1 Corintios 13 - Nuevo Testamento Uwotjüja

Eseäkuäwättü u̧wä̧mȩnä̧ jü̧

¹ Ttü̧ja̧ tti̧wȩnȩ chukuokuaja pä'ü'i̧nä̧, á̧gȩrȩ tti̧wȩnȩ chukuokuaja pä'ü'i̧nä̧, eseu repeäkuäwä juidomȩnä̧mä̧, kuoräuba rä̧mi̧pa̧'a̧ jä̧'i̧nü̧'a̧nü̧tä̧ ja̧'wa̧ta̧nü̧ campana rȩmi̧pa̧'a̧ jä̧'i̧nü̧'a̧nü̧tä̧ wa̧sä̧.

² Ja̧'wa̧ta̧nü̧ Dio i̧mi̧nä̧ jiäkuäwä chu̧ju̧nä̧ra̧ja̧ pä'ü'i̧nä̧, ttu̧wo̧juo̧kü̧ jäwä o'kajuiyünä̧ chu̧wo̧jua̧ja̧ pä'ü'i̧nä̧, wo̧juä̧wä̧ wȩnȩ chu̧wo̧juo̧ttü̧'i̧nä̧, müä'ka'i̧nä̧ pporächi'ünä̧ cha̧'kua̧ chu̧wȩnä̧rü̧ttü̧'i̧nä̧, eseu repeäkuäwä juidüttümä̧, ttümä̧ mikuäwokütä jȩpü̧sä̧.

³ Ja̧'wa̧ta̧nü̧, usurä isotürü chukuäje'a pä'ü chiäre o'kajuiyünä̧ iyü kkä̧nü̧, chidepä kuo'ü ikunä̧ chiyaja pä'ü'i̧nä̧, eseu repeäkuäwä juidomȩnä̧mä̧, ttümä̧ mikuäwokütä jȩpü̧sä̧.

⁴ Eseu re kkä̧kuä̧wä̧mä̧ usurä ȩmä̧kuä̧wä̧ ja̧'a̧; adiutä jȩä̧kuä̧wä̧ ja̧'a̧; kka̧ra̧ u̧ju̧nä̧ro̧mȩnä̧ ttüjü'kü juiyünä̧ toäkuäwokü ja̧'a̧; u̧wä̧mȩnä̧ wa̧sä̧ päwokü ja̧'a̧, ukuomä̧ te'äkuäwokü ja̧'a̧,

⁵ surojuoepümä̧ jȩä̧kuä̧wo̧kü̧ ja̧'a̧; tta̧mü̧nä̧ pa̧ja̧tü̧ jäwämä̧ usäwokü ja̧'a̧; a̧mü̧nä̧tä̧ jo̧mȩnä̧ ra̧wä̧ri̧pä̧rä̧kuä̧wo̧kü̧ ja̧'a̧, pä̧i̧ 'chu'ädü kku̧nä̧wo̧kü̧ ja̧'a̧;

⁶ surojü 'kuäopomȩnä̧ ttesewoka'a, jueü wȩnȩnä̧tä̧ eseäkuäwä ja̧'a̧.

⁷ O'kajuiyünä̧ usurä ȩmä̧wä̧kuä̧wä̧ ja̧'a̧, o'kajuiyünä̧ esetäkuäwä ja̧'a̧, o'kajuiyünä̧ tta̧wä̧rä̧kuä̧wä̧ ja̧'a̧, o'kajuiyünä̧ tta̧mi̧'kiächi'äkuäwä ja̧'a̧.

⁸ Eseu repeäkuäwämä̧ yorisotä beipächokü ja̧'a̧; ja̧'wa̧nü̧ ja̧'a̧nä̧ Dio i̧mi̧nä̧ jiäkuäwämä̧ beipächä̧kuȩ ja̧'a̧, tti̧wȩnȩ pünä̧ ukuokuäkuäwä'i̧nä̧ beipächä̧kuȩ ja̧'a̧, ja̧'wa̧ta̧nü̧ ttu̧wo̧juö̧ wȩnȩ'i̧nä̧ beipächä̧kuȩ ja̧'a̧.

⁹ Isopäi'ünä̧ wo̧juä̧wä̧mä̧ ju'totä wo̧juä̧tü̧jä̧ ja̧'wa̧ta̧nü̧ ju'totä ji'äwätüjä̧ Dio i̧mi̧nä̧mä̧,

¹⁰ ja̧'wa̧nü̧ ja̧'a̧nä̧ jo̧mȩnü̧ adiwä juei ichomȩnä̧mä̧, jitä kkä'kobütä jü̧mä̧ beipächäkua'a.

¹¹ Ji̧'ki̧cha̧wa̧ chäimä̧, ukuokuinü̧sä̧, amükuädinü̧sä̧, ja̧'wa̧nü̧ ja̧'a̧ pä'inü̧sä̧, ji̧'ki̧cha̧wa̧ jü̧nä̧tä̧; ja̧'wa̧nü̧ ja̧'a̧nä̧ büó juodomȩnä̧mä̧, ji̧'ki̧cha̧wa̧ jü̧nä̧ chinü̧mä̧ cho'ka'aku ikuipinü̧sä̧.

¹² Jitämä̧ tti'ä toäkuäwodänä̧ jä̧'i̧nü̧'a̧nü̧tä̧, seppanü̧ topätüjä̧ Dio-rümä̧; ja̧'wa̧nü̧ ja̧'a̧nä̧ o'kajuiyünä̧ jo̧mȩnü̧ päi'omȩnä̧ totäkuotüjä̧ Dio-rümä̧ wäjuönä̧. Jitämä̧ jü'totä wo̧jua̧sä̧, ja̧'wa̧nü̧ ja̧'a̧nä̧ jo̧mȩnü̧ päi'omȩnä̧ Churutä chu̧wo̧juä̧kua̧sä̧, pärokua'aku ttürü u̧wo̧juö̧ta̧'a̧nü̧.

¹³ Ja̧'wa̧nü̧ ja̧'a̧ttü̧, jitämä̧ wäbodäkuä jo̧mȩnä̧ kka̧'a̧ 'kuäopünä̧: Tta̧'kua̧ wȩnä̧rä̧kuä̧wä̧'i̧nä̧, tta̧'ä̧rü̧ kkä̧kuä̧wä̧'i̧nä̧ eseu repe'ü kkä̧kuä̧wä̧'i̧nä̧, jü̧nä̧; ja̧'wa̧nü̧ ja̧'a̧nä̧, pi̧yȩ wäbodäkuättü yabonä̧nü̧ jü̧mä̧ eseu repe'ü kkä̧kuä̧wä̧tä̧ ja̧'a̧.