1 Timoteo 2 - Nuevo Testamento Uwotjüja

O'katoi'ünä̧rü̧ Dio-rü ttukuokua pä'ü we'inü̧

¹ Kkorottü abonä̧nü̧ ä̧kuo̧mȩnä̧mä̧, rekuä rü̧jü̧ jä'epätukui, Juȩnȩ o'komenä̧tä̧ pi̧jä̧ ttü̧ja̧ o'katoi'ünä̧rü̧ ppädäji eseu ukuokuätukuirü.

² Dio-rü ukuokuätukui, Pi̧jä̧nä̧ we'ätürü, Jua'atäku ukuo ruwotü o'katoi'ünä̧rü̧. Jua'amä̧ eseunu̧ unichä̧rü̧ kkä̧nü̧ rȩrü̧jü̧ topü ukuotünü̧ tü̧ja̧kuä̧kua̧'a̧nü̧,

³ Pi̧yȩmä̧ adiwäjuei. Ja̧u̧ ja̧'a̧ tü̧ä̧nä̧wa̧ Dio-rü ra̧wä̧pi̧jü̧ttü̧ tü̧ji̧pü̧nä̧ ppä'ädinü̧rü̧ pä̧wä̧rü̧jü̧mä̧,

⁴ Ja̧'wa̧ta̧nü̧ jua̧u̧mä̧ o'katoi'ünä̧ ra̧wä̧pi̧jü̧ttü̧ kka̧kui̧pü̧ isopäi'ünä̧ wȩnȩ ttu̧wo̧juä̧chi̧'o̧mȩbü päi'ünä̧ tti̧rȩbȩwa̧ pä̧wä̧rü̧jä̧ku̧.

⁵ Ja̧'wa̧ta̧nü̧ Dio-ttü abonä̧nü̧ wa̧mä̧ toa'a, ya̧tȩtä̧ ja̧'a̧ ttü̧ja̧ Dio kkü̧ ttütodeunä̧ jȩpü̧mä̧: Jesucrito-tä ja̧'a̧

⁶ Ja̧'wa̧ta̧nü̧ jua̧u̧mä̧ wa'arera̧'a̧ iyäwinü̧, o'katoi'ünä̧ pi̧jä̧ ttü̧ja̧ ra̧wä̧pi̧jü̧ttü̧ ttü̧ji̧pa̧ pä'ümä̧ Jua'atäku chutä ütü'kü ji'äkuäwinü̧ u̧mo̧ro̧ mo̧ro̧ päi'omȩnä̧.

⁷ Pi̧yȩ jidäwa pä'ü, apóto pä'ü'i̧nä̧, jiäkuäwä i̧sa̧ pä'ü'i̧nä̧, o̧ä̧wa̧sä̧, chäditäwämä̧ Judío pokotürü isopäi'ünä̧ wȩnȩ tta̧'kua̧ wȩnä̧rä̧kuä̧wä̧ tü'kü jidäwa pä'ü ja̧'a̧, yaparewoküsä, Pi̧yȩ jidäumä̧ isopäi'ünä̧ ja̧'a̧.

U̧mä̧tü̧'i̧nä̧ nä̧tü̧'i̧nä̧ jȩtta̧ pä'ü weäwi'inü̧ wȩnȩ

⁸ Ja̧'wa̧nü̧ ja̧'a̧ttü̧, u̧mä̧tü̧mä̧ ttü̧ja̧kuo̧mȩ pünä̧ tta̧mi̧so'kinä̧ surojü juiyünä̧, ttü̧ra̧wä̧ro̧ka̧'a̧, pättä'chäkuäwoka'a, ttu̧mü̧ kä'epü Dio-rü ttukuokua pä̧wä̧rü̧jä̧ku̧sä̧.

⁹ Ja̧'wa̧ta̧nü̧ nä̧tü̧'i̧nä̧ adiwomȩnä̧ 'ka̧tä̧wä̧tu̧kui̧, adiwäjuei jo̧kü̧ttü̧, oro jo̧kü̧ttü̧, pü̧jä̧ta̧'i̧nä̧ rü̧ȩnä̧ mikuäwo̧ko̧ta̧ttü̧, abo 'kuäo'ünä̧ sa̧ȩkuä̧kuä̧wä̧ juiyünä̧ ttü̧'ka̧tä̧wa̧ pä̧wä̧rü̧jä̧ku̧sä̧,

¹⁰ adiwomȩnä̧ tta̧di̧kuä̧rü̧mä̧ kkorotürü äräbe'ünä̧, nä̧tü̧ Dio-rü ttukuota pä'ätü ttü̧ja̧ku̧ta̧'a̧nü̧ pätekuächäkua'a.

¹¹ Isajumä̧, ttu̧wo̧juȩtü̧mä̧ 'korunä̧tä̧ ukuotünü̧ kkä̧ju̧kua̧'a̧nü̧ ja̧'a̧;

¹² Ja̧'wa̧ta̧nü̧ Isaju ttü̧ja̧ ttä'ka jo̧mȩ kkä̧mä̧dü̧ kku̧wo̧juȩta̧ pä'ümä̧, Jua'atäku Uborü weja pä'ümä̧ kkü'koküsä 'korujuenä̧tä̧ kkü̧ja̧ pä̧wä̧rü̧jä̧ku̧sä̧,

¹³ Ja̧'wa̧ta̧nü̧ Dio-mä̧ ä̧kuo̧mȩnä̧mä̧ Adá̧-rü̧ aditinü̧, Juȩnȩ o'komenä̧tä̧ Ewa-rümä̧ aditinü̧;

¹⁴ Adá̧-mä̧ äwettämä̧ üyaparewokoku pinü̧, jua̧u̧ru̧ ja̧jü̧jueimä̧ isajurutä yapare jiäwinü̧; jua̧u̧ru̧ kkesetino̧mȩttü̧, surojünä̧ jȩä̧kuä̧wä̧nä̧ ma̧'ä̧chi̧nä̧ju̧.

¹⁵ Ja̧'wa̧nü̧ ja̧'a̧nä̧ isaju i̧tti̧mü̧kua̧ju̧ jȩja̧ pä'ü weäwi'inü̧ ukuotü, ttütäbotü esetü, kka̧'kua̧ wȩnä̧rü̧, kkawaruwärü repeü, surojü jȩjä̧'chü̧ juiyüttütä kkü̧ji̧pä̧kuo̧ju̧.