1 Tesalonicenses 5 - Nuevo Testamento Uwotjüja

¹ Ja̧'wa̧nü̧ ja̧'a̧nä̧ chawaruwä chi̧jä̧wa̧tü̧, pi̧yȩ 'kuäopä̧kuȩ mo̧ro̧'i̧nä̧, jidäwätukuaku pä'ümä̧ rekuä rü̧jo̧ko̧u̧jä̧.

² Isopäi'ünä̧ ukutumä̧ jo̧mȩnü̧tä̧ wo̧juä̧tü̧jä̧. Tu̧ru̧wa̧mä̧ tta̧tä̧ro̧kü̧ mo̧ro̧, yodó nä̧u̧kuä̧rä̧kuä̧wä̧ i̧sa̧ jä̧'i̧nü̧'a̧nü̧ i̧chä̧kua̧ pä'ümä̧;

³ Ttü̧ja̧: «wȩnȩmä̧ juiya'a, ra̧wä̧pi̧jü̧'i̧nä̧ juiya'a» pättomȩnä̧. Yotäku juätürümä̧ wa'are ichäkua'a, muchajuru kku̧ma̧du̧ba̧ barawächi'a'a jä̧'i̧nü̧'a̧nü̧. Ja̧'wa̧nü̧ ja̧'a̧ttü̧ jua̧u̧ttü̧mä̧ kka̧kui̧po̧ko̧tü̧ ttäkuotü.

⁴ Ja̧'wa̧nü̧ ja̧'a̧nä̧ chawaruwä chi̧jä̧wa̧tü̧ ukutumä̧, yo̧ü̧nä̧mä̧ kka̧kuo̧ko̧tü̧jä̧, ja̧'wa̧nü̧ jü̧ttü̧tä̧ yodó nä̧u̧kuä̧rä̧kuä̧wä̧ i̧sa̧ jä'i̧nü̧'a̧nü̧ ku̧ni̧chä̧rä̧tu̧kua̧'a̧nä̧ i̧cha̧ja̧u̧jä̧.

⁵ Isopäi'ünä̧ ukutumä̧ o'katoi'ünä̧ tȩya̧u̧, mo̧ro̧ jäwä i̧tti̧mü̧jä̧; yodomä̧, yo̧ü̧mä̧ i̧tti̧mü̧mä̧kü̧jä̧.

⁶ Ja̧'wa̧nü̧ ja̧'a̧ttü̧, kkorotü jü̧'a̧nü̧mä̧ tä'eku juiyätukua. Pärokua'akutä, tta̧'a̧rä̧kuä̧u̧, ttu̧'ȩpä̧rü̧nü̧ to̧tä̧rä̧tu̧kua̧.

⁷ Isopäi'ünä̧ ä'ekuätümä̧ yodó ä'ekuätü ja̧'wa̧ta̧nü̧ tä̧'ä̧mä̧kuä̧wä̧tü̧mä̧, yodó tä̧'ä̧mä̧kuä̧wä̧tü̧.

⁸ Ja̧'wa̧nü̧ ja̧'a̧nä̧, ujutu mo̧ro̧ isotümä̧, amükuä̧rü̧nü̧ tü̧ja̧kuä̧tu̧kua̧; eseäkuäwä'i̧nä̧, tta̧'kua̧ wȩnä̧rä̧kuä̧wä̧'i̧nä̧ 'ka̧tä̧wi̧'ü̧, surojüttü kki̧'ä̧kuä̧wä̧ tta̧'ä̧rü̧nü̧, isätta 'kiyätta ttü̧'ka̧tä̧wi̧'a̧'a̧ 'kua̧rü̧nä̧.

⁹ Isopäi'ünä̧ Dio-mä̧ usurä tȩmä̧u̧nä̧ ro̧ȩpa̧tü̧ pä'ümä̧ i'ätȩto̧ko̧u̧ pinä̧tü̧jä̧. Tu̧ru̧wa̧ Jesucrito-nä̧, ra̧wä̧pi̧jü̧ttü̧ kki̧'i̧kuä̧tä̧ tȩma̧ päinä̧u̧jä̧.

¹⁰ Jesucrito-tä ji̧na̧'a̧ ujutu jäwänä̧ 'korujuo'ächinü̧mä̧, 'korujuotächaja pä'ü'i̧nä̧, ta̧'kua̧ra̧ja̧ pä'ü'i̧nä̧, chutäku tü̧ja̧kua̧ pä'ü.

¹¹ Ja̧'wa̧nü̧ ja̧'a̧ttü̧, yotükupünä̧ esewächi'ätukui, yabonü̧ kujuru ȩmä̧tu̧kui̧, täkü jȩ'kuä̧tu̧ku̧ta̧'a̧nü̧.

Rüjínä̧ weinü̧ wȩnȩ

¹² Chawaruwä chi̧jä̧wa̧tü̧, ukutuku aditü, igresia-nä̧ Tu̧ru̧wa̧ jäwä ji'äu o'ipätürü ukuotätukui.

¹³ Ja̧'wa̧nü̧ ttadita'attü̧ eseunu̧ ukuotätukuitü. Wȩnȩ juiyünä̧ kka̧kuä̧tu̧kui̧ ukutumä̧.

¹⁴ Ja̧'wa̧ta̧nü̧ jä̧tȩpä̧u̧jä̧, chawaruwä chi̧jä̧wa̧tü̧, ütäwätürü jikuäwätukua pä'ü'i̧nä̧, 'kuä'ächi'inä̧tü̧rü̧ ttujuru ichi'ünä̧ jikuäwätukua pä'ü'i̧nä̧, juiyupätürü ppäkuädätukua pä'ü'i̧nä̧, o'katoi'ünä̧rü̧ kua̧mi̧ 'kikuächi'ätukua pä'ü'i̧nä̧, jü̧nä̧.

¹⁵ Ya̧tȩ suronä̧ jȩo̧mȩnä̧, pärokua'aku suronä̧ jȩa̧'a̧nä̧ ja̧'a̧tä̧ to'kuätukuä. Pärokua'aku adiutätä jȩpä̧tu̧kui̧, kkorotürü'i̧nä̧, o'katoi'ünä̧ku̧tä̧.

¹⁶ 'Kuäopünä̧ eseutä kka̧kuä̧tu̧kui̧.

¹⁷ 'Kuäopünä̧ Dio-rü ukuokuätukui.

¹⁸ Jü̧mä̧ o'kajuiyünä̧ Dio-rü esewätukui. Isopäi'ünä̧ jua̧u̧ ja̧'a̧ Dio-rü pä̧wä̧rü̧jü̧mä̧, Crito Jesú-ru kuesetinä̧tu̧kua̧'a̧ttü̧.

¹⁹ Epíritu Sa̧tu̧rü̧ na̧'ȩpü̧ kuikuätukuä.

²⁰ Dio i̧wȩnȩ (jä̧kuȩ wȩnȩ) jittäwomȩnä̧ esetätukui.

²¹ Kka̧kuä̧mü̧ topü adiwä jueitä jȩpä̧tu̧kui̧.

²² Surojümä̧ o'kajuiyütä mȩkuä̧tu̧kuä̧.

²³ Chutä Dio-tätä, wȩnȩ juiyünä̧ kkä̧kuä̧wä̧ iyütä, jo̧mȩnü̧ surojümä̧ jȩpü̧ ikuätukuäku; ja̧'wa̧ta̧nü̧ o'kajuiyütä kua̧'kua̧rä̧tu̧ku̧mä̧, kua̧'kua̧ru̧wa̧tu̧ku̧'i̧nä̧, kuidepä jättäji'i̧nä̧ Tu̧ru̧wa̧ Jesucrito ichomȩbü päi'ünä̧ surojümä̧ juiyünä̧ tta̧'ä̧rä̧kuä̧wä̧tu̧kui̧.

²⁴ Ukuturu wopinü̧mä̧, jȩa̧ päinü̧mä̧ jȩä̧kua̧, jueünä̧tä̧ ukuoku ja̧'a̧ttü̧.

²⁵ Chawaruwä chi̧jä̧wa̧tü̧, ujuturu'i̧nä̧ Dio-rü ukuokuätukui.

²⁶ O'katoi'ünä̧ tawaruwä tü̧jä̧wa̧tü̧rü̧mä̧, adiunä̧tä̧ 'chu̧'o̧pü̧nü̧ te'äwätukui.

²⁷ Tu̧ru̧wa̧ i̧mi̧nä̧ ukuturu jä'epüsä, pi̧yȩ chi̧wȩyu̧tu̧mä̧ o'katoi'ünä̧rü̧ tawaruwä tti̧jä̧wa̧tü̧rü̧mä̧, kukuokuiyätukuatü pä'ü.

²⁸ Tu̧ru̧wa̧ Jesucrito mippoünä̧ iyümä̧, ukutunä̧ kka̧ pä'üsä. Amȩ́.