1 Corintios 16 - Nuevo Testamento Uwotjüja

Ofrenda tü'kü

¹ Ja̧'wa̧ta̧nü̧ surojüttü rä'epü ikuinä̧u̧ru̧ ppädäkuäwä ofrenda-mä̧, ukutu'i̧nä̧ jȩpä̧tu̧kui̧ Galacia igresia isotürü wedinü̧ta'anü̧.

² Semana-ttü̧mä̧ domiku̧ jü̧ta̧'a̧nü̧, 'kȩ'ȩpü̧ rütätukui, kuȩmä̧jä̧tu̧ku̧'a̧kuä̧, wa'adü rütätukui, jua'amä̧ chichomȩnä̧mä̧ täkü ku̧ka̧ka̧kuä̧tu̧ku̧ juiyäkua'anü̧.

³ Jua'a chi̧'chi̧'o̧mȩnä̧tä̧, ukutu pätetü wekuäjä̧tu̧kuä̧u̧ru̧mä̧, kuiyäjätuku pärätäku wȩdä̧kua̧sä̧ Jerusarȩ́-ra̧'a̧mä̧ wȩyu̧kuojäku ttȩpa̧ pä'ü.

⁴ Ja̧'wa̧ta̧nü̧ ttü'i̧nä̧ chi̧'cha̧ pä'ü rekuä rü̧jü̧ttü̧mä̧, ttütäku tti̧'chä̧kuo̧tü̧.

I̧'chä̧kuo̧mȩ pünä̧ jiäwinü̧ wȩnȩ

⁵ Jua'amä̧ chichi'äkua̧sä̧, Macedonia rȩjȩnä̧ 'kuä'opi'ü'ka̧tä̧, Macedonia-nä̧ 'kuädopa pä'ü'i̧nä̧ rekuä rü̧ja̧'a̧ttü̧, juȩnȩ o'komȩnä̧ Corinto-ra̧'a̧ chi̧rȩbȩwi̧'a̧ pä'ümä̧.

⁶ Ukututäku'i̧nä̧ chü̧ji̧pä̧kua̧sä̧ 'kua̧ra̧'a̧, a̧'ȩmä̧ juȩnȩtä̧ 'kuädopa pä'ü; ja̧'wa̧nü̧ jü̧ttü̧mä̧ adiwäkua'a chi̧'cha̧'a̧ ppäkuädätukuattü pä'ü.

⁷ Jurunä̧tä̧ 'kuä'o'ümä̧ tochätukuakumä̧ pä'oküsä. Dio-rü pä̧wä̧rü̧jü̧ttü̧mä̧, rekuonä̧nü̧ chü̧ja̧ pä'üsä.

⁸ Ja̧'wa̧nü̧ ja̧'a̧nä̧ Éfeso ütawiyänä̧tä̧ chü̧jä̧kua̧sä̧ pentecostés mo̧ro̧bü päi'ünä̧.

⁹ Chadita pä'ümä̧ äpate rü̧ȩnä̧ bawekuächäja'a, yabokutä ja̧'wa̧nü̧ ja̧'a̧nä̧ rekuätü chaboiyotü'i̧nä̧ rekuätü ja̧'a̧.

¹⁰ Timoteo jua'a i̧rȩbȩwi̧'ü̧ttü̧mä̧ adiu esewomȩnä̧ jȩpä̧tu̧kui̧rü̧, jua̧u̧'i̧nä̧ ttüta'a̧nü̧ Tu̧ru̧wa̧ aditäwä aditü.

¹¹ Ja̧'wa̧nü̧ ja̧'a̧ttü̧ ja̧'a̧tä̧mä̧ to'kuätukuärü, adiutä wȩnȩ juiyünä̧ ppä'ädätukuirü, ttürü topü icha'amä̧, pa̧nä̧ttü̧mä̧ chawaruwä chi̧jä̧wa̧tu̧ku̧ tta̧tä̧rä̧ku̧.

¹² Ta̧wa̧ru̧wa̧ ti̧jä̧wa̧ Aporo ütü'kü'i̧nä̧ pä'üsä, jua̧u̧mä̧ kuawaruwärü to'kua täi ti̧jä̧wa̧tu̧ku̧ päda'anä̧, jitätämä̧ i̧'cha̧ pä'okü päjí, kko̧ro̧nü̧ ichü'anü̧ jo̧mȩnä̧tä̧ i̧chä̧kua̧.

Jȩtta̧ pä'ü weinü̧ wȩnȩ

¹³ Kua̧'kua̧ ku̧wȩnä̧rä̧tu̧ku̧mä̧, to̧pä̧rä̧kuä̧u̧ 'kiyünä̧ kka̧kuä̧tu̧kui̧. Kujurutuku kkü̧nä̧ kka̧kuä̧tu̧kui̧, u̧mä̧tü̧ 'kua̧rü̧nä̧.

¹⁴ O'kajuiyünä̧ jȩ'kuä̧tu̧ku̧mä̧, eseutätä jȩpä̧tu̧kui̧.

¹⁵ Chawaruwä chi̧jä̧wa̧tü̧, ukutumä̧ wo̧juä̧tü̧jä̧ Estéfana i̧tti̧mü̧ku̧ ä̧kuo̧mȩnä̧ Acaya rȩjȩttü̧ Dio-rü esetinä̧tü̧ pä'ümä̧ ja̧'wa̧ta̧nü̧ juätütä ja̧'a̧ Dio-rü esetinä̧tü̧rü̧ ppä'ädätümä̧.

¹⁶ Ja̧'wa̧ta̧nü̧ ukutu'i̧nä̧ juätürü kukuotätukua pä̧wä̧rü̧jä̧ku̧sä̧ ja̧'wa̧ta̧nü̧ o'katoi'ünä̧rü̧ Dio jäwänä̧ ppä̧'ä̧dä̧rü̧ aditätürümä̧.

¹⁷ Cheseunä̧ jä̧ku̧sä̧ Estéfana-rü̧'i̧nä̧, Fortunato-rü'i̧nä̧, Arcaico-rü'i̧nä̧ topü ttichäjiyäku, pärokuotü ukutu kuichätukuoka'a jä̧ja̧'a̧ttü̧.

¹⁸ Juätümä̧ cheseunä̧ jȩpi̧nä̧tü̧, ukuturu'i̧nä̧ kuesewätukunä̧, juätürümä̧ ppä'ädätukui.

Te'äu kädi'inomȩ

¹⁹ Asia rȩjȩttü̧ igresia pünä̧ ukuturu te'äwätü. Aquira'i̧nä̧, Prisca'i̧nä̧, ttojusodenä̧ dodepü ka̧ka̧kuä̧rä̧'i̧jä̧tu̧ku̧, tu̧ru̧wa̧ i̧mi̧nä̧ tettäwä̧u̧jä̧.

²⁰ O'katoi'ünä̧tä̧ tawaruwä ti̧jä̧wa̧tü̧mä̧ tettäwä̧u̧jä̧. Yotukunä̧, surojü juiyünä̧ 'chu̧'o̧pü̧ eseäkuäwätukui.

²¹ Ttü Pauru-mä̧, cha̧mü̧nä̧ pa̧ja̧tü̧ chu̧mü̧nä̧ wȩyu̧tu̧ tedäwä̧u̧jä̧.

²² Ya̧tȩ, Tu̧ru̧wa̧ Jesucrito-rü eseu repe'okümä̧, su̧ro̧pa̧tä̧ wa̧. ¡Tu̧ru̧wa̧mä̧ täkü i̧chä̧kua̧!

²³ Tu̧ru̧wa̧ rettü ppädümä̧, ukututäku kka̧ pä'üsä.

²⁴ Tu̧ru̧wa̧ Jesucrito-nä̧ ukutu o'katoi'ünä̧rü̧ eseusä.