1 Corintios 2 - Nuevo Testamento Uwotjüja

Crito ü̧jo̧kä̧ jäinä̧ 'korujuoächinü̧ wȩnȩ ji'äwinü̧

¹ Ja̧'wa̧nü̧ ja̧'a̧ttü̧ chawaruwä chi̧jä̧wa̧tü̧, Dio ütü'kü ji'äu chi̧wä̧chi̧nü̧mä̧, adiu a̧'kua̧ku̧nä̧ aditü ikumä̧ ji'äwokü pinü̧sä̧.

² Ja̧'wa̧ta̧nü̧, ukutuku chü̧ji̧nü̧mä̧ kkoro juei ttukuokuajü jueimä̧, suro Jesucrito ütü'kütä, ü̧jo̧kä̧ jäinä̧ toe'ächinü̧tä̧ ji'äwinü̧sä̧.

³ Jua'a ukuturu wo̧juȩtü̧ chi̧wä̧chi̧nü̧mä̧ ukuo i̧sa̧ 'kua̧rü̧ juiyünä̧ topäkuäu, ja̧'wa̧ta̧nü̧ ye'eku rü̧ȩnä̧ tti̧'ä̧wi̧nü̧sä̧.

⁴ Jua̧u̧nü̧ jidäu kuesetätukua pä'ümä̧, adiu wo̧juä̧wä̧ wȩnȩnä̧mä̧ ji̧dä̧wo̧ko̧u̧ pinä̧tü̧jä̧. Ja̧'wa̧nü̧ jo̧ka̧'a̧, Epíritu Sa̧tu̧nä̧ ujuru i̧jȩpo̧mȩnä̧tä̧ jidäwinä̧u̧jä̧,

⁵ Jua'amä̧ ukutu kua̧'kua̧ ku̧wȩnä̧rä̧tu̧ku̧mä̧, pi̧jä̧ ttü̧ja̧ ttu̧wo̧juö̧nä̧ 'chu̧ä̧rü̧nä̧ kkada'ka jü̧nä̧ ttü̧ja̧jü̧ jueimä̧, Dio ujurunä̧tä̧ kkada'ka jü̧nä̧ ku̧ja̧kuä̧tu̧kua̧ pä'ü.

Dio jäwä wo̧juä̧wo̧kü̧mä̧ Epíritu-nä̧tä̧ i̧jȩpü̧

⁶ Ja̧'wa̧nü̧ ja̧'a̧nä̧, wo̧juä̧wä̧ wȩnȩ ukuokuätüjä̧ tta̧'kua̧ wȩnä̧rä̧kuä̧wä̧nä̧ büó juo'inä̧tü̧rü̧. Ja̧'wa̧nü̧ tukuokumä̧, pi̧jä̧ ttü̧ja̧ ttu̧wo̧juö̧mä̧kü̧ ja̧'wa̧ta̧nü̧ pi̧jä̧ ruwotü ttu̧wo̧juö̧ toe'ächümä̧kü̧.

⁷ Ja̧'wa̧nü̧ ja̧'a̧ttü̧ ukuokuätüjä̧, Dio jäwä wo̧juä̧wä̧ wȩnȩ wo̧jui̧'ä̧kuä̧wo̧kü̧. Mo̧ täbokütä päi'ünä̧ ttieruwomȩnä̧ amükuädü u̧ju̧ni̧nü̧ chutä uruwo ujuturu iya pä'ü.

⁸ Pi̧yȩ wo̧juä̧wä̧mä̧ jitä pi̧jä̧nä̧ we'ätü ruwotümä̧ ttu̧wo̧jui̧po̧kü̧ ji̧nü̧ ja̧'a̧; ja̧'wa̧nü̧ jo̧ka̧'a̧ ta̧'kua̧rü̧ u̧ru̧wa̧rü̧ ttu̧wo̧jui̧pi̧nü̧ttü̧mä̧ ü̧jo̧kä̧nü̧ jäinä̧mä̧ kuä'ümä̧ ttikuokoku pi̧na̧jü̧.

⁹ Ja̧'wa̧nü̧ ja̧'a̧ttü̧, wȩyu̧kuä̧ wȩnȩmä̧ pä'a: «Dio-mä̧, churutä repe'ätürümä̧ ya̧tȩ'i̧nä̧ tookü juei, ä̧ju̧kuä̧kuä̧wo̧kü̧ juei, ja̧'wa̧ta̧nü̧ yoriso amükuädäkuäwokü juei, jo̧mȩnü̧ jȩpü̧ kku̧ni̧nü̧ iya pä'ümä̧.»

¹⁰ Jua̧u̧ ttieruwuö juei ja̧'a̧, ujuturu Epíritu-nä̧ tu̧wo̧jui̧pü̧nä̧ Dio i̧jȩpi̧nü̧mä̧; isopäi'ünä̧ Epíritumä̧ o'kajuiyünä̧tä̧ usäu wo̧jua̧, Dio jakuänä̧ amükuädü'i̧nä̧.

¹¹ ¿Ditä ja̧'a̧jä̧ttü̧ pi̧jä̧ ttü̧ja̧ttü̧, ttü̧ja̧sa̧ a̧'kua̧rü̧ i̧sa̧ jü̧'a̧nü̧, ttü̧ja̧sa̧ jakuänä̧ amükuädü'i̧nä̧ wo̧jua̧mä̧? Ja̧'wa̧nü̧ jü̧ta̧'a̧nü̧, Dio i̧sa̧ Epíritu-tä ja̧'a̧, Dio-nä̧ kka̧ku̧ wo̧jua̧mä̧.

¹² Ja̧'wa̧ta̧nü̧ ujutu'i̧nä̧ ta̧'kua̧rü̧ i̧sa̧rü̧mä̧ pi̧jä̧nä̧ttü̧mä̧ ȩmo̧ko̧tü̧ pinä̧tü̧jä̧ ja̧'wa̧nü̧ ja̧jü̧jueimä̧ Dio-ttü ichinü̧ Epíritu-ru ȩmi̧nä̧tü̧jä̧, Dio iyinü tu̧wo̧jua̧ pä'ümä̧.

¹³ Jua̧u̧ tü'kümä̧ ukuokuätüjä̧, jua̧u̧ tukuokumä̧ ta̧mü̧nä̧ pa̧ja̧tü̧ tu̧wo̧juö̧ wȩnȩnä̧mä̧kü̧ ja̧'a̧, jua'amä̧ Dio i̧sa̧ Epíritu u̧wo̧juȩta̧'a̧ku̧ ukuokuätüjä̧, Epíritu jäwämä̧.

¹⁴ Dio i̧sa̧ Epíritu-ru to'ätümä̧, Epíritu jäwämä̧ 'kittünä̧ wotü, juätürümä̧, jua̧u̧mä̧ suräjuä wȩnȩ jü̧nä̧tä̧ ja̧'a̧ttü̧. Ja̧'wa̧nü̧ ja̧'a̧ttü̧ yoriso ttu̧wo̧jui̧pü̧ juiyünä̧tä̧ jä̧u̧, jua'amä̧ Epíritu jäwänä̧tä̧ adiwomȩnä̧ päwä ja̧'a̧ttü̧.

¹⁵ Ja̧'wa̧nü̧ ja̧'a̧nä̧, Dio i̧sa̧ Epíritu-ru kku̧nä̧rä̧tü̧mä̧, o'kajuiyünä̧tä̧ adiwomȩnä̧ pä'ätü; pärokua'aku juätürümä̧, kkorotümä̧ pättü juiyünä̧ ja̧'a̧.

¹⁶ Isopäi'ünä̧ wȩyu̧kuä̧ wȩnȩmä̧ pä'a: «¿Ditä ja̧'a̧jä̧ttü̧ Tu̧ru̧wa̧ Crito amükuädü wo̧jui̧nü̧mä̧? ¿Ditä ja̧'a̧jä̧ttü̧, Jua̧u̧ru̧ wo̧juȩti̧nü̧mä̧?» Ja̧'wa̧nü̧ ja̧'a̧nä̧, ujutumä̧ Crito amükuädü juei kku̧nä̧rä̧tü̧jä̧.