1 Tesalonicenses 3 - Nuevo Testamento Uwotjüja

Timoteo-rü weinü̧ wȩnȩ

¹ Ja̧'wa̧nü̧ ja̧'a̧ttü̧, ukuturu tota pä'ü ta̧mu̧kuä̧rü̧nä̧ jä̧u̧ Atenas ütawiyänä̧tä̧ tü̧ja̧kui̧'a̧ pä'ü amükuäjä'kotü, kka̧kui̧pi̧nä̧tü̧jä̧.

² Ja̧'wa̧nü̧ jä̧u̧, ta̧wa̧ru̧wa̧ ti̧jä̧wa̧ Dio i̧wȩnȩ, Crito i̧wȩnȩ jareü wȩnȩ jiäkuäwä ppä'ädä̧ri̧'i̧jü̧, Timoteo-rütä, ukuturu we'ätüjä̧ ppädätukuaku pä'ü.

³ Surojü 'kuäopomȩnä̧, kua̧'kua̧ ku̧wȩnä̧rä̧'i̧jä̧tu̧ku̧ kuijuiyuwächi'ätuku juiya pä'ü. Ujutumä̧, iweye jua̧u̧mä̧ 'kuätopü pä'ü, ku̧wo̧juä̧tu̧kua̧ pä'ü.

⁴ Ji̧nä̧ ukututäku tü̧ja̧kuä̧i̧, jitäwinä̧u̧jä̧, rü̧ȩnä̧ usurä tȩmä̧wä̧kuo̧tü̧jä̧ pä'ü. Jitäwinü̧tä̧ ja̧'a̧, ukutu 'kuäkuopätukumä̧, ku̧wo̧juä̧tu̧ku̧tä̧.

⁵ Ja̧'wa̧nü̧ ja̧'a̧ttü̧, ukuturu toku tta̧'kua̧ wȩnä̧rü̧ ttü̧ja̧kua̧ja̧ pä'ü chu̧wo̧jua̧ pä̧wä̧rü̧jä̧ku̧, Timoteo-rü jiäwattü pä'ü we'inü̧sä̧. Jua'amä̧ äwettämä̧, täkü ma̧ttä̧chü̧nä̧ jȩi̧nä̧u̧ku̧ pä'ü amükuädü, yapare taditina̧'a̧ tä̧jí̧ pä'inü̧sä̧.

⁶ Ja̧'wa̧nü̧ ji̧na̧'a̧nä̧, jitämä̧ Timoteo-mä̧ jua'a Tesalónica-ra̧'a̧ttü̧ ppa̧'ä̧chi̧'ä̧ji̧'ka̧mä̧, eseku ku̧jä̧tu̧ku̧tä̧, Dio-rü kua̧'kua̧ ku̧wȩnä̧rä̧tu̧ku̧tä̧, ukuturu ujutu tota pätüta'anü̧, ukutu ujuturu to'kuätukua päkuätukutä jiäwäjä̧u̧jä̧.

⁷ Ja̧'wa̧nü̧ kua̧'kua̧ ku̧wȩnä̧rä̧tu̧kua̧'a̧ jiäwomȩnä̧, rü̧ȩnä̧ usurä ȩmä̧u̧ ta̧'kua̧ tta̧'ȩku̧ tajuäkuäwa'anä̧, ta̧'kua̧ tȩmü̧nä̧ päi'ä̧jä̧u̧jä̧.

⁸ Ja̧'wa̧nü̧ Tu̧ru̧wa̧rü̧ kua̧'kua̧ ku̧wȩnä̧rä̧tu̧ tä̧ju̧kuo̧mȩnä̧mä̧, pä'äjita'anü̧ tesewä̧rü̧nä̧ jä̧u̧jä̧.

⁹ Ja̧'wa̧nü̧ ja̧'a̧mä̧ ¿Däjenä̧tä̧ tesewäkua'ajä̧ttü̧ Tä'o Dio-rümä̧ ukutu, teseunä̧ ku̧jä̧tu̧kua̧'a̧mä̧?

¹⁰ Mo̧ro̧ ji̧nü̧'a̧kuä̧, yodoji̧nü̧a̧'a̧kuä̧ jä'epätüjä̧ Dio-rümä̧, ukuturu tota pä'ümä̧, jua'a yaboku Jua̧u̧ru̧ jo̧mȩnü̧ kua̧'kua̧ ku̧wȩnä̧rä̧tu̧ku̧nä̧ tu̧wo̧juȩti̧'ä̧tu̧kua̧ku̧ pä'ü.

Pauru'i̧nä̧, awaruwä'i̧nä̧ Dio-rü ttukuokuinü̧ wȩnȩ

¹¹ Ja̧'wa̧nü̧ ja̧'a̧ttü̧, Chutä Tä'o Dio-tä ja̧'wa̧ta̧nü̧ Tu̧ru̧wa̧ Jesucrito-tä ppä̧dä̧kuä̧u̧jä̧ jua'a ukuturu totächa pä'ümä̧.

¹² Ja̧'wa̧ta̧nü̧ Tu̧ru̧wa̧tä̧ ku'uttächätukunä̧, o'katoi'ünä̧ku̧ kuesewätukunä̧ ppädätukuaku pä'ü jä'epätüjä̧ Tu̧ru̧wa̧rü̧mä̧, pärokua'aku ukuturu tesewuöta'anü̧.

¹³ Ja̧'wa̧ta̧nü̧ Tu̧ru̧wa̧rü̧ jä'epätüjä̧, Chutätä rü̧ȩnä̧ kua̧'kua̧ ku̧wȩnä̧rä̧tu̧ku̧nä̧, surojü juiyünä̧ kujurutuku iyätukuaku pä'ü. Ja̧'wa̧nü̧ jo̧mȩnä̧ chutä pojopü ȩmi̧nä̧u̧ku̧ ichomȩnä̧ Dio ä'ka jo̧mȩttü̧ ukuturu, jitüjamä̧ suropätü pä'ü jittäu juiyäkua'anü̧. Amȩ́.