TITUS 2 - Rengah Jian

Pengereken pengelan éh mu'un

¹ Bang jian ke' bara' ha' tebaraa' éh teneng.

² Jian ke' nebaraa' irah lakei' éh ja'au urip, ke' réh jam seruh, ngan pu'un barék éh jian ngan jam mihau usah réh, ngan petem lem pengelan réh tong Kristus, ngan jam pika irah éh jah, kebit kenin lem pengeketa.

³ Kenat péh jian ke' nebaraa' irah redo éh ja'au urip, dokoo' barék réh barei' éh tekep tong kelunan éh ni'ai éh ngelan tong Allah. Mai réh pané ngesa'at ngaran kelunan, mai réh keripen baa' nesep éh bisa'. Bang jian réh pané tong kekat éh jian,

⁴ dokoo' réh omok nebaraa' irah redo éh bé' jak ja'au urip ke' réh jam murung lakei' réh ngan anak réh,

⁵ ngan jam mavaa' kenin réh ngan ni'ai, ngan jam petubo lamin réh, ngan ngerera' tong lakei' réh, dokoo' mai séé'-séé' péh ngesa'at ha' tebaraa' éh jin Allah.

⁶ Kenat péh jian ke' nebaraa' irah lemanai dokoo' réh jam mavaa' kenin réh.

⁷ Ka'au' tekep jah telana' tong barék éh jian dalem kekat ineu'-ineu' péh. Jian ke' nebaraa' réh jin kenin ko' mu'un, mai ke' ngelayoo' awah.

⁸ Jian ke pakai ha' tebaraa' éh teneng mu'un éh bé' omok kesa'at réh, dokoo' kelunan éh ngelawan lu', omok menyaa' uban réh bé' omok pesala' lu'.

⁹ La'ah jian ke' nyohoo' kekat kelunan sohoo' pengeja'au réh ngan ngepayoo' kenin pengeja'au néh dalem kekat ineu'-ineu'. Hun pengeja'au néh pané, mai éh nyakat ha' néh,

¹⁰ ngan mai réh nekau. Bang jian réh ngelayau maneu' kekat éh jian ngan tigéh dokoo' jin penganeu' réh éh kenat kelunan omok ngajung ha' tebaraa' tong Allah éh purip lu'.

¹¹ Uban pu'un Allah pepoléng penika Néh dokoo' Néh omok purip kekat kelunan.

¹² La'ah penika Néh inah mihin uleu' dokoo' murip ni'ai ngan bé' kivu kekat éh jin tana' iteu'. Tong tana' iteu' uleu' tekep murip jam mavaa' kenin, teneng ngan kivu sohoo' Allah.

¹³ Kelebéé' lu' mena tong Dau éh kenelan lu', hun pengaren Allah éh Matek ja'au ngan Yésus Kristus éh Pepurip lu' pu'un poléng kepéh.

¹⁴ Pu'un éh mena' urip Néh ngeliwah uleu', dokoo' Néh ngelepu lu' jin kekat arong kesa'at, mohéé uleu' ngan maneu' uleu' anah nah awah, kenat péh mihin uleu' mekat maneu' jian.

¹⁵ Jian ke' bara' kekat ha' tebaraa' iteu', ngan neu' penyukat Sahéé' Ni'ai jian ke' nebaraa' ngan petena' réh. Mai jah-jah usah péh ngera' ke' awah.