1 Tesalonicenses 4 - Nuevo Testamento Uwotjüja

Dio esewomenä̧ kkä̧kuä̧wä̧ wȩnȩ

¹ Ja̧'wa̧ta̧nü̧ chawaruwä chi̧jä̧wa̧tü̧ kkoro päi'ünä̧ ukuturu Tu̧ru̧wa̧ Jesucrito i̧mi̧nä̧ jätepümä̧. Ujututtü ku̧wo̧jui̧'i̧nä̧tu̧ku̧'a̧kuä̧, Dio-rü pä̧wä̧rü̧jo̧mȩnä̧ ku̧ja̧kuä̧tu̧kua̧ pä'ätüjä̧, jitä jȩpü̧ ku̧ja̧kuä̧tu̧ku̧ta̧'a̧nü̧.

² Tu̧ru̧wa̧ Jesucrito weäwänä̧, ukutu jȩpü̧ ku̧ja̧kuä̧tu̧kua̧ pä'ü jitäwinü̧mä̧ wo̧juä̧tü̧jä̧.

³ Isopäi'ünä̧ Dio-rü pä̧wä̧rü̧jo̧mȩnä̧ kkä̧kuä̧wä̧mä̧: surojü juiyüku juoächäkuäwä ja̧'a̧, tti̧rȩkua̧mü̧ pokotüku jȩä̧'chä̧kuä̧wä̧ttü̧ 'kȩi̧pä̧chä̧kuä̧wä̧ ja̧'a̧,

⁴ ja̧'wa̧ta̧nü̧ ya̧ku̧nä̧ kuirekuatukuru ukuotünü̧ tta̧'a̧rä̧tu̧kui̧,

⁵ Dio-rü jerupätü 'kua̧rü̧nä̧mä̧, nä̧tü̧rü̧'i̧nä̧, u̧mä̧tü̧rü̧'i̧nä̧ usäwä oipa'anä̧mä̧ ku̧jä̧tu̧kuä̧.

⁶ Kuawaruwä kui̧jä̧wa̧tü̧rü̧mä̧ kuyaparewätukuä; jitäwä'ijüta'anü̧ Tu̧ru̧wa̧ Dio-mä̧ rü̧ȩnä̧ usurä ttȩmä̧u̧nä̧ ro̧ȩpä̧kua̧ ja̧'wa̧nü̧ jȩpä̧tü̧rü̧mä̧.

⁷ Isopäi'ünä̧ Dio-mä̧ surojü jȩpü̧ tü̧ja̧kua̧ pä'ümä̧ wooko̧u̧ pinä̧tü̧jä̧, surojü kätädächa pä'ü woinä̧u̧jä̧.

⁸ Ja̧'wa̧nü̧ ja̧'a̧ttü̧, pi̧yȩ kkü'kokümä̧, ttü̧ja̧sa̧rü̧mä̧ ya'okuokü; Dio-rütä ya'oku, Epíritu Sa̧tu̧rü̧ iyinü̧rü̧.

⁹ Ttawaruwärü eseu repeäkuäwä tü'kü chi̧wȩyu̧ta̧ pä'ümä̧ rekuä rü̧jo̧ka̧'a̧, jua'amä̧, Chuttutä Dio-ttü ku̧wo̧jui̧'i̧nä̧tu̧kua̧'a̧ttü̧ ttawaruwärü eseu repeäkuäwämä̧.

¹⁰ Isopäi'ünä̧ ukutumä̧ ja̧'wa̧nü̧tä̧ jȩpä̧tü̧jä̧ Macedonia rȩjȩnä̧ kka̧kuä̧tü̧ Dio-rü esetinä̧tü̧ o'katoi'ünä̧rü̧mä̧. Ja̧'wa̧nü̧ ja̧'a̧ttü̧, ukuturu yabonü̧ ppäkuädätukua pä'ü jä'epätüjä̧.

¹¹ Ttu̧wȩkuä̧nä̧ kka̧kuä̧tu̧kui̧, ukutu jäwä kuaditäwätuku ku̧mü̧tu̧ku̧nä̧ aditütä, ujutu tu̧wo̧juȩti̧nü̧'a̧kuä̧,

¹² Ja̧'wa̧nü̧ jȩ'kuä̧tu̧kuo̧mȩnä̧ Dio-rü esetokotü ttukuotäkuotü. Ukututä'i̧nä̧ rekuä rü̧jü̧ juiyomȩnä̧ kkä̧nü̧ jä̧'ȩpä̧ro̧ko̧tü̧ kuäkuotüjä̧.

Pä'äjita'anü̧ Tu̧ru̧wa̧ i̧chä̧kuȩ wȩnȩ

¹³ Ja̧'wa̧ta̧nü̧ chawaruwä chi̧jä̧wa̧tü̧, 'korujuo'ächinä̧tü̧ ttütü'kümä̧ kuieruwätukuamä̧ pä'okotüjä̧. Kuieruwätukuttümä̧ kua̧'kua̧ tta̧kuȩkuä̧kuo̧tü̧jä̧, tta̧wä̧räkuä̧wä̧ wȩnȩ jui'ätü 'kua̧rü̧nä̧tä̧.

¹⁴ Isopäi'ünä̧ Jesucrito-mä̧ 'korujuo'ächäji̧'ka̧mä̧, tto'ächinü̧ pä'ü tesetüttümä̧. Dio-mä̧ ja̧'wa̧ta̧nü̧ tto̧ä̧dä̧kua̧ Jesú-ru esetü kkä̧nü̧ 'korujuo'ächinä̧tü̧rü̧mä̧.

¹⁵ Ja̧'wa̧nü̧ ja̧'a̧ttü̧ Tu̧ru̧wa̧ Jesú päinü̧, ukuturu pä'ätüjä̧: Isopäi'ünä̧ ujutu a̧'kua̧rä̧tü̧mä̧, Tu̧ru̧wa̧ ichomȩbü päi'ünä̧ kka̧kui̧pi̧nä̧tü̧mä̧ Tu̧ru̧wa̧ku̧ tü̧ka̧ka̧kui̧'ä̧kuo̧tü̧jä̧; 'korujuo'ächinä̧tü̧ Tu̧ru̧wa̧ku̧ ttü̧ka̧ka̧kui̧'ü̧ o'komȩnä̧.

¹⁶ Chutä Tu̧ru̧wa̧tä̧ mo̧ro̧jä̧ra̧'a̧ttü̧ i̧wȩnȩku̧ we'ünü̧, Á̧gȩrȩ-tü̧ ttu̧ru̧wa̧ i̧wȩnȩku̧ ja̧'wa̧ta̧nü̧ Dio we'äwotü ttiäre trompeta rä̧mi̧pü̧nä̧ i̧mȩyȩwä̧kua̧. Ja̧'wa̧nü̧ päi'omȩnä̧, Crito-nä̧ 'korujuo'ächinä̧tü̧mä̧, ä̧kuo̧mȩnä̧ ttottächipäkuotü;

¹⁷ Ja̧'wa̧nü̧ päi'ü o'ka'a, ujutu kka̧kui̧pi̧nä̧tü̧mä̧, a̧'kua̧rä̧tü̧mä̧ ajiya isoppanä̧, juätütäku kätekuächäkuotüjä̧, juorü Tu̧ru̧wa̧rü̧ icha'a tota pä'ümä̧. Jua̧u̧nu̧tä̧ kkä̧mä̧dü̧ Tu̧ru̧wa̧ku̧ 'kuäopünä̧ tü̧jä̧kuo̧tü̧jä̧.

¹⁸ Ja̧'wa̧nü̧ ja̧'a̧ttü̧, pi̧yȩ ji'äkuäu, kuawaruwärümä̧ eseäkuäwätukui.