1 Corintios 9 - Nuevo Testamento Uwotjüja

Apóto pättäku ȩmü̧ wȩnȩ

¹ ¿Ttümä̧ apóto-mä̧kü̧sä̧? ¿Ttümä̧ unichä̧rü̧ chu̧ju̧nä̧ rä'epü ikuokoku pinü̧sä̧? ¿Ttümä̧ Tu̧ru̧wa̧ Jesucrito-rü topokü pinü̧sä̧? ¿Ukutumä̧ Tu̧ru̧wa̧ a̧'kua̧ iweyenä̧ chaditäwämä̧kü̧jä̧?

² Kkorotümä̧, Apóto-mä̧ wokü pätta'anä̧; ukuturumä̧ isopäi'ünä̧ apóto wa̧sä̧, isopäi'ünä̧ ukutu Jesucrito-rü kuesetätuku ja̧'a̧ i̧jȩpü̧mä̧, ttü apóto cha'a.

³ Ttürü suronä̧ pä'ä'türü pi̧yȩ pä'üsä:

⁴ ¿Ujutumä̧ tu̧kuȩ tukua pä'ümä̧, tawa pä'ümä̧ wokotüjä̧ tä̧jí̧,

⁵ ja̧'wa̧ta̧nü̧ kkorotü apótore jü̧ta̧'a̧nü̧, Tu̧ru̧wa̧ ü̧jä̧wa̧tü̧ jü̧ta̧'a̧nü̧, Cefa jü̧'a̧nü̧mä̧, Crito-rü esetäjuru tirekua päi'ünä̧ tȩpa̧ pä'ümä̧ jui'ätüjä̧ tä̧jí̧?

⁶ ¿Juiyo ujutu Bernawé-kutätí̧, tu̧kuȩ tukua pä'ü aditü usurä ȩmä̧wä̧tü̧mä̧?

⁷ ¿Ditä jä̧'i̧jä̧ttü̧, su̧ro̧do̧u̧ i̧sa̧ kkä̧nü̧, u̧kuȩ'i̧nä̧, iäre'i̧nä̧ mitäu kkü̧mä̧? ¿Ditä jä̧'i̧jä̧ttü̧ uwa pättiyu adita'anä̧, jua̧u̧ u̧wä̧ju̧ kuokümä̧? ¿Ditä jä̧'i̧jä̧ttü̧ oweja-tü̧rü̧ tta̧wä̧ra̧'a̧nä̧, oweja-tü̧ ttatate isoya awokümä̧?

⁸ Pi̧yȩmä̧, ttütä pä'ümä̧ pä'oküsä, pi̧yȩmä̧ ja̧'wa̧nü̧tä̧ wo̧juȩti̧yä̧ku̧ pä'üsä weäwä wȩnȩmä̧.

⁹ Isopäi'ünä̧ weäwä wȩnȩ Moisé i̧wȩyu̧ti̧nü̧ pa̧'a̧nü̧ pä'a: «päkäyä, trigo pättü pojäwächünä̧ jȩa̧'a̧ jakuänä̧mä̧, u̧kuȩmä̧ ppäi ttukuepärü,» ja̧'wa̧nü̧ pä'amä̧, Dio-mä̧ pä̧kä̧yü̧rü̧ ja̧'a̧tä̧ topü pä'ümä̧, päoka'a,

¹⁰ Jua'amä̧ ujuturu pä'ü pä'a. Isopäi'ünä̧ weäwä wȩnȩmä̧ ujuturu ja̧'a̧tȩ'ü̧ i̧wȩyu̧ti̧nü̧ ja̧'a̧ttü̧. Ja̧'wa̧nü̧ ja̧'a̧ttü̧ rȩjȩ i̧sa̧ppȩ päi'ünä̧ jȩpü̧'i̧nä̧, trigo pojü'i̧nä̧, u̧wä̧ju̧ ttȩma̧ pä'ü ja̧'a̧tȩ'ü̧ jȩpä̧tü̧.

¹¹ Ja̧'wa̧nü̧ ja̧'a̧ttü̧, ujutu Epíritu jäwä ukutunä̧ tu̧ju̧ni̧na̧'a̧mä̧, ukutumä̧ ujuturu rekuä rü̧jü̧ kuiyätukua pä'ü wotüjä̧.

¹² Kkorotü'i̧nä̧, ukututtü pi̧yȩ pädü ttȩmä̧'i̧ja̧'a̧mä̧, juȩnȩ yabonä̧ ujutumä̧ tȩma̧ pä'ü ja̧'a̧. Ja̧'wa̧nü̧ ja̧'a̧nä̧'i̧nä̧, ujutumä̧ pi̧yȩttü̧mä̧ tȩmo̧ka̧'a̧ usurä ȩmä̧wä̧'i̧jä̧tü̧jä̧, Crito i̧wȩnȩ jareü jitäu ttoepü juiyäkua'anü̧ pä'ü.

¹³ ¿Ukutumä̧ jerupätüjä̧ tä̧jí̧, ukuo jäwänä̧ aditätümä̧, Dio-rü ukuokuäkuäwodettü kuä̧nü̧ kkä̧tü̧ pä'ümä̧. Ja̧'wa̧ta̧nü̧ altar pättomȩ aditätümä̧, altarttü kuä̧nü̧ kka̧kuä̧tü̧ pä'ümä̧?

¹⁴ Ja̧'wa̧nü̧ jü̧ta̧'a̧nü̧, Tu̧ru̧wa̧'i̧nä̧ we'inü̧, Dio i̧wȩnȩ ji'äwätürümä̧, jua̧u̧ jittäuttü kuä̧nü̧ ttü̧ja̧kua̧ pä'ü.

¹⁵ Ja̧'wa̧nü̧ ja̧'a̧nä̧, ttümä̧ pi̧yȩttü̧mä̧ jä'epokü pä'ijüsä ja̧'wa̧ta̧nü̧ kuiyätukuattü pä'ü'i̧nä̧, pi̧yȩmä̧ chi̧wȩyu̧to̧kü̧. Ja̧'wa̧nü̧ ja̧jü̧ jueimä̧ 'koru juodächatä pä'üsä, ya̧tȩ'i̧nä̧ ttürü iyäwi'inü̧mä̧ 'choipü juiyäkua'anü̧.

¹⁶ Ja̧'wa̧ta̧nü̧ ttümä̧ jareü wȩnȩ jidäwa'amä̧ eseäkuäwoküsä, isopäi'ünä̧ jua̧u̧mä̧ rekuä rü̧ji̧yä̧ku̧ weina̧'a̧ttü̧. ¡Jua̧u̧ jareü wȩnȩ jidäwoka'a jü̧ttü̧mä̧, isottü̧ ttüwe! pä'äusä.

¹⁷ Ja̧'wa̧nü̧ ja̧'a̧ttü̧, eseunu̧ jua̧u̧ jidäuttümä̧, mikuä chȩmä̧kua̧sä̧; ja̧'wa̧nü̧ ja̧'a̧nä̧ chesewoka'a jȩchü̧ttü̧mä̧, weäwi'ina̧'a̧tä̧ jȩpü̧sä̧.

¹⁸ ¿Ja̧'wa̧nü̧ ja̧'a̧mä̧, ti̧yȩjä̧ttü̧ ttü mikuä chȩmä̧kuȩmä̧? Jua̧u̧mä̧ Crito weinü̧ mipponä̧ jidäutä ja̧'a̧, jareü wȩnȩ jidäwomȩnä̧ mikuä chȩma̧ pä'ü ji̧nü̧mä̧ chȩmo̧ka̧'a̧tä̧.

¹⁹ Ya̧tȩ'i̧nä̧, esclavo chunä̧ u̧mü̧wä̧ya̧mä̧ choka'anä̧, o'katoi'ünä̧ esclavo jü̧nä̧ ttu̧mü̧wä̧ya̧tä̧ juo'ächinü̧sä̧, rekuätü Jesucrito-rü esetü ttikunä̧ jidäwa pä'ü.

²⁰ Judío ttü̧'kä̧tȩnä̧ chü̧jo̧mȩnä̧mä̧, judío i̧sa̧ jü̧nä̧tä̧ kkü̧sä̧; juätü'i̧nä̧ Crito-rü esetü ttikua pä'ü. Moisé weäwä wȩnȩnä̧ kka̧kuä̧tü̧rü̧ (ttütämä̧ weäwä wȩnȩnä̧ chü̧jo̧ka̧'a̧nä̧) weäwä wȩnȩnä̧ chü̧ja̧'a̧ 'kua̧rü̧nä̧ kkü̧sä̧, weäwä wȩnȩnä̧ kka̧kuä̧tü̧ Crito-rü esetü ttikua pä'ü.

²¹ Ja̧'wa̧ta̧nü̧ Moisé weäwä wȩnȩ juiyünä̧ kka̧kuä̧tü̧rü̧mä̧, ttü'i̧nä̧ weäwä wȩnȩ juiyünä̧ kkü̧sä̧ (jua'akumä̧ Dio weinü̧ wȩnȩ, Crito weäwä wȩnȩ juiyünä̧mä̧ chü̧jo̧ka̧'a̧nä̧), weäwä wȩnȩ juiyünä̧ kka̧kuä̧tü̧, Crito-rü esetü ttikua pä'ü.

²² Juiyupätuku chü̧jo̧mȩnä̧'i̧nä̧, juiyupätü 'kua̧rü̧nä̧ kkü̧sä̧, juätü juiyupätü Crito-rü esetü ttikua pä'ü; o'katoi'ünä̧ ttü̧jü̧'a̧kuä̧tä̧ kkü̧sä̧, esetätü pünä̧ esetü ttikua pä'ü.

²³ Pi̧yȩ o'kajuiyünä̧ jȩpü̧sä̧, jareü wȩnȩ jäwänä̧, jua̧u̧ jäwä ji̧nä̧ ji̧yȩtȩnä̧ cha pä'ü.

²⁴ Isopäi'ünä̧ wo̧juä̧tü̧jä̧, joäkuäwä isotü jottomȩnä̧mä̧, o'katoi'ünä̧tä̧ jopätü pä'ü ja̧'wa̧nü̧ ja̧'a̧nä̧ ya̧tȩtä̧ ja̧'a̧ joäji mikuä premio pättü ȩmi̧pü̧mä̧. Ja̧'wa̧nü̧ jü̧ta̧'a̧nü̧, ukutu'i̧nä̧ premio pättü kuȩmä̧tu̧ku̧nä̧ päi'ünä̧ jopätukui.

²⁵ O'katoi'ünä̧ järeäkuäwättü tti̧rȩbȩwa̧ pä'ätümä̧, o'kajuiyütä ro̧'ȩkuä̧tü̧; isopäi'ünä̧, surojuoächü corona pättü ttȩma̧ pä'ü ja̧'a̧nä̧; ujutumä̧ corona pättü surojuoächokü tȩmä̧kuo̧tü̧jä̧.

²⁶ Ja̧'wa̧nü̧ ja̧'a̧ttü̧ ttümä̧, päte'üra̧'a̧tä̧mä̧ jopoküsä; ja̧'wa̧ta̧nü̧ ja̧'a̧tä̧ isoppanä̧ 'ta'tatta'a 'kua̧rü̧nä̧mä̧ rowäwoküsä.

²⁷ Ja̧'wa̧nü̧ ja̧jü̧ jueimä̧, cha̧mü̧nä̧ 'ta'tapäkuäu, ukuotünä̧ jȩpä̧kuä̧u̧sä̧, ttütä'i̧nä̧ kkorotürümä̧ ppädädä'ija'anä̧, tode'ächü 'kua̧ra̧'a̧ pä'ü.