1 Pedro 5 - Nuevo Testamento Uwotjüja

A̧ci̧a̧nu̧tu̧ru̧ jiäwinü̧ wȩnȩ

¹ Jitämä̧ igresia-ttü a̧ci̧a̧nu̧tu̧ru̧ ttü'i̧nä̧ juätü jü̧ta̧'a̧nü̧ A̧ci̧a̧nu̧tu̧ wa̧, ro̧'ȩpü̧ ji'äu kkä̧nü̧, Crito usurä ȩmä̧wi̧nü̧'i̧nä̧ jidäwa pä'üsä, ja̧'wa̧ta̧nü̧ ppa̧'ä̧chü̧ ü̧rü̧ä̧ i̧jȩpo̧mȩnä̧ ja̧u̧ jäwä chu̧ju̧nä̧rä̧kua̧'a̧ttü̧.

² Dio ä̧ji̧mü̧ oweja-tü̧ iyinä̧u̧ru̧mä̧ adiu Dio-rü pä̧wä̧rü̧ja̧'a̧ku̧ tta̧'a̧rä̧tu̧kui̧, kujurutukumä̧kü̧, pärätänä̧mä̧kü̧, ja̧'wa̧nü̧ ja̧jü̧ jueimä̧ adiu eseunü̧tä̧.

³ Tta̧kuä̧rä̧tu̧kuä̧u̧ tturuwotü jü̧nä̧mä̧ jȩ'kuä̧tu̧kuä̧, ja̧'wa̧nü̧ ja̧jü̧ jueimä̧ juätürü i̧jȩkuä̧ wotü jü̧nä̧tä̧ kka̧kuä̧tu̧kui̧.

⁴ Ja̧'wa̧nü̧tä̧ chutä pató ichomȩnä̧mä̧, ukutumä̧ ukuo corona kuȩmä̧kuo̧tü̧jä̧, ja̧u̧ corona-mä̧ yoriso joächächokü jä̧kuȩ.

Igresia jü̧nä̧ wotü

⁵ Ja̧'wa̧ta̧nü̧ ukutu mü̧ä̧yotü'i̧nä̧ igresia-ttü a̧ci̧a̧nu̧tu̧ru̧mä̧ ukuotätukui. O'katoi'ünä̧tä̧ kkorotümä̧ kkorotüku ukuo tekuäwätukuoka'a ukuotätukui, Isopäi'ünä̧: Dio-mä̧ ttukuo te'äkuäwätürümä̧ kkü'kokü, ja̧'wa̧nü̧ ja̧'a̧nä̧ ttukuo te'äkuäwokotürütä adiwäjuei iyü ppä'ädü.

⁶ Ja̧'wa̧nü̧ ja̧'a̧ttü̧ kukuomä̧ tekuäwätukuä, Dio ju̧ru̧wa̧ u̧mü̧ dȩa̧'a̧ttü̧mä̧ u̧mo̧ro̧ mo̧ro̧ pätekuächomȩnä̧ ukuturu esewäkua'anü̧.

⁷ O'kajuiyünä̧ kua̧'kua̧ rokuekuätukumä̧ Dio-rütä iyätukui, jua'amä̧ ukuturu tta̧wä̧ra̧'a̧ttü̧.

⁸ Wo̧juȩku̧nä̧ amükuädätü jü̧nä̧ to̧pä̧rä̧kuä̧u̧ kka̧kuä̧tu̧kui̧, isopäi'ünä̧ kua̧bo̧i̧ya̧tu̧ku̧ äwettämä̧, mü yäwi durupä̧rü̧ jä̧'i̧nü̧'a̧nü̧ ya̧tȩrü̧ ukui'a pä'ü usú kue'ächü.

⁹ Tta̧'kua̧ wȩnä̧rä̧kuä̧wä̧nä̧ 'kiyünä̧ kua̧mi̧ 'ki'ächi'ätukui, pi̧jä̧ o'kajuiyünä̧ kka̧kuä̧tü̧ kui̧jä̧wa̧tu̧ku̧'i̧nä̧ jua̧u̧tä̧ jäwänä̧ usurä ttȩmä̧wa̧'a̧mä̧ wo̧juä̧tü̧jä̧.

¹⁰ Ja̧'wa̧nü̧ ja̧'a̧nä̧ ukutu usurä kuȩmä̧wä̧tu̧kua̧'a̧ttü̧mä̧ a̧'u̧kua̧'a̧tä̧ mo̧ro̧ o'ka'a Dio-mä̧ surojü juikuätukunä̧'i̧nä̧, 'kiyünä̧ ku̧jä̧tu̧ku̧nä̧'i̧nä̧, kujuruwätukunä̧'i̧nä̧ ja̧'wa̧ta̧nü̧ jo̧mȩnü̧ kuätukunä̧'i̧nä̧ jȩä̧kuä̧u̧jä̧. Dio-mä̧ chutätä Crito-nä̧ rü̧ȩnä̧ eseunä̧ uruwo beipokü ku̧ju̧nä̧rä̧tu̧kua̧ pä'ü woinä̧u̧jä̧.

¹¹ Ruwomä̧ ukutä jäwä ja̧'a̧ 'kuäopünä̧tä̧. Amȩ́.

Rüjí te'äu jiäwinü̧ wȩnȩ

¹² Silvano, chi̧jä̧wa̧ a̧'kua̧ wȩnä̧rü̧ pädäkunä̧ ukuturu a̧'u̧ku̧nä̧tä̧ wȩyu̧tu̧ we'üsä, ro̧'ȩpü̧ ji'äu kkä̧nü̧, ja̧'wa̧ta̧nü̧ pi̧yȩ ja̧'a̧ isopäi'ünä̧ Dio mipponä̧ iyinü̧ ukutunä̧ kkü̧mä̧ pä'ü jidäwipa pä'ümä̧.

¹³ Igresia wotü Babironia ütawiyänä̧ kka̧kuä̧tü̧rü̧ Dio-mä̧ pojopü ȩmi̧nä̧u̧ ukuturu ȩmi̧nü̧ta̧'a̧nü̧ juätümä̧ te'äu tti̧wȩnȩ wȩttä̧u̧jä̧ ja̧'wa̧ta̧nü̧ chi̧tti̧ Maruku-rü'i̧nä̧.

¹⁴ Kkorotümä̧ kkorotüku te'äkuäu 'chu̧'o̧pü̧ eseäkuäwätukui. O'kajuiyünä̧ Crito-nä̧ wȩnȩ juiyünä̧ kka̧kuä̧tu̧kui̧.