1 Corintios 11 - Nuevo Testamento Uwotjüja

¹ Ttü jȩchü̧ jȩpä̧tu̧kui̧, ttü'i̧nä̧ Crito jȩü̧ jȩchü̧ta̧'a̧nü̧.

² Chawaruwä chi̧jä̧wa̧tü̧ ukuturu eseusä o'kajuiyünä̧tä̧ ttürü amükuädü jȩ'kuä̧tu̧kua̧'a̧ttü̧, chu̧wo̧juȩti̧nü̧'i̧nä̧ ukuotü jȩ'kuä̧tu̧kua̧'a̧ttü̧.

³ Ja̧'wa̧nü̧ ja̧'a̧nä̧, ku̧wo̧juä̧tu̧kua̧ pä'üsä, Crito-tä ja̧'a̧ ttü̧ja̧ ttu̧ru̧wa̧mä̧ pä'ü, ja̧'wa̧ta̧nü̧ ubomä̧ isaju kku̧ru̧wa̧ ja̧'a̧ ja̧'wa̧ta̧nü̧ Dio-mä̧ Crito u̧ru̧wa̧ ja̧'a̧ pä'ü.

⁴ Ya̧tȩ unä̧ mü̧ȩkua̧'a̧ Dio-rü ukuokuomȩnä̧mä̧ ja̧'wa̧ta̧nü̧ Dio i̧mi̧nä̧ ukuokuomȩnä̧mä̧, Crito-rü ukuotü jui'ü jȩpü̧.

⁵ Ja̧'wa̧nü̧ ja̧'a̧nä̧, yajute isaju Dio-rü kkukuokuomȩnä̧'i̧nä̧, Dio i̧mi̧nä̧ kkukuokuomȩnä̧'i̧nä̧ kku mü̧jȩkuo̧ka̧'a̧ jȩjü̧ttü̧mä̧ kkirekuorü ukuotü jui'ü jȩpä̧ju̧, kkuwo'che kirü ikuäwaju jä̧'i̧nü̧'a̧nü̧ waju.

⁶ Isaju kku mü̧jȩku̧ juiyüttümä̧, kuwo'che 'kui'äu kkikua pä'ütä ja̧'a̧. Ja̧'wa̧nü̧ ja̧'a̧nä̧ kkuwo'che 'kui̧jä̧wa̧ pä'ü'i̧nä̧, kiräu kkikua pä'ü'i̧nä̧ kkudäpekuttümä̧, mü̧jȩkua̧ pä'ütä ja̧'a̧.

⁷ Ubomä̧ U mü̧ȩkua̧ pä'ümä̧ juiya'a, jua'amä̧ Dio a̧'kua̧juä̧'i̧nä̧, Dio ukuo'i̧nä̧ jua̧u̧nä̧ kkä̧dȩpa̧'a̧ttü̧. Ja̧'wa̧nü̧ ja̧'a̧nä̧ isajumä̧, ubo ukuo kkä̧dȩpä̧ju̧,

⁸ jua'amä̧ uborümä̧ isajuttümä̧ räepokoku pinü̧ ja̧'a̧ttü̧; ja̧'wa̧nü̧ jo̧ka̧'a̧ isajurumä̧, ubottü räepinä̧kua̧ ja̧'a̧ttü̧.

⁹ Ja̧'wa̧ta̧nü̧ ubomä̧ isajuru rekuä rü̧ji̧yä̧ku̧mä̧ uwäbe'okoku pinü̧, pärokua'aku, isajutä ji̧na̧'a̧ uborü rekuä rü̧ji̧yä̧ku̧ uwäbe'inä̧kua̧mä̧.

¹⁰ Ja̧'wa̧nü̧ ja̧'a̧ttü̧ isajumä̧, kkü̧nä̧mä̧ kkukuo jäwä kki̧jȩpü̧'a̧nü̧ ja̧'a̧ ja̧'wa̧ta̧nü̧ á̧gȩrȩ pä̧ttä̧u̧ru̧ ukuotünü̧.

¹¹ Ja̧'wa̧nü̧ ja̧'a̧nä̧, Tu̧ru̧wa̧ jäwänä̧mä̧ ubomä̧ isaju toünä̧mä̧ ü̧jü̧ jui̧'a̧, pärokua'aku isaju'i̧nä̧ ubo toünä̧mä̧ kkü̧jü̧ jui'aju.

¹² Isopäi'ünä̧ isajumä̧ ubottü räjopinü̧ta̧'a̧nü̧, ubo'i̧nä̧ isajuttü uwäpächü; ja̧'wa̧nü̧ ja̧'a̧nä̧ o'katoi'ünä̧ Dio-ttü ichätütä ja̧'a̧.

¹³ Ukututä amükuädü topätukui: ¿isaju kku kka̧tto̧kuo̧ka̧'a̧ Dio-rü kkukuokuttümä̧ adiu uwäjuö'a̧nü̧ tä̧jí̧?

¹⁴ Ä̧tȩkuä̧nä̧tä̧ päi'ünä̧, uborümä̧ adiu uwäwoka'a uwo'che otoächa'anä̧ u̧wȩnä̧ro̧mȩnä̧mä̧;

¹⁵ ja̧'wa̧nü̧ ja̧'a̧nä̧, isaju kuwo'che otoächünä̧ kku̧wȩnä̧ro̧mȩnä̧mä̧ adiu uwäwa'a, jua'amä̧ i̧sä̧ta̧ tta̧tto̧kua̧jü̧ jueimä̧ kkuwo'che Dio iyinä̧kua̧ ja̧'a̧ttü̧.

¹⁶ Ja̧'wa̧nü̧mä̧ jidäwa'anä̧, yotüte pi̧yȩ pättä'cha pättüttümä̧, ujutumä̧ ja̧'wa̧ta̧nü̧ Dio-rü esetätü'i̧nä̧ kkoromä̧ jerupätüjä̧.

Abo 'kuäo'ünä̧ jȩttü̧ wȩnȩ

¹⁷ Pi̧yȩ, yaboku jäwä chi̧wȩyu̧to̧mȩnä̧mä̧, chesewo̧ko̧u̧jä̧; isopäi'ünä̧ ji̧nä̧ ji̧yȩtȩnä̧ ku̧ka̧ka̧kuä̧tu̧kuo̧mȩnä̧mä̧, adiu jȩtta̧jü̧ jueimä̧ yaboku surojuo'ekutä jȩ'kuä̧tu̧kua̧'a̧ttü̧.

¹⁸ Ä̧kuo̧mȩnä̧mä̧ pä'üsä, ukutu igresia isotü ku̧ka̧ka̧kui̧'ä̧tu̧kuo̧mȩnä̧mä̧, pä'ä'chäkuäu 'kȩkui̧pä̧chä̧tu̧ku̧ ä̧ju̧ku̧; ja̧'wa̧nü̧ jo̧mȩnä̧ ji̧yȩku̧nä̧mä̧ chesetünä̧ ja̧'a̧.

¹⁹ ¡Isopäi'ünä̧ ukutu pä'ä'chäkuäu 'kȩkui̧pä̧chä̧tu̧ku̧mä̧ ja̧'wa̧nü̧tä̧ 'kuäopa pä'ü ja̧'a̧, yotüku pünä̧ isopäi'ünä̧ Crito-rü kuesetätuku i̧jȩkuä̧cha̧ pä'ü!

²⁰ Ja̧'wa̧nü̧ ja̧'a̧ttü̧, ka̧ka̧ku̧ kukuätukuomȩnä̧mä̧, Tu̧ru̧wa̧ u̧kuȩ ukuinü̧ cena-mä̧ kuokotüjä̧.

²¹ Isopäi'ünä̧ kukuätukuomȩnä̧mä̧, yotukunä̧tä̧ ä'kanä̧ ku̧kuȩtu̧ku̧tä̧ kukuätukua'attü̧; kkorotümä̧ ppäi ttutta'anä̧, kkorotütä tä̧'ä̧mä̧'chü̧ jȩpä̧tü̧jä̧.

²² ¿Ukutumä̧ kuojusodetuku jui'ätüjä̧ tä̧jí̧, ku̧kuȩ kukuätukuomȩmä̧ ja̧'wa̧ta̧nü̧ kuäwätukuomȩmä̧? ¿Tta̧'a̧nü̧ pä'ü Dio iäre igresia suronä̧ jȩ'kuä̧tu̧kua̧'a̧jä̧ttü̧ ja̧'wa̧ta̧nü̧ usurä isotürü dä'ä ttukuepätukua'ajä̧ttü̧? ¿Däjé pädätukuäkuttü̧? ¿pi̧yȩ jȩ'kuä̧tu̧kua̧'a̧mä̧ adiwa'a pä'ü, chesewa'a ukuturumä̧?

Tu̧ru̧wa̧ u̧kuȩ ukuinü̧ wȩnȩ

²³ Isopäi'ünä̧ ttümä̧, Tu̧ru̧wa̧ttü̧ chemi̧nü̧mä̧, ukuturu'i̧nä̧ wo̧juȩti̧nü̧sä̧: Tu̧ru̧wa̧ Jesú-mä̧, iyü ttikuinü̧ yodomä̧, trigo i̧ri̧si̧ ȩmo̧po̧'ü̧;

²⁴ Dio-rü eseu ukuokuäji̧'ka̧, 'to'opü pä'inü̧: «ja̧já̧, kuätukui; pi̧yȩmä̧ ttütä jä̧ttä̧pä̧ya̧ wa̧sä̧, ukutu jäwänä̧ 'toi'a'a; pi̧yȩmä̧ ttürü amükuädü jȩpä̧tu̧kui̧.»

²⁵ Ja̧'wa̧ta̧nü̧tä̧, u̧kuȩ kuä̧ji̧'ka̧, i̧so̧'ta̧ ȩmo̧po̧'ü̧ pä'inü̧: «po̧'ta̧ isoya a̧kuo̧'ta̧mä̧, jareünä̧ chesekuoya ja̧'a̧ chukuojanä̧; pi̧yȩ 'kuäopünä̧ kuawätukuta'anü̧, ttürü amükuädü jȩpä̧tu̧kui̧.»

²⁶ Ja̧'wa̧nü̧ ja̧'a̧ttü̧, 'kuäopünä̧tä̧ trigo i̧ri̧si̧, pi̧si̧ kukuätukuomȩnä̧mä̧ ja̧'wa̧ta̧nü̧ po̧'ta̧ isoya kuäwätukuomȩnä̧mä̧, Tu̧ru̧wa̧ 'korujuoächinü̧ ji'äwätüjä̧, Chutä ichomȩbü päi'ünä̧.

Tu̧ru̧wa̧ u̧kuȩ ukuinü̧ jȩä̧kuä̧wä̧ wȩnȩ

²⁷ Ja̧'wa̧nü̧ ja̧'a̧ttü̧, ya̧tȩ trigo i̧ri̧si̧ uku juiyü'anü̧ wa̧ kkä̧nü̧, au'i̧nä̧ au juiyü'anü̧ wa̧ kkä̧nü̧ Tu̧ru̧wa̧ awinoya awomȩnä̧mä̧, Tu̧ru̧wa̧ idepä jättäji jä̧ji̧nä̧mä̧, ukuoja jä̧ji̧nä̧mä̧ a̧mü̧nä̧ ä̧tȩkuä̧tä̧ a̧wä̧kua̧.

²⁸ Ja̧'wa̧nü̧ ja̧'a̧ttü̧, yotukunä̧ kua̧mü̧nä̧tu̧ku̧tä̧ kka̧kuä̧mä̧kuä̧u̧ topäkuäwätukui ja̧'wa̧nü̧ jȩpi̧'ü̧'kotütä trigo i̧ri̧si̧'i̧nä̧, i̧so̧'ta̧nä̧ akuoya'i̧nä̧ awätukui.

²⁹ Isopäi'ünä̧ uku juiyü'anü̧ ja̧'a̧nä̧, au juiyü'anü̧ ja̧'a̧nä̧, Tu̧ru̧wa̧ idepä jättäji amükuädoka'a ukuttümä̧, a̧mü̧nä̧ ä̧tȩkuä̧tä̧ ku ja̧'wa̧ta̧nü̧ a̧mü̧nä̧ ä̧tȩkuä̧tä̧ awuö.

³⁰ Ja̧'wa̧nü̧ jȩtto̧mȩnä̧, ukututtü rekuätü na̧nȩpä̧tü̧ kka̧kuä̧tü̧ ja̧'wa̧ta̧nü̧ rekuätü juiyupächätü ja̧'wa̧ta̧nü̧ kkorotümä̧ 'korujuo'ächinä̧tü̧.

³¹ Isopäi'ünä̧, ujututä ta̧mü̧nä̧ pa̧ja̧tü̧ kka̧kuä̧mä̧kuä̧u̧ totäkuäuttümä̧, Tu̧ru̧wa̧mä̧ ro̧ȩpo̧ko̧u̧ täkuotüjä̧,

³² ro̧ȩpü̧ttü̧'i̧nä̧, Tu̧ru̧wa̧mä̧ ro̧ȩpä̧u̧jä̧ weye juota pä'ü, pi̧jä̧ ttü̧ja̧ku̧ yo̧mȩtȩnä̧ tote'ächünä̧ ro̧ȩpü̧ juiyäkua'anü̧.

³³ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, kukuätukua pä'ü ka̧ka̧kui̧pü̧mä̧, o'katoi'ünä̧ ji̧nä̧ yo̧mȩtȩ pättia'anä̧ tta̧'a̧rä̧tu̧kui̧.

³⁴ Ja̧'wa̧ta̧nü̧ yotukunä̧ ttukua ppä̧i̧rü̧jü̧ttü̧mä̧, kuojusodetukuttü kuätukui, kuä̧tȩkuä̧tu̧ku̧ jäwä ku̧ka̧ka̧kuä̧tu̧ku̧ juiya pä'ümä̧. Kkoromä̧ topü chichomȩnä̧tä̧, adiwomȩnä̧ jȩpü̧ chu̧ju̧nä̧kua̧sä̧.