1 Corintios 8 - Nuevo Testamento Uwotjüja

Täkü ujutumä̧ Tü̧ä̧nä̧wa̧rü̧ kku̧nä̧rä̧tü̧jä̧

¹ Ja̧'wa̧ta̧nü̧ ttu̧kuȩ, ttü̧ä̧nä̧wo̧tü̧ tti̧mi̧nä̧ ukuoku jȩä̧kuä̧wä̧ tü'kümä̧, isopäi'ünä̧ o'katoi'ünä̧tä̧ wo̧juä̧tü̧jä̧. Ja̧'wa̧nü̧ ja̧'a̧nä̧, wo̧juä̧wä̧mä̧ ukuo tettäunä̧tä̧ juoepü, pärokua'aku eseäkuäwämä̧, äräbe'ü wȩnȩ ja̧'a̧.

² Isopäi'ünä̧tä̧, ya̧tȩ rü̧ȩnä̧ wo̧jua̧sä̧ pä'ü amükuädüttümä̧, isopäi'ünä̧mä̧ jȩru̧pa̧ ja̧'a̧.

³ Ja̧'wa̧nü̧ ja̧'a̧nä̧, ya̧tȩ Dio-rü eseu repe'ümä̧, Dio-tä u̧wo̧juä̧ku̧.

⁴ Ja̧'wa̧nü̧ ja̧'a̧ttü̧, ttu̧kuȩ ttü̧ä̧nä̧wo̧tü̧ tti̧mi̧nä̧ ukuokuä'chü jȩttü̧ tü'kümä̧, jua̧u̧mä̧ pi̧jä̧ttü̧mä̧ mikuäwokü pä'ü wo̧juä̧tü̧jä̧, Dio-mä̧ ya̧tȩtä̧ ja̧'a̧ pä'ü tu̧wo̧jua̧'a̧ttü̧.

⁵ Yotukupünä̧mä̧, mo̧ro̧jä̧nä̧ttü̧'i̧nä̧, pi̧jä̧nä̧ttü̧'i̧nä̧ ttü̧ä̧nä̧wa̧ dio-tü̧ pä̧ttä̧u̧ ttü̧ja̧kua̧'a̧nä̧ (iweye pättüta'anü̧, rekuätü kka̧kuä̧tü̧ dio-tü̧'i̧nä̧, tturuwotü'i̧nä̧, jü̧nä̧),

⁶ ja̧'wa̧nü̧ ja̧'a̧nä̧, ujuturumä̧ ya̧tȩtä̧ ja̧'a̧ tü̧ä̧nä̧wa̧ Dio-mä̧, Tä'omä̧, o'kajuiyünä̧ jua̧u̧ aditäwätä ja̧'a̧ ja̧'wa̧ta̧nü̧ ujutu'i̧nä̧ jua̧u̧ru̧ pä̧wä̧rü̧jo̧mȩnä̧tä̧ kka̧kuä̧tü̧jä̧. Ja̧'wa̧ta̧nü̧ Tu̧ru̧wa̧mä̧, ya̧tȩtä̧ ja̧'a̧ Jesucrito-tä, jua̧u̧nä̧tä̧tä̧ o'kajuiyünä̧ uwäbe'inü̧, ja̧'wa̧ta̧nü̧ ujututä'i̧nä̧.

Amükuädü Eseu kkä̧kuä̧wä̧ wȩnȩ

⁷ Ja̧'wa̧nü̧ ja̧'a̧nä̧ pi̧yȩ wȩnȩmä̧ o'katoi'ünä̧mä̧ wo̧juo̧ko̧tü̧. Yotukunä̧mä̧, weye juo'inü̧'kotü ttü̧ä̧nä̧wo̧tü̧rü̧ ukuokuäkuäwa'a idepä kuätü; ja̧'wa̧ta̧nü̧ tta̧mü̧kuädüttü, jo̧mȩnü̧ ttoka'amä̧, jitütä surojuo'ekuätü.

⁸ Ja̧'wa̧nü̧ ja̧'a̧ttü̧, tu̧kuȩ tukú jäwättümä̧ Dio-mä̧ ȩmo̧ko̧ujä̧; tu̧kuȩ tukuajá pä'ü'i̧nä̧ adiwämä̧ isotü pokotüjä̧, tukú juiyajá pä'ü'i̧nä̧ suropokotüjä̧.

⁹ Ja̧'wa̧nü̧ ja̧'a̧nä̧, ukutu unichä̧rü̧ jȩpü̧ ku̧jä̧tu̧ku̧mä̧, jiyüpätürü kkä'ü kuikuätuku juiyünä̧ kka̧kuä̧tu̧kui̧.

¹⁰ Isopäi'ünä̧, ukú wo̧jua̧rü̧, ttü̧ä̧nä̧wo̧tü̧ tti̧mi̧nä̧ ukuokuäkuäwomȩ mesa isodä kuä̧nü̧ ku̧'a̧'a̧, kui̧jä̧wa̧ juiyu̧pa̧ toüttümä̧, ¿jua̧u̧'i̧nä̧ juȩnȩmä̧ pä̧wä̧rü̧jä̧chi̧'ä̧ku̧ pä̧mä̧dü̧mä̧, jua̧u̧ ukuoka'a jä̧kua̧'a̧?

¹¹ Ja̧'wa̧nü̧ jo̧mȩnä̧, ukú ku̧wo̧juä̧ji̧nä̧mä̧, kui̧jä̧wa̧ ji̧yü̧pa̧mä̧, toe'ächünä̧ jȩpü̧jä̧, jua̧u̧'i̧nä̧ Crito mitäu 'korujuoächinä̧ku̧ru̧.

¹² Ja̧'wa̧nü̧ jȩpü̧, tawaruwä ti̧jä̧wa̧tü̧ jiyupätü ttu̧wo̧juö̧ surojuo'epätüjä̧ ja̧'wa̧nü̧ jȩpü̧mä̧ Crito üjü'kokü jȩpä̧tü̧jä̧.

¹³ Ja̧'wa̧nü̧ ja̧'a̧ttü̧, chu̧kuȩ jäwänä̧ chi̧jä̧wa̧rü̧ surojünä̧ ma̧ä̧chü̧nä̧ jȩchü̧ttü̧mä̧, idepämä̧ yorisotä chuku juiyü'anü̧ ja̧'a̧.