1 Corintios 12 - Nuevo Testamento Uwotjüja

¹ Chawaruwä chi̧jä̧wa̧tü̧, Epíritu Sa̧tu̧ jȩtta̧ pä'ü iyü jäwä ku̧wo̧juä̧tu̧kua̧ pä'üsä.

² Ukutumä̧ wo̧juä̧tü̧jä̧, Jesucrito-rü kuesetätuku juiyäimä̧ re'teäkuäwinä̧tü̧jä̧ ttü̧ä̧nä̧wo̧tü̧ tta̧'kua̧juä̧ tätäwä o'kanä̧ esetü, ukuoku'i̧nä̧ ukuokuokü o'kanä̧.

³ Ja̧'wa̧nü̧ ja̧'a̧ttü̧, ukuturu ku̧wo̧juä̧tu̧kua̧ pä'ü pä'üsä, ya̧tȩ'i̧nä̧ Dio i̧sa̧ Epíritu-nä̧mä̧, Jesú-ru su̧ro̧pa̧ päa pä'ümä̧ juiya'a; ja̧'wa̧ta̧nü̧ ya̧tȩ'i̧nä̧ toa'a, ¡Jesú-ru Chu̧ru̧wa̧! pä'ümä̧, Epíritu Sa̧tu̧ toünä̧mä̧.

Adikuämä̧ rü̧ȩnä̧ ja̧'a̧nä̧, ji̧nä̧ ya̧tȩ jäwätä ja̧'a̧

⁴ Igresia-ttü wo̧juȩku̧nä̧ adikuämä̧ rü̧ȩnä̧ ja̧'a̧nä̧, jua̧u̧ iyümä̧ ya̧tȩ Epíritu Sa̧tu̧tä̧ ja̧'a̧.

⁵ Ja̧'wa̧ta̧nü̧ aditü kkä̧kuä̧wä̧mä̧ rü̧ȩnä̧ ja̧'a̧nä̧, U̧ru̧wa̧mä̧ ji̧nä̧ ya̧tȩtä̧ ja̧'a̧.

⁶ Ja̧'wa̧ta̧nü̧ ujurumä̧ rü̧ȩnä̧ jo̧mȩnä̧ i̧jȩkuä̧cha̧'a̧nä̧, Dio jua̧u̧ o'kajuiyünä̧ jȩpü̧mä̧, ji̧nä̧ ya̧tȩtä̧ ja̧'a̧.

⁷ Ja̧'wa̧nü̧ ja̧'a̧nä̧ yotukunä̧rü̧ iyäwi'ina̧'a̧ Epíritu Sa̧tu̧ ujuru i̧jȩkuä̧chü̧nä̧, o'katoi'ünä̧rü̧ rekuä rü̧ji̧yä̧ku̧.

⁸ Isopäi'ünä̧ Epíritumä̧, yotüterümä̧ iyü wo̧juȩku̧nä̧ ttukuokua pä'ü; ja̧'wa̧ta̧nü̧ jua̧u̧ Epíritu-tä ja̧'a̧ kkorotürü'i̧nä̧, chutä üjü'komȩnä̧ wo̧juä̧wä̧ wȩnȩ iyümä̧.

⁹ Ja̧'wa̧ta̧nü̧ Jua̧u̧ Epíritu-nä̧tä̧ kkorotümä̧ i̧yä̧u̧ tta̧'kua̧ wȩnä̧rä̧kuä̧wä̧ ttu̧ju̧nä̧ra̧ pä'ü'i̧nä̧ ja̧'wa̧ta̧nü̧ kkorotümä̧ i̧yä̧u̧ na̧nȩpä̧tü̧rü̧ aditü ikuäwä'i̧nä̧, jü̧nä̧.

¹⁰ Kkorotürümä̧ iyü ttujuru'i̧nä̧, jȩtto̧kü̧ juei jȩtta̧ pä'ü'i̧nä̧; kkorotürütä iyü Dio i̧mi̧nä̧ jittäwa pä'ü'i̧nä̧. Yotüterümä̧ iyü epíritu-tu̧ yaparewätürü'i̧nä̧, isopäi'ünä̧ isotürü'i̧nä̧ ttu̧wo̧jua̧ pä'ü ja̧'wa̧ta̧nü̧ kkorotürümä̧ iyü kkorotü tti̧wȩnȩ wo̧juȩku̧nä̧ ttukuokua pä'ü'i̧nä̧; ja̧'wa̧ta̧nü̧ kkorotürümä̧ iyü, kkorotü tti̧wȩnȩnä̧ ttukuokuomȩnä̧ rä'epü iku jittäwa pä'ü'i̧nä̧.

¹¹ Ja̧'wa̧nü̧ ja̧'a̧ttü̧, pi̧yȩmä̧ o'kajuiyünä̧tä̧ Epíritu, ya̧tȩtä̧ yotüku pünä̧rü̧ iyä'chü jȩpü̧, Churutä pä̧wä̧rü̧jo̧mȩnä̧.

¹² Ja̧'wa̧ta̧nü̧ ttü̧ja̧sa̧ ya̧tȩnä̧tä̧mä̧, rü̧ȩnä̧ todewa'a jua̧u̧ru̧ ppädümä̧: i'äre'i̧nä̧, ä'i̧nä̧, üjo'i̧nä̧, rü̧ȩnä̧, ttü̧ja̧sa̧mä̧ ya̧tȩtä̧ ja̧'a̧nä̧. Ja̧'wa̧nü̧ jü̧ta̧'a̧nü̧ o'katoi'ünä̧ ji̧nä̧ ji̧yȩtȩnä̧tä̧ todewa'a, Jesucrito-nä̧mä̧.

¹³ Ujututtümä̧ judío'i̧nä̧, judío pokotü'i̧nä̧, Grecia ttü̧ja̧'i̧nä̧, esclavo jü̧nä̧ ttumüwäyotü'i̧nä̧, esclavo jü̧nä̧ ttu̧wo̧juȩtä̧u̧ pokotü'i̧nä̧ ji̧nä̧ yotütetä päti'ünä̧, Epíritu-nä̧ bautizo jȩpä̧kuä̧wi̧nä̧tü̧jä̧, ji̧yȩtȩ igresia päti'ünä̧, ji̧nä̧ yotüte wotütä, ji̧nä̧ ya̧tȩ Epíritu Sa̧tu̧rü̧ iyinä̧u̧jä̧ Dio-mä̧.

¹⁴ Ya̧tȩ jä̧ttä̧pä̧ya̧nä̧mä̧, ji̧yȩtȩtä̧mä̧ kko̧ka̧'a̧ jua̧u̧ttü̧ todeumä̧, jua̧u̧nä̧mä̧ rü̧ȩnä̧tä̧ kka̧kua̧'a̧.

¹⁵ Ya̧tȩ ü̧jä̧pü̧mä̧ päü'anü̧ ja̧'a̧ tä̧jí̧: «ttümä̧ u̧mü̧ choka'attü, jä̧ttä̧pä̧ya̧ttü̧mä̧ todepoküsä» jü̧nä̧ ja̧'wa̧nü̧ päomȩnä̧ ¿jä̧ttä̧pä̧ya̧ttü̧ i̧mi̧ku̧ päi'ü'anü̧ ja̧'a̧ tä̧jí̧?

¹⁶ Ja̧'wa̧ta̧nü̧ ä̧ja̧'i̧nä̧ päü'anü̧ ja̧'a̧ tä̧jí̧: «Ttümä̧ i'äre choka'attü, jä̧ttä̧pä̧ya̧ttü̧mä̧ todepoküsä» jü̧nä̧, ¿ja̧'wa̧nü̧ päomȩnä̧, jä̧ttä̧pä̧ya̧ttü̧mä̧ ütodewoka'a tä̧jí̧?

¹⁷ Isopäi'ünä̧ o'kajuiyütä jä̧ttä̧pä̧ya̧rü̧ i'äretä jü̧ttü̧mä̧, ¿Tȩnȩ́ kkü̧'a̧nü̧ttü̧ ä̧ja̧mä̧? ja̧'wa̧ta̧nü̧ o'kajuiyünä̧tä̧ ä̧ja̧tä̧ jü̧ttü̧mä̧ ¿tȩnȩ́ kkü̧'a̧nü̧ttü̧ i̧ji̧yu̧mä̧?

¹⁸ Ja̧'wa̧nü̧ ja̧'a̧ttü̧, Dio-mä̧ ya̧tȩnä̧mä̧ todeu ji̧yȩku̧nä̧ kku̧ni̧nü̧, Churutä adiwomȩnä̧.

¹⁹ Isopäi'ünä̧ suro ji̧yȩtȩ todeutä kkü̧ttü̧mä̧, ¿jä̧ttä̧pä̧ya̧mä̧ too ü̧ji̧pa̧'a̧jä̧ttü̧?

²⁰ Ja̧'wa̧nü̧ ja̧'a̧ttü̧, ya̧tȩttü̧ todeumä̧ rü̧ȩnä̧ kka̧kua̧'a̧nä̧, jä̧ttä̧pä̧ya̧mä̧ ya̧tȩtä̧ ja̧'a̧.

²¹ I'äremä̧, u̧mü̧rü̧mä̧, päü juiyünä̧ ja̧'a̧: «Ukurumä̧ rekuä rü̧jo̧ko̧ku̧sä̧,» jü̧nä̧mä̧; ja̧'wa̧ta̧nü̧ U'i̧nä̧, i̧jä̧pi̧yä̧rü̧mä̧ päoka'a, «ukuturumä̧ rekuä rü̧jo̧ko̧ku̧sä̧,» jü̧nä̧mä̧.

²² Pärokua'aku, jä̧ttä̧pä̧ya̧rü̧ todeumä̧ rekuä rü̧jo̧kü̧ 'kua̧ra̧'a̧nä̧, ji̧nä̧somä̧ jua̧u̧ ja̧'a̧ rü̧ȩnä̧ rekuä rü̧jü̧mä̧;

²³ Ja̧'wa̧ta̧nü̧ jä̧ttä̧pä̧ya̧rü̧ todeuttü ukuo jäwä jo̧kü̧ 'kua̧rü̧'i̧nä̧, adiutä 'ka̧tä̧tü̧jä̧. Ja̧'wa̧ta̧nü̧ ti̧jȩpa̧ pätokü'i̧nä̧, adiutä tto'ekuätüjä̧,

²⁴ Isopäi'ünä̧ tottünä̧ ti̧jȩpo̧mȩmä̧, rekuä rü̧jo̧ka̧'a̧ tü̧da̧jä̧ra̧ pä'ümä̧. Jua'amä̧ Dio-tä aditina̧'a̧, mikuäwokü 'kua̧rü̧, kkorottü'i̧nä̧ abonä̧nü̧ tta̧tä̧ra̧ pä'ümä̧.

²⁵ Jua'amä̧ ji̧nä̧ ya̧tȩtä̧ jäwämä̧, i̧mi̧ku̧nä̧ 'kȩkuä̧chü̧ juiya pä'ü. Ji̧nä̧ ya̧tȩ jäwämä̧, jua̧u̧ jä̧ttä̧pä̧ya̧rü̧ todeunä̧ kka̧'a̧ttü̧, jua̧u̧ttü̧ i̧mi̧ku̧nä̧ päi'omȩnä̧mä̧ kkoro jua̧u̧nä̧ kka̧ku̧mä̧ baraunä̧tä̧ ja̧'a̧.

²⁶ Ja̧'wa̧nü̧ jü̧ta̧'a̧nü̧ ja̧'a̧, ji̧yȩtȩ jua̧u̧nä̧ todewäji usurä ȩmä̧wo̧mȩnä̧mä̧, o'kajuiyünä̧ jua̧u̧ttü̧ todeumä̧ usurä ȩmä̧wa̧'a̧ ja̧'wa̧ta̧nü̧ ji̧yȩtȩ jua̧u̧ttü̧ todeunä̧ adiwä juei 'kuäopomȩnä̧mä̧, o'kajuiyünä̧ adiunä̧tä̧ ja̧'a̧.

²⁷ Ukutu'i̧nä̧ Crito-nä̧ todepätüjä̧ ja̧'wa̧nü̧ jo̧mȩnä̧ igresia-nä̧mä̧ ji̧nä̧ yotüte jü̧nä̧ todepätüjä̧, yotukunä̧ ttaditäwä kkü̧nä̧.

²⁸ Dio-mä̧, igresia-nä̧mä̧ kku̧ni̧nü̧, ä̧kuo̧mȩnä̧mä̧ apótore pä̧ttä̧u̧ru̧; juȩnȩ o'komȩnä̧mä̧, profetas pättä̧u̧ru̧; wäbodäkuä päi'ünä̧mä̧ wo̧juȩkuä̧ isotürü; jua̧u̧ o'komȩnä̧mä̧ jȩtto̧kü̧ juei jȩpä̧tü̧rü̧; kkorotümä̧ na̧'ä̧chä̧tü̧rü̧ aditü ikuätürü'i̧nä̧; kkorotümä̧ ppädäkuäwä isotürü'i̧nä̧; kkorotümä̧ juȩpä̧rä̧kuä̧wä̧ isotürü'i̧nä̧ ja̧'wa̧ta̧nü̧ kkorotümä̧ kkorotü tti̧wȩnȩ wäjuönä̧ ukuokuätürü'i̧nä̧.

²⁹ O'katoi'ünä̧mä̧ apótore-mä̧ wokotü ja̧'a̧; ja̧'wa̧ta̧nü̧ o'katoi'ünä̧mä̧ profeta-mä̧ wokotü ja̧'a̧. O'katoi'ünä̧mä̧ wo̧juȩkuä̧ isotümä̧ wokotü ja̧'a̧ ja̧'wa̧ta̧nü̧ o'katoi'ünä̧mä̧ jȩtto̧kü̧ jueimä̧ jȩpo̧ko̧tü̧ ja̧'a̧,

³⁰ ja̧'wa̧ta̧nü̧ o'katoi'ünä̧mä̧ na̧nȩpä̧tü̧rü̧ aditü ikuokotü ja̧'a̧. Ja̧'wa̧ta̧nü̧ o'katoi'ünä̧mä̧ kkorotü tti̧wȩnȩmä̧ ukuokuotü ja̧'a̧ ja̧'wa̧ta̧nü̧ o'katoi'ünä̧mä̧ kkorotü tti̧wȩnȩ rä'epü ikumä̧ ukuokuokotü ja̧'a̧.

³¹ Ja̧'wa̧nü̧ ja̧'a̧ttü̧ jȩ'kuä̧tu̧kuä̧kuȩmä̧ abonä̧nü̧ adiutätä usätukui. Ja̧'wa̧nü̧ ja̧'a̧ttü̧, ttümä̧ mä̧nä̧ ji̧mä̧tȩ juiyo a̧di̧wä̧mä̧ chu̧wo̧juȩtä̧u̧jä̧.