1 Corintios 6 - Nuevo Testamento Uwotjüja

Dio-rü esetätü ttä'kattütä adikuätukui wȩnȩmä̧

¹ Ukututtü ya̧tȩ kka̧ra̧ igresia i̧sa̧ku̧ wȩnȩ ku̧ju̧nä̧rä̧tu̧kuo̧mȩnä̧mä̧, pi̧jä̧nä̧ttü̧ juez pättäkurumä̧ aditü ikuätukuaku pä'ümä̧ kusätuku juiyü'anü̧ ja̧'a̧. Ja̧'wa̧nü̧ jo̧ka̧'a̧ igresia i̧sa̧ juez-rü usätukui.

² ¿Ukutumä̧ kuieruwätukua'a tä̧jí̧, Dio-rü esetätütä jä̧kua̧'a̧, pi̧jä̧nä̧ttü̧ adiwomȩnä̧ wettäkuotü pä'ümä̧? ¿Tta̧'a̧nü̧ pä'ü ji̧'ki̧cha̧jü̧tä̧'i̧nä̧ adiwomȩnä̧ wekuätuku juiyünä̧ wotüjä̧ttü̧?

³ ¿Ukutumä̧, á̧gȩrȩ-rü adiwomȩnä̧ pätäkuotüjä̧ pä'ümä̧ kuieruwätukua'a tä̧jí̧? ¡Juȩnȩ, yabonä̧ pi̧jä̧nä̧ttü̧ kkä̧kuä̧wä̧mä̧ adiwomȩnä̧ pätü'anü̧ ja̧'a̧!

⁴ Ja̧'wa̧nü̧ ja̧'a̧ttü̧, pi̧jä̧nä̧ttü̧ wȩnȩ ku̧ju̧nä̧rä̧tu̧kuo̧mȩnä̧mä̧ ¿tta̧'a̧nü̧ pä'ü igresia-ttü tta̧'kua̧ ttu̧wȩnä̧ro̧ko̧u̧ru̧ wȩnȩ aditü ttikua pä'ü kusätukua'ajä̧ttü̧?

⁵ Pi̧yȩmä̧ dä'ä ttukuätukua pä'ü pädäu̧jä̧: ¿Ukutu Dio-rü esetinä̧tü̧ttü̧mä̧ juiyo ya̧tȩ'i̧nä̧ toa'a tä̧jí̧, wȩnȩ jo̧mȩnä̧ wo̧juȩku̧nä̧ wȩnȩ aditü ikumä̧?

⁶ ¡Suro Dio-rü esetinä̧tü̧tä̧mä̧ rowäkuäwokotüjä̧, Dio-rü esetokotü wȩnȩ aditü ikuäwä isotü ttä'kattü'i̧nä̧ rowäkuäu 'chä̧tü̧jä̧!

⁷ Ja̧'wa̧nü̧ ja̧'a̧ttü̧, kurowäwätukuomȩnä̧mä̧, täkü surojünä̧ jȩpä̧tü̧jä̧ ¿Tta̧'a̧nü̧ pä'ü wä̧i̧nä̧ usurä ȩmä̧wä̧tü̧jä̧ pä'ü kuamükuädätukuoka'ajä̧ttü̧? ¿Tta̧'a̧nü̧ pä'ü wä̧i̧nä̧ ttüyaparewä̧u̧jä̧, pä'ü kuamükuädätukuoka'ajä̧ttü̧? Ja̧'wa̧nü̧ jȩ'kuä̧tu̧ku̧ttü̧mä̧ kkorottü'i̧nä̧ abonä̧nü̧ rü̧ȩnä̧ mikuäwa'a.

⁸ Ja̧'wa̧nü̧ ja̧'a̧nä̧, nä̧u̧kuä̧rä̧kuä̧wä̧mä̧, ttawaruwärü suronä̧ jȩä̧kuä̧wä̧mä̧ mikuäwokü ja̧'a̧. Ja̧'wa̧nü̧ ja̧'a̧nä̧, jua̧u̧tä̧tä̧ jȩpü̧ kka̧kuä̧tü̧jä̧ Dio-rü esetätümä̧.

⁹ ¿Ukutumä̧ juiyo jerupätüjä̧ tä̧jí̧, suronä̧ jȩpä̧tü̧mä̧, ru̧wa̧ Dio weomȩmä̧ dodettokäkuotü pä'ümä̧? Kua̧mü̧nä̧mä̧ kuyapareäkuäwätukuä: nä̧tü̧rü̧ jȩpä̧'chä̧tü̧'i̧nä̧, ttü̧ä̧nä̧wo̧tü̧rü̧ kku̧nä̧rä̧'chä̧tü̧'i̧nä̧, tti̧rȩkua̧mü̧ pokotüku jȩpä̧'chä̧tü̧'i̧nä̧, u̧mä̧tü̧ nä̧tü̧ jü̧nä̧ jȩ'pä̧chä̧kuä̧wä̧tü̧'i̧nä̧, kkawaruwajuku a̧wa̧ru̧wa̧ku̧ jȩpä̧'chä̧kuä̧wä̧tü̧'i̧nä̧,

¹⁰ nä̧u̧kuä̧rä̧tü̧'i̧nä̧, ruwoku tta̧'kua̧ ro'ekuätü'i̧nä̧, tä̧'ä̧mä̧'chä̧tü̧'i̧nä̧, suronä̧ pä'ä'chätü'i̧nä̧, nä̧u̧kuä̧rä̧tü̧'i̧nä̧ dodettokäkuotü ru̧wa̧ Dio weomȩmä̧.

¹¹ Iweye, ä'kojimä̧ yotukunä̧mä̧ ja̧'wa̧nü̧ kka̧kui̧nä̧tü̧jä̧; ja̧'wa̧nü̧ ja̧'a̧nä̧ jitämä̧ surojü juiyünä̧ aditü ikuinä̧u̧jä̧, adiwä isotü jü̧nä̧ jȩi̧nä̧u̧jä̧ Tu̧ru̧wa̧ Jesucrito i̧mi̧nä̧'i̧nä̧ ja̧'wa̧ta̧nü̧ Dio i̧sa̧ Epíritu-nä̧'i̧nä̧ jü̧nä̧.

Dio esewomȩnä̧tä̧ jȩpä̧tu̧kui̧

¹² Pa̧'a̧nü̧ pä'ä'ijätü: o'kajuiyünä̧tä̧ jȩpü̧ mȩda̧ pä'ü ja̧'a̧nä̧, o'kajuiyünä̧mä̧ ttürü ppädokü ja̧'a̧; o'kajuiyünä̧tä̧ jȩpü̧ mȩda̧ pä'ü ja̧'a̧nä̧, o'kajuiyünä̧mä̧ ttürü wea'anä̧mä̧ chiyäwokä̧kua̧sä̧.

¹³ Ja̧'wa̧ta̧nü̧ pä'ä'ijätü: «Ttu̧kuȩmä̧ tü'käbiyünä̧ ȩki̧pü̧ ja̧'a̧ ja̧'wa̧ta̧nü̧ tü'käbiyümä ttu̧kuȩ ȩja̧ pä'ütä ja̧'a̧; ja̧'wa̧nü̧ ja̧'a̧nä̧ Dio-mä̧ todärekue'ü si'epü i̧kuä̧kuȩ ja̧'a̧. Ja̧'wa̧nü̧ ja̧'a̧nä̧, tidepä jättäjimä̧ nä̧tü̧rü̧'i̧nä̧, u̧mä̧tü̧rü̧'i̧nä̧ jȩpä̧'chü̧ surojuottepa pä'ümä̧ jo̧ka̧'a̧, jua̧u̧mä̧ Tu̧ru̧wa̧ iäre ja̧'a̧. Ja̧'wa̧ta̧nü̧ tidepä jättäjimä̧ Tu̧ru̧wa̧ iäretä ja̧'a̧.

¹⁴ Ja̧'wa̧ta̧nü̧ Dio-mä̧ Tu̧ru̧wa̧ Jesucrito-rü ttoädinü̧ta̧'a̧nü̧, ujuturu'i̧nä̧ ujurunä̧tä̧ ttoädäkuä̧u̧jä̧.

¹⁵ ¿Ukutumä̧ juiyo jerupätüjä̧ tä̧jí̧, ya̧ku̧nä̧ jättäpäyotümä̧, Crito jä̧ttä̧pä̧ya̧rü̧, jua̧u̧ru̧tä̧ todepätüjä̧ pä'ümä̧? ¿Ja̧'wa̧nü̧ ja̧'a̧ttü̧, jua̧u̧ Crito jä̧ttä̧pä̧ya̧rü̧ chutodewa'amä̧, mä̧nä̧ isaju kkidepä jü̧nä̧ juodepa'a tä̧jí̧? Ja̧'wa̧nü̧mä̧ jȩchü̧ juiyü'anü̧ ja̧'a̧.

¹⁶ ¿Ukutumä̧ jerupätüjä̧ tä̧jí̧, ya̧tȩ mä̧nä̧ isajuru ppä'ächi'ümä̧, juäjuku, idepämä̧ ji̧nä̧ ji̧yȩtȩ pä'i'ü pä'ümä̧? Ja̧'wa̧nü̧ ja̧'a̧ttü̧ wȩyu̧kuä̧mä̧ pä'a: «Ta̧ju̧ päjätümä̧, ttidepämä̧ ji̧yȩtȩ pätti'äkuotü,» jü̧nä̧.

¹⁷ Ja̧'wa̧nü̧ ja̧'a̧nä̧, Tu̧ru̧wa̧rü̧ ppä'ächi'ümä̧, Epíritu-nä̧mä̧ ji̧nä̧ ya̧tȩ wotü, chutäkumä̧.

¹⁸ Ja̧'wa̧nü̧ ja̧'a̧ttü̧ nä̧tü̧rü̧'i̧nä̧, u̧mä̧tü̧rü̧'i̧nä̧ jȩä̧'chä̧kuä̧wä̧ttü̧mä̧ dü'ekuächätukui. Ya̧tȩ kkoro suronä̧ jȩü̧mä̧, jättäpäya̧rü̧mä̧ surojuoepokü; ja̧'wa̧nü̧ ja̧'a̧nä̧ nä̧tü̧rü̧, u̧mä̧tü̧rü̧ jȩä̧'chä̧kuä̧wä̧nä̧ iyäurumä̧, a̧mü̧nä̧ pa̧ja̧tü̧ jä̧ttä̧pä̧ya̧ surojuo'eku.

¹⁹ ¿Ja̧'wa̧ta̧nü̧ jerupätüjä̧ tä̧jí̧, ukutu kuidepätuku jättäjimä̧ Epíritu Sa̧tu̧ ü̧jo̧de pä'ümä̧, ukutunä̧ kkü̧, Dio iyinä̧ku̧ pä'ümä̧ ja̧'wa̧nü̧ ja̧'a̧ttü̧ ujutu tidepämä̧kü̧ ja̧'a̧ pä'ümä̧?

²⁰ Isopäi'ünä̧ Dio-mä̧ mitäu ȩmi̧nä̧u̧jä̧; ja̧'wa̧nü̧ ja̧'a̧ttü̧ kuidepätuku jättäpäyotü'i̧nä̧, kua̧'kua̧rü̧ i̧sa̧nä̧'i̧nä̧, Dio-rü eseäkuäwätukui, jua̧u̧mä̧ Dio jäwätä ja̧'a̧ttü̧.