ÉH POLÉNG 22 - Rengah Jian

¹ La'ah meliket nah nojoo' baa' ja'au éh baa' éh purip kelunan, mening mu'un éh. Baa' inah musit jin nyun éh jalan Allah, ngan Anak Domba nah mokoo' ke' roh Raja.

² Baa' inah matong tai belu'an jalan ja'au tong leboo' inah. La'ah pipa dirin baa' inah, pu'un inan kayeu' buaa' éh purip kelunan, éh ngebuaa' jah poloo' duah koléé' lem jah taun, inah éh jah koléé' jah laséh. Ujung kayeu' inah jalan nawan kekat kelunan.

³ Bé' pu'un ineu'-ineu' éh kenukum Allah éh omok pu'un tong leboo' inah. Nyun éh jalan Allah menyun ke' néh Raja ngan Anak Domba pu'un lem leboo' inah, ngan irah éh sohoo' Néh omok réh seva' Éh.

⁴ Omok réh na'at da'in Néh, ngaran Néh pu'un tong sela' réh.

⁵ Bé' pu'un merem kepéh, bé' tiken pelita' ngan ada maten dau, uban Tuhan Allah tengéé' éh perema réh. Irah omok raja' pemung ngan Néh pelinguh-linguh.

Tong penyavéé' Yésus

⁶ Boh meliket inah bara' ka' ngan ké', Kekat ha' inah teneng éh omok ke' ngelan éh. La'ah Tuhan Allah éh mena' Sahéé' Néh ngan irah nabi Néh, Iah nyohoo' meliket Néh tai bara' ngan irah éh sohoo' Néh ke' réh omok jam tong kekat éh danii' juk pu'un kepéh, ha' néh.

⁷ La'ah ka' ha' Yésus, Menéng ke'. Akeu' juk tuai laho. Murung kenin kekat irah éh kivu kekat ha' lem surat iteu' éh bara' tong kekat éh juk avéé' kepéh, ha' Néh.

⁸ Akeu' Yohanes lepah menéng ngan na'at kekat iteu'. La'o ké' menéng ngan na'at éh, akeu' ngejekuu' lem ké' tong jumen meliket éh bara' kekat iteu' ngan ké'. Ké' juk seva' éh.

⁹ Bang ka' ha' néh ngan ké', Mai ke' maneu' kenat, akeu' péh kelunan éh sohoo' Tuhan barei' ka'au', ngan barei' kekat padéé' ko' éh bara' ha' Tuhan ngan kelunan, ngan barei' kekat irah éh jah éh kivu kekat ha' lem surat iteu'. Jian ke' seva' Allah, ha' néh.

¹⁰ La'ah ka' ha' néh kepéh, Kekat ha' lem surat iteu' éh bara' tong kekat éh juk avéé' kepéh vam, mai ke' melim éh, uban danii' mu'un hun kekat éh benara' néh inah pu'un kenat mu'un.

¹¹ Séé'-séé' éh maneu' barék sa'at, adang néh petem lem kesa'at néh inah, ngan séé'-séé' éh pu'un penyeruh éh segit, adang néh pu'un petem lem penyeruh néh éh segit kenat, séé'-séé' éh maneu' jian, tekep éh petem maneu' jian, ngan séé'-séé' éh pu'un ni'ai kenin, tekep éh petem ni'ai kenin, ha' néh.

¹² La'ah ka' ha' Yésus, Menéng ke'. Akeu' juk tuai laho, ngan pu'un Akeu' mena' oléé' ngan siget-siget usah kivu kekat penganeu' néh.

¹³ Akeu' éh bu'un ngan éh pengega', éh saa' tenah ngan éh Saa' murin; Akeu' éh Tuhan jin bu'un avéé' pengega'.

¹⁴ La'ah murung kenin irah éh poo' pakai réh ngan maneu' éh ni'ai. Irah omok kuman buaa' kayeu' éh mena' urip ngan kelunan, ngan omok masek lem leboo' inah jin usit néh.

¹⁵ Bang kelunan éh maneu' barék éh segit, irah éh pakai limu', irah éh petuyang, éh mematai kelunan, irah éh seva' butun ngan irah éh kenyo jian péh palaa' ha' kenat péh palaa' penganeu' néh, bé' réh omok masek lem leboo' inah.

¹⁶ Ka' ha' Néh kepéh, Akeu' Yésus nyohoo' meliket Ké' tai bara' kekat ha' iteu' ngan kekat sidang. Akeu' pu'un jin puku' Daud, Akeu' éh kenyuhai éh ngada teka rema, ha' Néh.

¹⁷ La'ah Sahéé' Ni'ai ngan redo éh juk kawin bara', Tuai ke', ha' néh. La'ah siget usah éh menéng éh jian éh bara', Tuai ke'. Séé'-séé' éh mapeu' batok tuai ke', alaa' baa' éh omok purip ke', pu'un Tuhan mena' éh awah ngan séé'-séé' éh keloo' alaa' éh.

Pengega' ha'

¹⁸ La'ah akeu' Yohanes akeu' bara' mu'un ngan siget-siget kelunan éh menéng kekat ha' lem surat iteu' éh bara' tong kekat éh juk avéé' kepéh vam, Mavaa' keh jian-jian, hun pu'un séé'-séé' pepit ha' éh jah ngan ha' iteu', Allah pepit kekat penusah éh benara' néh lem surat iteu' ngan réh kepéh.

¹⁹ Ngan hun pu'un séé'-séé' bet jelua' ha' jin kekat ha' lem surat iteu' éh bara' tong kekat éh juk pu'un, Allah bet tulat néh jin inan kayeu' éh omok purip kelunan pelinguh, kenat péh pu'un éh bet tulat néh jin leboo' ni'ai éh benara' Néh lem surat iteu' nah.

²⁰ La'ah Iah éh bara' tong kekat iteu' bara' mu'un, Akeu' juk tuai laho ha' Néh, Amin! Tuai ke', Tuhan Yésus.

²¹ Jian Tuhan Yésus mena' pengejian ngan siget usah éh anah Nah.