1 Tesalonicenses 2 - Nuevo Testamento Uwotjüja

Ppa̧'a̧dü̧ jiäwinü̧ wȩnȩ

¹ Chawaruwä chi̧jä̧wa̧tü̧ ukututä wo̧juä̧tü̧jä̧, ukuturu do'ächü ti̧wä̧chi̧na̧'a̧mä̧, ja̧'a̧tä̧tä̧mä̧ do'ächü ti̧wä̧cho̧ka̧'a̧ ji̧na̧'a̧ttü̧.

² Ja̧'wa̧ta̧nü̧ wo̧juä̧tü̧jä̧ Filipo ütawiyä ttü̧ja̧ ujuturu suronä̧ wopü kkä̧nü̧ suronä̧ jȩtti̧nü̧mä̧. Ja̧'wa̧nü̧ rü̧ȩnä̧ suroja'anä̧'i̧nä̧, Dio-mä̧ tujuru iyinä̧u̧jä̧ jareü wȩnȩ jitäwa pä'ümä̧.

³ Ujutu jitäumä̧ jäyä jäwämä̧ jo̧ka̧'a̧ ja̧'wa̧ta̧nü̧ surojükumä̧ wiwawoka'a ja̧'wa̧ta̧nü̧ yaparetü'i̧nä̧ ji'äwokotüjä̧.

⁴ Pärokua'aku Dio-mä̧ jȩtü̧'a̧nü̧ ji̧yä̧ku̧ jareü wȩnȩmä̧ jitäwa pä'ü weinä̧u̧jä̧, ja̧'wa̧nü̧ ja̧'a̧ttü̧ ja̧'wa̧nü̧tä̧ ukuokuätüjä̧. Jua'amä̧ ttü̧ja̧ ttesewatü pä'ümä̧kü̧, Dio-tä esewätü pä'ü ja̧'a̧, tami'iso'ki kka̧kuä̧mü̧ topü ja̧'a̧ttü̧.

⁵ Ujutumä̧ ukutu kuesetätukuatü pä'ümä̧, ti̧wȩnȩmä̧ a̧'kua̧tü̧mä̧ ukuokuokotüjä̧ ja̧'wa̧ta̧nü̧ pärätä ja̧'a̧tȩ'ü̧mä̧ yaparetümä̧ jitäwo̧ko̧u̧jä̧. Dio topü ja̧'a̧ttü̧ wo̧jua̧ pi̧yȩ yapare pädoka'amä̧.

⁶ Ukuturu'i̧nä̧, kkorotürü'i̧nä̧, ttü̧ja̧ ttukuotatü pä'ümä̧ usokotüjä̧.

⁷ Jua'akumä̧, Crito we'äwotü apótore ta'attü̧ ukuturumä̧ jätepü'anü̧ ja̧'a̧nä̧, jȩpo̧ko̧tü̧jä̧, pärokua'aku ttu̧wȩkuä̧nä̧ eseunü̧tä̧ jȩti̧nä̧u̧jä̧. Yajute tta̧ju̧ kki̧tti̧mü̧rü̧ tta̧'ä̧rü̧, atate ajü kku'uttädajü'a̧nü̧tä̧.

⁸ Ukuturu rü̧ȩnä̧ repetächina̧'a̧mä̧, suro jareü wȩnȩ Dio i̧wȩnȩtä̧mä̧ tiya pätoko̧u̧jä̧, ta̧'kua̧rü̧'i̧nä̧ tiyü'anü̧ wotüjä̧ ukutunä̧mä̧. ¡Isopäi'ünä̧ ukuturu rü̧ȩnä̧ repetächina̧'a̧ttü̧!

⁹ Chawaruwä chi̧jä̧wa̧tü̧ ukutu kuamükuädätukuttümä̧ wo̧juä̧tü̧jä̧, ujutu taditinü̧'i̧nä̧, usurä tȩmä̧wi̧nü̧'i̧nä̧, jü̧nä̧. Mo̧ro̧'i̧nä̧, yodo'i̧nä̧, aditinä̧tü̧jä̧ ukuturu jä̧'ȩpä̧rü̧ jui'ümä̧, Dio i̧wȩnȩ, jareü wȩnȩ jitäwa'a rekuä rü̧jä̧u̧mä̧.

¹⁰ Ukutumä̧ ujutu jȩtü̧ to'kuinä̧tu̧kua̧'a̧ttü̧ wo̧juä̧tü̧jä̧, ujuturumä̧, Dio'i̧nä̧ wo̧jua̧, adiwä juei jȩti̧nü̧mä̧, adiwomȩnä̧'i̧nä̧, ttü̧ja̧ ttukuokuokomȩnä̧'i̧nä̧, jȩpü̧ kka̧kui̧nä̧tü̧jä̧ ukutu, Dio-rü esetätukumä̧.

¹¹ Ja̧'wa̧ta̧nü̧ wo̧juä̧tü̧jä̧ ukutu ya̧ku̧nä̧rü̧mä̧ yabokutä eseunu̧ kui̧'chä̧tu̧kua̧ pä'ütä Jitäwä'i̧jä̧u̧jä̧, ya̧tȩ ttä'o jü̧nä̧ wa̧ i̧tti̧mü̧rü̧ täbotü ji̧'ä̧wä̧rü̧ jä'i̧nü̧'a̧nü̧.

¹² Jitäwä'i̧jä̧u̧jä̧ Dio i̧tti̧mü̧ ttü̧ja̧ku̧'a̧nü̧ ku̧ja̧kuä̧tu̧kuä̧kua̧'a̧nü̧, ttu̧ju̧nä̧ra̧ pä'ü woinä̧u̧ jü̧nä̧.

¹³ Ja̧'wa̧nü̧ ja̧'a̧ttü̧, 'kuäopünä̧ Dio-rümä̧ eseunu̧ ukuokuätüjä̧. Jua'amä̧ Dio i̧wȩnȩ jitäwomȩnä̧ ttü̧ja̧ tti̧wȩnȩ 'kua̧rü̧nä̧ kuä̧ju̧kuä̧tu̧kuo̧ka̧'a̧, Dio i̧wȩnȩ jü̧nä̧tä̧, kuesetinä̧tu̧kua̧'a̧ttü̧, iweye ja̧'wa̧nü̧ ja̧'a̧tä̧mä̧. Jua̧u̧ wȩnȩtä̧ ja̧'a̧ isopäi'ünä̧ ukutu esetätünä̧ aditümä̧.

¹⁴ Isopäi'ünä̧ chawaruwä chi̧jä̧wa̧tü̧, ukutumä̧, Judea-ttü Dio-rü esetätürü 'kuäopinü̧ta'anü̧ usurä ȩmä̧wä̧tü̧jä̧, jua'amä̧ juätü ji̧nü̧ta'anü̧ kui̧rȩjä̧tu̧ku̧ ttü̧ja̧ judío suronä̧ jȩtta̧'a̧ usurä kuȩmä̧wä̧tu̧kua̧'a̧ttü̧.

¹⁵ Juätü Judío-mä̧ Tu̧ru̧wa̧ Jesú-ru'i̧nä̧, umüwäyotü profeta-rü'i̧nä̧ kuä'ü ikuinü̧'kotü, ujuturu'i̧nä̧ tti̧rȩjä̧ttü̧ ya'opü ikuinä̧tü̧. Juätümä̧ Dio eseu juiyünä̧ jȩpä̧tü̧, ttü̧ja̧rü̧'i̧nä̧ o'katoi'ünä̧ ttaboiyotü wotü.

¹⁶ Judío pokotürü, ra̧wä̧pi̧jü̧ttü̧ ttü̧ja̧kui̧'a̧ pä'ü, jitäu juiyünä̧ jȩttä̧u̧jä̧. Ja̧'wa̧nü̧ jȩtto̧mȩnä̧mä̧, suronä̧ jȩttä̧'i̧jü̧mä̧ yaboku rü̧ä̧chä̧u̧. Ja̧'wa̧nü̧ ja̧'a̧nä̧, täkü rüjí mo̧ro̧mä̧ Dio-mä̧ usurä ttȩmä̧u̧nä̧ ro̧ȩpä̧kuä̧u̧.

Pauru, Tesalónica ttü̧ja̧rü̧ doächäja päinü̧ wȩnȩ

¹⁷ Chawaruwä chi̧jä̧wa̧tü̧, ukututtü otó päti'ina̧'a̧mä̧, juiyomä̧ rekuomä̧ jo̧ka̧'a̧ ji̧na̧'a̧nä̧, jakuänä̧mä̧ ta̧mu̧kuä̧rü̧nä̧ ji̧na̧'a̧ ja̧'wa̧nü̧ jä̧u̧ ukuturu totächa pä'inä̧tü̧jä̧.

¹⁸ Ja̧'wa̧nü̧ jä̧u̧, ticha pä'ü a̧mü̧kuä̧rü̧, ttü Pauru'i̧nä̧ ticha pä'ü ppa̧'a̧dä̧rü̧ chusa'anä̧, Satanás-mä̧ ti̧'chü̧ juiyünä̧ jȩi̧nä̧u̧jä̧.

¹⁹ Ja̧'wa̧nü̧ ja̧'a̧ttü̧mä̧ ¿ti̧yȩjä̧ttü̧ ujutu tesewa pä'ü tta̧tä̧rü̧mä̧, corona pättü jü̧nä̧ tesewä̧kuȩmä̧, Tu̧ru̧wa̧ Jesucrito ichomȩnä̧, ä'kattümä̧? Kkorotümä̧ toa'a, Jua̧u̧mä̧ ukututä jä̧kua̧'a̧.

²⁰ A̧, iweye ja̧'wa̧nü̧tä̧ ja̧'a̧. Ukuo tetäwä̧u̧mä̧ ukututä ja̧'a̧ttü̧.