YOHANES 7 - Rengah Jian

Yésus ngan irah padéé' Néh

¹ La'o inah lakau Yésus tong tana' Galilia, bé' éh keloo' lakau tong tana' Yudea kepéh uban kelunan Yahudi pitah jalan ke' réh juk mematai Éh.

² La'ah lepah danii' tong jaka' irah Yahudi juk maneu' dau ja'au inah, éh ngaran néh, dau ja'au lamin sapau ujung kayeu', ke' réh mena' pengena' réh ngan Tuhan la'o ajau.

³ Kenat péh irah padéé' Yésus bara' ngan Néh, ka' ha' réh, Jian Ke' piso jin siteu' tai tong tana' Yudea, mai Ke' mokoo' siteu', jian Ke' tai sinah dokoo' bakéh Ko' omok na'at telana' éh naneu' Ko' inah,

⁴ Hun kelunan keloo' réh ngajung éh, bé' éh melim kekat penganeu' néh. Uban Ko' maneu' kuraa'-kuraa' telana' éh tejeu', jian Ke' tai pepoléng éh ngan kekat kelunan béé, ha' réh.

⁵ Avéé' padéé' usah Néh bé' ngelan Éh.

⁶ Ka' ha' Yésus ngan réh, Bé' sukup jaka' Ké' jak, bang jaka' keh ngelayau éh pu'un.

⁷ Kelunan tong tana' iteu' bé' réh leko keh, bang irah leko Akeu' uban Ké' bara' tong penganeu' réh éh sa'at.

⁸ Jian keh tai dau ja'au inah, bé' Akeu' keloo' tai uban jaka' Ké' bé' jak éh sukup, ha' Néh.

⁹ La'o Yésus pané ngan réh kenat, mokoo' Éh keto tong tana' Galilia.

Yésus tai tong dau ja'au, lamin ujung kayeu'

¹⁰ La'o padéé' Yésus nah tai tong dau ja'au inah, boh Yésus tai kepéh. Bang bé' Iah kivu jalan éh kenivu irah pinaa' nah, bang Iah selim-selim awah.

¹¹ Kelunan Yahudi pitah Éh tong dau ja'au inah, Ka' ha' réh, Mah iri', ha' réh.

¹² Kelunan pinaa' pané selem-selem tong Yésus, ka' ha' jelua' réh, Kelunan inah jian éh, ha' réh. Ka' ha' jelua' kepéh, Bé', kelunan petawang awah ine', ha' réh.

¹³ Selem-selem réh pané uban réh medai kelunan Yahudi.

¹⁴ Avéé' belu'an réh maneu' dau ja'au inah, tai Yésus tong umaa' Allah ke' Néh nebaraa' réh.

¹⁵ Béé kenin irah Yahudi, ka' ha' réh, Jin semah kelunan iteu' omok jam tong kekat tebaraa' inah Néh bé' pu'un tai sekulah, ha' réh.

¹⁶ Ka' ha' Yésus ngan réh, Kekat ha' tebaraa' Ké' iteu', bé' éh ha' tebaraa' Ké' tengéé', bang inah éh jin Allah éh nyohoo' Akeu' tuai.

¹⁷ Séé'-séé' éh keloo' maneu' kekat pengeloo' Allah, omok éh jam kekat ha' tebaraa' Ké' inah pu'un éh jin Allah, bé' Ku' bara' éh kivu kenin Ké' tengéé' awah.

¹⁸ Kelunan éh pu'un pané kivu kenin néh tengéé', iah maneu' kenat dokoo' kelunan omok ngajung éh. Bang kelunan éh keloo' réh ngajung Iah éh nyohoo' Éh tuai, pu'un éh pané mu'un, bé' éh kenyo ngan ngelavo' réh.

¹⁹ Pu'un Musa mena' kekat sohoo' Tuhan ngan keh, bang bé' keh kivu éh. Uban ineu' keh pitah jalan juk mematai Akeu', ha' Néh.

²⁰ Ka' ha' irah pinaa' nah, Ka'au pu'un nasek balei', séé' éh juk mematai Ke' kunah ko' nah, ha' réh.

²¹ Ka' ha' Yésus ngan réh kepéh, Jah koléé' awah Ku' maneu' telana' éh ja'au tong Dau Posot, pu'un keh béé kenin.

²² Uban Musa nyohoo' keh maneu' adet sunat, na' péh éh Dau Posot, pu'un keh pesunat anak keh. Éh mu'un néh bé' éh Musa éh bu'un maneu' adet inah, bang tepun keh Abraham éh bu'un néh.

²³ Hun keh omok pesunat anak keh tong Dau Posot dai keh ngelapah tong sohoo' lem Surat Musa nah, kineu' keh merek ngan Ké' hun Ké' peka'o kelunan mu'un tong Dau Posot.

²⁴ Mai keh seruh tong éh poléng ta'an keh awah, bang jian keh seruh jian-jian ngan pepata éh mu'un, ha' Yésus.

Tong kelunan neteng, séé' éh Yésus

²⁵ Pu'un jelua' kelunan tong leboo' Yérusalem éh bara' ka', Kineu' kelunan inah bé' énéh éh penitah irah ja'au ke' réh juk mematai éh rai.

²⁶ Bang na'at tam, bé' Éh melim usah Néh, sinah Éh nebaraa' kelunan tong ta'an réh béé ngan bé' pu'un séé' tai maneu' Éh. Kineu' irah ja'au, kejam réh mu'un kelunan inah Iah Éh Kristus.

²⁷ Bang bé' Éh Kristus, uban hun Kristus tuai, bé' pu'un séé'-séé' éh omok jam jin semah savéé' Néh, bang uleu' béé jam jin semah kelunan iteu' pu'un tuai, ha' réh.

²⁸ La'ah tovoo' Yésus nebaraa' réh tong umaa' Allah, Iah pané ngan réh ngan ja'au ha', ka' ha' Néh, Ka'ah seruh keh jam Akeu', ngan jam savéé' Ké', bang bé' Akeu' tuai kivu kenin Ké' tengéé', Iah éh nyohoo' Akeu' tuai pu'un Éh teneng. Bé' keh jam Éh,

²⁹ Bang Akeu' jam Éh uban Ké' pu'un tuai jin Iah, ngan Iah nyohoo' Akeu' tuai, ha' Néh.

³⁰ Irah tioo juk ngamit Éh bang bé' réh omok ngamit Éh uban bé' jak éh sukup jaka'.

³¹ Jin belah irah kelunan pinaa' nah pu'un kuraa' kekat réh éh ngelan tong Néh. Ka' ha' réh, Tovoo' Kristus tuai, kineu' Éh, omok Éh maneu' telana' éh pelapah ja'au jin éh neu' kelunan iteu', ha' réh.

Kelunan ja'au nyohoo' seradu tai ngamit Yésus

³² Uban kekat irah Parisi ngan kekat pengeja'au imam tong sebayang Yahudi nyohoo' kuraa'-kuraa' irah éh mavaa' umaa' Allah, ngamit Yésus.

³³ Ka' ha' Yésus, Bé' Ku' lebéé' lah mokoo' ngan keh siteu' dat, la'o inah Akeu' juk moléé' tai Iah éh nyohoo' Akeu' tuai rai.

³⁴ Adang ka'ah pu'un pitah Akeu', bang bé' keh omok alaa' Akeu' kepéh, uban tong jalan Ké' juk tai nah, bé' keh omok tai sinah, ha' Néh.

³⁵ Boh irah Yahudi pané belah irah ke', ka' ha' réh, Semah Éh juk tai nah ke' uleu' bé' omok tai temeu' ngan Néh. Kineu' Éh juk tai ngan irah Yahudi éh mokoo' tong tana' éh jah, ke' réh mokoo' belah kelunan éh tengéé' pohoo' ngan nebaraa' réh.

³⁶ Ineu' sin tong ha' Néh ka', Ka'ah juk pitah Akeu' bang bé' keh omok alaa' Akeu' kepéh. Ineu' sin tong ha' néh éh bara', Bé' ka'ah omok tai tong jalan Ké' juk tai nah. Kineu' ha' Néh kenat, ineu' sin néh, ha' réh.

Tong baa' éh purip kelunan

³⁷ Avéé' tong ga' dau tong dau ja'au inah, éh dau éh pelapah ja'au mu'un, tong dau inah, Yésus nekedéng ngan pané ngan ja'au ha', séé'-séé' éh mapeu' batok, jian éh tuai tavin Akeu' ngan mesep.

³⁸ Séé'-séé' éh ngelan tong Akeu', iah pu'un barei' jah anak baa' éh bé' omok metei', pu'un baa' éh purip musit jin kenin néh pekua' ha' lem surat Allah éh pu'un bara' éh, ha' Néh.

³⁹ Pu'un Yésus pané kenat tong Sahéé' Ni'ai éh juk nena' Néh ngan kekat kelunan éh ngelan tong Iah. Tovoo' Néh pané kenat, Sahéé' Ni'ai bé' jak éh pu'un tuai uban Yésus to bé' jak moléé' tai Tamen Néh ngan kenajung tong seruga.

Kelunan pinaa' tengéé' kenin

⁴⁰ Jelua' kelunan jin irah pinaa' nah éh menéng ha' Yésus pané kenat, pu'un réh bara' ka', Adang kelunan iteu' Iah éh Nabi éh pejajii' Tuhan rai, ha' réh.

⁴¹ Ha' jelua' kepéh, Bé' éh kenat, adang Néh Kristus, ha' réh. Ha' jelua' kepéh, Bé' éh kenat, uban hun Kristus tuai, bé' Éh tuai jin Galilia.

⁴² Uban ha' lem surat Allah bara', Kristus pu'un éh jin puku' Daud ngan lohoo' Néh tong leboo' Bétléhém, éh leboo' Daud sahau, ha' réh.

⁴³ Petengéé' kenin réh.

⁴⁴ Jelua' kelunan nah juk ngamit Yésus bang bé' pu'un séé'-séé' éh tai ngamit Éh kenat.

Pengeja'au irah Yahudi éh mahéng kenin bé' ngelan

⁴⁵ La'ah moléé' kepéh irah seradu nah tai tavin irah pengeja'au imam ngan irah Parisi neteng réh, Semah iri'? Kineu' éh ke' keteleu' bé' mihin Éh tuai, ha' réh.

⁴⁶ Ka' ha' irah seradu mipa réh, Jin-jin sahau péh bé' pu'un kelunan éh jam pané barei' kelunan inah, ha' réh.

⁴⁷ Ka' ha' irah Parisi kepéh, kineu' keh lavo' neu' Néh kenat.

⁴⁸ Kineu', pu'un jah usah jin belah pengeja'au lu' ngan jah kelunan Parisi éh ngelan tong Iah kejam keh?

⁴⁹ Kelunan pinaa' nah bé' réh jam kekat ha' lem Surat Musa, kenat péh irah teneng tong ukum Tuhan, ha' irah Parisi.

⁵⁰ Jin belah irah éh pané kenat, pu'un Nikodemus. Nikodemus pané ngan réh,

⁵¹ Ukum tebaraa' lu' bé' éh kejeraa' lu' pesala' ngan ngukum kelunan hun lu' to bé' jak menéng kekat ha' néh ngan jam tong kekat penganeu' néh, ha' néh.

⁵² Ha' réh mipa éh, kineu' ka'au', kelunan jin Galilia pekua' barei' Iah, jian ke' pekalai tong ha' tebaraa' Allah, boh ke' omok jam bé' pu'un jah Nabi Tuhan tuai jin Galilia, ha' réh.