1 Pedro 4 - Nuevo Testamento Uwotjüja

¹ Ja̧'wa̧nü̧ ja̧'a̧ttü̧, Crito idepänä̧ usurä ȩmä̧wi̧ta̧'a̧nü̧, ukutu'i̧nä̧ usurä ȩmä̧kuä̧wä̧nä̧ jo̧mȩnü̧ kka̧kuä̧tu̧kui̧. Ja̧'wa̧nü̧ idepänä̧ usurä ȩmä̧wä̧u̧mä̧ surojüttümä̧ 'to'oku ikuä'ijü,

² Dio-rü pä̧wä̧rü̧jo̧mȩnä̧ tokue'ächomȩbü̧ päi'ünä̧ ü̧jä̧kua̧'a̧nü̧ ttü̧ja̧rü̧ pä̧wä̧rü̧ja̧'a̧ku̧mä̧kü̧.

³ Ukutumä̧ rekuo mo̧ro̧ judío pokotü jȩttä̧'i̧jü̧ jȩpi̧nä̧tü̧jä̧ ja̧'wa̧ta̧nü̧ kukuojatuku juoächünä̧tä̧, surojü kkü'kekunä̧tä̧, pä'kärinä̧tä̧, tä̧mä̧'chä̧kuä̧wä̧nä̧tä̧ ja̧'wa̧ta̧nü̧ kkü'käwokü tturuwo juoekuänä̧tä̧ kka̧kui̧nä̧tü̧jä̧.

⁴ Jitämä̧, suronä̧ jȩpü̧ ttü̧jü̧ jȩ'kuä̧tu̧kuo̧ko̧mȩmä̧ ukutumä̧ suronä̧ ttu̧kuo̧kuä̧u̧jä̧.

⁵ Ja̧'wa̧nü̧ ja̧'a̧nä̧ a̧'kua̧rä̧tü̧rü̧'i̧nä̧, 'korujuo'ächinä̧tü̧rü̧'i̧nä̧ ü'ojo'a pä'ü jo̧mȩnü̧ jȩpü̧ kku̧nä̧wo̧mȩttü̧ jȩtti̧nü̧mä̧ tti̧jȩpä̧kuo̧tü̧.

⁶ Ja̧'wa̧nü̧ ja̧'a̧ttü̧ 'koru juo'ächinä̧tü̧rü̧'i̧nä̧ jareü wȩnȩmä̧ ji'äwinü̧, pi̧jä̧ ttü̧ja̧ tta̧mü̧kuäda'aku ttü'ojo'ä̧u̧ ja̧'a̧nä̧ tta̧'kua̧rü̧nä̧ Dio päina̧'a̧ku̧ ttü̧jä̧kua̧'a̧nü̧.

Kkorotürü ppä̧dä̧rä̧kuä̧wä̧

⁷ O'kajuiyünä̧ beipächäkua'amä̧ täkü tü'küwächa'a. Ja̧'wa̧nü̧ ja̧'a̧ttü̧, ukutumä̧ adiwomȩnä̧ amükuädätukui ja̧'wa̧ta̧nü̧ tta̧'a̧rä̧kuä̧ü̧nü̧ Dio-rü ukuokuätukui.

⁸ Ja̧'wa̧ta̧nü̧ ukutunä̧ rü̧ȩnä̧ eseäkuäwä kkä̧kua̧'a̧nü̧, isopäi'ünä̧ eseu repeäkuäwämä̧ rü̧ȩnä̧ suronä̧ jü̧ttü̧'i̧nä̧ jȩpü̧ iku.

⁹ Kuojusodetukunä̧mä̧ kkorotü kkorotünü̧ do'ädätukui, ya̧tȩrü̧'i̧nä̧ suronä̧ ukuokuäwä juiyünä̧.

¹⁰ Yotükupünä̧ Dio mipponä̧ iyü kuȩmi̧nä̧tu̧ku̧mä̧, kkorotüku ppä'ädü aditätukui adiunä̧ juȩ'ȩpä̧rü̧ adikuä isotü jü̧nä̧.

¹¹ Ya̧tȩ ukuokuttümä̧, Dio i̧wȩnȩ päü'anü̧ ukuoku. Ya̧tȩ ji̧yȩtȩ aditüttümä̧ Dio ujuru iyü'akuä̧ aditü, o'kajuiyünä̧ jȩ'ku̧mä̧, Dio-rü Jesucrito-nä̧ tteseunä̧ jȩpi̧, eseäkuäwä'i̧nä̧, ttujuru'i̧nä̧ 'kuäopünä̧ u̧ru̧wa̧rü̧tä̧. Amȩ́.

Usurä ȩmä̧u̧ tteseu wȩnȩ

¹² Chi̧jä̧wa̧tü̧, yekuekui'ätukuä ku'kä̧tȩtu̧ku̧ttü̧ ukuturu kka̧kuä̧mȩ'ü̧ toümä̧, to'kuätukuokü jä̧'i̧jü̧ 'kua̧rü̧nä̧mä̧.

¹³ Ja̧'wa̧nü̧ ja̧jü̧jueimä̧ esewätukui Crito usurä ȩmä̧winü̧nä̧ usurä kuȩmä̧wä̧tu̧kuo̧mȩnä̧mä̧, ja̧'wa̧ta̧nü̧ eseäkuäwä jo̧mȩnü̧ jä̧kua̧'a̧nü̧ uruwo i̧jȩpo̧mȩnä̧.

¹⁴ Ukuturu eseäkuäwä kka̧'a̧, Crito jäwänä̧ suronä̧ pättä'chäkurumä̧, jua'amä̧ ukuo'i̧nä̧ Dio a̧'kua̧rü̧ i̧sa̧'i̧nä̧ ukutunä̧ ü̧ja̧'a̧ttü̧.

¹⁵ Ukututtü ya̧tȩ usurä ȩmä̧u̧ttü̧mä̧, ttü̧ja̧sa̧rü̧'i̧nä̧ kuä'ü ikuoka'anä̧, ü̧nä̧u̧kuä̧ro̧ka̧'a̧nä̧, suronä̧'i̧nä̧ jȩo̧ka̧'a̧nä̧, ttiäre'i̧nä̧ ȩmi̧pä̧ro̧ka̧'a̧;

¹⁶ Crito-rü esetinomȩttü̧ usurä ȩmä̧u̧mä̧, udäpeku juiyü'anü̧ ja̧'a̧, ttudäpekuajueimä̧ Dio i̧mi̧ ȩpü̧tä̧ eseu.

¹⁷ Täkü rȩbȩwä̧ja̧'a̧ pojokuä mo̧ro̧mä̧ chutä Dio i̧tti̧mü̧ttü̧ kkä̧mä̧dü̧, ja̧'wa̧nü̧ pojokuä ujutunä̧ kkä̧mä̧da̧'a̧mä̧ ¿Toku jä̧kua̧'a̧jä̧ttü̧ rüjí mo̧ro̧mä̧, jareü Dio i̧wȩnȩ ukuotokotürümä̧?

¹⁸ Ja̧'wa̧ta̧nü̧ adiwätü i̧sa̧'i̧nä̧ 'kiya'a abotä ra̧wä̧pi̧jü̧ttü̧ ü̧ji̧pa̧'a̧mä̧, ¿Toku jä̧kua̧'a̧jä̧ttü̧ su̧ro̧pa̧rü̧mä̧ ja̧'wa̧ta̧nü̧ surojü jȩpü̧rü̧mä̧?

¹⁹ Ja̧'wa̧nü̧ ja̧'a̧nä̧ Dio-rü pä̧wä̧rü̧jo̧mȩnä̧ usurä ȩmä̧wä̧tü̧mä̧, yabonü̧tä̧ adiu jȩtta̧ pä'ü ja̧'a̧, tta̧'kua̧rü̧mä̧ uwäbe'inü̧ Dio u̧mü̧nä̧tä̧ iyü kku̧nu̧, jua̧u̧mä̧ adiwomȩnä̧tä̧ jȩä̧kua̧'a̧nü̧.