1 Timoteo 3 - Nuevo Testamento Uwotjüja

¹ Pi̧yȩmä̧ isopäi'ünä̧tä̧ ja̧'a̧. Ya̧tȩ igresia-nä̧ Pató juoa pä'ümä̧, isopäi'ünä̧ adiu adita pä'ütä amükuädü.

A̧ci̧a̧nu̧tu̧ jȩtta̧ pä'ü jäepü wȩnȩ

² Ja̧'wa̧nü̧ ja̧'a̧ttü̧, pi̧yȩ aditäwä kku̧nä̧rü̧mä̧, surojü jȩpä̧'i̧jü̧ jü̧nä̧mä̧ pä'äwokü ja̧'a̧. Irekuarümä̧ yajuterütä u̧ju̧nä̧ra̧ pä'ü ja̧'a̧, idepä kkü'kekumä̧ o'kajuiyünä̧tä̧ tta̧wä̧rä̧kuä̧wa̧ pä'ü wa̧, ja̧'wa̧ta̧nü̧ jȩä̧kuȩ'i̧nä̧ todärenä̧ amükuäda pä'ü ja̧'a̧. Ojusodenä̧ ttü̧ja̧rü̧ doäda pä'ümä̧ 'kuäopünä̧tä̧ jo̧mȩnü̧ ü̧ja̧ pä'ü ja̧'a̧; ja̧'wa̧ta̧nü̧ u̧wo̧juȩta̧ pä'ü'i̧nä̧ jo̧mȩnü̧ wa̧;

³ Tä̧'ä̧mä̧'chü̧'i̧nä̧, rowäwä'chü'i̧nä̧ jȩü̧ juiyü'anü̧ ja̧'a̧, ja̧'wa̧nü̧ ja̧jü̧ jueimä̧ re kkä̧kuä̧wä̧ i̧sa̧tä̧, unichä̧rü̧ kkä̧nü̧tä̧ ja̧'wa̧ta̧nü̧ pärätä'i̧nä̧ a̧'kua̧ roeku juiyü'anü̧ ja̧'a̧.

⁴ Ojusode'i̧nä̧ adiu tta̧wä̧rä̧kuä̧wä̧ u̧wo̧jua̧'a̧nü̧ ja̧'a̧ ja̧'wa̧ta̧nü̧ i̧tti̧mü̧rü̧'i̧nä̧ ttukuotäkua'anü̧ u̧wo̧juȩtü̧'a̧nü̧ ja̧'a̧;

⁵ Isopäi'ünä̧ ya̧tȩ a̧mü̧nä̧ pa̧ja̧tü̧ ojusode'i̧nä̧ tta̧wä̧rä̧kuä̧wä̧ ieruwa'amä̧, ¿Tta̧'a̧nü̧ tta̧wä̧rä̧kua̧'a̧jä̧ttü̧ Dio i̧tti̧mü̧rü̧mä̧?

⁶ Ja̧'wa̧nü̧ ja̧'a̧ttü̧ jareünä̧ Dio-rü esetü ikumä̧ ttü̧ja̧rü̧mä̧ juȩpä̧rü̧ juiya'anü̧ ja̧'a̧, ja̧'wa̧nü̧ jü̧ttü̧mä̧ chutä a̧mü̧nä̧ ukuo kku̧nä̧u̧ äwettä ma̧ä̧chi̧no̧mȩ okurära̧'a̧ ma̧ä̧cha̧'a̧ku̧.

⁷ Ja̧'wa̧ta̧nü̧ ttü̧ja̧ Dio-rü esetokotü'i̧nä̧ ttukuotäkuttü, dä'ä ttuäwänä̧'i̧nä̧, kkoro äwettä kka̧kuä̧mȩ'ü̧ toünä̧'i̧nä̧ ma̧ä̧chü̧ juiyäkua'anü̧.

Diákunu̧tu̧ jȩtta̧ pä'ü jaepü wȩnȩ

⁸ Ja̧'wa̧ta̧nü̧, Diákunu̧ wotümä̧ ttukuotä̧u̧tä̧ ja̧'a̧, pättümä̧ isopäi'ünä̧tä̧ ukuokuätü, tä̧'ä̧mä̧'cho̧ko̧tü̧, pärätä ttȩma̧ pä'ü'i̧nä̧ tta̧'kua̧ ro'ekuokotü.

⁹ Kkoromä̧ 'kuäopünä̧tä̧ Dio i̧wȩnȩ jareü wȩnȩ iyinü̧mä̧ o'kajuiyünä̧tä̧ tteseta pä'ü ja̧'a̧, ja̧'wa̧ta̧nü̧ tta̧mü̧kuädünä̧mä̧ surojü tta̧mü̧kuädoka'a kkä̧nü̧tä̧.

¹⁰ Ä̧kuo̧mȩnä̧mä̧ kka̧kuä̧mȩ'ü̧ toä'chäkuäwänä 'kuättopa pä'ü ja̧'a̧, ja̧'wa̧nü̧ jo̧mȩnä̧ suronä̧ päwä juätü juittüttütä jä̧kua̧'a̧ Diákunu̧ jü̧nä̧ ttadita pä'ümä̧.

¹¹ Ja̧'wa̧ta̧nü̧, nä̧tü̧'i̧nä̧ ttukuotä̧u̧tä̧ jä̧kua̧'a̧, suräjuei wȩnȩ'i̧nä̧ ukuokuokotütä, ttukuokuajueimä̧ tta̧'kua̧pu̧nü̧ kkä̧nü̧, o'kajuiyünä̧ ukuotätütä.

¹² Ya̧tȩ Diákunu̧mä̧ irekuarümä̧ yajuterutä ü̧ja̧ pä'ü ja̧'a̧, ja̧'wa̧ta̧nü̧ i̧tti̧mü̧rü̧'i̧nä̧, chutä a̧mü̧nä̧ ojusode'i̧nä̧ weäwä wo̧jua̧.

¹³ Isopäi'ünä̧ Diákunu̧tu̧ ttaditäwä adiu aditätümä̧, ttukuo ttu̧ju̧nä̧rä̧kuo̧tü̧, unichä̧rü̧ kka̧ku̧ tteseäkuäwäkuotü ja̧'wa̧ta̧nü̧ Jesucrito-rü esetinä̧tü̧'i̧nä̧ tta̧'kua̧ ttu̧wȩnä̧rä̧kuo̧tü̧.

Tesetinü̧mä̧ Jesucrito-nä̧ i̧jȩkuä̧chi̧na̧'a̧

¹⁴ A̧'u̧kua̧'a̧tä̧ jü̧ o'ka'a ukuru do'ächü chicha pä̧wä̧rü̧jä̧ku̧sä̧; Ja̧'wa̧nü̧ ja̧'a̧nä̧ pi̧yȩ wȩyu̧tu̧ wedäkujä̧,

¹⁵ Rekuo mo̧ro̧ todeputtü'i̧nä̧, Dio 'kuäopünä̧ kkü̧ umüwäyotü igresia wotürü adiu juekuȩpä̧rä̧kua̧'a̧nü̧. 'Chu̧'ä̧rä̧kuä̧u̧ ja̧'wa̧ta̧nü̧ isopäi'ünä̧ wȩnȩ ja̧'a̧ pä'ätümä̧.

¹⁶ Jeruwoka'a ttesetinü̧ttü̧mä̧ isopäi'ünä̧ jü̧ i̧jȩkuä̧chü̧mä̧ ji̧yȩtȩ rü̧ä̧u̧ jäwä ja̧'a̧: Crito-mä̧, pi̧jä̧ra̧'a̧ ichümä̧ ttü̧ja̧sa̧ jü̧nä̧tä̧ ichinü̧, Epíritu ji̧na̧'a̧ surojümä̧ jui̧'a̧ pä'ü ji'äwinü̧mä̧ Ja̧'wa̧ta̧nü̧ á̧gȩrȩ'i̧nä̧ tottinä̧ku̧. Ruwäkuiyä pa̧ja̧ku̧nä̧ i̧wȩnȩ jittäwomȩnä̧ Pi̧jä̧ ttü̧ja̧mä̧ esetinä̧tü̧, ja̧'wa̧ta̧nü̧ mo̧ro̧jä̧ra̧'a̧ kä'ekuächinü̧.