1 Corintios 15 - Nuevo Testamento Uwotjüja

Crito wa'arettü ttoächinü̧ wȩnȩ

¹ Jitämä̧, chawaruwä chi̧jä̧wa̧tü̧, jareü wȩnȩ jidäwinü̧ kuamükuädätukua pä'üsä. Pi̧yȩtä̧ ja̧'a̧ jareü wȩnȩ esetinü̧'kotü, ji̧yȩnä̧tä̧ 'kiyünä̧ ku̧ja̧kuä̧tu̧ku̧mä̧.

² Ja̧'wa̧ta̧nü̧ pi̧yȩ jareü wȩnȩnä̧tä̧ ja̧'a̧ kuesetätukuttümä̧, ji̧yȩnä̧tä̧ ku̧ji̧pä̧tu̧kuä̧kua̧'a̧mä̧ surojü ra̧wä̧pi̧jü̧ttü̧; ja̧'wa̧nü̧ jo̧ka̧'a̧ jü̧ttü̧mä̧, yaparetä esetinä̧tü̧jä̧.

³ Ä̧kuo̧mȩnä̧mä̧, ttü chȩmi̧nü̧'a̧kuä̧tä̧, chu̧wo̧juȩtinä̧u̧jä̧: Crito-mä̧ 'korujuo'ächinü̧, ujutu suronä̧ jȩtä̧'i̧jü̧ mikuäwächünä̧ pä'ü, wȩyu̧kuä̧ wȩnȩ päü'a̧kuä̧;

⁴ Iku ttikuäjäku o'ka'a, wäbodäkuä mo̧ro̧ päi'omȩnä̧ wa'arettü tto'ächinü̧ pä'ü, wȩyu̧kuä̧ wȩnȩ päü'a̧kuä̧;

⁵ ja̧'wa̧nü̧ jä̧jí̧ o'ka'a, Cefarü'i̧nä̧, ja̧'wa̧ta̧nü̧ doce-nü̧ winä̧tü̧rü̧'i̧nä̧ i̧jȩkui̧nü̧ pä'ü.

⁶ Jua̧u̧nü̧ o'ka'amä̧, quinientos'i̧nä̧ yabonä̧ wotü tawaruwä ti̧jä̧wa̧tü̧rü̧'i̧nä̧ i̧jȩkui̧nü̧, juätüttümä̧ ji̧nä̧ a̧'kua̧rä̧tü̧, kkorotümä̧ 'korujuottächina̧'a̧nä̧.

⁷ Jua̧u̧nü̧ o'ka'amä̧ Sa̧ti̧a̧ku̧rü̧'i̧nä̧, apótore o'katoi'ünä̧rü̧'i̧nä̧ i̧jȩkui̧nü̧.

⁸ Rüjinä̧mä̧, ttürü'i̧nä̧ i̧jȩkui̧nü̧, kkä'konä̧ uwäpächü ji̧'ki̧cha̧wa̧ 'kua̧rü̧nä̧ jä̧'i̧nü̧'a̧nü̧.

⁹ Jua'amä̧, ttümä̧ apótorettümä̧ juiyo a̧'u̧kua̧sä̧, apóto pättü juiyü'anü̧'i̧nä̧ wa̧sä̧, Dio iäre igresia isotürü suronä̧ jȩttü̧nä̧ wedina̧'a̧ttü̧.

¹⁰ Ja̧'wa̧nü̧ ja̧'a̧nä̧ Dio-mä̧ ttürü re ü̧ji̧no̧mȩttü̧tä̧, pa̧'a̧nü̧ wa̧sä̧; jua̧u̧ re ü̧ji̧nü̧mä̧ yaparemä̧ jo̧ka̧'a̧ ji̧na̧'a̧ ttürümä̧. Ja̧'wa̧nü̧ ja̧'a̧nä̧, ttümä̧ juätü o'katoi'ünä̧ttü̧'i̧nä̧ abonä̧nü̧ aditinü̧sä̧; ja̧'wa̧nü̧ ja̧'a̧nä̧ ttümä̧kü̧ ja̧'a̧, ji̧nä̧somä̧ Dio ttürü re ü̧ji̧nü̧ kka̧'a̧ ttünä̧.

¹¹ Ja̧'wa̧nü̧ ja̧'a̧nä̧, ttü jidäwaja pä'ü'i̧nä̧, juätü jittäwina̧ja̧ pä'ü'i̧nä̧, ji̧nä̧somä̧ jua̧u̧tä̧tä̧ ja̧'a̧, jua̧u̧ jitäwinü̧tä̧ esetinä̧tü̧jä̧ ukuturu'i̧nä̧.

Kkorotü wa'arettü ttottächä̧kuȩ wȩnȩ

¹² Ja̧'wa̧nü̧ ja̧'a̧nä̧, ujutu Crito wa'arettü ttoächinü̧ wȩnȩ jitäwa'a ja̧'a̧mä̧ ¿tta̧'a̧nü̧ pä'ü ukututtü yotukunä̧mä̧, wa'arettümä̧ ttoächäkuäwokü pätta'a jä̧ttü̧?

¹³ Jua̧u̧nu̧mä̧, wa'arettü ttoächäkuäwä juiyüttümä̧. Crito'i̧nä̧ wa'arettümä̧ ttoächü juiyinü̧'a̧nü̧ ja̧'a̧;

¹⁴ ja̧'wa̧ta̧nü̧ Crito wa'arettü ttoächü juiyinü̧ttü̧mä̧, jitäu wȩnȩ'i̧nä̧, ja̧'wa̧ta̧nü̧ kua̧'kua̧ ku̧wȩnä̧rä̧tu̧ku̧'i̧nä̧ yoriso mikuäwokütä jü̧'a̧nü̧ ja̧'a̧.

¹⁵ Ja̧'wa̧nü̧ wa'arettü ttoächäkuäwä juiyüttümä̧, ujutumä̧ yapareu jitäwä'ija'atä ja̧'a̧ Dio ütü'kü jitäwä'ija'amä̧, Dio-mä̧ Crito-rü tto'ädinü̧ pä'ü jitäwa'attü̧.

¹⁶ Isopäi'ünä̧ 'korujuo'ächinä̧tü̧ wa'arettü ttottächoka'a jü̧ttü̧mä̧, Crito'i̧nä̧ wa'arettümä̧ tto'ächokü pi̧na̧jü̧;

¹⁷ ja̧'wa̧ta̧nü̧ Crito wa'arettü ttoächoka'a ji̧nü̧ttü̧mä̧, ukutu kua̧'kua̧ ku̧wȩnä̧rä̧tu̧ku̧'i̧nä̧ mikuäwoka'atä kua̧'kua̧ wȩnä̧rä̧tü̧jä̧; ja̧'wa̧ta̧nü̧ surojü jȩ'kuä̧'i̧jä̧tu̧ku̧'i̧nä̧ jȩpü̧ ikuoka'a ji̧yȩnä̧tä̧ kka̧kua̧ja̧tü̧jä̧.

¹⁸ Ja̧'wa̧nü̧ jü̧ttü̧mä̧, Crito-rü esetätü 'korujuo'ächinä̧tü̧'i̧nä̧ totte'ächina̧'a̧tä̧ ja̧'a̧.

¹⁹ Pi̧jä̧nä̧ ta̧'kua̧rä̧i̧tä̧ Crito-nä̧ tta̧tä̧rü̧ttü̧mä̧, ¡pi̧jä̧ ttü̧ja̧mä̧ ujutu o'katoi'ünä̧rü̧ rȩrü̧jü̧nä̧tä̧ to̧ttä̧u̧jä̧!

²⁰ Ja̧'wa̧nü̧ jü̧'a̧nü̧ ja̧'a̧nä̧, Crito-mä̧ wa'arettü ttoächina̧'a̧tä̧ ja̧'a̧. Jua̧u̧tä̧ ji̧na̧'a̧ ä̧kuo̧mȩnä̧ i̧sa̧ jü̧nä̧ wa'arettü tto'ächinü̧mä̧.

²¹ Isopäi'ünä̧ ya̧tȩ jȩi̧nü̧nä̧tä̧ wa'are doächinü̧ta'anü̧, ya̧tȩ jȩi̧nü̧nä̧ wa'arettü ttoächäkuäwämä̧ doächina̧'a̧.

²² Ja̧'wa̧ta̧nü̧ Adá̧-nä̧mä̧ o'katoi'ünä̧ 'korujuottächüta̧'a̧nü̧, Crito-nä̧mä̧ o'katoi'ünä̧ kkä̧kuä̧wä̧ ttu̧ju̧nä̧rä̧kuo̧tü̧.

²³ Ja̧'wa̧nü̧ ja̧'a̧nä̧ yotukunä̧rü̧ pä'ü rütäu'akuä jä̧kua̧'a̧: Ä̧kuo̧mȩnä̧mä̧ Crito ji̧na̧'a̧, jua̧u̧nü̧ o'ka'amä̧ Crito-rü esetätürü jä̧kua̧'a̧, Chutä ichomȩnä̧.

²⁴ Jua̧u̧nü̧ o'ka'a täkü pi̧jä̧mä̧ beipächäkua'a, o'katoi'ünä̧ ukuo ruwotürü'i̧nä̧, juruwätürü'i̧nä̧ kkȩdü̧ iku uruwo weä'ijü jä'o Dio-rü iyomȩnä̧.

²⁵ Isopäi'ünä̧ Crito-mä̧ uruwomä̧ wȩä̧kua̧ aboiyotü o'katoi'ünä̧rü̧ kkȩdü̧ ikuomȩbü päi'ünä̧;

²⁶ Jua̧u̧nü̧ o'ka'a a̧bo̧i̧ya̧ o'komȩnä̧ si'epü i̧kuä̧kua̧mä̧ wa'are jä̧kua̧'a̧.

²⁷ Isopäi'ünä̧ Dio i̧wȩnȩmä̧ pä'a: Dio-mä̧ iyinä̧ku̧ o'kajuiyünä̧ i̧dȩa̧'a̧ jü̧nä̧ wea pä'ütä. Jua'a «o'kajuiyünä̧» pä'amä̧, Dio-rümä̧ päoka'a, jua̧u̧tä̧ o'kajuiyünä̧ iyinü̧tä̧ ja̧'a̧ttü̧ wea pä'ü.

²⁸ Ja̧'wa̧nü̧ ja̧'a̧ttü̧ o'kajuiyünä̧tä̧ Crito weütätä päi'omȩnä̧, Chutä'i̧nä̧ Dio weünä̧tä̧ ü̧ji̧pä̧kua̧, o'kajuiyünä̧ weünä̧ iyinü̧rü̧, jua'amä̧ Dio-mä̧ o'kajuiyünä̧tä̧ u̧wä̧mȩnä̧ jü̧nä̧tä̧ wea pä'ü.

²⁹ Ja̧'wa̧nü̧ jo̧ka̧'a̧ ja̧'a̧mä̧, ¿tta̧'a̧nü̧ pä'ü wa'ü ikuinä̧tü̧ tti̧mi̧nä̧ bautizo jȩttä̧kuä̧wa̧'a̧jä̧ttü̧? ¿Wa'ü ikuinä̧tü̧ wa'arettü tto'ächokotü wotünä̧mä̧?

³⁰ Ja̧'wa̧ta̧nü̧ ¿ujutumä̧, tta̧'a̧nü̧ pä'ü o'kajuiyünä̧ mo̧ro̧ ji̧nü̧ a̧'u̧kuä̧ tote'ächü'anü̧ ra̧wä̧pi̧jü̧nä̧ kka̧kuä̧tü̧jä̧ttü̧?

³¹ Jueünä̧tä̧ pädäu̧jä̧ chawaruwä chi̧jä̧wa̧tü̧, Tu̧ru̧wa̧ Jesucrito ukuo ä̧rä̧mü̧nä̧, mo̧ro̧ ji̧nü̧ a̧'u̧kuä̧ wa'are tü'küwuönä̧ kkü̧sä̧.

³² Éfeso ütawiyättümä̧ de'a isotü pä̧i̧kuä̧tü̧ jä̧'i̧nü̧'a̧nü̧ wotü ttü̧ja̧ku̧ rowäwinü̧sä̧ ja̧'wa̧nü̧ ja̧'a̧nä̧, isopäi'ünä̧ wa'ü ikuinä̧tü̧ ttoächäkuäwokü jü̧ttü̧mä̧, ¿däjetä chȩmi̧na̧'a̧jä̧ttü̧? jua̧u̧nu̧mä̧ kkorotü pättä'ijü̧'a̧kuä̧ jȩtä̧tu̧kua̧: kuä̧nü̧ jü̧nä̧tä̧, au jü̧nä̧tä̧ jȩtä̧tu̧kua̧, täkü yo̧i̧mo̧ro̧mä̧ 'korujuotächäkua'attü̧.

³³ Ttüyaparewa'anä̧ kuiyäwätukuä. Ja̧'wa̧ta̧nü̧ pä'inä̧tü̧: «Suronä̧ jȩpä̧tü̧ku̧ ppä̧kuä̧chä̧rä̧tu̧kuä̧, adiu jȩttä̧'i̧jü̧mä̧ totte'ächüdo,» pä'inä̧tü̧.

³⁴ Porächätukui, suronä̧ jȩ'kuä̧'i̧jä̧tu̧ku̧ käkuädächätukua pä'ü rekuä rü̧ja̧'a̧; ukututtü yotüte Dio-rü jerupätü kka̧kuä̧tü̧ pätta'a ä̧ju̧ku̧sä̧, dä'ä ttukuätukunä̧ pädäu̧jä̧.

Wa'ü ikuinä̧tü̧ ttottächä̧kuȩ wȩnȩ

³⁵ Yotüte pättäkuotü: ¿Toku ppa̧ttä̧chä̧kua̧'a̧jä̧ttü̧ wa'arettü, pä'äjita'anü̧ a̧'kua̧rä̧kuä̧wä̧ra̧'a̧mä̧? ¿Jitä jareünä̧ ttidepämä̧, toku ttäkuotüjä̧ttü̧?

³⁶ ¡Amükuädäkuäwä jui'ätüjä̧! Kuäwä ttu̧ju̧no̧mȩnä̧ bawa pä'ümä̧, u̧wä̧ju̧ jä̧ji̧mä̧ ä'kanä̧ wa'ü ikua pä'ütä ja̧'a̧.

³⁷ Kuäwä ttu̧ju̧no̧mȩnä̧mä̧ isade bawäkuademä̧ kku̧nä̧wo̧kü̧, ji̧nä̧somä̧ u̧wä̧ju̧ isätetä kku̧nä̧wä̧ ja̧'a̧, kkorojuei ja̧ pä'ü'i̧nä̧, pärokuätä jä̧kua̧'a̧ ba̧wä̧kuȩmä̧.

³⁸ Ja̧'wa̧nü̧ ja̧'a̧ttü̧ Dio-mä̧, u̧wä̧ju̧ ote jättäji pünä̧mä̧ Churutä pä̧wä̧rü̧jo̧mȩnä̧tä̧ jü̧ ja̧'a̧.

³⁹ O'kajuiyütä ttidepämä̧ yorätewoka'a; ji̧yȩtȩmä̧ ttü̧ja̧ ttidepä ja̧'a̧, kkoromä̧ de'a isotü ttidepä ja̧'a̧, kkoromä̧ ppi̧yu̧ ttidepä ja̧'a̧, kkoromä̧ po̧i̧ ttidepä ja̧'a̧.

⁴⁰ Ja̧'wa̧nü̧ jü̧ta̧'a̧nü̧, mo̧ro̧jä̧ jäwä ttidepä'i̧nä̧ ja̧'wa̧ta̧nü̧ pi̧jä̧nä̧ rȩjȩttü̧ ttidepä'i̧nä̧ kka̧'a̧; ja̧'wa̧nü̧ ja̧'a̧nä̧ ji̧yȩtȩmä̧ mo̧ro̧jä̧ttü̧ ttidepä üadiwä ja̧'a̧ ja̧'wa̧ta̧nü̧ kkoromä̧ pi̧jä̧ rȩjȩttü̧ ttidepä üadiwä ja̧'a̧.

⁴¹ Mo̧ro̧ kkä̧wa̧ i̧tȩya̧u̧'i̧nä̧, yodó kkä̧wa̧ i̧tȩya̧u̧'i̧nä̧ ja̧'wa̧ta̧nü̧ si̧ri̧'kü̧ tti̧tȩya̧u̧'i̧nä̧, yo̧mȩtȩnä̧mä̧ yorätewoka'a.

⁴² Ja̧'wa̧ta̧nü̧tä̧ jä̧kua̧'a̧ wa'inä̧tü̧ ttottächomȩnä̧mä̧. Pparuwächünä̧ ttu̧ju̧na̧'a̧nä̧, wa'ü ikuokü jäwänä̧tä̧ ttoächäkuäwäkua'a.

⁴³ Ttesewoka'a ttu̧ju̧na̧'a̧mä̧, eseäkuäwänä̧ ttoächäkuäwäkua'a; ttujuru juiyünä̧ ttu̧ju̧na̧'a̧nä̧, ttujuru kkü̧nä̧ ttoächäkuäwäkua'a.

⁴⁴ Isotü ttidepänä̧ ttu̧ju̧na̧'a̧nä̧, epíritu idepä jäwänä̧ ttoächäkuäwäkua'a. Isotü ttidepä jäwä'i̧nä̧ kka̧'a̧nä̧, epíritu jäwä ttidepä'i̧nä̧ kka̧'a̧.

⁴⁵ Wȩyu̧kuä̧ wȩnȩ pä'a: «Ä̧kuo̧mȩnä̧ ttü̧ja̧sa̧ Adá̧, a̧'kua̧rü̧ jä̧ji̧mä̧ ttü̧ja̧sa̧tä̧ pä'i'inü̧»; rüjinä̧ Adá̧-mä̧, epíritu wa̧ päjimä̧ tta̧'kua̧rü̧ iyäwä i̧sa̧ päi'ünä̧tä̧ pä'i'inü̧.

⁴⁶ Ja̧'wa̧nü̧ ja̧'a̧ttü̧, tidepättü ä̧'kua̧rä̧kuä̧wä̧tä̧ ja̧'a̧ ä̧kuo̧mȩnä̧mä̧, juȩnȩ o'komȩnä̧mä̧, epíritu jäwänä̧ tta̧'kua̧rü̧tä̧ ja̧'a̧.

⁴⁷ Ä̧kuo̧mȩnä̧ ttü̧ja̧sa̧mä̧, rȩjȩttü̧ uwäbe'äkuäwa̧ ji̧na̧'a̧ ja̧'wa̧nü̧ jo̧mȩttü̧ pi̧jä̧ ttü̧ja̧ i̧sa̧ pinü̧; juȩnȩ o'komȩnä̧ i̧sa̧mä̧, Tu̧ru̧wa̧ ji̧na̧'a̧, mo̧ro̧jä̧ra̧'a̧ttü̧ ichinü̧.

⁴⁸ Pi̧jä̧ rȩjȩ ttü̧ja̧sa̧ ja̧'a̧ttü̧ ja̧'wa̧nü̧tä̧ wotü pi̧jä̧ ttü̧ja̧mä̧; mo̧ro̧jä̧ ttü̧ja̧sa̧ ja̧'a̧ttü̧ ja̧'wa̧nü̧tä̧ wotü mo̧ro̧jä̧ ttü̧ja̧mä̧.

⁴⁹ Ja̧'wa̧nü̧ ä̧kuo̧mȩnä̧ i̧sa̧, pi̧jä̧ttü̧ uwäbe'äkuäwa̧ a̧'kua̧juä̧ kku̧nä̧ri̧nä̧tü̧jä̧, ja̧'wa̧nü̧ ji̧nü̧ta'anü̧ mo̧ro̧jä̧ i̧sa̧ Crito 'kua̧rü̧nä̧ wotüjä̧.

⁵⁰ Chawaruwä chi̧jä̧wa̧tü̧, pi̧yȩ pä'üsä ukuturu: Ttidepä'i̧nä̧, ttukuoja jäwä'i̧nä̧, ru̧wa̧ Dio weükumä̧ wiwawächoka'a; surojuoächü jäwämä̧, beipächokükumä̧ weoka'a.

⁵¹ Dio jäwä kuieruwinä̧tu̧ku̧ jidäwäu̧jä̧: O'katoi'ünä̧mä̧ wa'ümä̧ tikuoka'a jä̧kua̧'a̧nä̧, o'katoi'ünä̧ tü'ärowächi'äkuotüjä̧.

⁵² Jurunä̧tä̧, tti'äre yȩbi̧ päi'a'attü, trompeta rüjí rä̧mi̧po̧mȩnä̧, wa'ü ikuinä̧tü̧mä̧ wa'ü ikuäwokünä̧ ttottächi'äkuotü. Ja̧'wa̧nü̧ ja̧'a̧nä̧ ujutumä̧ ti'ärowächi'äkuotüjä̧.

⁵³ Isopäi'ünä̧ pi̧yȩ pparuwächü beipächümä̧ 'ka̧tä̧wi̧'a̧ pä'ü rekuä rü̧ja̧'a̧ pparuwächü beipächokünä̧ ja̧'wa̧ta̧nü̧ pi̧yȩ tidepä wa'ü ikumä̧, tidepä wa'ü ikuokü jäwänä̧.

⁵⁴ Ja̧'wa̧nü̧ pi̧yȩ tidepä beipächümä̧, beipächokü jäwänä̧ 'ka̧tä̧wi̧'o̧mȩnä̧ ja̧'wa̧ta̧nü̧ wa'ü iku jäwämä̧, wa'ü ikuäwokü jäwänä̧ 'ka̧tä̧wi̧'o̧mȩnä̧, wȩyu̧kuä̧ wȩnȩ pä'ijü'akuä 'kuäopäkua'a: «Wa'aremä̧, täkü toe'ächa'a,»

⁵⁵ ¿Wa'are kui̧wi̧ra̧ri̧ ujurumä̧ ti̧yȩjä̧ttü̧? ¿ukú, wa'are reju kujurumä̧ ti̧yȩjä̧ttü̧?

⁵⁶ Isopäi'ünä̧ wa'are i̧wi̧ra̧ri̧mä̧ suronä̧ jȩä̧kuä̧wä̧ ja̧'a̧ ja̧'wa̧ta̧nü̧ surojü jȩä̧kuä̧wä̧ ujurumä̧ weäwä wȩnȩ ja̧'a̧.

⁵⁷ ¡Ja̧'wa̧nü̧ ja̧'a̧nä̧, Dio-rü esewätüjä̧, Tu̧ru̧wa̧ Jesucrito-nä̧tä̧ kkȩdü̧ ikuäwä iyina̧'a̧ttü̧!

⁵⁸ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, kua̧mi̧'ki'ächi'ü yaboku tätukui, yabonü̧, 'kuäopünä̧tä̧ Tu̧ru̧wa̧ aditäwä aditü; Tu̧ru̧wa̧nä̧ adikuämä̧ yaparemä̧ adikuokü pä'ü.