1 Timoteo 4 - Nuevo Testamento Uwotjüja

Isopäi'ünä̧ jo̧kü̧ ttu̧wo̧juȩtinü̧ wȩnȩ

¹ Ja̧'wa̧nü̧ ja̧'a̧nä̧ Epíritumä̧ jueünä̧tä̧ pä'ü rüjí mo̧ro̧ päi'omȩnä̧ yotukunä̧mä̧ tta̧'kua̧ ttu̧wȩnä̧rü̧ kättädi'äkuȩmä̧, epíritu-tu̧ suropätü isopäi'ünä̧ jo̧kü̧ jittäu ä̧ju̧ku̧, ja̧'wa̧ta̧nü̧ epíritu-tu̧ suropätü ttu̧wo̧juȩtü̧ ttesetäkuȩmä̧.

² Yaparetü jȩpä̧tü̧rü̧tä̧ ja̧'wa̧ta̧nü̧ yaparewätürütä, dä'ärü̧jü̧'i̧nä̧ yoriso amükuädokotü wettütä jȩttä̧kuo̧tü̧.

³ Juätü ttü̧ja̧mä̧, ttirekuarü ttȩma̧ pä'ü'i̧nä̧ we'okotü ja̧'wa̧ta̧nü̧ Crito-rü esetätü isopäi'ünä̧ wȩnȩ wo̧juȩtä̧tü̧ Dio kuäkuäwä uwäbe'inü̧rü̧ eseu ttukua pä'ü'i̧nä̧ we'okotü ttäkuotü.

⁴ Ja̧'wa̧ta̧nü̧ o'kajuiyünä̧ Dio aditinü̧mä̧ adiwäjuei ja̧'a̧; Jua'atäku pi̧yȩmä̧ surojü pä'ü yatokuoka'a Dio-rü eseu tukuttümä̧.

⁵ Isopäi'ünä̧ Dio i̧wȩnȩmä̧ ja̧'wa̧ta̧nü̧ Dio-rü ukuokuäkuäwämä̧ surojümä̧ juiyünä̧tä̧ jȩa̧'a̧ttü̧.

⁶ Pi̧yȩ wȩnȩ tawaruwä tü̧jä̧wa̧tü̧rü̧ ku̧wo̧juȩtü̧ttü̧mä̧, Jesucrito adiwänä̧ u̧mü̧wä̧ya̧ jä̧kua̧, ttu̧mü̧wä̧ya̧ ta̧'kua̧ wȩnä̧rä̧kuä̧wä̧ wȩnȩttü̧ kku jü̧nä̧ ja̧'wa̧ta̧nü̧ adiwäjuei wo̧juȩkuä̧ i̧'chȩ'i̧jü̧nä̧.

⁷ Ja̧'wa̧nü̧ ja̧'a̧nä̧ täbokü jäwä, Dio-rü esetokotü, tta̧mü̧kuädü jui'ätü jittäumä̧ kuesetä. Ja̧u̧ ja̧jü̧jueimä̧, rȩrü̧jü̧ toäkuäwänä̧ yaboku juruwächi'i;

⁸ Pi̧yȩ wȩnȩ tawaruwä tü̧jä̧wa̧tü̧rü̧ ku̧wo̧juȩtü̧ttü̧mä̧, Jesucrito adiwänä̧ u̧mü̧wä̧ya̧ jä̧kua̧, ttu̧mü̧wä̧ya̧ ta̧'kua̧ wȩnä̧rä̧kuä̧wä̧ wȩnȩttü̧ kku jü̧nä̧ ja̧'wa̧ta̧nü̧ adiwäjuei wo̧juȩkuä̧ i̧'chȩ'i̧jü̧nä̧.

⁹ Pi̧yȩmä̧ isopäi'ünä̧ wȩnȩ. O'katoi'ünä̧ ttesetü'a̧nü̧ ja̧'a̧.

¹⁰ Ja̧'wa̧nü̧ jo̧mȩttü̧ yabokutä aditätüjä̧, ja̧'wa̧ta̧nü̧ ta̧'kua̧ tu̧wȩnä̧rü̧mä̧ Dio wa'ikuokünä̧tä̧ kka̧kua̧'a̧. Jua̧u̧mä̧ o'katoi'ünä̧rü̧ ra̧wä̧pi̧jü̧ttü̧ ttü̧ji̧pü̧nä̧ jȩpi̧nü̧. Ji̧nä̧somä̧ churutä esetätürü ppä'ädinü̧.

¹¹ Pi̧yȩ wȩnȩ wo̧juȩti̧, wo̧juȩtü̧mä̧ o'katoi'ünä̧rü̧ ttukuotä ji'äwi.

¹² Ya̧tȩ'i̧nä̧ mü̧ä̧ya̧ pä'ü kkü'kü jui'ü pättä'cha'anä̧mä̧ kuiyäwä; ja̧'wa̧nü̧ ja̧jü̧ jueimä̧ kukuokunä̧'i̧nä̧, jȩpü̧ku̧ju̧nä̧'i̧nä̧, eseu repekunä̧'i̧nä̧, kua̧'kua̧rü̧nä̧'i̧nä̧, kua̧'kua̧ ku̧wȩnä̧rü̧nä̧'i̧nä̧, ja̧'wa̧ta̧nü̧ surojü juiyünä̧tä̧ ku̧ju̧ta̧'a̧nü̧ Crito-rü esetätümä̧ jȩpü̧ ttü̧jä̧kua̧'a̧nü̧ jȩpü̧ kkä̧wi̧.

¹³ Do'ächü Chichäkua'a ä'kanä̧mä̧, wȩyu̧kuä̧ wȩnȩ o'katoi'ünä̧ ttä̧ju̧ku̧nä̧ ukuokui, kuawaruwä ku̧jä̧wo̧tü̧ eseu kättädi'ü juiyünä̧ wo̧juȩti̧.

¹⁴ Jȩ'ku̧'a̧nü̧ ukunä̧ kka̧ku̧nä̧mä̧ aditi, Dio ukuokuomȩnä̧, igresia-ttü a̧ci̧a̧nu̧ wotü kunä̧ mȩ'ü̧ ttukuokuomȩnä̧ Dio iyinü̧mä̧.

¹⁵ Pi̧yȩ wȩnȩ ji'äu aditütä kkä̧wi̧, o'katoi'ünä̧ kuäditäwä adiu kui̧'cha̧'a̧ tottäkua'anü̧.

¹⁶ Kua̧mü̧nä̧ pa̧ja̧tü̧'i̧nä̧ tta̧'a̧rä̧kuä̧wi̧ ja̧'wa̧ta̧nü̧ kkorotürü ku̧wo̧juȩtü̧mä̧ ttu̧'ȩpä̧rü̧nü̧ wo̧juȩti̧, o'kajuiyünä̧ adiwomȩnä̧tä̧ jȩpi̧. Ja̧'wa̧nü̧ jȩ'kuo̧mȩnä̧tä̧ ukutä'i̧nä̧, ku̧wo̧juȩtü̧ ä̧ju̧kuä̧tü̧'i̧nä̧ surojü jȩä̧kuä̧wä̧ttü̧mä̧ ttü̧ja̧kui̧'ä̧kuo̧tü̧.