1 Corintios 14 - Nuevo Testamento Uwotjüja

Wo̧juȩku̧nä̧ adikuä wȩnȩ

¹ Eseu repeäkuäwänä̧tä̧ tätukui ja̧'wa̧ta̧nü̧ epíritu jäwä adikuä Dio iyätukuaku usätukui ja̧'wa̧nü̧ ja̧'a̧nä̧, ji̧nä̧somä̧ Dio i̧mi̧nä̧ jiäkuäwätä.

² Ttü̧ja̧ tti̧wȩnȩ jo̧kü̧nä̧ ukuokumä̧, ttü̧ja̧rü̧mä̧ ukuokuokü, Dio-rütä ukuoku; jua'amä̧ ya̧tȩ'i̧nä̧ u̧wo̧jui̧po̧ko̧ku̧ epíritu-nä̧tä̧ ukuokua'attü̧ jeruwuö wȩnȩ.

³ Ja̧'wa̧nü̧ ja̧'a̧nä̧, Dio i̧mi̧nä̧ jiäkuäwämä̧ ttü̧ja̧rü̧ äräbe'ü kkä̧nü̧, ro̧'ȩpü̧'i̧nä̧ ro̧'ȩpü̧ kkä̧nü̧, ttajuäkuäu'i̧nä̧ jȩpü̧ ikua'a.

⁴ Ttü̧ja̧ ttukuokuokü wȩnȩnä̧ ukuokumä̧, churutätä ppädäku; ja̧'wa̧nü̧ ja̧'a̧nä̧ Dio i̧mi̧nä̧ ji'äumä̧ igresia isotürü ttä̧rä̧mü̧nä̧ ji'äu.

⁵ Ttümä̧ pä̧wä̧rü̧jä̧ku̧sä̧ ukutu o'katoi'ünä̧, ttieruwuö wȩnȩnä̧'i̧nä̧ kukuokuätukua pä'ü; ja̧'wa̧nü̧ ja̧'a̧nä̧, ji̧nä̧somä̧ pä̧wä̧rü̧jä̧ku̧sä̧ Dio i̧mi̧nä̧ jikuäwätukua pä'ü; isopäi'ünä̧ Dio i̧mi̧nä̧ ji'äumä̧ ttieruwuö wȩnȩnä̧ ukuokuttü'i̧nä̧ abonä̧nü̧ wa̧ ja̧'a̧ttü̧, ja̧'wa̧nü̧ ja̧'a̧nä̧ jua̧u̧ jittäu rä'epü iku ji'äu ü̧jo̧mȩnä̧mä̧ adiwa'a, igresia isotürü ppäda'attü.

⁶ Ja̧'wa̧nü̧ ja̧'a̧ttü̧ chawaruwä chi̧jä̧wa̧tü̧, ttü'i̧nä̧ ukuturu kuieruwätuku wȩnȩnä̧ ukuoku chichüttümä̧ ¿däjé ppäda'ajä̧ttü̧ ukuturumä̧, ku̧wo̧juä̧chi̧'ä̧tu̧kua̧ pä'ü jidäwaja pä'ü'i̧nä̧, Dio i̧mi̧nä̧ jidäwaja pä'ü'i̧nä̧, kkä̧kuä̧wä̧ wȩnȩ jidäwaja pä'ü'i̧nä̧? jü̧nä̧mä̧.

⁷ Isopäi'ünä̧ kkorojuei rä̧mi̧pü̧ jäwä música pättü, mä̧ra̧na̧'i̧nä̧, arpa pättü'i̧nä̧, i̧wȩnȩ i̧mi̧ku̧ pünä̧ rä̧mi̧pü̧ juiyüttümä̧, ¿Tta̧'a̧nü̧ ttu̧wo̧juö̧'a̧nü̧ttü̧ mä̧ra̧na̧ i̧wȩnȩ, arpa i̧wȩnȩ ja̧'a̧ pä'ümä̧?

⁸ Ja̧'wa̧ta̧nü̧ kurä päi'omȩnä̧, trompeta wäjuönä̧ rä̧mi̧pü̧ juiyüttümä̧, ¿toku ttadikuo'a'ajä̧ttü̧ ttürowäwa pä'ümä̧?

⁹ Ja̧'wa̧nü̧ jü̧ta̧'a̧nü̧ ja̧'a̧ ukutu'i̧nä̧; kui̧wȩnȩtu̧ku̧nä̧ adiu wäjuönä̧ päkuätuku juiyüttümä̧ ¿Toku ttu̧wo̧jui̧pä̧kua̧'a̧jä̧ttü̧ kukuokuätukumä̧? jua'amä̧ isopparütä ukuokuätüjä̧.

¹⁰ Isopäi'ünä̧ pi̧jä̧nä̧mä̧ rü̧ȩnä̧ kka̧kua̧'a̧ ttü̧ja̧ tti̧wȩnȩmä̧ ja̧'wa̧nü̧ ja̧'a̧nä̧ jua̧u̧mä̧ o'kajuiyünä̧tä̧ ji̧yȩku̧nä̧ ttukuokumä̧ ttu̧wo̧juö̧nä̧tä̧ ja̧'a̧.

¹¹ Ja̧'wa̧nü̧ ja̧'a̧nä̧, jua̧u̧ ukuoku wȩnȩ chieruwuöttümä̧ kko̧ro̧jä̧ttü̧ i̧chä̧kuä̧wa̧ 'kua̧rü̧nä̧tä̧ wa̧sä̧ churutämä̧, pärokua'aku chutä'i̧nä̧ ja̧'wa̧nü̧tä̧ wa̧ ttürümä̧.

¹² Ja̧'wa̧nü̧ ja̧'a̧ttü̧, epíritu iyü jäwä ku̧ju̧nä̧ra̧ päkuätukua'amä̧, yabonü̧tä̧ usätukui igresia ä̧rä̧mü̧nä̧ pädü jäwätä.

¹³ Ja̧'wa̧nü̧ ja̧'a̧ttü̧, kkoro wȩnȩnä̧ kukuokuttümä̧, Dio-rü ukuoku jä'epi, jua̧u̧ wäjuönä̧ rä'epü iku jikuäwäkua'anü̧.

¹⁴ Ja̧'wa̧ta̧nü̧ chi̧wȩnȩ jo̧kü̧nä̧ Dio-rü chukuokuttümä̧, cha̧'kua̧rü̧ i̧sa̧mä̧ ukuokua'anä̧ chukuokumä̧ wo̧jui̧'o̧kü̧sä̧.

¹⁵ ¿Jua̧u̧nu̧mä̧ tokutä jȩchä̧kua̧'a̧jä̧ttü̧? toku ttoka'anü̧, cha̧'kua̧rü̧ i̧sa̧nä̧ chukuokua'anä̧'i̧nä̧, chamükuädünä̧mä̧ chu̧wo̧jua̧ pä'ü ja̧'a̧; cha̧'kua̧rü̧ i̧sa̧nä̧ ra̧da̧'a̧nä̧'i̧nä̧, chamükuädünä̧mä̧ chu̧wo̧jua̧ pä'ü ja̧'a̧.

¹⁶ Isopäi'ünä̧ kua̧'kua̧rü̧ i̧sa̧nä̧tä̧ Dio-rü kueseuttümä̧, ppeyänä̧ ä̧ju̧kuä̧rü̧mä̧; ¿toku, adiwa'a pä'ü ppächi'äkua'ajä̧ttü̧ ukú Dio-rü kukuokukumä̧, kukuoku wȩnȩ ieruwa'amä̧?

¹⁷ ¡Isopäi'ünä̧tä̧! Dio-rü kukuokumä̧ adiwa'anä̧, kka̧ra̧rü̧mä̧ ppädü juiyünä̧ ja̧'a̧.

¹⁸ Tttümä̧ Dio-rü eseusä, ukututtü'i̧nä̧ abonä̧nü̧ kkorotü tti̧wȩnȩ rü̧ȩnä̧ chukuokua'attü̧;

¹⁹ Ja̧'wa̧nü̧ ja̧'a̧nä̧, igresia-nä̧mä̧ ji̧mü̧tȩ jäwätä chukuokua pä'üsä, wäjuönä̧ cha̧ju̧ku̧tä̧, diez mil-nü̧ jo̧mȩnä̧ chi̧wȩnȩmä̧ pädaja pä'ü'i̧nä̧, ttieruwa'attü̧.

²⁰ Chawaruwä chi̧jä̧wa̧tü̧, ppo̧'ä̧tü̧ jä̧'i̧nü̧'a̧nü̧ amükuädätukui surojünä̧mä̧; ja̧'wa̧nü̧ ja̧'a̧nä̧ kuamükuädätukunä̧mä̧ tä̧mü̧ 'kua̧rü̧nä̧ amükuädätukui.

²¹ Wȩyu̧kuä̧ wȩnȩmä̧ pä'a: «Pitü ttü̧ja̧rü̧mä̧ kkoro wȩnȩnä̧'i̧nä̧, kkorotü ttänä̧'i̧nä̧ chukuokuäkua̧sä̧; ja̧'wa̧nü̧ ja̧'a̧nä̧'i̧nä̧ ttä̧ju̧kuo̧kä̧kua̧sä̧, pä'ü Tu̧ru̧wa̧mä̧.»

²² Ja̧'wa̧nü̧ ja̧'a̧ttü̧, kkoro wȩnȩnä̧ ukuokuäkuäwämä̧ Dio-rü esetokotü totta pä'ü jü̧ ja̧'a̧. Ja̧'wa̧nü̧ ja̧'a̧nä̧ Dio i̧mi̧nä̧ ukuokuäkuäwämä̧ Dio-rü esetätürü ja̧'a̧tȩ'ü̧ jü̧ ja̧'a̧.

²³ Isopäi'ünä̧ igresia isotü ka̧ka̧kui̧'ä̧jä̧'kotü ttü̧'ȩjo̧mȩ, ya̧tȩ jȩru̧pa̧, Dio-rü esetokü, o'katoi'ünä̧ tti̧wȩnȩ pünä̧ ttukuokua'a do'ächi'ü ä̧ju̧ku̧ttü̧mä̧ ¿jitüjamä̧ tä̧'ä̧mä̧kuä̧wä̧tü̧ ja̧'a̧, pä'ümä̧ amükuädokü tä̧jí̧?

²⁴ ja̧'wa̧nü̧ ja̧'a̧nä̧, o'katoi'ünä̧ Dio i̧mi̧nä̧ jittäwa'a, Dio-rü esetokü, jȩru̧pa̧ do'ächi'ü ä̧ju̧ku̧ttü̧mä̧ chutätä u̧wo̧juä̧kua̧, ji̧yȩja̧mä̧ isopäi'ünä̧ ja̧'a̧.

²⁵ Yä̧wä̧i̧nä̧ a̧mi̧so'kinä̧ ȩnä̧rä̧'i̧jü̧mä̧ i̧jȩkuä̧chä̧kua̧'a̧, ja̧'wa̧nü̧ jo̧mȩnä̧ Dio-rü iwe'kiyunä̧ pä̧mä̧dü̧ esewä̧kua̧, isopäi'ünä̧ Dio-mä̧ ukututä ku̧'kä̧tȩtu̧ku̧nä̧ kkü̧ ja̧'a̧ pä'ü.

Wetta pä'ü rekuä rü̧jü̧ wȩnȩ

²⁶ ¿Toku päta'ajä̧ttü̧ chawaruwä chü̧jä̧wa̧tü̧?, ka̧ka̧kui̧pü̧ ukutu, yotukunä̧ salmos ra̧tto̧mȩnä̧, kkorotümä̧ kkä̧kuä̧wä̧ ttu̧wo̧juȩto̧mȩnä̧ ja̧'wa̧ta̧nü̧ tti̧wȩnȩ jo̧kü̧nä̧ ttukuokuomȩnä̧, Dio i̧jȩpü̧ jittäwomȩnä̧, rä'epü iku jittäwomȩnä̧mä̧. Jȩpä̧tu̧kui̧, ja̧'wa̧nü̧ ja̧'a̧nä̧ o'kajuiyünä̧tä̧ ukuturu äräbe'ütä.

²⁷ Ja̧'wa̧ta̧nü̧ tti̧wȩnȩ jo̧kü̧nä̧ ttukuokuomȩnä̧mä̧, ta̧ju̧ jo̧mȩnä̧tä̧, wä̧mȩtukuä jo̧mȩnä̧tä̧, kkorotü ttukuoku o'ka'atä, ya̧tȩ rä'epü ji'äu ü̧jü̧nä̧tä̧ jȩpä̧tu̧kui̧.

²⁸ Ja̧'wa̧nü̧ ja̧'a̧nä̧, jua̧u̧ wȩnȩ ya̧tȩ'i̧nä̧ rä'epü iku ji'äu, igresia-nä̧ toüttümä̧, 'korujueinä̧, ukutätä Dio-rütä ukuokui.

²⁹ Ja̧'wa̧ta̧nü̧, profetas wotü'i̧nä̧ ta̧ju̧tä̧tä̧, wä̧mȩtukuätätä ukuokuätukui, kkorotü adiwomȩnä̧ pätta'anä̧.

³⁰ Ja̧'wa̧nü̧ ja̧'a̧nä̧, juȩnȩ pȩjä̧tü̧ttü̧, ya̧tȩrü̧ Dio ji̧yȩtȩ i̧jȩpü̧ttü̧mä̧, ä̧kuo̧mȩnä̧ ukuokuäjimä̧ 'koruchi'i.

³¹ Pa̧'a̧nü̧ jȩpä̧tu̧kui̧ o'katoi'ünä̧ yotüku pünä̧, o'katoi'ünä̧ ä̧ju̧ku̧ ttu̧wo̧jui̧'ä̧kua̧'a̧nü̧.

³² Ja̧'wa̧ta̧nü̧ profetas wotü, ttu̧wo̧juȩtü̧mä̧ profetas pättü'a̧kuä̧tä̧ ja̧'a̧.

³³ Ja̧'wa̧nü̧ ja̧'a̧nä̧, Dio-mä̧ ttieruwächi'ünä̧mä̧, ttire'tewächünä̧mä̧ wokü ja̧'a̧. Pärokua'aku, Dio-mä̧ wȩnȩ juiyünä̧ i̧sa̧ ja̧'a̧. Kkoro igresia o'kajuiyünä̧ jü̧ta̧'a̧nü̧,

³⁴ Nä̧tü̧'i̧nä̧ igresia isotü ttü̧ka̧ka̧kuo̧mȩmä̧, ttukuokua pä'ü weäwoka'a; ttukuota pä'ütä ja̧'a̧ weäwä wȩnȩ päüta'anü̧.

³⁵ Kkoro juei ttu̧wo̧jua̧ pättüttümä̧, ttirekuomü̧rü̧ jä'epü ä̧ju̧kuä̧tü̧ ttojusodettü; jua'amä̧, suronä̧ uwäwa'attü̧, isaju igresia isotü ttä'kattü kkukuokuomȩnä̧.

³⁶ Suro, Dio i̧wȩnȩmä̧ ukututtütämä̧ kkä̧mä̧do̧ka̧'a̧ ji̧na̧'a̧, ja̧'wa̧ta̧nü̧ ukututä̧mä̧kü̧ ji̧na̧'a̧ Dio i̧wȩnȩ ȩmi̧nä̧tü̧mä̧.

³⁷ Ja̧'wa̧ta̧nü̧ ya̧tȩ profeta-sä päüttümä̧ ja̧'wa̧ta̧nü̧ Epíritu ukuokuäkusä päüttümä̧, pi̧yȩ chi̧wȩyu̧tu̧mä̧, Tu̧ru̧wa̧ weinü̧ ja̧'a̧ pä'ü wo̧jua̧.

³⁸ Ja̧'wa̧nü̧ ja̧'a̧nä̧, pi̧yȩ esetoka'a jü̧ttü̧mä̧, Tu̧ru̧wa̧'i̧nä̧ tookoku jä̧kua̧.

³⁹ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, Dio i̧mi̧nä̧ ukuokuäkuäwä yabonü̧, usätukui ja̧'wa̧nü̧ ja̧'a̧nä̧ kkoro wȩnȩnä̧ ukuokuäkuäwämä̧, tto̧kuȩpä̧rä̧tu̧kuä̧;

⁴⁰ Ja̧'wa̧nü̧ ja̧'a̧nä̧, o'kajuiyünä̧ jȩ'kuä̧tu̧ku̧mä̧ adiwomȩnä̧, ukuotü jȩpä̧tu̧kui̧.