1 Pedro 3 - Nuevo Testamento Uwotjüja

Ttirekuomü̧ jȩtta̧ pä'ü jü̧

¹ Ja̧'wa̧ta̧nü̧ ukutu tti̧tti̧mü̧ tta̧ju̧tu̧'i̧nä̧, kui̧tti̧mü̧tu̧ku̧ ttä̧'o̧tü̧rü̧ ukuotätukui, yotüte Dio i̧wȩnȩ ttesetü juiyüttü'i̧nä̧, ukutu kukuokuätukuoka'anä̧ ku̧jä̧tu̧ku̧ttü̧ topü ttesetäkua'anü̧,

² juätümä̧ surojü juiyünä̧ ku̧jä̧tu̧ku̧'i̧nä̧, Dio-rü kukuotätuku'i̧nä̧ tottäkuotü.

³ Kuadikuätukumä̧ wä̧mȩ jäwämä̧ jo̧ka̧'a̧ sa̧kuȩkuä̧tu̧ku̧'i̧nä̧, oro räu o̧sa̧ ja̧ pä'ü'i̧nä̧, ku̧'ka̧tä̧wä̧ti̧yü̧ adiwä̧ta̧ ja̧ pä'ü'i̧nä̧,

⁴ ja̧'wa̧nü̧ ja̧jü̧ jueimä̧ kua̧mi̧'iso'ki jakuänä̧ttü̧, üadiwä toe'ächokü tta̧'kua̧rü̧ esewa'anä̧ unichä̧rü̧ kkä̧kuä̧wä̧ ja̧'a̧. Pi̧yȩ üadiwämä̧ Dio ä'kattümä̧ rü̧ȩnä̧ mikuäu.

⁵ Ja̧'wa̧ta̧nü̧ pi̧yȩ'i̧nä̧ ji̧na̧'a̧, Tä̧mi̧nä̧ jȩtti̧nü̧mä̧, nä̧tü̧ surojü jui'ätü ttadikui'inü̧mä̧; juätü Dio-rü tta̧'kua̧ wȩnä̧rä̧tü̧mä̧ tti̧rȩkuo̧mü̧rü̧'i̧nä̧ ukuotinä̧tü̧.

⁶ Sara'i̧nä̧ pa̧'a̧nü̧ winä̧ju̧ Abraha̧-rü̧ ukuotümä̧ «chu̧ru̧wa̧» pä'ü o'inä̧ju̧. Ja̧'wa̧ta̧nü̧ ukutu'i̧nä̧ adiu jȩpü̧ yekuekuäwä juikuätukuttü̧mä̧ juäjutä kki̧tti̧mü̧jä̧.

⁷ Ja̧'wa̧ta̧nü̧ ukutu ttirekuomü̧mä̧, kuirekuamü̧tu̧ku̧ku̧ wo̧juȩku̧nä̧ kka̧kuä̧tu̧kui̧. Isajurumä̧ i̧sä̧yu̧ i̧so̧'ta̧ 'kuäo'ta̧ jä̧'i̧nü̧'a̧nü̧ ukuotätukui, juätü'i̧nä̧ kkä̧kuä̧wä̧ Dio iyinü ukutuku ttiya pä'ü woinä̧u̧ Dio iäre ju'to i̧yä̧kuȩttü̧, Dio-rü kukuokuomȩnä̧ tto̧ȩpä̧rü̧ juiyaku pä'ümä̧.

O'katoi'ünä̧ Crito-rü esetätü jȩtta̧ pä'ü jü̧

⁸ Rüjinä̧mä̧, o'katoi'ünä̧tä̧ eseäkuäwänä̧ kka̧kuä̧tu̧kui̧, ji̧nä̧ ji̧yȩtȩnä̧tä̧ amükuädü, ja̧'wa̧ta̧nü̧ tti̧jä̧wa̧tü̧ 'kua̧rü̧nä̧ repe'äkuäunü̧. Adiwä isotü jü̧nä̧tä̧, ukuo tekuäwätukuoka'atä.

⁹ Surojünä̧mä̧ mikuämä̧ päkuätukuä, ja̧'wa̧ta̧nü̧ suronä̧ pä'chäkuäwänä̧'i̧nä̧, to'ija̧'a̧ku̧tä̧ adiwäjueitä iyätukui, ja̧'wa̧nü̧ ja̧'a̧ttü̧ Dio-mä̧ adiwäjuei kuȩmä̧tu̧kua̧ pä'ü woinä̧u̧jä̧.

¹⁰ Isopäi'ünä̧: A̧'kua̧rü̧ repe'äkuäumä̧ ja̧'wa̧ta̧nü̧ mo̧ro̧ eseu ü̧ja̧ pä'ümä̧, Surojümä̧ kukuokuoka'a tta̧'a̧rä̧kuä̧wi̧, Ja̧'wa̧ta̧nü̧ yapare wȩnȩ'i̧nä̧ kukuokuä;

¹¹ Surojüttü 'kä̧'i̧pä̧chü̧ adiutä jȩpi̧, Wȩnȩ juiyünä̧ kkä̧kuä̧wä̧tä̧ usipü ja̧u̧nä̧tä̧ täi.

¹² Isopäi'ünä̧ Tu̧ru̧wa̧mä̧ adiwä isotürümä̧ tta̧'a̧rü̧ ja̧'wa̧ta̧nü̧ ttukuokuomȩnä̧'i̧nä̧ ä̧ju̧ku̧, Ja̧'wa̧nü̧ ja̧'a̧nä̧ surojü jȩpä̧tü̧rü̧mä̧ kkü'kokü.

¹³ ¿Dítä jä̧ttü̧ ukutu adiutä jȩ'kuä̧tu̧kuo̧mȩnä̧ suronä̧ jȩü̧'a̧nü̧ wa̧mä̧?

¹⁴ Ja̧'wa̧nü̧ ja̧'a̧nä̧ yabonä̧ adiu jȩ'kuä̧tu̧kua̧'a̧nä̧'i̧nä̧ usurä ȩmä̧wä̧'i̧jä̧tü̧jä̧, ¡Eseäkuäwä kku̧nä̧rä̧tu̧kui̧! Ya̧tȩrü̧'i̧nä̧ ye'ünü̧mä̧ yekuekui'ätukuä.

¹⁵ Ja̧'wa̧nü̧ ja̧jü̧jueimä̧ Crito-rü kua̧mi̧'iso'kituku u̧ru̧wa̧ jü̧nä̧tä̧ ukuotätukui. 'Kuäopünä̧tä̧ jo̧mȩnü̧ kka̧kuä̧tu̧kui̧ o'kajuiyünä̧ ukutu tta̧'a̧rü̧ ku̧jä̧tu̧ku̧ jättepomȩnä̧ kuädätätukuä̧kuȩmä̧.

¹⁶ Ja̧'wa̧nü̧ ja̧'a̧nä̧ ukuo tekuäwätukuoka'a ukuotünü̧ jȩpü̧ adiwomȩnä̧ amükuädätukui, Crito-rü esetätü jü̧nä̧ adiu ku̧jä̧tu̧kuo̧mȩnä̧ suronä̧ ukuokuä'ijätümä̧, jitütä tti̧wȩnȩnä̧ dä'ättuttäkua'anü̧.

¹⁷ Adiu jȩpü̧ usurä ttȩmä̧wo̧mȩnä̧tä̧ adiwa'anü̧ ja̧'a̧, Dio-mä̧ ja̧'wa̧nü̧tä̧ pä̧wä̧rü̧jä̧ku̧, surojü jȩtta̧jueimä̧.

¹⁸ Isopäi'ünä̧ Crito-mä̧ chutä a̧mü̧nä̧ pa̧ja̧tü̧ ujutu suronä̧ jȩtä̧'i̧jü̧nä̧, ya'utenä̧tä̧ 'korujuo'ächü usurä ȩmä̧wi̧nü̧, Jua̧u̧mä̧ surojümä̧ jȩpo̧kü̧ja̧'a̧nä̧ surojü jȩpä̧tü̧nä̧ usurä ȩmä̧wi̧nü̧, ukuturu Dio ü̧ja̧'a̧ku̧ ȩpa̧ pä'ü. Idepänämä̧ 'korujuoächina̧'a̧nä̧ Epíritu jäwä a̧'kua̧rä̧kuä̧wä̧mä̧ tto'ächinü̧.

¹⁹ Pa̧'a̧nü̧ jü̧nä̧tä̧ epíritu-tu̧ kärenä̧ pȩjä̧tü̧rü̧mä̧ 'chä̧nü̧ ji'äwinü̧.

²⁰ Pitümä̧ mo̧tä̧ päi'ünä̧ ukuotokotü pinä̧tü̧ ji̧na̧'a̧, Nué ü̧ji̧nü̧ mo̧ro̧, Dio woi'ka ttadita'anä̧ tta̧wä̧rinü̧ pänä̧tä̧ päi'ünä̧, juätüttümä̧ kko̧ro̧mü̧ttü̧nü̧ wä̧mȩtukuätä ja̧'a̧ ajettü kka̧kui̧pi̧nä̧tü̧mä̧.

²¹ Ja̧'wa̧nü̧ ja̧'a̧ttü̧ ajiya ji̧no̧yamä̧ bautizo päwoya jü̧nä̧ wȩnȩkuä̧chi̧na̧'a̧, jitämä̧ ja̧u̧nä̧tä̧ suronä̧ jȩtä̧i'jü̧ttü̧mä̧ kka̧kui̧pä̧tü̧jä̧. Bautizo-mä̧ jättäpäyotümä̧ tükächi'okü, ja̧'wa̧nü̧ ja̧jü̧jueimä̧ adiu amükuädütä Dio-rümä̧ jä'epätukui, Jesucrito tto'ächäji̧'ka̧,

²² mo̧ro̧jä̧ra̧'a̧ kä'ekuächü Dio u̧wo̧jua̧'a̧ku̧nä̧ pä̧mä̧di̧nü̧nä̧tä̧, ja̧'wa̧ta̧nü̧ á̧gȩrȩ ttukuo'i̧nä̧ ttujuru'i̧nä̧ kku̧nä̧rä̧tü̧tä̧ tta̧ttä̧rä̧ku̧nä̧tä̧.