YOHANES 12 - Rengah Jian

Yésus nosoo' réh anyuu' éh jian ba'oo' tong Betania

¹ Nem dau teka irah maneu' Dau Ja'au Paska, tai Yésus mokoo' tong leboo' Betania éh leboo' Laserus éh lepah pebetéé' Néh jin patai néh rai.

² Pu'un réh maneu' ka'an ja'au juk seva' Yésus, Marta éh petubo réh, Laserus péh mokoo' kuman pemung ngan Yésus

³ Boh Meriam alaa' jah gutun anyuu', éh ma'an mu'un-mu'un melih. Anyuu' inah éh senuai jin lakat anyuu'. Iah tioo mujek anyuu' inah tong gem Yésus ngan mitit éh palaa' bok néh kepéh. Jian ba'oo' kekat lamin iteu' neu' anyuu' inah.

⁴ La'ah jah bakéh Yésus, ngaran néh Yudas Iskariot éh memalo Yésus nah, ka' ha' néh ngan Yésus,

⁵ Uban ineu' redo inah bé' melih anyuu' inah ke' néh omok alaa' teleu' ato rigit pirek tong néh dokoo' néh mena' éh ngan kelunan kari kepéh, ha' néh.

⁶ Pu'un éh pané kenat bé' éh uban néh pika kelunan kari, bang uban iah éh kelunan éh nekau. Iah éh ngamit bék jalan réh modoo' rigit réh ngan pu'un éh nekau rigit jin inah.

⁷ Ka' ha' Yésus ngan Yudas, Mai ke' petusah redo inah, turut ke' iah maneu' kenat tong dau Ké' tenanem réh.

⁸ Kelunan kari ngelayau éh pu'un ngan keh, bang Akeu' bé' Ku' ngelayau pu'un ngan keh, ha' Néh.

Tong réh pitah jalan juk mematai Laserus

⁹ Pinaa' kelunan Yahudi menéng rengah Yésus pu'un tong leboo' Betania, boh réh tai sinah. Bé' irah tai sinah ke' réh na'at Yésus awah, bang dokoo' réh na'at Laserus péh éh Yésus pepurip jin patai néh rai.

¹⁰ Kenat péh irah pengeja'au imam pakat pitah jalan ke' réh juk mematai Laserus kepéh,

¹¹ uban naneu' Laserus betéé' murip kepéh, pinaa' kelunan Yahudi ngelan tong Yésus ke' réh bé' kivu irah éh pengeja'au réh kepéh.

Kelunan seva' Yésus tovoo' Iah tai Yérusalem

¹² Barei' sagam kelunan pinaa' éh pu'un tai Dau Ja'au Paska, nenéng réh rengah Yésus juk tai leboo' Yérusalem.

¹³ Boh réh alaa' da'an éh barei' da'an uvut réh nah ke' réh tai temeu' ngan Néh, ja'au ha' réh mejing Allah, ka' ha' réh, Mejing Allah, jian mu'un Iah éh tuai dalem ngaran Tuhan. Jian mu'un Iah éh Raja' kelunan Israel, ha' réh.

¹⁴ Boh Yésus alaa' keledai ke' Néh menyun bau néh, pekua' barei' éh benara' réh lem surat Allah,

¹⁵ O ka'ah kelunan tong leboo' Yérusalem, mai keh medai, Na'at Raja' keh tuai tavin keh, lakau jalan anak keledai.

¹⁶ Irah bakéh Yésus bé' réh nesen tong ha' lem surat Allah inah tovoo' Yésus lakau nah, bang la'o Yésus murip jin patai Néh ngan kenajung tong seruga kepéh, boh réh nesen ha' inah, ngan petesen kenin réh kepéh kenat éh penganeu' réh ngan Yésus rai.

¹⁷ La'ah irah pinaa' éh pu'un pemung ngan Yésus tovoo' Néh purip Laserus jin patai néh ngan tebai éh musit jin luvang bateu' nah, pu'un réh tosok éh ngan kelunan éh jah kepéh.

¹⁸ Kenat kelunan pinaa' pu'un tai petemeu' ngan Yésus, uban réh menéng tong telana' éh naneu' Yésus éh ja'au mu'un nah.

¹⁹ Hun irah Parisi jam irah pinaa' tai tavin Yésus kenat, pu'un réh pepané tong irah ke', ka' ha' réh, Kekat kelunan inah bé' irah kivu uleu' kepéh, nebet réh awah lu', kekat réh béé-béé tai tavin kelunan inah awah, ha' réh.

Kelunan Yunani pitah Yésus

²⁰ La'ah jin belah irah pinaa' éh tai leboo' Yérusalem tovoo' Dau Ja'au inah, pu'un kelunan éh pohoo' Yunani kepéh.

²¹ Irah Yunani nah tai tavin Pilipus. Pilipus nah pu'un éh jin leboo' Betsaida tong tana' Galilia. Ka' ha' irah Yunani ngan Pilipus, O Guru, améé' tuai juk pitah Yésus, ha' réh.

²² Boh Pilipus tai bara' kenat ngan Anderias, boh rawah pu'un tai bara' kenat ngan Yésus kepéh.

²³ Ka' ha' Yésus ngan roh, Hun iteu' lepah avéé' jaka' Anak Kelunan juk kenajung kekat kelunan.

²⁴ Akeu' bara' mu'un ngan keh, hun lu' modoo' jah lo'ong parai, jah lo'ong awah ke' éh. Bang hun lu' mulah éh tong tana' ke' néh nyekaa', boh éh pu'un buaa' éh pinaa'.

²⁵ Séé'-séé' éh mihau urip néh tengéé', tawang urip néh inah. Bang séé'-séé' éh bé' seruh mihau urip néh tengéé' tong tana' iteu', inah éh pu'un urip pelinguh.

²⁶ Séé'-séé' éh juk maneu' kereja' Ké', jian éh kivu Akeu' mu'un, dokoo' semah-semah Akeu' pu'un, sinah ke' kelunan éh kivu sohoo' Ké' inah. Séé'-séé' éh maneu' kereja' Ké' kenat, Tamen Ké' ngajung éh, ha' Yésus ngan réh.

Yésus bara' tong pematai Néh

²⁷ Ka' ha' Yésus kepéh, Hun iteu' besau mu'un-mu'un kenin Ké'. Kineu' ha' Ké' la'ah. Kineu', tekep Ku' bara', O Amam mai Ke' kejeraa' kekat pengeketa iteu' teneng tong Akeu'. Kineu', tekep Ku' bara' kenat. Akeu' pu'un tuai tong tana' iteu' dokoo' Ké' jam keta.

²⁸ O Amam, jian Ke' ngeja'au ngaran Ko', ha' Néh. Pelapah pu'un jah ha' éh nenéng réh jin seruga, ka' ha' Néh, Pu'un Ku' ngeja'au ngaran Ké' tenéh, ngan pu'un Ku' juk ngeja'au éh kepéh, ha' Néh.

²⁹ Hun irah pinaa' éh nekedéng sinah menéng ha' inah, boh réh bara' ka', Ha' lengedo énéh, ha' réh. Ka' ha' jelua' kepéh, Pu'un jah meliket pané ngan Néh, ha' réh.

³⁰ Ka' ha' Yésus ngan réh, Bé' pu'un ha' kenat jin seruga ngan Ké' awah, bang ngan ka'ah péh.

³¹ Hun iteu' lepah avéé' sioo' hun kelunan tong tana' iteu' petuneng Néh ngan iah éh pu'un penyukat tong tana' iteu' juk senopéé' Néh.

³² La'ah hun Ké' pu'un netéé' réh jin tana' iteu', boh Ku' menat kenin kekat kelunan tavin Akeu', ha' Néh.

³³ Neu' ha' Néh pané kenat, inah Iah bara' tong Néh matai.

³⁴ Ka' ha' irah pinaa' mipa Éh, Pu'un jah ha' lem surat Tuhan éh bara', Kristus pu'un murip pelinguh. Hun néh kenat kineu' ha' Ko' bara' Anak Kelunan juk netéé' réh. Séé' éh Anak Kelunan, ha' réh.

³⁵ Ka' ha' Yésus mipa réh, Bé' lah lebéé' rema iteu' pu'un ngan ka'ah dat. Kelebéé' rema iteu', pu'un keto, jian keh lakau tong nawa Néh dai merem avéé' tong keh. Kelunan éh lakau tong merem, bé' éh jam kemah-kemah ketai néh.

³⁶ Jian keh ngelan tong rema iteu' kelebéé' rema iteu' pu'un pemung ngan keh, dokoo' keh omok anak-anak rema inah. La'o Yésus pané kenat piso Éh jin sinah dai réh jam Éh.

Kelunan Yahudi bé' keloo' ngelan tong Yésus

³⁷ Pinaa' telana' éh ja'au éh ta'an réh, na' péh kenat bé' irah ngelan Éh,

³⁸ kenat éh pesukup ha' éh benara' Yesaya sahau, ka' ha' néh, O Tuhan, séé' éh ngelan kekat ha' éh benara' mé'? Kelunan mah éh jalan Tuhan pepoléng penyukat Néh, ha' néh.

³⁹ Inah jalan irah bé' omok ngelan, uban ka' ha' Yesaya kepéh,

⁴⁰ Ka' ha' Allah pané Akeu' éh maneu' maten kenin réh peseu', ngan maneu' kenin réh mahéng, dokoo' réh bé' pu'un ta'an, ngan bé' réh nesen, bé' irah keloo' tavin Akeu' ke' Ké' peka'o réh, ha' Néh.

⁴¹ Pu'un Yesaya pané kenat uban néh na'at tong pengaren Yésus ngan pu'un éh bara' tong Yésus.

⁴² Na' péh irah pinaa' bé' keloo' ngelan tong Yésus, pinaa' pengeja'au irah Yahudi pu'un ngelan tong Yésus, bang uban réh medai kelunan Parisi meta' réh masek tong lamin sebayang, bé' réh bara' tong pengelan réh ngan kelunan éh jah.

⁴³ Irah keloo' kelunan ngajung réh, pelapah ja'au jin kenajung Allah.

Ha' tebaraa' Yésus adang petuneng kelunan

⁴⁴ La'ah Yésus pané kepéh ngan ja'au ha', ka' ha' Néh séé'-séé' éh ngelan tong Akeu', bé' éh ngelan tong Akeu' awah, bang pu'un éh ngelan kepéh tong Tamen Ké' éh nyohoo' Akeu' tuai.

⁴⁵ Séé'-séé' éh na'at Akeu', pu'un éh na'at Tamen Ké' kepéh éh nyohoo' Akeu' tuai.

⁴⁶ Pu'un Akeu' tuai tong tana' iteu' dokoo' Ké' perema tong tana' iteu', jalan siget-siget kelunan éh ngelan tong Akeu', bé' éh mokoo' tong merem kepéh.

⁴⁷ Séé'-séé' éh menéng ha' tebaraa' Ké' bang bé' éh kivu éh, bé' éh Akeu' éh ngukum éh. Bé' Akeu' tuai tong tana' iteu' dokoo' Ké' ngukum kelunan, bang inah Akeu' tuai dokoo' Ké' purip kelunan.

⁴⁸ Séé'-séé' éh bet Akeu', ngan éh bé' alaa' ha' Ké', pu'un éh ngukum éh, inah éh kekat ha' éh benara' Ké' ngan néh, ha' Ké' inah éh petuneng éh tong ga' dau vam.

⁴⁹ Pu'un éh kenat uban bé' Akeu' pané kivu kenin Ké' tengéé', bang Tamen Ké' éh nyohoo' Akeu' tuai, pu'un éh bara' ngan Ké' tong kekat ha' éh tekep Ké' bara' ngan keh kepéh.

⁵⁰ La'ah Akeu' jam kekat éh benara' Néh, inah éh mihin kelunan omok murip pelinguh. La'ah kekat éh benara' Ké' ngan keh, inah éh kekat éh benara' Tamen Ké' ngan keh, ha' Néh.