Biblia Todo Logo
Bìoball air-loidhne

- Sanasan -

IBRANI 13 - Rengah Jian


Jalan lu' ngepayoo' kenin Allah

1 Barei' keh pu'un pika pepika, jian keh petem maneu' kenat barei' éh tekep ngan kelunan éh pepadéé' dalem Tuhan.

2 Jian keh alaa' kelunan éh nyakai tong lamin keh ngan jian kenin. Pu'un kelunan éh alaa' réh kenat inah réh alaa' meliket, bang bé' réh jam éh meliket.

3 Mai keh ngelepan irah éh tong lamin tutup, pika réh, seleket hun néh usah ko' tengéé' éh tenutup réh. Pika irah éh keta, seleket hun néh usah ko' tengéé' éh keta.

4 Kelunan éh kawin jian éh mokoo' petem ngan redo néh kenat péh lakei' néh, jian éh mihau éh mu'un pekua' lu' mihau livah éh ma'an belih, jian lakei' inah ngan redo inah pu'un barék éh teneng belah rawah ke', mai roh magat irah éh jah ngan petuyang. Adang Tuhan, petuneng irah éh sa'at barék ngan petuyang.

5 Adang Tuhan ngukum irah éh sa'at barék ngan petuyang. Dalem kekat urip keh, mai keh kelih juk kaya', bang jian keh sukup kenin tong éh pu'un ngan keh. Uban ka' ha' Tuhan, Bé' Akeu' kejeraa' ka'au' tengéé', bé' Akeu' bet ke', ha' Néh.

6 Uban néh kenat jian uleu' makang kenin bara' pekua' ha' jin dalem surat Allah, ka' éh, Tuhan éh nolong ku', akeu' bé' medai. Ineu' éh omok neu' kelunan tong akeu' ha' Néh.

7 Jian keh seruh tong irah éh pengeja'au keh lepah, éh bara' ha' Tuhan ngan keh. Seruh keh tong urip réh ngan tong pematai réh, jian keh nyavuu' pengelan réh.

8 Yésus Kristus pu'un pekua' hun sahau, hun iteu' ngan avéé' kelebéé'-lebéé' néh.

9 Mai keh kejeraa' ha' tebaraa' éh tengéé' pepetat keh jin jalan éh teneng. Kenin lu' tekep gahang neu' penika Allah, bé' éh neu' lu' kivu kuraa' kuraa' sohoo' tong éh omok kinan lu'. Kelunan éh kivu sohoo' inah bé' inah omok ngegahang pengelan réh tong Tuhan.

10 Irah imam éh kereja' tong lamin Tuhan bé' réh omok kuman pengena' éh tong mija jalan pengena' lu'.

11 Imam éh pengeja'au kekat imam Yahudi mihin dahaa' ka'an tai lem Retek Matek Ni'ai dokoo' mena' éh ngan Tuhan jalan mega' penyala'. Bang usah ka'an inah, nolong réh saa' usit lamin inah.

12 Kenat péh Yésus matai saa' usit pagin leboo', dokoo' mohéé' irah éh anah nah jin penyala' réh palaa' dahaa' Néh tengéé'.

13 Uban néh kenat jian uleu' tai tavin Éh saa' usit lamin inah dokoo' lu' masek lem pengemenyaa' pemung ngan Néh.

14 Éh ke' néh kenat uban tong tana' bé' pu'un leboo' éh pelinguh jalan lu' mokoo'; uleu' to ke' pitah leboo' éh juk pu'un kepéh vam.

15 Uban néh kenat, jian uleu' ngelayau musit ha' mejing Tuhan, inah seleket pengena' lu' ngan Allah lem Yésus. Kekat ha' inah éh pengena' lu' hun lu' ngakun Iah éh Tuhan lu'.

16 Mai ngelepan maneu' jian ngan nolong-petolong, uban Penganeu' inah seleket pengena' éh pesenang kenin Allah.

17 Jian keh ngerera' tong irah éh majak keh ngan kivu sohoo' réh. Uban irah éh mihau kekat urip keh, uban irah juk bara' kekat kereja' réh ngan Allah, hun keh kivu sohoo' réh, irah omok kereja ngan jian kenin, Bang hun keh bé' kivu sohoo' réh irah péh kereja ngan bahat kenin ngan bé' omok mihau keh mu'un.

18 Jian keh ngelayau sebayang tong améé'. Bé' pu'un ineu'-ineu' éh pesala' kenin mé', uban ngelayau améé' juk maneu' kekat éh teneng.

19 Inah akeu' nyohoo' keh sebayang mu'un menyat Allah mukap jalan ke' ké' omok laho moléé' ngan keh kepéh.


Ga' ha' sebayang néh

20 Allah lepah Pebetéé' Tuhan lu' Yésus jin pematai Néh. Uban neu' pematai Néh inah, Iah hun iteu' omok Gembala éh pengeja'au kekat Gembala uleu; domba-domba Néh. Pematai Néh péh netap jajii' éh pelinguh éh naneu' Allah ngan uleu'.

21 Jian Allah inan pengepawah inah pesukup kekat pengejian Néh ngan keh dokoo' keh omok maneu' pengeloo' Néh. Dokoo' jin Yésus Kristus Allah maneu' kekat ineu' éh keneloo' Néh dalem urip lu'. Jian Kristus pu'un peparen avéé' kelebéé' lebéé' néh! Amin.


Pengega' surat néh

22 Akeu' menyat ka'ah kebit kenin menéng kekat ha' tena' éh jalan ngegahang kenin keh uban surat ké' iteu' bé' éh pelapah kebit.

23 La'ah akeu' keloo' keh jam Timotius pu'un kelepu réh jin lamin tutup. Hun néh laho avéé' siteu' da', boh ku' mihin éh tovoo' ké' tuai nepah ka'ah.

24 Akeu' bara' tabi' ngan kekat pengeja'au keh, kenat péh ngan kekat kelunan éh anah Tuhan. Kelunan Kristén éh jin tana' Italia, irah péh bara' tabi' ngan keh.

25 Jian Allah mena' pengejian ngan ka'ah bé'.

Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia

Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia

Bible Society of Malaysia
Lean sinn:



Sanasan