1 Corintios 10 - Nuevo Testamento Uwotjüja

Ukuotü, Dio-rü teseäkuäwätukua

¹ Chawaruwä chi̧jä̧wa̧tü̧, tä̧do̧tü̧ mi̧nä̧ o'katoi'ünä̧ ajiya isoppa dȩa̧'a̧nä̧ kuettächinü̧mä̧ ja̧'a̧tä̧ ku̧nichi'ätukuamä̧ pä'oküsä ja̧'wa̧ta̧nü̧ o'katoi'ünä̧ rü̧ä̧dubora tuworanä̧ 'kuättopinü̧'i̧nä̧.

² Ja̧'wa̧nü̧tä̧, Moisé-ku o'katoi'ünä̧ rü̧ä̧ duborattü'i̧nä̧, ajiya isoppattü'i̧nä̧ bautizo päwi'inä̧u̧.

³ Ja̧'wa̧ta̧nü̧tä̧, o'katoi'ünä̧ ttu̧kuȩ epíritu jäwä ji̧nä̧ ji̧yȩtȩttü̧tä̧ kuinä̧tü̧;

⁴ Ja̧'wa̧ta̧nü̧ ttawa pä'ü'i̧nä̧ ji̧nä̧ yoyate, epíritu isoyattü awinä̧tü̧. Jua'amä̧ i̧nä̧wä epíritu isäwättü, jitürütä tta̧wä̧rinä̧wättü ttawina̧'a̧ttü̧, juäwä i̧nä̧wä ji̧nä̧wämä̧ Crito-tä ji̧na̧'a̧.

⁵ Ja̧'wa̧nü̧ ja̧'a̧nä̧, juätüttü rekuätümä̧ Dio eseunä̧ jȩpo̧ko̧tü̧ pinä̧tü̧; ja̧'wa̧nü̧ jo̧mȩttü̧ desierto pättomȩ tebabaa wa'äu ikuinä̧tü̧.

⁶ Ja̧'wa̧nü̧ ja̧'a̧nä̧, pi̧yȩ o'kajuiyünä̧ 'kuäopinü̧mä̧, ujutu'i̧nä̧ tu̧wo̧jua̧ pä'ü 'kuäopinü̧; juätü surojü kkü'kekunä̧ amükuädü jȩtti̧nü̧'a̧kuä̧mä̧, ujutu'i̧nä̧ surojü jȩtü̧ juiya pä'ü.

⁷ Ja̧'wa̧nü̧ ja̧'a̧ttü̧, ukutumä̧ ttü̧ä̧nä̧wo̧tü̧rü̧ esetäkuäwämä̧, kuesetätukuä, juätüttü yotukunä̧ jȩtti̧nü̧'a̧kuä̧mä̧, wȩyu̧kuä̧ wȩnȩmä̧ pä'a: «Ttü̧ja̧mä̧ ttu̧kuȩ kuä̧nü̧'i̧nä̧, tta̧wȩ au'i̧nä̧ pȩjä̧mü̧, eseäkuäwuö tü'inä̧tü̧, juätü ttü̧ä̧nä̧wo̧tü̧rü̧ eseäkuäwuö,» jü̧nä̧.

⁸ Ja̧'wa̧ta̧nü̧ nä̧tü̧rü̧'i̧nä̧, u̧mä̧tü̧rü̧'i̧nä̧ jȩä̧'chä̧kuä̧wä̧nä̧ kuiyäwätukuä, ja̧'wa̧nü̧ jȩpü̧ ttü̧ja̧kuo̧mȩnä̧mä̧, ya'ute mo̧ro̧tä̧mä̧ veintitrés mil-nü̧ jo̧mȩnä̧ wa'ü ikuinä̧tü̧.

⁹ Ja̧'wa̧ta̧nü̧ Crito-mä̧ suronä̧ jȩcha̧'a̧nä̧dä̧jä̧ ja̧'a̧tä̧ topä'ijü pä'ümä̧ jȩ'kuä̧'chä̧tu̧kuä̧, juätüttü yotukunä̧ kka̧kuä̧mȩ'ü̧ jȩtto̧mȩnä̧ ä̧ka̧tü̧ yü̧yü̧pü̧ tti̧kuä̧u̧ wa'äu ttikuinü̧ ja̧'a̧ttü̧.

¹⁰ Ja̧'wa̧ta̧nü̧ Dio-rü suronä̧ amükuädü päkuä'chätukuä; ja̧'wa̧nü̧ pättä'chomȩnä̧ juätüttü yotukunä̧rü̧, wa'are wȩ'ä̧wa̧ á̧gȩ kuä'äu ikuinü̧ ja̧'a̧ttü̧.

¹¹ Pi̧yȩmä̧ o'kajuiyünä̧tä̧ tü̧tä̧mü̧mi̧nä̧rü̧mä̧ 'kuäopina̧'a̧, ujutu tu̧wo̧jua̧ pä'ü, ja̧'wa̧ta̧nü̧ wȩyu̧tu̧ rütäwämä̧ pȩja̧'a̧, ujuturu wo̧juȩtü̧, rüjí mo̧ro̧ kka̧kuä̧tü̧rü̧.

¹² Ja̧'wa̧nü̧ ja̧'a̧ttü̧, ttümä̧ 'kiyünä̧ kkü̧sä̧ pä'ü amükuädümä̧, ma̧kuä̧chü̧ juiya pä'ütä amükuädü kkä̧wi̧.

¹³ Ukutumä̧ kkorotü ttü̧ja̧ usurä ttȩmä̧wä̧'i̧jü̧ jueitä 'kuäopä̧u̧jä̧; ja̧'wa̧nü̧ ja̧'a̧nä̧ Dio-rümä̧ kua̧'kua̧ wȩnä̧rä̧tu̧kui̧, kua̧mi̧ 'kikuächi'ätuku juiyünä̧ jü̧ 'kuäkuopätukua'anä̧ ja̧'a̧tä̧mä̧ tooko̧u̧ kuäkuotüjä̧. Jua̧u̧ yabonä̧, usurä kuȩmä̧wä̧tu̧ku̧ ichomȩnä̧mä̧, ji̧yȩtä̧ku̧ yo̧mȩtȩnä̧, jua̧u̧ttü̧ räkuopächätuku'i̧nä̧ iyü kkä̧nü̧, kua̧mi̧'kikuächi'ätukumä̧ iyäkuä̧u̧jä̧.

Ttü̧ä̧nä̧wo̧tü̧rü̧ ukuokuäkuäwä ttukuomȩnä̧mä̧ Dio-rü adiwoka'a

¹⁴ Ja̧'wa̧nü̧ ja̧'a̧ttü̧ chawaruwä chi̧jä̧wa̧tü̧, ttü̧ä̧nä̧wo̧tü̧rü̧ ukuokuä'chümä̧ jȩ'kuä̧tu̧kuä̧.

¹⁵ Ukuturu wo̧juȩku̧nä̧ amükuädätürü ukuokusä: Pi̧yȩ pädü, adiwomȩnä̧ ukututä amükuädü topätukui.

¹⁶ Ja̧'wa̧ta̧nü̧ Santa Cena, Dio-rü ukuokuäkuäwoya tawomȩnä̧mä̧, ¿Crito ukuojanä̧ ji̧nä̧ ji̧yȩtȩ pä'i'okotüjä̧ tä̧jí̧? Ja̧'wa̧ta̧nü̧ trigo i̧ri̧si̧ tukuomenämä̧, ¿Crito idepänä̧, ji̧nä̧ ji̧yȩtȩ pä'i'okotüjä̧ tä̧jí̧?

¹⁷ Isopäi'ünä̧ ujutumä̧ rekuätü wotü ta'anä̧, ji̧nä̧ ya̧tȩtä̧ idepä pä'i'ätüjä̧, ji̧nä̧ ji̧si̧tȩttü̧tä̧ tukua'attü trigo i̧ri̧si̧mä̧.

¹⁸ Irae ttü̧ja̧rü̧ amükuädü topätukui: kuä'ü iku sacrificio jȩpä̧kuä̧wo̧tü̧ isotürü ttukuomȩnä̧mä̧ ¿Jua̧u̧ altar pättüttü ji̧nä̧ ji̧yȩtȩ wokotü tä̧jí̧?

¹⁹ ¿Toku pä'ü päda'ajä̧ttü̧? ¿Ttü̧ä̧nä̧wo̧tü̧rü̧ ukuokuäkuäwämä̧ abonä̧nü̧ mikuäu pä'ü? ja̧'wa̧nü̧ jü̧ juiya pä'ü'i̧nä̧ ¿ttü̧ä̧nä̧wo̧tü̧rü̧ wȩnȩtü̧ ukuokuäkuäwä ji̧yȩtä̧mä̧, abonä̧nü̧ mikuäu pä'ü? ja̧'wa̧nü̧mä̧kü̧.

²⁰ Jua̧u̧ pädümä̧, pä'üsä. Judío pokotü i̧sa̧rü̧ kuä'ü iku sacrificio jȩtto̧mȩnä̧mä̧, Dio-rümä̧ ttukuokuoka'a, ä̧wȩttü̧rü̧ ukuokutä jȩpä̧tü̧ pä'ü. Ja̧'wa̧nü̧ ji̧yä̧ku̧, ä̧wȩttü̧ku̧ ji̧nä̧ ji̧yȩtȩ kuätukua pä'oküsä.

²¹ Tu̧ru̧wa̧ a̧wo̧'ta̧ttü̧ au kkä̧nü̧'i̧nä̧, ä̧wȩttü̧ tta̧wo̧'ta̧ttü̧ kuawätukua pä'ümä̧ juiya'a; ja̧'wa̧ta̧nü̧ Tu̧ru̧wa̧ iäre mesa-ttü kuä̧nü̧ kkä̧nü̧, ä̧wȩttü̧ ttiäre mesa-ttü kukuätukua pä'ümä̧ juiya'a.

²² ¿Jua̧u̧nu̧mä̧, Tu̧ru̧wa̧ a̧mi̧ surächi'ünä̧ jȩta̧ päta'a tä̧jí̧? ¿Ujutumä̧, jua̧u̧ttü̧'i̧nä̧ abonä̧nü̧ tujuru kku̧nä̧rä̧tü̧jä̧ tä̧jí̧?

Ta̧wa̧ru̧wa̧ amükuädü ukuotäkuäwä wȩnȩ

²³ Iweye, o'kajuiyünä̧ jȩcha̧ pä'ümä̧ wa̧sä̧ ja̧'wa̧nü̧ ja̧'a̧nä̧ o'kajuiyünä̧mä̧ jȩä̧kuä̧wo̧kü̧ ja̧'a̧; o'kajuiyünä̧mä̧ jȩcha̧ pä'ü ja̧'a̧nä̧, o'kajuiyünä̧mä̧ ttürü äräbe'okü jäwä ja̧'a̧.

²⁴ Ja̧'wa̧nü̧ ja̧'a̧ttü̧, kua̧mü̧nä̧tu̧ku̧ rekuä rü̧jü̧tä̧mä̧ kuamükuädätukuä, ji̧nä̧somä̧ kkorotürü rekuä rü̧jü̧ amükuädätukui.

²⁵ O'kajuiyünä̧tä̧ mikuänä̧ idepä ttiyomȩttü̧ kuä̧nü̧mä̧, ja̧'a̧tä̧ kuätukui; jä̧kuȩpä̧rä̧tu̧kuo̧ka̧'a̧tä̧, kkoro kuamükuädätuku juiyäkua'anü̧.

²⁶ Isopäi'ünä̧ pi̧jä̧'i̧nä̧ o'kajuiyütä ja̧'wa̧ta̧nü̧ pi̧jä̧nä̧ kka̧ku̧'i̧nä̧ o'kajuiyütä, Tu̧ru̧wa̧ iäretä ja̧'a̧.

²⁷ Ja̧'wa̧ta̧nü̧, Dio-rü esetokü kukuätukua pä'ü ä̧tȩpa̧'a̧ kui̧'cha̧ päkuätukuttümä̧, tätukui, o'kajuiyünä̧ ttu̧ju̧nü̧mä̧ kuätukui, jä̧ȩpä̧rä̧kuä̧wä̧ juiyünä̧, kkoro kuamükuädätuku juiyäkua'anü̧.

²⁸ Ja̧'wa̧nü̧ ja̧'a̧nä̧ ya̧tȩ, ukuturu: «Pi̧yȩ idepämä̧ sacrificio pättü jȩttä̧jí̧» päüttümä̧; jua̧u̧nu̧mä̧ kukuätukuä, jua̧u̧ ji'äu ikuomȩttü̧ ja̧'wa̧ta̧nü̧ kkoro kuamükuädätuku juiyäkua'anü̧.

²⁹ Ukutu kuamükuädätukumä̧ pä'oküsä, kkorotü tta̧mü̧kuädü pä'üsä. Jua̧u̧nu̧mä̧ ¿Tta̧'a̧nü̧ pä'ü, ttü wȩnȩ juiyünä̧ jȩchü̧mä̧, kka̧ra̧ amükuädomȩnä̧ pä̧ttä̧kua̧ cha'ajä̧ttü̧?

³⁰ Dio-rü ukuoku chukuäja'amä̧, ¿Tta̧'a̧nü̧ pä'ü chu̧kuȩ chukuokuäjinä̧mä̧, suronä̧ ttukuokua'ajä̧ttü̧?

³¹ Ja̧'wa̧nü̧ jä̧'cha̧'a̧ttü̧, kukuätukuomȩnä̧'i̧nä̧, kuawätukuomȩnä̧'i̧nä̧, o'kajuiyünä̧tä̧ Dio-rü pä̧wä̧rü̧ja̧'a̧ku̧tä̧ jȩpä̧tu̧kui̧.

³² Judío'i̧nä̧, judío pokotürü'i̧nä̧, ja̧'wa̧ta̧nü̧ Dio iäre igresia isotürü'i̧nä̧ surojü jü̧nä̧ jȩ'kuä̧tu̧kuä̧.

³³ O'kajuiyünä̧tä̧ jȩchü̧mä̧, o'katoi'ünä̧rü̧ ttesewomȩnä̧ jȩcha̧ pä'üsä, ttürütä ppädütämä̧kü̧, rekuätürü ppädü, juätü'i̧nä̧ surojüttü ttü̧ja̧kui̧'a̧ pä'ü.