1 Tesalonicenses 1 - Nuevo Testamento Uwotjüja

Pauru teäwinü̧ wȩnȩ

¹ Ttü Pauru'i̧nä̧, Silvano'i̧nä̧, Timoteo'i̧nä̧, te'äwätüjä̧ Tesalónica ütawiyänä̧ kka̧kuä̧tü̧, Dio-ku, Tu̧ru̧wa̧ Jesucrito-ku ji̧yȩtȩnä̧ wotürü. Tami'iso'ki o'kajuiyünä̧ pä̧wä̧rü̧jä̧u̧jä̧, wȩnȩ juiyünä̧ kkä̧kuä̧wä̧, eseäkuäwä Dio jo̧mȩnü̧ iyätukuaku pä'ü.

Dio-rü eseäkuäwä wȩnȩ

² 'Kuäopünä̧ Dio-rü tukuokuta'anü̧, Dio-rü esewätüjä̧ ukutu kutü'kütukumä̧.

³ Tä'o Dio ä'ka jo̧mȩ tukuokuomȩnä̧mä̧ amükuädätü̧jä̧, kua̧'kua̧ wȩnä̧rü̧ kuaditä'ijätuku'i̧nä̧, eseu kuaditä'ijätuku'i̧nä̧ ja̧'wa̧ta̧nü̧ 'kiyünä̧, Tu̧ru̧wa̧ Jesucrito surojüttü kki̧'ä̧kuä̧wä̧ i̧yä̧kuȩ tta̧kuä̧rä̧tu̧ku̧'i̧nä̧, jü̧nä̧.

⁴ Chawaruwä chi̧jä̧wa̧tü̧, Dio ukuturu repe'ü i̧tti̧mü̧ jü̧nä̧ ȩmi̧na̧'a̧mä̧ wo̧juä̧tü̧jä̧.

⁵ Isopäi'ünä̧ jareü wȩnȩ ukuturu jitäwinü̧mä̧, suro ti̧wȩnȩnä̧tä̧mä̧ ji'äwokotü pinä̧tü̧jä̧, pärokuä Dio ujurunä̧, Epíritu Sa̧tu̧ jäwänä̧, jueünä̧tä̧ ji'äwinä̧tü̧jä̧. Ukutumä̧ wo̧juä̧tü̧jä̧, ukuturu adiu ppä'ädü jȩti̧nü̧mä̧.

⁶ Ukutumä̧, ujutu jȩpü̧ tü̧ja̧kui̧nü̧ta̧'a̧nü̧'i̧nä̧, Tu̧ru̧wa̧ jȩi̧nü̧ta̧'a̧nü̧'i̧nä̧ jȩpä̧tü̧jä̧, wȩnȩ rü̧ȩnä̧ usurä kuȩmä̧wä̧tu̧kua̧'a̧nä̧'i̧nä̧, Epíritu Sa̧tu̧ kuesewätukunä̧ iyomȩnä̧.

⁷ Ja̧'wa̧nü̧ jȩ'kuä̧tu̧kuo̧mettü̧, Macedonia rȩjȩnä̧ kka̧kuä̧tü̧'i̧nä̧, Acaya rȩjȩnä̧ kka̧kuä̧tü̧'i̧nä̧, Crito-rü esetätümä̧ o'katoi'ünä̧tä̧ ukutu jȩ'kuä̧tu̧ku̧mä̧ jȩpä̧tü̧.

⁸ Isopäi'ünä̧ ukututäjä̧ Tu̧ru̧wa̧ i̧wȩnȩ kkä̧mä̧dü̧ ji'äwinä̧tü̧mä̧, suro jua̧u̧ kui̧rȩji̧yä̧tu̧ku̧ Acaya-nä̧, Macedonia-nä̧tä̧mä̧kü̧, kkoro rȩjȩnä̧'i̧nä̧ ji'äwinä̧tü̧jä̧. O'kajuiyünä̧ pa̧ja̧ku̧nä̧ kka̧kuä̧tü̧mä̧ ä̧ju̧kui̧nä̧tü̧, Dio-rü kua̧'kua̧ ku̧wȩnä̧rä̧tu̧ku̧ wȩnȩmä̧, täkü ujutu jitäwa pä'ümä̧ rekuä rü̧jü̧ juiyünä̧tä̧, päi'ünä̧.

⁹ Isopäi'ünä̧ o'katoi'ünä̧ ukuokuätü, ujuturu tichäja'a adiu jȩ'kui̧nä̧tu̧ku̧mä̧, ja̧'wa̧ta̧nü̧ ji'äwätü ku̧ä̧nä̧wa̧tu̧ku̧ tta̧'kua̧juä̧ tätäwä'karü kuesetinä̧tu̧kua̧'a̧, jaropi'ü Dio a̧'kua̧rü̧rü̧, jueü wȩnȩ i̧sa̧rü̧ kuesetinä̧tu̧kua̧'a̧'i̧nä̧.

¹⁰ Ja̧'wa̧ta̧nü̧ juätümä̧ wo̧juä̧tü̧ mo̧ro̧jä̧ra̧'a̧ttü̧ i̧chä̧kua̧rü̧, wa'arettü tto'ächinü̧rü̧, Dio ro̧ȩpä̧kuȩttü̧ rä'epü ikuäwä i̧sa̧ Jesucrito ichakua'a tta̧kuä̧rä̧tu̧kua̧'a̧mä̧.