1 Juan 4 - Nuevo Testamento Uwotjüja

Isopäi'ünä̧ tta̧'kua̧ wȩnä̧rä̧kuä̧wä̧ wȩnȩ

¹ Chawaruwä chi̧jä̧wa̧tü̧, Dio iyinä̧ku̧ Epíritu-ru kku̧nä̧rä̧tü̧jä̧ pä'ätürümä̧ o'katoi'ünä̧rü̧mä̧, kuesetätukuä, kka̧kuä̧mü̧ topätukui, isopäi'ünä̧ Dio iyinä̧ku̧ Epíritu-ru ttu̧ju̧nä̧ra̧ja̧ pä'ü. Isopäi'ünä̧ pi̧jä̧nä̧, rekuätü Dio i̧wȩnȩ ji'äwätü profetas 'kua̧rü̧nä̧ rä'ekuätü.

² Pi̧yȩttü̧ kka̧kuä̧mü̧ topü wo̧juä̧wa̧'a̧, isopäi'ünä̧ Dio i̧yä̧wa̧ Epíritu-ru kku̧nä̧rä̧tü̧jä̧ pä'ümä̧: «Jesucrito-mä̧ isopäi'ünä̧ ttü̧ja̧sa̧ jü̧nä̧ ichinü̧ pi̧jä̧ra̧'a̧mä̧,» pätta'attü̧ topü wo̧juä̧tü̧jä̧.

³ Ja̧'wa̧nü̧ ja̧'a̧ttü̧, Dio iyinä̧ku̧ Epíritu-ru kku̧nä̧rä̧tü̧jä̧ pä'ü kkä̧nü̧, Jesú-mä̧ pi̧jä̧ra̧'a̧mä̧ ttü̧ja̧sa̧ jü̧nä̧mä̧ ichokü pinü̧ pättüttümä̧, o'katoi'ünä̧ Dio-mä̧ we'äwotü jo̧ka̧'a̧; ja̧'wa̧nü̧ wa̧mä̧ Dio a̧bo̧i̧ya̧ Epíritu-ru kku̧nä̧rü̧, mo̧tä̧ päi'ünä̧ i̧chä̧kua̧ pä'ü kuä̧ju̧kui̧nä̧tu̧kuä̧ku̧, jua̧u̧mä̧ täkü pi̧jä̧nä̧ kkü̧.

⁴ Chi̧tti̧mü̧ wotü, ukutumä̧ Dio-ku kka̧kuä̧tü̧jä̧ ja̧'wa̧nü̧ ja̧'a̧ttü̧, täkü juätü yaparewätürümä̧ kkȩdü̧ ikuinä̧tü̧jä̧. Isopäi'ünä̧ ukutuku kkü̧mä̧, pi̧jä̧nä̧ kkü̧ttü̧'i̧nä̧ abonä̧nü̧ ujuru kku̧nä̧rü̧.

⁵ Juätümä̧ iweye pi̧jä̧ isotü wotü ja̧'wa̧nü̧ ja̧'a̧ttü̧ pi̧jä̧ jäwä ttukuokuomȩnä̧mä̧ ttä̧ju̧kuä̧u̧.

⁶ Ujutumä̧ Dio-ku kka̧kuä̧tü̧jä̧; ja̧'wa̧nü̧ ja̧'a̧ttü̧ Dio-rü wo̧jua̧mä̧, ujuturu ä̧ju̧ku̧. Ja̧'wa̧nü̧ ja̧'a̧nä̧, Dio-ku kko̧kü̧mä̧, ujuturu ä̧ju̧kuo̧kü̧. Ja̧'wa̧nü̧ jo̧mȩnä̧ wo̧juä̧tü̧jä̧ jueü wȩnȩ Epíritu-ru kku̧nä̧rü̧rü̧'i̧nä̧ ja̧'wa̧ta̧nü̧ yapare wȩnȩ Epíritu-ru kku̧nä̧rü̧rü̧'i̧nä̧, jü̧nä̧.

Eseu repetäkuäwa pä'ü ja̧'a̧

⁷ Chawaruwä chü̧jä̧wa̧tü̧, eseu repeäkuäwämä̧ Dio-ttü ichü ja̧'a̧ttü̧, yotükupünä̧ eseu repetäkuäu'anü̧ ja̧'a̧. Isopäi'ünä̧ eseu repeäkuäwä kku̧nä̧rä̧tü̧mä̧ o'katoi'ünä̧ Dio i̧tti̧mü̧ ja̧'a̧ ja̧'wa̧ta̧nü̧ juätümä̧ Dio-rü wo̧juä̧tü̧ ja̧'a̧.

⁸ Ya̧tȩ, eseu repe'okümä̧ Dio i̧tti̧ wokü, isopäi'ünä̧ Dio-mä̧ eseu repeäkuäwä i̧sa̧ ja̧'a̧ttü̧.

⁹ Dio, ujuturu eseu repeümä̧, I̧tti̧ chu̧'ä̧kua̧ Jesucrito-rü pi̧jä̧ra̧'a̧ we'inü̧. Jua'amä̧ o'katoi'ünä̧, jua̧u̧nä̧tä̧ kkä̧kuä̧wä̧ i'ko tu̧ju̧nä̧ri̧ya̧rü̧ pä'ü.

¹⁰ Pi̧yȩ ja̧'a̧, eseu repe'ü jȩi̧nü̧mä̧: Ji̧nä̧somä̧, ä̧kuo̧mȩnä̧mä̧ ujutumä̧, Dio-rü eseu repe'okotü pinä̧tü̧jä̧; pärokua'aku chutätä ujuturu eseu repe'ü, I̧tti̧rü̧ we'inü̧, jua̧u̧ usurä ȩmä̧u̧ ji̧yȩnä̧tä̧ ujutu suronä̧ jȩtü̧ mikuäwächa pä'ü.

¹¹ Chawaruwä chi̧jä̧wa̧tü̧, isopäi'ünä̧ Dio ja̧'wa̧nü̧ ujuturu eseu repeinüttü̧mä̧, ja̧'wa̧ta̧nü̧ ujutu'i̧nä̧ yotukunä̧ eseu repetäkuäwa pä'ü ja̧'a̧.

¹² Dio-mä̧ ya̧tȩ'i̧nä̧, yorisotä tookoku ja̧'a̧nä̧; ujutu yotükupünä̧ eseu repetäkuäuttümä̧, Dio-mä̧ ujutunä̧ kkü̧ ja̧'wa̧ta̧nü̧ Jua̧u̧ eseu repeü'i̧nä̧ ujutunä̧ kkä̧kua̧'a̧.

¹³ Pi̧yȩttü̧ topü wo̧juä̧tü̧jä̧, Chutä Dio-ku kkä̧tü̧jä̧ pä'ümä̧; ja̧'wa̧ta̧nü̧ Chutä Dio'i̧nä̧ ujutuku kkü̧ pä'ümä̧: Dio-ttü ichinü̧ Epíritu-ru ujuturu iyinomȩttü̧.

¹⁴ Ja̧'wa̧ta̧nü̧ ujutujä̧ topinä̧tü̧ ta'attü̧, Jä'o Dio-mä̧, I̧tti̧rü̧ pi̧jä̧ra̧'a̧, surojüttü rä'epü ikua pä'ü we'inü̧, pä'ü ji'äwätümä̧.

¹⁵ Ya̧tȩ, Jesú-ru Dio I̧tti̧ ja̧'a̧ pä'ü ji'äurumä̧, Dio'i̧nä̧ jua̧u̧nä̧tä̧ kkü̧; pärokua'aku jua̧u̧ ttü̧ja̧sa̧'i̧nä̧ Dio-ku kkü̧.

¹⁶ Ja̧'wa̧nü̧ Dio ujuturu eseu repeü wo̧jui̧'i̧nü̧'kotümä̧, Jua̧u̧ru̧tä̧ esetinä̧tü̧jä̧. Dio-mä̧ eseu repeäkuäwätä wa̧ pä'ü. Ja̧'wa̧nü̧ ja̧'a̧ttü̧ eseu repeäkuäwänä̧ kkü̧mä̧ Dio-ku kkü̧ ja̧'wa̧ta̧nü̧ Dio'i̧nä̧ jua̧u̧nä̧tä̧ kkü̧.

¹⁷ Isopäi'ünä̧ tawaruwä tü̧jä̧wa̧tü̧rü̧ eseu repe'ü tü̧ja̧ku̧ttü̧mä̧ ja̧'wa̧ta̧nü̧ Jesucrito pi̧jä̧ttü̧ ü̧ji̧nü̧ta'anü̧ tü̧ja̧ku̧ttü̧mä̧, Jesucrito pi̧jä̧ ttü̧ja̧ o'katoi'ünä̧rü̧ ü'ojo'ü mo̧ro̧ päi'omȩnä̧mä̧ ye'ekuokotü täkuotüjä̧.

¹⁸ Ya̧tȩ eseu repeäkuäwä kku̧nä̧rü̧mä̧, yekuäkuäwämä̧ jui̧'a̧. Ja̧'wa̧nü̧ ja̧'a̧ttü̧ eseu repeäkuäwä kko̧mȩmä̧, yekuäkuäwämä̧ juiya'a. Isopäi'ünä̧ eseäkuäwämä̧, yekuäkuäwä ya'opü iku. Ja̧'wa̧nü̧ jo̧mȩttü̧ ya̧tȩ, Dio ro̧ȩpä̧kua̧sä̧ pä'ü yekuttümä̧, eseu repeäkuäwä jui̧'a̧ ja̧'a̧.

¹⁹ Ujutumä̧ tawaruwä tü̧jä̧wa̧tü̧rü̧ eseu repe'ätüjä̧. Jua'amä̧, ä̧kuo̧mȩnä̧mä̧ ujuturu eseu Dio repeina̧'a̧ttü̧.

²⁰ Ja̧'wa̧nü̧ ja̧'a̧ttü̧, ya̧tȩ «Dio-rü eseu repe'üsä» pä'ükkä̧nü̧, a̧wa̧ru̧wa̧ i̧jä̧wa̧rü̧ eseu repeü juiyüttümä̧, yapareäkuäwä i̧sa̧ ja̧'a̧. Isopäi'ünä̧ tawaruwä ti̧jä̧wa̧ totäkuru'i̧nä̧ eseu repetoka'amä̧ ¿toku eseu repetäkua'ajä̧ttü̧, Dio-rümä̧, totokokurumä̧?

²¹ Ja̧'wa̧ta̧nü̧ Jua̧u̧mä̧ pi̧yȩ jȩpü̧ kkä̧kuä̧wä̧ weinä̧u̧jä̧: «Dio-rü eseu repe'ümä̧, a̧wa̧ru̧wa̧ i̧jä̧wa̧rü̧'i̧nä̧ eseu repe'i,» jü̧nä̧.