PILEMON 1 - Rengah Jian

¹ Surat iteu' jin Paulus, éh pu'un tong lamin tutup uban perengah Kristus Yésus, ngan jin padéé' lu' Timotius.

² Surat iteu' nena' ngan Pilemon, padéé' ngan bakéh mé' ngan kekat irah sidang éh petipun tong lamin ko', kenat péh ngan padéé' lu' Appia ngan Arkhipus éh bakéh améé' ngelawan kekat éh sa'at.

³ Jian Allah éh Tamen lu', ngan Tuhan Yésus Kristus, mena' pengejian ngan pengepawah ngan kéh.

Tong penika ngan pengelan Pilemon

⁴ O padéé' ké', siget koléé' ké' sebayang, akeu' mateng ke' lem sebayang ké', ngan bara' jian kenin ngan Allah.

⁵ Uban pu'un ku' menéng rengah tong penika ko' ngan kekat kelunan éh anah Tuhan ngan tong pengelan ko' tong Tuhan Yésus.

⁶ Akeu' sebayang dokoo' neu' lu' pu'un pekua' kenin lem pengelan lu' tong Kristus, ka'au' omok pepit dalem kekat pengejam ko' tong kekat pengejian éh anah uleu' neu' urip lu' lem Kristus.

⁷ O padéé', neu' penika ko' akeu' pu'un murung kenin ngan pu'un ngegahang kenin, uban pu'un ke' ngejian kenin kuraa'-kuraa' kelunan éh anah Tuhan.

Paulus menyat Pilemon pika Onésimus

⁸ Uban néh kenat, uban ké' padéé' ko' lem Kristus, omok akeu' makang kenin nyohoo' ke' maneu' éh tekep.

⁹ Bang bé' akeu' nyohoo' ke' maneu' éh, bang uban penika Tuhan ngan uleu' akeu' menyat ke' awah. Akeu' Paulus éh lawah Kristus Yésus, ngan éh pu'un tong lamin tutup hun iteu' uban pengelan ké' tong Iah,

¹⁰ Akeu' maneu' jah ha' pengenyat tulat Onésimus, éh seneruh ké' barei' anak ké' tengéé', uban iah péh ngelan tong Kristus. Tovoo' ké' tong lamin tutup, akeu' éh seleket tamen néh.

¹¹ Hun lepah rai bé' iah pu'un gunah tong ka'au', bang hun iteu' iah pu'un gunah tong ka'au' kenat péh tong akeu'.

¹² Hun iteu' inah akeu' nyohoo' éh moléé' tai ka'au' kepéh, iah éh matek kemurung ké'.

¹³ Keloo' akeu' pokoo' éh ngan ké' siteu' dokoo' néh omok nolong akeu' ngeliwah ka'au', kelebéé' ké' pu'un lem lamin tutup iteu' uban ké' perengah Rengah Jian.

¹⁴ Bang bé' akeu' keloo' maneu' ineu'-ineu' hun ké' bé' jam kenin ko', bé' akeu' keloo' ke' maneu' ineu'-ineu' uban néh sohoo' ké' awah, bang akeu' keloo' ke' maneu' éh hun néh lem pengeloo' kenin ko' mu'un.

¹⁵ Barang kenat péh Onésimus pu'un petat jin ka'au' metok awah rai, dokoo' ko' omok alaa' iah moléé' pelinguh ngan ko' kepéh.

¹⁶ Uban hun iteu' bé' iah jah kelunan sohoo' awah, bang pelapah jian jin kelunan sohoo', uban hun iteu' inah iah padéé' lu' dalem Tuhan éh penika uleu'. Akeu' murung iah mu'un, makin péh ka'au', uban iah éh sohoo' ko' ngan hun iteu' padéé' ko' dalem Tuhan kepéh.

¹⁷ Uban néh kenat hun néh mu'un akeu' éh bakéh ko', jian ke' alaa' iah kepéh pekua' barei' hun néh usah ké' mu'un.

¹⁸ Hun iah pu'un maneu' ineu'-ineu' kesa'at ngan ko' ngan ngerugi ke', ngan hun néh pu'un putang livah ko', akeu' éh bayan éh.

¹⁹ Inah éh senurat ké' tengéé', Akeu' Paulus omok bayan éh. Bang bé' akeu' bara' ka'au' péh pu'un putang usah ko' ngan ké'.

²⁰ O padéé', dalem ngaran Tuhan akeu' menyat ke' pika akeu' ngan ngejian kenin ké' pekua' éh tekep ngan kelunan éh pepadéé' dalem Kristus.

²¹ La'ah lem ké' nyurat éh kenat ngan ko', akeu' ngelan adang ko' juk kivu pengenyat ké' inah ngan pelapah ja'au jin éh pengenyat ké' inah.

²² Jah pengenyat ké' kepéh, Jian ke' petenup jah lamin ngan ké', uban akeu' ngelan Tuhan omok mipa ha' sebayang ko' ngan kejeraa' akeu' moléé' kepéh ngan ko'.

Paulus bara' tabi'

²³ La'ah Epapras éh pu'un dalem lamin tutup pemung ngan ké' uban pengelan néh tong Kristus Yésus, pu'un éh bara' tabi' ngan ko'.

²⁴ Kenat péh Markus, Aristarkhus, Demas ngan Lukas, éh pebakéh ngan ké' dalem kereja' Tuhan, irah péh bara' tabi' ngan ko'.

²⁵ Jian éh penika Tuhan Yésus Kristus pu'un pemung ngan kekat ka'ah béé.