1 Corintios 5 - Nuevo Testamento Uwotjüja

Ya̧tȩ suronä̧ jȩi̧nü̧ wȩnȩ

¹ Ukutu ku̧'kä̧tȩtu̧ku̧ttü̧ ya̧tȩ irekua pokajuku ü̧jä̧'cha̧'a̧ ukuowa'a. Pi̧yȩ surojü wȩnȩmä̧ Dio-rü esetokotüttü'i̧nä̧ ukuowokü jä̧'i̧jü̧ ja̧'a̧. Jua'a yabonä̧ surojü wȩnȩ ja̧'a̧ ja̧'wa̧nü̧ ja̧ju̧ päkuajuku irekua jü̧nä̧ ü̧ja̧'a̧mä̧.

² Ja̧'wa̧ta̧nü̧ ¡ukutumä̧ ukuo te'äkuäwätüjä̧! Ja̧'wa̧nü̧ jo̧mȩnä̧ tta̧'kua̧ tta̧'ȩku̧, jua̧u̧ jȩpü̧rü̧ ukututtü rä'epü ttikuaju jueimä̧.

³ Ja̧'wa̧ta̧nü̧ ttümä̧ jua'amä̧ chü̧jo̧ka̧'a̧nä̧, jua'atä epíritu-nä̧ chü̧ja̧'a̧ttü̧; täkü ja̧'wa̧nü̧ jȩta̧rü̧tä̧ pä'üsä, jua̧u̧ surojü jȩpü̧rü̧mä̧.

⁴ Tu̧ru̧wa̧ Jesucrito i̧mi̧nä̧ ja̧'wa̧ta̧nü̧ Tu̧ru̧wa̧ Jesucrito ujurunä̧ ka̧ka̧ku̧ pȩjä̧mä̧tu̧kui̧, ttü'i̧nä̧ ukututäku 'kä̧dä̧wä̧rä̧kua̧sä̧ epíritu-nä̧tä̧,

⁵ ja̧'wa̧nü̧ jȩpü̧ Sataná-rü̧ iyü ikuätukuirü, idepä jättäji toe'ächünä̧, Tu̧ru̧wa̧ Jesucrito ichü mo̧ro̧ päi'omȩnä̧ a̧'kua̧rü̧ surojüttü kki̧'ä̧kua̧'a̧nü̧.

⁶ Pi̧yȩ jäwänä̧ ukuo te'äu kueseäkuäwätukua pä'ümä̧ jui'ätüjä̧. ¿Ukutumä̧ jerupätüjä̧ tä̧jí̧?: ¿«Levadura-mä̧ a̧'u̧ku̧nä̧tä̧ ja̧'a̧nä̧'i̧nä̧ isäwa ppü̧ä̧mi̧'ü̧nä̧ jü̧ pä'ümä̧»?

⁷ Ja̧'wa̧nü̧ ja̧'a̧ttü̧ levadura pättü täbo jäwättümä̧ adiku ikuätukui, trigo o̧si̧ levadura pättü juiyü Pacua jäwä 'kua̧rü̧nä̧ kuätukua; isopäi'ünä̧, täkü tiäre Pacua pä'kärimä̧ Crito-tä ja̧'a̧, ujutu jäwänä̧ oweja mü̧ä̧ya̧ jü̧nä̧ ü̧jo̧kä̧ jäinä̧ 'korujuoächina̧'a̧ttü̧.

⁸ Ja̧'wa̧nü̧ ja̧'a̧ttü̧ ujutu tiäre pacua pä'käri jȩtä̧tu̧kua̧, surojü levadura pättü kka̧jü̧ jueimä̧ pärokuänä̧, trigo pättü i̧ri̧si̧nä̧mä̧ adiwä juei, jueü jäwänä̧tä̧, isopäi'ünä̧ wȩnȩ kkü̧nä̧tä̧.

⁹ Ä'kanä̧ chi̧wȩyu̧ti̧nä̧'tänä̧mä̧, pä'inü̧sä̧, tti̧rȩkua̧mü̧ pokotürü jȩpä̧'chä̧tü̧ku̧ ppä̧ttä̧chä̧rü̧ juiya pä'ü.

¹⁰ Ja̧'wa̧nü̧ pädäjimä̧, o'katoi'ünä̧ pi̧jä̧nä̧ttü̧ ttirekua pokajuku jepä̧'chä̧tü̧ttü'i̧nä̧, ruwotü juotta pä'ätüttü'i̧nä̧, nä̧u̧kuä̧rä̧tü̧ttü̧'i̧nä̧, ttü̧ä̧nä̧wo̧tü̧rü̧ kku̧nä̧rä̧'chä̧tü̧ttü̧'i̧nä̧ jo̧mȩnü̧ räkuächätukua pä'ümä̧ pä'okü pinü̧sä̧; ja̧'wa̧nü̧ jü̧ttü̧mä̧ pi̧jä̧ttü̧ räkuopächätukua pä'ütä ja̧'a̧.

¹¹ Ja̧'wa̧ta̧nü̧ pä'üsä, wȩyu̧tu̧ we'inü̧sä̧ Crito-nä̧ chi̧jä̧wa̧tü̧ tta'anä̧, tti̧rȩkua̧mü̧ wokotüku jȩä̧'chä̧kuä̧wä̧nä̧'i̧nä̧, ruwotü juotta pä'ü tta̧'kua̧ roekuäkuäwänä'i̧nä̧, ttü̧ä̧nä̧wo̧tü̧rü̧ kku̧nä̧rä̧'chä̧kuä̧wä̧nä̧'i̧nä̧; surojuo'epü pä'chäkuäwänä̧'i̧nä̧, tä̧mä̧'chä̧kuä̧wä̧nä̧'i̧nä̧, nä̧u̧kuä̧rä̧kuä̧wä̧nä̧'i̧nä̧ kka̧kuä̧tü̧rü̧. Ja̧'wa̧nü̧ wa̧ku̧mä̧ ttu̧kuȩ'i̧nä̧, ttüku juiya pä'ü.

¹² Ja̧'wa̧nü̧ ja̧'a̧ttü̧, ttümä̧ igresia isotü wokotürü jü̧ päda pä'ümä̧ jui̧'a̧sä̧;

¹³ Dio-tä ja̧'a̧ juätürü pä̧kua̧mä̧. Ja̧'wa̧nü̧ ja̧'a̧nä̧ ukutumä̧ igresia isotü jȩttü̧ päkuätukua pä'ü ja̧'a̧. Ja̧'wa̧nü̧ ja̧'a̧ttü̧, surojü jȩpü̧rü̧mä̧ rä'epü ikuätukuirü.