1 Corintios 7 - Nuevo Testamento Uwotjüja

Ttirekuarü kka̧kuä̧tü̧rü̧ ro̧ȩpi̧nü̧ wȩnȩ

¹ Wȩyu̧tu̧ jä'epü kuä̧ju̧kuä̧jä̧tu̧ku̧ jä̧jí̧ chädätäu̧jä̧. Ya'utettü ubomä̧ isajuku ü'käu juiyüttütä adiwaja'a.

² Ja̧'wa̧nü̧ ja̧'a̧nä̧, nä̧tü̧rü̧, u̧mä̧tü̧rü̧ jȩä̧'chä̧kuä̧wä̧nä̧ pettächächomȩttü̧, yotukunä̧mä̧ kuirekuamü̧rü̧ kku̧nä̧rä̧tu̧kui̧, pärokua'aku nä̧tü̧'i̧nä̧ kuirekuorü kku̧nä̧rä̧tu̧kui̧.

³ Ja̧'wa̧nü̧ ja̧'a̧ttü̧, kkirekuomä̧ irekuakutä ä'a pä'ü ja̧'a̧, pärokua'aku irekuamä̧ kkirekuokutä kkä'a pä'ü ja̧'a̧.

⁴ Irekuamä̧ kka̧mü̧nä̧ pa̧ja̧tü̧ kkidepänä̧mä̧ we'äwokoju, kkirekuotä we'ü; pärokua'aku ubo a̧mü̧nä̧ pa̧ja̧tü̧ idepänä̧mä̧ we'äwokü, irekuatä ja̧'a̧ we'äjumä̧.

⁵ Ja̧'wa̧nü̧ ja̧'a̧ttü̧ jȩ'kuä̧kuä̧wä̧tu̧kua̧ pä'ü kuirekuorü, kuirekuarü pä̧wä̧rü̧jo̧mȩnä̧mä̧ ya̧kuo̧kuä̧rä̧kuä̧wä̧tu̧kuä̧ ja̧'wa̧nü̧ ja̧'a̧nä̧ Dio-rü rekuonä̧nü̧ ukuokutä jua̧u̧mä̧ ro̧'ȩkuä̧tu̧kui̧, jua'a'i̧nä̧ ä'kanä̧ esekui'ü'kotütä, jua̧u̧ o'ka'a pä'äjita'anü̧ ku̧ja̧kuä̧mä̧tu̧kua̧. Pärokua'aku rekuo jȩ'kuä̧kuä̧tu̧kuo̧ka̧'a̧ ku̧ja̧kuä̧tu̧ku̧ttü̧'i̧nä̧ Satanás weomȩnä̧ surojuokuächätukuä.

⁶ Ja̧'wa̧nü̧ ja̧'a̧nä̧, pi̧yȩ o'kajuiyünä̧ pädümä̧ ro̧'ȩpü̧tä̧ pädäu̧jä̧, weäwä wȩnȩ jä̧'i̧jü̧'a̧nü̧mä̧kü̧tä̧.

⁷ Ttütämä̧, o'katoi'ünä̧ u̧mä̧tü̧mä̧ ttü chü'anü̧tä̧ kuätukua pä̧wä̧rü̧jä̧ku̧sä̧; ja̧'wa̧nü̧ ja̧'a̧nä̧ Dio-mä̧ yotukunä̧rü̧ tti̧mi̧ku̧ pünä̧ ttü̧ja̧ pä'ü iyinü̧, yotukunä̧mä̧ i̧mi̧ku̧nä̧ tta'anä̧, kkorotütä i̧mi̧ku̧nä̧ jü̧nä̧.

⁸ Ttümä̧ pä̧wä̧rü̧jä̧ku̧sä̧, ttirekua to'ätü'i̧nä̧, rȩkua̧mü̧'i̧nä̧, tti̧rȩkua̧mü̧rü̧ ttȩmo̧ka̧'a̧ ttü̧ja̧ pä'ütä; Ja̧'wa̧nü̧ ja̧'a̧nä̧ Dio-mä̧ yotukunä̧rü̧ jȩpü̧ ttü̧jä̧kuȩmä̧ iyinü̧, yotukunä̧mä̧ pi̧yȩ pädü jȩttü̧nä̧, kkorotümä̧ kkoro jȩttü̧nä̧, jü̧nä̧.

⁹ Ja̧'wa̧nü̧ ja̧'a̧nä̧, kua̧mi̧ 'kikuächi'ü juiyünä̧ jü̧ttü̧mä̧, ü'käwi'ü kka̧kuä̧tu̧kui̧ jakuänä̧mä̧ usurä kuȩmä̧wä̧tu̧kuä̧, ja̧'wa̧nü̧tä̧ adiwa'a.

¹⁰ Ja̧'wa̧nü̧ ja̧'a̧nä̧ ttirekuorü ȩmä̧wi̧nä̧tü̧rü̧mä̧, Tu̧ru̧wa̧mä̧ we'ü, ttümä̧ wedokü: Kkirekuorümä̧ jaroji'a pä'ümä̧ juiya'a, pä'ü.

¹¹ Ja̧'wa̧nü̧ ja̧'a̧nä̧, kkirekuorü jaropi'äjumä̧, kka̧ra̧rü̧mä̧ kuȩmo̧ka̧'a̧tä̧ kkä̧wi̧ ja̧'wa̧nü̧ jo̧ka̧'a̧ jü̧ttü̧mä̧ pä'äjita'anü̧ kuirekuoku eseku iku kkä̧wi̧; ja̧'wa̧ta̧nü̧ ubo'i̧nä̧ kuirekuarümä̧ jaro'kui'ä.

¹² Ja̧'wa̧ta̧nü̧ kkorotürü pä'üsä, ttütätä, Chu̧ru̧wa̧mä̧ päokü ja̧'a̧nä̧: Ya̧tȩ ta̧wa̧ru̧wa̧ ti̧jä̧wa̧ Dio-rü esetokojuru irekua ü̧ja̧'a̧, juäju repe'ü kkü̧jü̧ttü̧mä̧, juäjurumä̧ jaro'kui'ä.

¹³ Ja̧'wa̧ta̧nü̧, yajute Dio-rü esetokürü kkirekuo jü̧nä̧ kkü̧ja̧'a̧, jua̧u̧ repe'ü ü̧jü̧ttü̧mä̧, käkuädi'ärü.

¹⁴ Isopäi'ünä̧ kkirekuo Dio-rü esetokümä̧, juäju irekua Dio-rü esetäjunä̧ surojü jui̧'a̧ jü̧nä̧ juo'ächü; ja̧'wa̧ta̧nü̧ isaju Dio-rü esetokoju ü̧jä̧kua̧mä̧, kkirekuo Dio-rü esetünä̧ surojü jui'ächächäju. Ja̧'wa̧nü̧ jo̧ka̧'a̧ jü̧ttü̧mä̧, kui̧tti̧mü̧tu̧ku̧mä̧ suropätütä jü̧nä̧ wotü, ja̧'wa̧nü̧ ja̧'a̧nä̧ jitämä̧ surojü jui'ätü isotü ja̧'a̧.

¹⁵ Ja̧'wa̧nü̧ ja̧'a̧nä̧, ubo ja̧ pä'ü'i̧nä̧, isaju ja̧ pä'ü'i̧nä̧, Dio-rü esetokü ja̧'a̧ jaroi'a, päjüttümä̧, jaropi'i. Ta̧wa̧ru̧wa̧ ti̧jä̧wa̧ jü̧ttü̧'i̧nä̧, tijäwaju jü̧ttü̧'i̧nä̧ jua̧u̧ttü̧ rä'opächätü. Isopäi'ünä̧ Dio-mä̧ wȩnȩ juiyünä̧ tü̧ja̧ pä'ü woinä̧u̧jä̧, jua̧u̧ surojü kkȩdä̧ra̧tü̧ pä'ümä̧ wooko̧u̧ pinä̧tü̧jä̧.

¹⁶ Isopäi'ünä̧ ¿Toku ku̧wo̧jua̧'a̧jä̧ttü̧ ukú isajumä̧, kuirekuorü surojüttü ü̧ji̧pü̧nä̧ ppädädäkuajusä 'kua̧ra̧'a̧ pä'ümä̧? ¿Ja̧'wa̧ta̧nü̧ toku, ku̧wo̧jua̧'a̧jä̧ttü̧ uku kkirekuomä̧, chirekuarü surojüttü kkü̧ji̧pü̧nä̧ ppä̧dä̧dä̧kua̧sä̧ 'kua̧ra̧'a̧ pä'ümä̧?

¹⁷ Ja̧'wa̧nü̧ ja̧'a̧nä̧, yotukunä̧rü̧ Tu̧ru̧wa̧ jȩ'kuä̧tu̧ku̧'a̧nü̧ jü̧ iyinü̧'a̧kuä̧ ja̧'wa̧ta̧nü̧ Dio ukuturu woinü̧ ku̧ja̧kui̧nä̧tu̧ku̧ta̧'a̧nü̧, jȩpü̧ kka̧kuä̧tu̧kui̧: Pi̧yȩtä̧tä̧, we'üsä o'katoi'ünä̧ igresia wotürü.

¹⁸ ¿Ya̧tȩ, circuncisión pättü jȩpä̧kuä̧wa̧rü̧ Dio woina̧'a̧ jü̧ttü̧mä̧? Circuncisión jȩpä̧kuä̧wa̧tä̧ kkä̧wi̧. ¿Ja̧'wa̧ta̧nü̧ circuncisión jȩpä̧kuä̧wo̧kü̧rü̧ woina̧'a̧ jü̧ttü̧mä̧? Circuncisión pättü jȩ'kuä̧kuä̧wo̧ka̧'a̧tä̧ kkä̧wi̧.

¹⁹ Isopäi'ünä̧ ji̧nä̧so ji̧yȩtä̧ ukuo kkü̧mä̧ Dio weinü̧ wȩnȩtä̧ ja̧'a̧ ja̧'wa̧ta̧nü̧ circuncisión jȩä̧kuä̧wä̧'i̧nä̧, jȩä̧kuä̧wo̧kü̧'i̧nä̧ iso jäwämä̧kü̧ ja̧'a̧.

²⁰ Yotukunä̧, Dio woinü̧ ku̧ja̧kui̧nä̧tu̧ku̧'a̧kuä̧, kka̧kuä̧tu̧kui̧.

²¹ ¿Esclavo pättäku jü̧nä̧ ku̧ja̧'a̧ woinü̧ttü̧mä̧? kua̧'kua̧ tta̧kuȩkuä̧; ja̧'wa̧nü̧ ja̧'a̧nä̧, jua̧u̧ttü̧ räkuopächü'anü̧ jü̧ttü̧mä̧, kusu'anü̧ ja̧'a̧.

²² Isopäi'ünä̧, esclavo jü̧nä̧ ttu̧mü̧wä̧ya̧ wa̧rü̧ Tu̧ru̧wa̧ woinä̧ku̧ jü̧ttü̧mä̧, Tu̧ru̧wa̧tä̧ rä'epü ikuinä̧ku̧ ja̧'a̧; ja̧'wa̧nü̧ jü̧ta̧'a̧nü̧, u̧ru̧wa̧ to̧'a̧ esclavo pättäku wokürü woinä̧ku̧ jü̧ttü̧mä̧, jitämä̧ Crito-tä ja̧'a̧ esclavo jü̧nä̧ u̧ru̧wa̧mä̧.

²³ Ukutumä̧ Dio mitäu ȩmi̧nä̧u̧jä̧; Ttü̧ja̧ ttu̧wo̧juȩtä̧u̧ esclavo pä̧ttä̧u̧ jü̧nä̧ juokuächätukuä.

²⁴ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, Dio ukuturu woinü̧ ku̧ja̧kui̧nä̧tu̧ku̧'a̧kuä̧ kka̧kuä̧tu̧kui̧.

²⁵ Jitü, nä̧tü̧ Tti̧rȩkua̧mü̧ku̧ ü'käwokotü ttütü'kü, Tu̧ru̧wa̧ weinü̧mä̧ jui̧'a̧sä̧; ja̧'wa̧nü̧ ja̧'a̧nä̧ ttü päda'aku pä'üsä, Tu̧ru̧wa̧ rȩrü̧jü̧ toinü̧nä̧ chü̧ja̧'a̧ttü̧, jua̧u̧nä̧tä̧ yaboku 'chä̧nü̧ kkä̧nü̧.

²⁶ Ttü tochomȩnä̧, yotukunä̧mä̧ ku̧jä̧tu̧kua̧'a̧ku̧tä̧, ku̧jä̧tu̧ku̧'a̧nü̧ ja̧'a̧ pä'üsä, jitä pi̧yȩ mo̧ro̧mä̧ suroja'attü.

²⁷ ¿Ttirekuarü ttü̧ja̧'a̧ jü̧ttü̧mä̧? jaro'kui'ätukuä; ¿Ttirekuarü to'ätü jü̧ttü̧mä̧? kuȩma̧ pä'ümä̧ kusätukuä.

²⁸ Ja̧'wa̧nü̧ ja̧'a̧nä̧ ku'käwätukuomȩnä̧mä̧ surojoka'anä̧; usurätä kuȩmä̧wä̧tu̧kuä̧kuo̧tü̧jä̧, kuidepätuku jäwänä̧ ja̧'wa̧nü̧ jü̧ pä'üsä pä'ü.

Dio-rü esetü kkä̧kuä̧wä̧ wȩnȩ

²⁹ Chawaruwä chi̧jä̧wa̧tü̧, ukuturu pi̧yȩ pä'üsä: täkü, mo̧ro̧mä̧ a̧'u̧ku̧nä̧tä̧ ja̧'a̧. Ja̧'wa̧nü̧ ja̧'a̧ttü̧ ttirekuarü kku̧nä̧rä̧tü̧mä̧, to'ätü 'kua̧rü̧nä̧ kka̧kuä̧tu̧kui̧;

³⁰ ja̧'wa̧ta̧nü̧ ajuäkuäwätümä̧, ajuäwokotü 'kua̧rü̧nä̧ kka̧kuä̧tu̧kui̧; ja̧'wa̧ta̧nü̧ eseäkuäwätümä̧, esewokotü 'kua̧rü̧nä̧ kka̧kuä̧tu̧kui̧; mitü ȩmü̧ kka̧kuä̧tü̧mä̧, kuiäretuku jo̧ka̧'a̧ 'kua̧rü̧nä̧ kka̧kuä̧tu̧kui̧;

³¹ Ja̧'wa̧ta̧nü̧ pi̧jä̧ jäwänä̧ eseäkuäwätümä̧, eseäkuäwokotü 'kua̧rü̧nä̧ kka̧kuä̧tu̧kui̧; isopäi'ünä̧ pi̧jä̧ jäwä totümä̧ beipächä̧kuȩ.

³² Ttümä̧ kua̧'kua̧ roekuäkuäwä juiyünä̧ ku̧jä̧tu̧kua̧ pä'üsä. Irekua to̧'a̧mä̧ Tu̧ru̧wa̧ jäwätä a̧'kua̧ ro'eku, jua̧u̧ esewomȩnä̧ ü̧ja̧ pä'ü.

³³ Ja̧'wa̧nü̧ ja̧'a̧nä̧, irekuarü kku̧nä̧rü̧mä̧ pi̧jä̧ jäwätä a̧'kua̧ ro'eku, irekua kkesewomȩnä̧ jȩa̧ pä'ü.

³⁴ Ja̧'wa̧nü̧ jü̧ta̧'a̧nü̧ ja̧'a̧, nä̧tü̧ ttirekuorü kka̧kuä̧tü̧'i̧nä̧, ttirekuorü ȩmo̧ko̧tü̧'i̧nä̧ jü̧nä̧. Kkirekuo to'aju mü̧ä̧yajumä̧, Tu̧ru̧wa̧ jäwätä kka̧'kua̧ ro'ekuäju, kka̧mü̧nä̧ kkidepä adiu tta̧'a̧rä̧kuä̧u̧nü̧'i̧nä̧ ja̧'wa̧ta̧nü̧ epíritu jäwänä̧'i̧nä̧, jü̧nä̧; ja̧'wa̧nü̧ ja̧'a̧nä̧, kkirekuorü kkä̧ju̧mä̧, pi̧jä̧ jäwätä kka̧'kua̧ ro'ekuäju, kkirekuo esewomȩnä̧ jȩja̧ pä'ütä.

³⁵ Pi̧yȩ ukuturu pädümä̧, kuiweyekuätukunä̧ ja̧ pä'ümä̧ pädokü, pärokua'aku ukuturu adiunä̧ ku̧jä̧tu̧kua̧ pä'ü pä'üsä, kkorottü'i̧nä̧ u̧wä̧mȩnä̧ Dio-rü eseu ku̧jä̧tu̧kua̧ pä'ü.

³⁶ Ya̧tȩ ittiju mü̧ä̧yaju, kkirekuorü kkȩma̧ päjü mo̧ro̧ 'kuäo'äkua, kkȩma̧ päjüttümä̧ wä̧i̧nä̧ pä̧wä̧rü̧jo̧mȩnä̧ jȩpä̧ju̧, wä̧i̧nä̧ ȩmä̧wi̧'ü̧ kka̧kuä̧tü̧, surojoka'a.

³⁷ Ja̧'wa̧nü̧ ja̧'a̧nä̧, ya̧tȩ a̧mi̧so'kinä̧ amükuädü, wȩnȩ juiyomȩnä̧, ittijuru kkirekuorü kkȩma̧ päü juiyüttümä̧, adiu jȩpü̧.

³⁸ Ja̧'wa̧nü̧ ja̧'a̧ttü̧ kkirekuorü ȩma̧ju̧ pä'ü weüttümä̧, adiu jȩpü̧; ja̧'wa̧nü̧ ja̧'a̧nä̧, kkirekuorü kkȩma̧ päü juiyüttümä̧, juȩnȩ abonä̧nü̧ adiu jȩpü̧.

³⁹ Isaju kkirekuorü kkä̧ju̧mä̧, ji̧nä̧ a̧'kua̧rä̧i̧mä̧ kkirekuoku todepaju; ja̧'wa̧nü̧ ja̧'a̧nä̧, kkirekuo toe'ächomȩnä̧mä̧, täkü todepokoju, kka̧ra̧rü̧ kkȩma̧ päjüttümä̧ ȩmä̧ju̧ ja̧'wa̧nü̧ ja̧'a̧nä̧ Tu̧ru̧wa̧rü̧ esetürü.

⁴⁰ Ja̧'wa̧nü̧ ja̧'a̧nä̧, ttü pädümä̧, rü̧ȩnä̧ eseu kkü̧jä̧kua̧ju̧ kkȩmo̧ka̧'a̧ to'aju kkü̧ji̧pü̧ttü̧tä̧, pä'üsä; Ttü'i̧nä̧ Dio i̧sa̧ Epíritu-ru kku̧nä̧rü̧sä̧ pä'ü, amükuädüsä.