1 Pedro 2 - Nuevo Testamento Uwotjüja

Jareünä̧ Dio ȩmi̧nä̧u̧

¹ Ja̧'wa̧nü̧ ja̧'a̧nä̧, surojümä̧ o'kajuiyünä̧tä̧ ya'okuätukui, yaparetäkuäwä'i̧nä̧, ä'kayättütä jȩä̧'chä̧kuä̧wä̧'i̧nä̧, kkü'käwokü'i̧nä̧ ja̧'wa̧ta̧nü̧ o'kajuiyünä̧ suräjuei wȩnȩ'i̧nä̧.

² Ji̧'chi̧cha̧wa̧ jareünä̧ uwäpächü atate isoya päkuoya pä̧wä̧rü̧jü̧nä̧ usa'a jä̧'i̧nü̧'a̧nü̧ Epíritu jäwä usätukui, ja̧u̧nä̧tä̧ büó juokuätukuomȩnä̧ ra̧wä̧pi̧jü̧ttü̧ kki̧'i̧kuä̧mä̧ ku̧ju̧nä̧rä̧tu̧kua̧,

³ Täkü Tu̧ru̧wa̧ üadiwämä̧ pä̧wä̧ kki̧nä̧tü̧jä̧.

⁴ Ja̧'wa̧nü̧ ja̧'a̧ttü̧ Tu̧ru̧wa̧rü̧ tü'küpächätukui, I̧no̧'ki wa'ü ikuoko'ki ttü̧ja̧mä̧ ya'okuinä̧tü̧, ja̧'wa̧nü̧ ja̧'a̧nä̧ Dio-rümä̧ pojopü kku̧nä̧wo'ki rü̧ȩnä̧ mikuäwo'ki jü̧nä̧.

⁵ Pa̧'a̧nü̧ jo̧mȩttü̧, Dio-mä̧ i̧no̧'kiyä wa'ü ikuoko'ki jä̧'i̧nü̧'a̧nü̧ jü̧nä̧ jȩä̧kuä̧u̧jä̧, Epíritu jäwä ojusode jü̧nä̧'i̧nä̧, ja̧'wa̧ta̧nü̧ ya̧tȩ sacerdote surojü jui̧'a̧ jü̧nä̧'i̧nä̧, Epíritu jäwänä̧ sacrificio jü̧nä̧ Jesucrito-nä̧ iyätukuaku pä'ü Dio esewomȩnä̧.

⁶ Ja̧'wa̧nü̧ ja̧'a̧ttü̧ wȩyu̧kuä̧mä̧ pä'a: «Ttümä̧ Sión-nä̧ i̧no̧'ki rütüsä ä̧kuo̧mȩnä̧ iso'ki, pojopü ȩmä̧wo'ki ja̧'wa̧ta̧nü̧ rü̧ȩnä̧ mikuäwo'ki; juo'kinä̧ a̧'kua̧ wȩnä̧rü̧mä̧ dä'ä ttu'okü jä̧kua̧.»

⁷ Ukuturu esetätürümä̧ juo'ki ino'kimä̧ rü̧ȩnä̧ mikuäwo'ki ja̧'a̧, ja̧'wa̧nü̧ ja̧'a̧nä̧ esetokotürümä̧ wȩyu̧kuä̧ wȩnȩ pä'ijü'akuä 'kuäopa'a: «I̧no̧'ki adikuä ttü̧ja̧ ttüjü'koko'ki ji̧no̧'kimä̧ ä̧kuo̧mȩnä̧ iso'ki jü̧nä̧ pärowächina̧'a̧,»

⁸ Ja̧'wa̧ta̧nü̧ pi̧yȩ ja̧'a̧ kkoromä̧: «Ino'kimä̧, i̧nä̧wänä̧ ppeokuächäkua'a.» Ja̧'wa̧nü̧ ja̧'a̧ juätümä̧ i̧wȩnȩ jarodü ppe'okuächätü, ja̧u̧ ja̧'a̧ juätürü pä̧wä̧rü̧jü̧mä̧.

⁹ Ja̧'wa̧nü̧ ja̧'a̧nä̧ ukutumä̧ ya̧tȩ i̧tti̧mü̧ jü̧nä̧ ü'ojo'inä̧u̧jä̧, ru̧wa̧ Rey-rü ppädärä̧kuä̧wä̧ i̧sa̧ sacerdote jü̧nä̧'i̧nä̧, pi̧jä̧ ruwäkuiyä ttü̧ja̧ surojü jui'ätü jü̧nä̧'i̧nä̧, Dio aditäwä adiwäjuei jikuäwätukua pä'ü, yo̧mȩttü̧ rä'epü iku i̧tȩya̧u̧ra̧'a̧ku̧ wopinü̧rü̧.

¹⁰ Ä'kojimä̧ yoriso ukutumä̧ awaruwä jü̧nä̧mä̧ wokotü pinä̧tü̧jä̧, ja̧'wa̧nü̧ ja̧'a̧nä̧ jitämä̧ Dio a̧wa̧ru̧wä̧jä̧; ä'kojimä̧ Dio rȩrü̧jü̧ tooko̧u̧ pinä̧tü̧jä̧, ja̧'wa̧nü̧ ja̧'a̧nä̧ jitämä̧ rȩrü̧jü̧ to̧ä̧u̧jä̧.

¹¹ Chi̧jä̧wa̧tü̧, ro̧'ȩpü̧ ji̧dä̧wä̧u̧jä̧ kko̧ro̧jä̧ttü̧ ichäkuäwotü pi̧jä̧nä̧ kue'ächätürü 'kua̧rü̧nä̧, ttidepä kkü'kekunä̧mä̧ kuiyäwätukuä tta̧'kua̧rü̧ rowäwukumä̧.

¹² Judío pokotü ttü̧'kä̧tȩttü̧mä̧ adiunä̧ o'ikuätukui. Ja̧'wa̧nü̧ jü̧nä̧tä̧, jitämä̧ ukuturu suronä̧ jȩpä̧tü̧rü̧ 'kua̧rü̧nä̧ ttukuokua'anä̧, adiu jȩ'kuä̧tu̧kua̧'a̧ topü chutä o'katoi'ünä̧rü̧ jä'epü mo̧ro̧ päi'omȩnä̧ Dio-rü ttesewäkuotü.

Ruwotürü ukuotäkuäwä wȩnȩ

¹³ Chu̧ru̧wa̧ jäwänä̧, pi̧jä̧ ttü̧ja̧ wettü o'kajuiyünä̧ ukuotätukui: Emperado-ru'i̧nä̧, jua'amä̧ kkorottü'i̧nä̧ u̧wa̧mȩnä̧ jü̧ aditomettü̧,

¹⁴ ruwo we'ürü'i̧nä̧ jua̧u̧mä̧ suronä̧ jȩpä̧tü̧rü̧ ro̧ȩpa̧ pä'ü wȩ'ä̧wa̧ jo̧mȩttü̧ ja̧'wa̧nü̧ ja̧'a̧nä̧ adiu jȩpä̧tü̧rü̧mä̧ eseu.

¹⁵ Isopäi'ünä̧ Dio-mä̧ ukutumä̧ adiutä jȩ'kui̧yä̧tu̧kua̧ru̧ pä̧wä̧rü̧jä̧ku̧, jerupätü'i̧nä̧ amükuädäkuäwä jui'ätü'i̧nä̧ ukuturu to'ija̧'a̧ku̧ pättü juiyäkua'anü̧.

¹⁶ Ttü̧ja̧ surojüttü rä'epü ikuäwotü jü̧nä̧ kka̧kuä̧tu̧kui̧, surojüttü rä'epü ikuäwotü̧jä̧ pä'ü, surojü jȩ'kuä̧tu̧kua̧ pä'ümä̧kü̧, ja̧'wa̧nü̧ ja̧jü̧jueimä̧ Dio-rü ppä̧dä̧rä̧kuä̧wä̧ isotü jü̧nä̧tä̧.

¹⁷ O'katoi'ünä̧rü̧tä̧ ukuotätükui, kui̧jä̧wa̧tü̧rü̧'i̧nä̧ esewätukui, Dio-rü'i̧nä̧ ye'ekunü̧, Ru̧wa̧ rey-rü'i̧nä̧ ukuotätukui.

Ppä̧dä̧rä̧kuä̧wä̧ isotü jȩtta̧ päinü̧

¹⁸ Ppä̧dä̧rä̧kuä̧wä̧ isotü, kuruwotü wettümä̧ o'kajuiyünä̧tä̧ ukuotünü̧ esewätukui, suro adiwä isotürütämä̧kü̧, ja̧u̧ ja̧jü̧jueimä̧ suropätü isotürü'i̧nä̧.

¹⁹ Isopäi'ünä̧ pi̧yȩ ja̧'a̧ Dio eseumä̧, ya̧tȩ surojü jȩo̧ka̧'a̧nä̧ Dio ä'kattü amükuädü jäwänä̧ mȩo̧pä̧rä̧ku̧ usurä ȩmä̧u̧ a̧mi̧ 'ki'ächi'ürü.

²⁰ Ja̧'wa̧nü̧ ja̧'a̧ttü̧ ji̧yȩtȩ surojü jȩ'kuä̧tu̧kuo̧mȩnä̧ ro̧ttȩpü̧ttü̧mä̧, ¿Däjé mikuätä kuȩmä̧kua̧'a̧jä̧ttü̧ tta̧'a̧rü̧ kkä̧nü̧ kua̧mi̧ 'kikuächi'ätukuttümä̧? Ja̧'wa̧nü̧ ja̧'a̧nä̧ adiu jȩpü̧ usurä kuȩmä̧wä̧tu̧ku̧ttü̧mä̧, ja̧'wa̧ta̧nü̧ usurä ȩmä̧u̧ tta̧'a̧rü̧ kkä̧nü̧ kua̧mi̧ 'kikuächi'ätukuttümä̧, ja̧u̧ ja̧'a̧ Dio üjü'kümä̧.

²¹ Pi̧yȩtä̧ pätetü Dio-mä̧ woinä̧u̧jä̧, täkü Crito-mä̧ ukutunä̧ usurä ȩmä̧wi̧nü̧, jȩi̧nü̧'a̧kuä̧ jȩ'kuä̧tu̧kua̧ pä'ü iyipümä̧.

²² Crito-mä̧ ya'utenä̧'i̧nä̧ surojümä̧ jȩpo̧kü̧ pinü̧, ja̧'wa̧ta̧nü̧ ya̧tȩrü̧'i̧nä̧ yaparewokü pinü̧.

²³ Suronä̧ pättä'chomȩnä̧mä̧, suronä̧ pä'ümä̧ ädätokü pinü̧; usurä ȩmä̧u̧nä̧ jȩttä̧ku̧'i̧nä̧, suronä̧mä̧ jȩpo̧kü̧ pinü̧, ja̧'wa̧nü̧ jȩtta̧jueimä̧ Dio jueünä̧tä̧ pä'ürütä iyäwinü̧.

²⁴ Crito-mä̧ chutätä surojü jȩtä̧'i̧jü̧mä̧ ja̧ttä̧pä̧ya̧ ü̧jo̧kä̧ jäinä̧ ȩpi̧nü̧, ujutu surojünä̧ 'korujuo'ächi'ü'kotü a̧'kua̧rä̧kuä̧wä̧ra̧'a̧ ttü̧ja̧kua̧ pä'ümä̧. Crito-mä̧ ta'ü ttikuinä̧ku̧ ukutu ku̧'ȩji̧'ä̧tu̧kua̧ pä'ümä̧.

²⁵ Ja̧'wa̧nü̧ ja̧'a̧ttü̧ ä'kojimä̧ oweja-tü̧ re'tewächätü jä̧'i̧nü̧'a̧nü̧ kue'ächinä̧tü̧jä̧, ja̧'wa̧nü̧ ja̧'a̧nä̧ jitämä̧ Crito-nä̧ ppa̧'ä̧chinä̧tü̧jä̧, Pató jä̧'i̧nü̧'a̧nü̧ ukuturu to̧pä̧rü̧ tta̧'a̧ru̧nä̧.