1 Corintios 3 - Nuevo Testamento Uwotjüja

Corinto ttü̧ja̧ jȩttü̧ juiyünä̧ ji̧nü̧ wȩnȩ

¹ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, ttümä̧ epíritu jäwänä̧ kka̧kuä̧tü̧ jü̧nä̧mä̧ chukuokuoko̧u̧ pinä̧tü̧jä̧, ja̧'wa̧nü̧ jo̧ka̧'a̧ ttidepä weünä̧ kka̧kuä̧tü̧ jü̧nä̧tä̧, Crito jäwänä̧mä̧ ppo̧'ä̧tü̧ jü̧nä̧tä̧ chukuokuinä̧u̧jä̧.

² 'Kiyü jueimä̧ chiyoka'a, atate isoyatä chiyinä̧u̧jä̧; ji̧nä̧ kukuätuku juiyünä̧ wotü kuätukua'attü, ¡ji̧nä̧ jitä'i̧nä̧, jo̧mȩnü̧mä̧ wokotüjä̧,

³ Jitä'i̧nä̧, kuidepä wea'anä̧tä̧ kka̧kuä̧tü̧jä̧!; ji̧nä̧ ukutunä̧ kka̧'a̧ kuä'kuoyäwätuku, kurowäwätuku'i̧nä̧, päkuä'chäkuäwätuku'i̧nä̧, jü̧nä̧ ja̧'wa̧nü̧ jȩpü̧ pi̧jä̧ jäwänä̧tä̧ kuidepä wea'anä̧ kka̧kuä̧tü̧jä̧.

⁴ Ja̧'wa̧nü̧ jȩpü̧ yotukunä̧ pä'ätüjä̧: «Ttümä̧ Pauru i̧sa̧sä̧,» kka̧ra̧mä̧ pä'ü, «Aporo i̧sa̧sä̧,» jü̧nä̧, jua̧u̧mä̧ ttidepä weünä̧ kkä̧tü̧ päwä ja̧'a̧.

⁵ Jua̧u̧nu̧mä̧ ¿Däjé jȩä̧kuä̧wä̧ i̧sa̧jä̧ttü̧ Aporo-mä̧? ja̧'wa̧ta̧nü̧ ¿Pauru'i̧nä̧ jü̧nä̧mä̧? Suro, ujutumä̧ Dio weinü̧tä̧ jȩä̧kuä̧wä̧ isotüjä̧, ujutunä̧tä̧ Jesucrito-rümä̧ esetinä̧tü̧jä̧. Jua'amä̧, ujutumä̧, yotukunä̧ Tu̧ru̧wa̧ weinü̧tä̧ aditinä̧tü̧jä̧:

⁶ Ttümä̧ Jesucrito jäwä jareü wȩnȩ jidäwa'anä̧ Aporo-mä̧ yabonü̧ Jesucrito-rü tta̧'kua̧ ttu̧wȩnä̧rü̧nä̧ wo̧juȩti̧nü̧ ja̧'wa̧nü̧ ja̧'a̧nä̧ ji̧nä̧so tä̧mü̧ juottünä̧ jȩpi̧nü̧mä̧ Dio-tä ja̧'a̧.

⁷ Ja̧'wa̧nü̧ ja̧'a̧ttü̧, ji'äwinü̧'i̧nä̧, tta̧'kua̧ ttu̧wȩnä̧rü̧nä̧ wo̧juȩti̧nü̧'i̧nä̧ mikuäwokotüjä̧, ji̧nä̧somä̧ chutä, Dio-tä ja̧'a̧ mi̧kuä̧wa̧mä̧ tä̧mü̧ juottünä̧ jȩpü̧tä̧.

⁸ Ja̧'wa̧nü̧ ja̧'a̧ttü̧ jiäkuäwä i̧sa̧'i̧nä̧, tta̧'kua̧ ttu̧wȩnä̧rü̧nä̧ wo̧juȩtü̧'i̧nä̧ ji̧nä̧ ji̧yȩtȩtä̧ wotü, jua'akumä̧ yotukunä̧ ttaditäwä jü̧'a̧kuä̧ mikuä ttȩmä̧kua̧'a̧nä̧.

⁹ Isopäi'ünä̧ ujutumä̧, Dio aditäwätä adikuä isotüjä̧ ja̧'wa̧ta̧nü̧ ukutumä̧ Dio u̧kuȩ kuäwä jü̧nä̧, ojusode jü̧nä̧ wotüjä̧.

¹⁰ Ttümä̧, Dio-rü pä̧wä̧rü̧jo̧mȩnä̧, juode kkada'ka 'chu̧ä̧ro̧mȩ jȩpü̧ kku̧ni̧nü̧sä̧: Jesucrito jäwä jareü wȩnȩ ji'äu. Ja̧'wa̧nü̧ ji̧na̧'a̧, kkorotümä̧ juȩnȩ wä̧mȩnä̧ aditätü. Ja̧'wa̧nü̧ ji̧na̧'a̧ttü̧, yotukunä̧ juȩnȩ wä̧mȩnä̧ aditätümä̧ ttu̧'ȩpä̧rü̧nü̧, aditätukui.

¹¹ Ja̧'wa̧nü̧ täkü yo̧mȩtȩ kka̧'a̧ttü̧, ya̧tȩ'i̧nä̧ kkoromȩ i̧mi̧ku̧nä̧ jo̧mȩ 'chu̧ä̧ro̧mȩ, adita pä'ümä̧ juiya'a, juȩnȩ 'chu̧ä̧ro̧mȩmä̧ Jesucrito-tä ja̧'a̧.

¹² Ja̧'wa̧nü̧ ja̧'a̧nä̧, pide kkada'ka 'chu̧'ä̧rü̧ u̧wä̧mȩ, oro-ttü'i̧nä̧, pärätättü'i̧nä̧, rü̧ȩnä̧ mikuäu ido'kiyättü'i̧nä̧, dauwiyättü'i̧nä̧, isä'kuattü'i̧nä̧, caña pättü o̧na̧ttü̧'i̧nä̧ taditüttümä̧;

¹³ Ttaditäwämä̧ wäjuönä̧ i̧jȩkuä̧chä̧kua̧'a̧ jȩtti̧nü̧'a̧kuä̧ ü'ojo'ü mo̧ro̧ päi'omȩnä̧; isopäi'ünä̧ jua̧u̧nü̧ mo̧ro̧mä̧ okuränä̧tä̧ i̧jȩkuä̧chä̧kua̧'a̧; ja̧'wa̧nü̧ ja̧'a̧ttü̧ yotukunä̧ jȩtti̧nü̧mä̧ okuränä̧tä̧ kka̧kuä̧mü̧ toäkuäwäkua'a.

¹⁴ Ja̧'wa̧ta̧nü̧ ya̧tȩ, aditinü̧ jä̧jí̧ 'kiyo kka̧ku̧ jü̧ttü̧mä̧, jua̧u̧ mikuämä̧ ȩmä̧kua̧;

¹⁵ Ja̧'wa̧nü̧ ja̧'a̧nä̧ aditäwä ji̧nü̧ kuo'ü ikuttümä̧, toe'ächä̧kua̧. Chutä'i̧nä̧ okurättü ttü̧ji̧pa̧'a̧ jä̧'i̧nü̧'a̧nü̧ ü̧ji̧pä̧kua̧ ra̧wä̧pi̧jü̧ttü̧mä̧.

¹⁶ ¿Ukutumä̧, Dio ojusode jü̧nä̧ kuätukua'amä̧ ja̧'wa̧ta̧nü̧ Dio i̧sa̧ Epíritu ukutunä̧ ü̧ja̧'a̧mä̧ kuieruwätukua'a tä̧jí̧?

¹⁷ Ya̧tȩ Dio ojusode si'epü ikuttümä̧, churutä si'epü i̧kuä̧kua̧; jua'amä̧ ukututä Dio ojusode, surojü juiyode kuätukua'attü.

¹⁸ Kua̧mü̧nä̧ pa̧ja̧tü̧mä̧ kuyapareäkuäwätukuä: pi̧jä̧nä̧ttü̧ ya̧tȩ wo̧juä̧wä̧ wȩnȩ u̧ju̧nä̧rü̧ttü̧mä̧, wo̧juo̧kü̧ 'kua̧rü̧nä̧ kkä̧wi̧, isopäi'ünä̧ wo̧juä̧wä̧ wȩnȩ ku̧ju̧nä̧rä̧kua̧'a̧nü̧.

¹⁹ Isopäi'ünä̧ pi̧jä̧ttü̧ wo̧juä̧wä̧ wȩnȩmä̧, Dio-rümä̧ suräjuä wȩnȩtä̧ ja̧'a̧. Ja̧'wa̧nü̧ ja̧'a̧ttü̧ wȩyu̧kuä̧mä̧ pä'a: «Dio-mä̧, wo̧juä̧wä̧ wȩnȩ kku̧nä̧rä̧tü̧rü̧mä̧, ji̧yȩtä̧ ttu̧wo̧juö̧nä̧ 'chu̧ä̧dä̧u̧,» jü̧nä̧.

²⁰ Ja̧'wa̧ta̧nü̧ pä'a: «Tu̧ru̧wa̧mä̧ wo̧jua̧, wo̧juä̧wä̧ wȩnȩ kku̧nä̧rä̧tü̧ ttu̧wo̧juö̧mä̧, suräjuä wȩnȩtä̧ ja̧'a̧ pä'ü.»

²¹ Ja̧'wa̧nü̧ ja̧'a̧ttü̧, pi̧jä̧ ttü̧ja̧ ttu̧ju̧nä̧rü̧mä̧ kueseäkuäwätukuä; jua̧u̧mä̧, o'kajuiyünä̧ ukututä jäwätä ja̧'a̧:

²² Pauru ja̧ pä'ü'i̧nä̧, Aporo ja̧ pä'ü'i̧nä̧, Cefa ja̧ pä'ü'i̧nä̧, pi̧jä̧ jäwä ja̧ pä'ü'i̧nä̧, tta̧'kua̧rü̧ ja̧ pä'ü'i̧nä̧, wa'are ja̧ pä'ü'i̧nä̧, jitä kka̧ku̧'i̧nä̧, yodoji rȩbȩä̧kuä̧wä̧kuȩ'i̧nä̧. Ukututä jäwätä ja̧'a̧;

²³ Ja̧'wa̧ta̧nü̧ ukutumä̧ Crito-ttü todepätüjä̧, Crito-tä Dio-ttü ütodewa'anä̧.