MARKUS 5 - Rengah Jian

Tong Yésus peka'o kelunan éh nasek balei'

¹ Jin la'o Yésus ngepawah kepu ngan lipak nah rii', boh réh teleu' bakéh Néh avéé' tong tana' irah Gerasa saa' dipa baa' Banget Galilia.

² Hun mah Yésus tuhun jin alut, iah peselalang ngan jah kelunan éh tuai jin luvang bateu' jalan tanem kelunan matai.

³ Kelunan inah éh nasek balei' mokoo' éh tong tanem kelunan. Bé' pu'un kelunan éh omok ngejeret éh.

⁴ Pinaa' koléé' réh ngejeret ojoo' ngan gem néh palaa' ratai, bang siget koléé' réh ngejeret éh nah, pu'un éh tioo memekat éh ngan nasa' jeret daven éh neu' réh tong gem néh nah. Matek gahang mu'un-mu'un éh, bé' pu'un séé' péh éh omok mengen éh.

⁵ Jian péh éh dau rema, jian péh éh dau merem, iah lakau-lakau tong tanem kelunan, kenat péh éh lakau tong tokong, iah ngeradau' ngeradau', ngan lekup-lekup usah néh neu' bateu'.

⁶ Jin juu' iah na'at Yésus tuai, pelapah iah nekedeu' tai tavin éh ke' néh ngejekuu' lep néh tong jumen Yésus,

⁷ ngan iah ngeradau' ja'au ha', ka' ha' néh, O Yésus Anak Allah éh matek bau, ineu' juk neu' Ko' tong akeu', ke' Ko' tuai siteu' teu'. Ko' pika ku, mai Ke' ngukum akeu', ha' néh.

⁸ Pu'un iah pané kenat ha', uban Yésus lepah bara' ka' ngan néh, O balei', pega' ke' jin kelunan iteu', ha' néh.

⁹ Yésus neteng éh ka', Ineu' ngaran ko'. Ha' lakei' inah, ngaran ké' ne', Panyen, kenat ngaran ké', uban mé' matek pinaa' mu'un teu', ha' néh.

¹⁰ Iah menyat ngan Yésus, bé' buhaa' Yésus bet balei' jin tana' inah.

¹¹ Déhéé' retek inah pu'un pinaa' idok nemo tong apé ihang.

¹² Kekat balei' nah menyat Yésus kejeraa' réh tai lem idok pinaa' nah, ka' ha' réh, Ko' kejeraa' améé' masek lem idok pinaa' nah, ha' réh.

¹³ La'ah Yésus kejeraa' balei' nah masek lem kekat idok nah. Tioo nekedeu' kekat idok pinaa' nah nerurut tong apé ihang bau dirin baa' tioo pejeu pelohoo' tai lem baa', tioo matai menyet. Ngioo' kekat idok nah duah ibu usah.

¹⁴ La'ah irah éh mihau idok nah tioo kelap tai bara' rengah inah ngan irah tong leboo' ngan irah tong térék péh, kekat idok inah matai menyet. La'ah irah tuai juk na'at ineu' éh lepah neu' Yésus nah.

¹⁵ Tai réh tavin Yésus, ngan pu'un réh na'at kelunan éh uban nasek balei' pinaa' nah, menyun sinah, ngan pakai néh lepah pu'un, kenin néh péh lepah teneng, medai mu'un réh.

¹⁶ La'ah kelunan éh lepah na'at inah ri', bara' rengah kelunan inah lepah ma'o jin néh nasek balei', ngan bara' tong kekat idok nah.

¹⁷ Uban neu' inah kenat irah nyohoo' Yésus kelap jin tana' réh.

¹⁸ Tovoo' Yésus menyun tong alut, kelunan éh nasek balei' lepah nah, menyat juk kivu Yésus.

¹⁹ Bang bé' Yésus buhaa' éh, ka' ha Yésus ngan néh, moléé' ke' tai lamin ko', ko' bara' ngan réh tong kekat jalan Tuhan pu'un nolong ke', ngan tong jalan Iah pepoléng penika Néh éh ja'au ngan ko', ha' Yésus ngan néh.

²⁰ La'ah moléé' lakei' inah lakau tipo tana' Dekapolis, ke' néh bara' tong jalan Yésus pika ngan peka'o éh nah. Béé kenin kekat kelunan menéng ha' néh bara' kenat.

Tong anak Yérus ngan tong redo ngamit seput Yésus

²¹ Moléé' Yésus kepéh papit saa' dipa baa' banget. Pinaa' kelunan tuai tavin Iah tong dirin baa' banget inah.

²² Pemung ngan réh sinah pu'un jah kelunan ngaran néh Yérus, éh pengeja'au tong lamin sebayang Yahudi. Hun néh na'at Yésus, iah ngejekuu' lep néh déhéé' gem Yésus.

²³ Iah menyat mu'un-mu'un ngan Yésus, ka' ha' néh, anak ké' éh redo éh si'ik ri', sakit éh tuai Ke' Ko' mapai ojoo' Ko' tong néh ke' néh ma'o jin kesakit néh, ke' néh omok murip da' ha' lakei ja'au Yérus nah.

²⁴ Pu'un Yésus tai kivu éh, ketem kelunan pinaa' nah péh tai kivu Yésus, avéé' réh pesikeu' lah tong jalan inah.

²⁵ Jin belah irah pinaa' nah, pu'un jah redo' éh pega' dahaa', jah poloo' duah ta'un tenéh éh sakit kenat.

²⁶ La'ah pinaa' mu'un kelunan éh nawan éh, ke' réh juk peka'o éh jin kesakit néh nah, bé' éh omok ma'o, bang jaa'-jaa' néh éh sakit sa'at-sa'at kepéh.

²⁷ Pu'un redo inah lepah menéng rengah Yésus, boh iah kivu Yésus jin likot néh pemung ngan kelunan pinaa' nah.

²⁸ Ka' kelem redo inah, Né' akeu' omok ngamit sapét tapak seput Néh nah, adang ké' omok ma'o jin kesakit ké' nah, kelem néh.

²⁹ Boh éh ngamit seput Yésus nah, tioo ma'o éh jin kesakit néh, tioo jian akam lem usah néh, bé' dahaa' néh pu'un pega' kepéh.

³⁰ Tovoo' inah néh Yésus jam pu'un akam Néh, inah éh, Iah nesen pu'un kegahang néh lepah musit jin Iah, tioo pupah éh pané ngan irah pinaa' nah ka', séé' ngamit seput Ké' ri', ha' Néh.

³¹ Ha' irah bakéh néh mipa éh, Pinaa' kelunan nyikeu' ke' nah ne', kineu' Ko' kenat ha', ha' réh ngan néh.

³² La'ah Yésus na'at tutuh Néh ke' néh jam séé' éh ngamit seput Néh nah.

³³ Kejam redo inah iah ma'o jin kesakit néh ri', riet éh medai, pelapah iah ngejekuu' lep néh déhéé gem Yésus, boh éh bara' ka', Akeu' ngamit seput Ko' nah rit, ha' néh.

³⁴ Ka' ha' Yésus ngan néh kepéh, O anak Ké', pengelan ko' éh lepah peka'o ke', moléé' ke' ngan pawah kenin ko', ma'o ke' jin kesakit ko', ha' néh.

³⁵ Lem Yésus too pané ngan redo inah kenat, tuai kelunan jin lamin Yérus bara' anak néh matai. Ka' ha' réh ngan Yérus, Anak ko' ri' de', matai éh, mai ke' petusah Guru nah lah, ha' réh.

³⁶ Bé' Yésus besau menéng ha' réh kenat, boh éh bara' ngan Yérus, ka' ha' néh, Mai ke' medai, jian ke' ngelan Akeu', ha' Néh.

³⁷ La'ah bé' Yésus buhaa' kelunan pinaa' tai kivu Iah, bang Péterus ngan Yakub ngan Yohanes éh padéé' Yakub nah awah éh tai kivu Iah.

³⁸ Hun réh avéé' tong lamin lakei ja'au nah, boh Yésus na'at kelunan pinaa' balah-balah ngahoo ngan mangaa' ngan nirau péh.

³⁹ Yésus masek tong lamin nah, ka' ha' néh ngan réh, Kineu' keh balah ngahoo ngan mangaa' kenat, anak iteu' bé' éh matai, pegen awah éh, ha' néh.

⁴⁰ Irah mala' muau éh, boh Iah nyohoo' kelunan pinaa' nah musit béé. Iah mihin tamen tinen anak inah, ngan réh teleu' bakéh néh éh kivu éh ri', tai tavin anak inah tong jalan néh pegen.

⁴¹ Boh Yésus ngamit ojoo' anak inah, ke' néh pané ngan néh, ka' ha' néh, Talita kum, ha' Yésus. Sin ha' inah, Anak redo betéé' ke'.

⁴² Tioo betéé' anak inah ngan lakau' sinah, urip néh jah poloo' duah ta'un. Kesioo' inah, Béé kenin kelunan pinaa' nah na'at éh.

⁴³ Matek bé' Yésus buhaa' réh bara' kekat éh neu' néh nah ngan kelunan éh jah. Ka' ha' néh, Jian keh alaa' ka'an ko' pakan anak ko' nah, ha' néh.