TITUS 3 - Rengah Jian

Barék kelunan Kristén

¹ Jian ke' petesen irah éh lem sidang ko', dokoo' réh omok ngerera' tong peritah ngan séé'-séé' éh pu'un penyukat, ngan kivu sohoo' réh, ngan maneu' kekat kereja' éh jian.

² Mai réh pané ngesa'at ngaran kelunan, jian réh murip ngan pawah ngan maneu' éh jian. Jian réh jian pengané, dawai kenin ngan kekat kelunan béé.

³ Uban hun bu'un rai uleu' béé kelunan éh suwok kenin, éh bé' kivu sohoo', ngan tawang awah. Uleu' pu'un keripen kekat pengagat sa'at ngan pengekelih, urip lu' penoo' neu' akam ngeleko kelunan ngan nyonoh ngan uleu' murip pata pekeleko.

⁴ Bang Allah, éh purip lu' pepoléng penika ngan pengejian kenin Néh ngan uleu'.

⁵ Pu'un éh purip uleu'. Bé' éh neu' ineu'-ineu' penganeu' lu' éh jian, bang neu' pengasi Néh awah Iah purip lu', neu' Néh mohéé' kenin lu' ngan mena' urip maréng ngan lu' neu' Sahéé' Ni'ai,

⁶ éh nena' Néh ngan kekat kenin néh neu' Yésus Kristus éh purip lu',

⁷ dokoo' neu' penika Néh uleu' omok alaa' kenin éh teneng tong jumen Allah ngan alaa' urip éh pelinguh pekua' pengelan lu'.

⁸ La'ah teneng mu'un ha' inah. La'ah éh pengeloo' ké', jian ke' mekat bara' kekat ha' tebaraa' iteu', dokoo' irah éh ngelan tong Allah omok mekat kereja' ngan maneu' kekat éh jian. Kekat ha' tebaraa' iteu' jian éh, ngan pu'un gunah néh ngan kekat kelunan.

⁹ Bang jian ke' petedau tong kekat ha' réh pesakat, ngan ha' tosok réh tong puku' kelunan awah, ngan tong kekat ha' kelunan paneu', ngan tong réh nyakat tong sohoo' lem Surat Musa. Kekat inah bé' pu'un gunah néh, seleket moo' awah éh.

¹⁰ Tong kelunan éh mihin irah éh jah tengéé' kenin, jian ke' pané ngan néh duah koléé' meta' éh maneu' kenat, la'o inah mai ngebakéh éh.

¹¹ Uban ka'au' jam kelunan éh kenat, sala' mu'un éh, ngan penyala' néh tengéé' péh pepoléng éh pu'un sala' mu'un.

Tong pengega' ha' néh

¹² Hun mah ku' nyohoo' Artemas barang Tikhikus péh tai tavin ke' kepéh, jian ke' mekat pitah jalan tuai tavin akeu' tong leboo' Nikopolis uban akeu' juk tai mokoo' sinah sioo' genin.

¹³ Jian ke' nolong Senas, guru Surat Musa irai, ngan Apolos, lem pengelakau roh, ko' nolong roh dokoo' mai roh pu'un kurang ineu'-ineu'.

¹⁴ Jian irah éh ngelan, pekalai maneu' jian ngan pesukup ineu'-ineu' pengekurang kelunan, mai réh murip ngan bé' jam seruh.

¹⁵ La'ah kekat kelunan éh pu'un pemung ngan ké' siteu' bara' tabi ngan ko'. Bara' tabi' kepéh ngan kekat bakéh lu' dalem pengelan lu' tong Tuhan. Jian penika Allah pu'un pemung ngan ka'ah béé.