1 Corintios 4 - Nuevo Testamento Uwotjüja

Apótore wotü ttaditäwä

¹ Ja̧'wa̧nü̧ ja̧'a̧ttü̧, ujuturumä̧ Crito aditäwä ppä'ädä̧rä̧tü̧ jü̧nä̧tä̧ topätukuitü, Dio jäwä ttieruwü wȩnȩ adikuä isotü jü̧nä̧tä̧.

² Ja̧'wa̧nü̧ ja̧'a̧ttü̧, adikuä 'chu̧'ä̧rä̧tü̧rü̧mä̧, ttaditäwä jȩpü̧ ttü̧ja̧ pä'ütä ja̧'a̧.

³ Ttütä chütü'kü, jȩchä̧'i̧jü̧ ukutu päkuätukuttü'i̧nä̧, kärenä̧ rütätü tturuwotü pättüttü'i̧nä̧, cha̧'kua̧ tta̧'ȩkuo̧kü̧sä̧; ttütä'i̧nä̧ cha̧mü̧nä̧ jäwämä̧ pä'äkuäwoküsä.

⁴ Jua'akumä̧, ttü suronä̧ jȩchi̧na̧'a̧mä̧, wäitä chieruwuönä̧ jä̧ku̧sä̧, adiu jȩpü̧ pä'ümä̧ pättoka'anä̧. Ja̧'wa̧nü̧ ja̧'a̧nä̧, ji̧nä̧so jȩchü̧ wȩnȩ pä'ümä̧ Dio-tä ja̧'a̧.

⁵ Ja̧'wa̧nü̧ ja̧'a̧ttü̧, ji̧nä̧ ä'kanä̧mä̧ jȩttä̧'i̧jü̧ wȩnȩmä̧ päkuätukuä, Tu̧ru̧wa̧ ichomȩnä̧tä̧ jiäwä̧kua̧ uwäwokü'i̧nä̧ ja̧'wa̧ta̧nü̧ jakuänä̧ tȩnä̧rü̧'i̧nä̧, jü̧nä̧. Ja̧'wa̧nü̧ jo̧mȩnä̧ yotukunä̧rü̧ jȩtti̧nü̧'a̧kuä̧ Dio-mä̧ ȩsȩwä̧kuä̧u̧.

⁶ Chawaruwä chi̧jä̧wa̧tü̧, pi̧yȩ ukuturu ukuokuäjisä, ujututä wȩnȩku̧, ttütä chütü'kü'i̧nä̧ ja̧'wa̧ta̧nü̧ Aporo ütü'kü'i̧nä̧, jü̧nä̧ ukuturu repeta'attü̧. Kkorojuei päkuätukuomȩnä̧, wȩyu̧kuä̧ wȩnȩ päomȩttü̧'i̧nä̧ abonä̧nü̧ päkuätuku juiya pä'ü, ya̧tȩ Dio i̧wȩnȩ jiäkuäwä i̧sa̧mä̧, kkorotüttü'i̧nä̧ u̧wä̧mȩnä̧ wa̧sä̧ pä'ü amükuädäkuäu juiya pä'ü.

⁷ Ja̧'wa̧nü̧ ja̧'a̧ttü̧ ¿Díjä̧ttü̧ ukuru, kkorotüttü'i̧nä̧ abonä̧nü̧ kua pä'ü iyinü̧mä̧? ¿Ja̧'wa̧ta̧nü̧ däjetäjä̧ttü̧ ukuru Dio iyokü ji̧nü̧mä̧? Jua̧u̧ o'kajuiyünä̧ Dio-tä iyinü̧ttü̧mä̧, ¿Tta̧'a̧nü̧ pä'ü kua̧mü̧nä̧ pa̧ja̧tü̧ ku̧'o̧kui̧'i̧nü̧ 'kua̧rü̧nä̧ ukuo te'äkuäujä̧ttü̧?

⁸ Täkü, ukutumä̧ jo̧mȩnü̧ kku̧nä̧rä̧tü̧jä̧ kuju'kätukumä̧: Täkü ruwotüjä̧, ruwotü 'kua̧rü̧nä̧ jȩpü̧ kkä̧nü̧, ujuturu rekuä rü̧jo̧ko̧u̧ 'kua̧rü̧nä̧ jȩ'kuä̧tu̧kua̧'a̧ttü̧. ¡Isopäi'ünä̧ ruwotü kuätukuado, ujutu'i̧nä̧ ukututäku jua̧u̧ ruwonä̧ wetäkua'anü̧!

⁹ Ttü Chamükuädümä̧, ujutu apótore-rümä̧, Dio-mä̧ rüjinä̧ u̧ju̧ni̧'i̧nä̧u̧jä̧, wa'arera̧'a̧tä̧ ä̧tȩkuo̧tü̧ 'kua̧rü̧nä̧. Ujutumä̧ pi̧jä̧ ttü̧ja̧ ttä'kattümä̧ ya̧'a̧wȩ'ü̧tä̧, ya̧ttä̧wȩ'ä̧u̧jä̧, á̧gȩrȩ ttä'kattü'i̧nä̧, ttü̧ja̧ ttä'kattü'i̧nä̧, jü̧nä̧.

¹⁰ Ujutumä̧, Crito jäwänä̧, amükuädokotü ttü̧ja̧ 'kua̧rü̧nä̧ wotüjä̧; ja̧'wa̧nü̧ ja̧'a̧nä̧ ukutumä̧, Crito re ü̧ji̧na̧'a̧ttü̧, rü̧ȩnä̧ amükuädäkuäwä kku̧nä̧rä̧tü̧ 'kua̧rü̧nä̧ wotüjä̧; Ujutumä̧ tijuiyuwa'anä̧, ukutumä̧ kujuru kku̧nä̧rä̧tü̧jä̧; Ujutumä̧ ttüjü'koko̧u̧ ta'anä̧, ukutumä̧ ukuo isotü jü̧nä̧ ttukuotäu̧jä̧.

¹¹ Jitä mo̧ro̧bü päi'ünä̧ ppäi'i̧nä̧, ppäi ttu'ätüjä̧, ttawa'i̧nä̧ a̧di̧rü̧jä̧u̧jä̧, tü̧'ka̧tä̧wä̧ti̧yu̧'i̧nä̧ jui'ätüjä̧; ti'ebabanä̧ kuäkuättä̧u̧jä̧, tü̧ja̧kuo̧mȩ'i̧nä̧ jui'ätüjä̧.

¹² Tu̧mü̧nä̧ aditü usurä ȩmä̧wä̧tü̧jä̧; Ujuturu suronä̧ ja̧tü̧do pätta'anä̧, pärokua'akumä̧, adiu ja̧tü̧do pä'ütä pä'ätüjä̧; suronä̧ jȩtta̧tü̧ pä'ü ttusa'anä̧, ta̧mi̧ 'ki'ächi'ü kka̧kuä̧tü̧jä̧.

¹³ Ujuturu suronä̧ pä'ü wotta'anä̧, pärokua'akumä̧ adiunä̧tä̧ tä̧dä̧tä̧u̧. Pi̧jä̧nä̧ttü̧mä̧ do'opü ikuäwotü, suropätü jü̧nä̧tä̧ pä̧ttä̧u̧jä̧, jitä mo̧ro̧bü päi'ünä̧tä̧.

¹⁴ Pi̧yȩmä̧, ukuturumä̧ dä'ä ttu'epumä̧ wȩyu̧to̧kü̧sä̧ ja̧'wa̧nü̧ ja̧jü̧jueimä̧ rettü, ro̧'ȩpü̧ wȩdä̧u̧jä̧, chi̧tti̧mü̧ 'kua̧rü̧nä̧.

¹⁵ Ja̧'wa̧nü̧ ja̧'a̧ttü̧ ukutumä̧, Crito-nä̧mä̧ diez mil-nü̧ jo̧mȩnä̧ wo̧juȩkuä̧ isotürü ku̧ju̧nä̧rä̧tu̧kua̧ja̧ pä'ü'i̧nä̧, kuä'otü̧mä̧ rekuätümä̧ to'ätüjä̧. Kuä'otuku jü̧nä̧ wa̧mä̧ ttütäsä, isopäi'ünä̧ Crito jäwä, jareü wȩnȩnä̧ chi̧tti̧mü̧ pä'i'inä̧tü̧jä̧.

¹⁶ Ja̧'wa̧nü̧ ja̧'a̧ttü̧, jädepä̧u̧jä̧ ttü jȩchü̧'a̧kuä̧ topü jȩpü̧ ku̧jä̧tu̧kua̧ pä'ü.

¹⁷ Ja̧'wa̧nü̧ ja̧'a̧ttü̧ Timoteo-rü wedinä̧u̧jä̧, Chu̧ru̧wa̧nä̧ chi̧tti̧ ukuotä'ijü rȩni̧'a̧rü̧. Jua̧u̧tä̧ jiäwäkuä̧u̧jä̧ Crito-nä̧ jȩpü̧ chü̧jä̧'i̧jü̧ wȩnȩmä̧, kkoromȩ pünä̧, kkoro igresia pünä̧ chu̧wo̧juȩtä̧'i̧jü'a̧kuä̧.

¹⁸ Ukututtü yotukunä̧mä̧, täkü topü ichokü pä'ü pä̧wä̧rü̧ja̧'a̧ku̧ kka̧kuä̧tü̧;

¹⁹ Ja̧'wa̧nü̧ ja̧'a̧nä̧, Chu̧ru̧wa̧rü̧ pä̧wä̧rü̧jü̧ttü̧mä̧, a̧'u̧kua̧'a̧tä̧ jü̧ o'ka'a do'ächü chichäkua̧sä̧. Ja̧'wa̧nü̧ chichomȩnä̧tä̧ tochäkua̧sä̧, yotukunä̧ ukuo te'äkuäu pättü, isopäi'ünä̧ tȩnȩbütä jȩpü̧ pättaja pä'ü.

²⁰ Isopäi'ünä̧ ru̧wa̧ Dio weümä̧ ti̧wȩnȩmä̧kü̧ ja̧'a̧, ji̧nä̧somä̧ Ujuru ja̧'a̧.

²¹ ¿Däje pä̧wä̧rü̧jä̧tu̧kuäku̧ttü̧: chichomȩnä̧mä̧, ro̧dȩpä̧tu̧kua̧ku̧ pä'ätüjä̧ ja̧'wa̧nü̧ jo̧ka̧'a̧ jü̧ttü̧mä̧ eseu repe'ünü̧ do'ächü chichätukuaku pä'ätüjä̧?