1 Corintios 1 - Nuevo Testamento Uwotjüja

Teäwinü̧ wȩnȩ

^1-2 Ttü Pauru, Dio-rü pä̧wä̧rü̧jo̧mȩnä̧, Crito apóto päi'ünä̧ woinä̧ku̧ cha'attü, cha̧wa̧ru̧wa̧ chi̧jä̧wa̧ Sóstenes-ku̧ te'äusä Corinto ütawiyättü Dio iäre igresia wotürü. Jesucrito, Dio-rü usäwäku 'kȩ'ȩpü̧ ȩmü̧, umüwäyotü jü̧nä̧ juoepinä̧u̧ru̧'i̧nä̧, ja̧'wa̧ta̧nü̧ jitü Tu̧ru̧wa̧ Jesucrito i̧mi̧nä̧ jä'epü ukuokuätürü'i̧nä̧, te'äusä, jua̧u̧mä̧ ujutu'i̧nä̧ Tu̧ru̧wa̧ ja̧'a̧nä̧, juätü'i̧nä̧ ttu̧ru̧wa̧ ja̧'a̧.

³ Tü̧tä̧mü̧ mi̧nä̧ Ttä'o Dio ja̧'wa̧ta̧nü̧ Tu̧ru̧wa̧ Jesucrito jä'o Dio rettü ppädütä ja̧'wa̧ta̧nü̧ yo̧mȩtȩnä̧ eseäkuäwätä kkä̧tu̧kua̧ku̧ pä'ätüjä̧.

Esewinü̧ wȩnȩ

⁴ Chä'o Dio-rü eseusä 'kuäopünä̧tä̧ ukutu jäwänä̧, ukuturu rettü Crito Jesú-nä̧ ppädiniyä̧ku̧.

⁵ Isopäi'ünä̧ epíritu jäwä ru̧kuä̧chä̧tu̧ku̧nä̧, Dio-mä̧ jua̧u̧nä̧tä̧ iyinä̧u̧jä̧ jo̧mȩnü̧ kukuokuätukua pä'ü'i̧nä̧, ku̧wo̧juä̧tu̧kua̧ pä'ü'i̧nä̧, jü̧nä̧.

⁶ Täkü, Crito jiäwinü̧ wȩnȩmä̧ ukututtümä̧ 'kiyünä̧ rü̧ä̧chi̧na̧'a̧.

⁷ Ja̧'wa̧nü̧ ja̧'a̧ttü̧ Dio mippoünä̧ iyümä̧ juiyoko̧u̧jä̧, Tu̧ru̧wa̧ Jesucrito pä'äjita'anü̧ icha'anä̧ tta̧'a̧rü̧ ku̧jä̧tu̧kua̧'a̧nä̧mä̧.

⁸ Dio-mä̧, ukuturumä̧ pi̧jä̧ beipächomȩbü päi'ünä̧ 'kiyünä̧ ku̧jä̧tu̧ku̧nä̧ tta̧wä̧rä̧kuä̧u̧jä̧, Tu̧ru̧wa̧ Jesucrito pä'äjita'anü̧ ichomȩnä̧, surojü jȩ'kuä̧tu̧ku̧mä̧, ya̧tȩrü̧'i̧nä̧ päwi'ü juiyäkua'anü̧.

⁹ Dio-mä̧ iya päinü̧mä̧ iyü, Jua̧u̧tä̧ ja̧'a̧ chutä I̧tti̧, Tu̧ru̧wa̧ Jesucrito-ku ji̧nä̧ ji̧yȩtȩnä̧ ku̧ja̧kuä̧tu̧kua̧ pä'ü wopinü̧mä̧.

¹⁰ Chawaruwä chi̧jä̧wa̧tü̧, Tu̧ru̧wa̧ Jesucrito i̧mi̧nä̧ ukuturu jä'epüsä, o'katoi'ünä̧ ji̧nä̧ ji̧yȩtȩnä̧tä̧ amükuädü jȩ'kuä̧tu̧kua̧ pä'ü, i̧mi̧ku̧nä̧ 'kȩ'i̧pä̧chü̧ amükuädäkuäwä juiyünä̧. Ji̧nä̧ ji̧yȩtȩnä̧tä̧ kka̧ku̧, adiwomȩnä̧ amükuädü jȩpä̧tu̧kui̧.

¹¹ Pi̧yȩmä̧ pä'üsä chawaruwä chi̧jä̧wa̧tü̧, ukutu rü̧ȩnä̧ pä'ä'chäkuäu ku̧ja̧kuä̧tu̧kua̧'a̧, Cloé i̧tti̧mü̧ttü̧ ä̧ju̧kuä̧ji̧'ka̧.

¹² Ukututtü, yotüte pättü pä'üsä: «Ttümä̧ Pauru umüwäyotü i̧sa̧sä̧»; kkorotü pä'ätü: «Ttümä̧ Aporo umüwäyotü i̧sa̧sä̧»; kkorotütä pä'ätü: «Ttümä̧ Cefa umüwäyotü i̧sa̧sä̧,» ja̧'wa̧ta̧nü̧ ttümä̧: «Crito umüwäyotü i̧sa̧sä̧,» jü̧nä̧.

¹³ ¿Ja̧'wa̧nü̧ jü̧ttü̧mä̧, Crito-mä̧ 'kȩ'chä̧kuä̧u̧ ikuinü̧ tä̧jí̧? ¿Pauru ja̧'a̧, ukuturu rettü, ü̧jo̧kä̧ jäinä̧ 'korujuo'ächinü̧mä̧? ¿ja̧'wa̧ta̧nü̧ ukutumä̧, Pauru i̧mi̧nä̧ bautizo jȩpä̧kuä̧wi̧nä̧tü̧jä̧ tä̧jí̧?

¹⁴ Dio-rütä eseusä, ukututtümä̧ ya̧tȩrü̧'i̧nä̧ bautizo jȩcho̧ka̧'a̧ ji̧na̧'a̧ttü̧, suro Cripo-rütä ja̧'wa̧ta̧nü̧ Gayo-rütä bautizo-mä̧ jȩpi̧nü̧sä̧.

¹⁵ Ya̧tȩ'i̧nä̧, jua̧u̧ i̧mi̧nä̧ bautizo jȩi̧nä̧ku̧sä̧ päü juiyäkua'anü̧.

¹⁶ Ja̧'wa̧ta̧nü̧ Estéfana i̧tti̧mü̧rü̧tä̧ bautizo-mä̧ jȩpi̧nü̧sä̧, ja̧'wa̧nü̧ ja̧'a̧nä̧ kkorotürü jȩchi̧na̧'a̧mä̧ jȩru̧pa̧sä̧,

¹⁷ Isopäi'ünä̧ Crito-mä̧, bautizo jȩcha̧ pä'ümä̧ weokoku pinü̧sä̧, jua̧u̧ ja̧jü̧jueimä̧ jareü wȩnȩtä̧ jidäwa pä'ü weinä̧ku̧sä̧; jua'a'i̧nä̧ wo̧juä̧wä̧ wȩnȩ kkü̧nä̧mä̧kü̧, Crito ü̧jo̧kä̧ jäinä̧ 'koru juo'ächinü̧, mikuäu toe'ächü juiya pä'ü.

¹⁸ Isopäi'ünä̧, Crito ü̧jo̧kä̧ jäinä̧ 'korujuoächinü̧mä̧, suräjuä wȩnȩ ja̧'a̧ to'e'ächätürümä̧; ja̧'wa̧nü̧ ja̧'a̧nä̧, ra̧wä̧pi̧jü̧ttü̧ kka̧kui̧pä̧tü̧, ujuturumä̧ Dio ujurutä ja̧'a̧.

¹⁹ Wȩyu̧kuä̧ wȩnȩ pä'a: «Wo̧juä̧tü̧ ttu̧wo̧juö̧ si'epü iku, adiu tta̧mü̧kuädü'i̧nä̧ jerutu chi̧kuä̧kua̧sä̧.»

²⁰ ¿Tó tti̧rȩbȩä̧kuä̧wi̧nä̧ttü̧ wo̧juä̧wä̧ kku̧nä̧ri̧nä̧tü̧mä̧, wo̧juȩkuä̧ isotü pinä̧tü̧mä̧, pi̧jä̧ jäwä ukuokui'enä̧tü̧mä̧? ¡Dio-mä̧, pi̧jä̧ ttü̧ja̧ ttu̧wo̧juö̧ jerutu ikuinä̧u̧ ja̧'a̧!

²¹ Ja̧'wa̧nü̧ ja̧'a̧ttü̧ pi̧jä̧ ttü̧ja̧mä̧, tta̧mü̧nä̧ pa̧ja̧tü̧ ttu̧wo̧juö̧ jäwänä̧mä̧ Dio-rümä̧ wo̧juo̧ko̧tü̧ pinä̧tü̧, Dio-mä̧ jiäkuäwä wȩnȩnä̧, ttü̧ttȩpä̧ro̧ka̧'a̧ 'kua̧rü̧nä̧tä̧ tta̧'kua̧ wȩnä̧rä̧tü̧rü̧mä̧ ra̧wä̧pi̧jü̧ttü̧mä̧ rä'epü ikua pä'ü amükuädinü̧.

²² Judío-mä̧, jitäu tteseta pä'ümä̧, jȩtto̧kü̧ ja̧jü̧juei jȩta̧'a̧ totta pä'ätü ja̧'wa̧ta̧nü̧ griego-mä̧ wo̧juȩku̧nä̧ rä̧mi̧pü̧ ttä̧ju̧kua̧ pä'atü;

²³ ja̧'wa̧nü̧ ja̧'a̧nä̧, ujutumä̧ Crito-rü ü̧jo̧kä̧ jäinä̧ 'korujuo'ächinü̧rü̧ ji'äwätüjä̧. Pi̧yȩmä̧ judío-rümä̧ tto̧ȩpä̧rü̧ wȩnȩ ja̧'a̧nä̧, judío pokotürütä ttu̧'ȩpä̧ro̧ko̧tü̧ ttukuokua'a jä̧'i̧nü̧'a̧nü̧ jü̧ wȩnȩ ja̧'a̧;

²⁴ Ja̧'wa̧nü̧ ja̧'a̧nä̧, Dio woinä̧u̧ru̧mä̧, judío já̧ pä'ü'i̧nä̧ ja̧'wa̧ta̧nü̧ grecia ttü̧ja̧ já̧ pä'ü'i̧nä̧, Crito-mä̧ Dio ujurutä, Dio u̧wo̧juö̧tä̧ wa̧ ja̧'a̧.

²⁵ Ja̧'wa̧nü̧ ja̧'a̧ttü̧ Dio jäwänä̧ ttu̧ȩpä̧rä̧kuä̧wo̧kü̧ 'kua̧rü̧mä̧, pi̧jä̧ ttü̧ja̧ ttu̧wo̧juö̧ttü̧'i̧nä̧ abonä̧nü̧ wo̧juä̧wä̧ wȩnȩ ja̧'a̧; ja̧'wa̧ta̧nü̧ Dio jäwänä̧ ttijuiyuwuö 'kua̧rü̧mä̧, pi̧jä̧ ttü̧ja̧ ttujuruttü'i̧nä̧ abonä̧nü̧ jü̧ ja̧'a̧.

Corinto ttü̧ja̧ ttü̧ja̧kui̧nü̧ wȩnȩ

²⁶ Chawaruwä chi̧jä̧wa̧tü̧, ukuturu Dio woinü̧ ku̧ja̧kui̧nä̧tu̧ku̧ amükuädätukui. Ukuturumä̧, ttü̧ja̧mä̧ pä'ätü, wo̧juä̧tü̧mä̧ a̧'u̧ku̧nä̧tä̧ winä̧tü̧, ruwonä̧ wotümä̧ a̧'u̧ku̧nä̧tä̧ winä̧tü̧ ja̧'wa̧ta̧nü̧ ttukuo kku̧nä̧rä̧tü̧ isotümä̧ a̧'u̧ku̧nä̧tä̧ winä̧tü̧, jü̧nä̧.

²⁷ Isopäi'ünä̧, Dio-mä̧, pi̧jä̧ttü̧ jerupätürü ȩmi̧nü̧, rü̧ȩnä̧ wo̧juä̧tü̧rü̧ dä'ä ttuepa pä'ü; ja̧'wa̧ta̧nü̧ Dio-mä̧, pi̧jä̧ttü̧ ttujuru jui'ätürü ȩmi̧nü̧, ttujuru kku̧nä̧rä̧tü̧rü̧ dä'ä ttuepa pä'ümä̧.

²⁸ Ja̧'wa̧ta̧nü̧ pi̧jä̧ttü̧ usurä isotürü ja̧'wa̧ta̧nü̧ ttü̧jü̧'ko̧ko̧u̧ru̧ Dio-mä̧ pojopü ȩmi̧nü̧, ja̧'wa̧nü̧ wotüjä̧ pättü jȩpü̧ ikua pä'ümä̧.

²⁹ Ja̧'wa̧nü̧ ja̧'a̧ttü̧, Dio ä'kattümä̧ ya̧tȩ'i̧nä̧ ja̧'wa̧nü̧ wa̧sä̧ pä'ü ukuo teäkuäwa pä'ümä̧ juiya'a.

³⁰ Ja̧'wa̧nü̧ ja̧'a̧nä̧, Chutä Dio-tä ja̧'a̧ ukuturu Jesucrito-ku ji̧nä̧ ji̧yȩtȩ päi'ünä̧ jȩpi̧nü̧mä̧ ja̧'wa̧nü̧ jȩpü̧ Crito-nä̧mä̧ wo̧juä̧wä̧ kkü̧nä̧, adiwomȩnä̧ jȩä̧kuä̧wä̧ kkü̧nä̧, 'kȩ'ȩpü̧ ȩmä̧wo̧tü̧ jü̧nä̧'i̧nä̧ ja̧'wa̧ta̧nü̧ mitäu ȩmi̧nä̧u̧ jü̧nä̧'i̧nä̧, jȩi̧nä̧u̧jä̧.

³¹ Ja̧'wa̧nü̧ ja̧'a̧ttü̧, wȩyu̧kuä̧ wȩnȩ pä'a: «Ukuo tekuäwa päkuttümä̧, Tu̧ru̧wa̧ Jesucrito-nä̧tä̧ ukuo te'äwi.»