ÉH POLÉNG 21 - Rengah Jian

Langit maréng ngan tana' maréng

¹ La'ah ta'an ké' langit éh maréng ngan tana' éh maréng. Langit éh bu'un ngan tana' éh bu'un bé' pu'un La'ah, ngan baa' banget péh salai.

² La'ah ta'an ké' leboo' ni'ai, inah éh Yérusalem éh maréng éh tuai jin seruga jin Allah. Pu'un éh lepah petenup tenéh barei' redo éh lepah petenup usah néh ke' néh tai temeu' ngan lakei' néh.

³ Akeu' menéng ha' éh ja'au pané jin nyun inah, Hun iteu' Allah mokoo' pemung ngan kelunan! Iah pu'un murip pemung ngan réh ngan irah omok anah Nah. Allah tengéé' juk mokoo' pemung ngan réh ke' Néh omok Allah réh.

⁴ Iah juk mitit baa' maten réh. Pematai péh bé' pu'un la'ah, kenat péh kebesau, kangaa' ngan penyakit. Kekat éh jin sahau lepah salai béé.

⁵ La'ah Iah éh menyun tong nyun raja nah bara', Hun iteu' Akeu' maneu' kekat-kekat néh maréng, ha' Néh. La'ah ka' ha' néh ngan ké' kepéh, Jian ke' nyurat ha' ké' iteu', uban kekat ha' inah teneng éh ngan omok kelunan ngelan éh.

⁶ Ka' ha' Néh kepéh, hun iteu' kekat néh béé lepah ma'o! Akeu' éh bu'un ngan ga' péh, Akeu' éh Tuhan jin bu'un avéé' pengega'. Kelunan éh mapeu' batok Akeu' juk mena' baa' nesep éh nena' ké' awah ngan réh jin usit baa' éh mena' urip.

⁷ Séé'-séé' éh nyopéé' kekat arong kesa'at iah omok alaa' iteu' jin Akeu', Akeu' omok Allah néh ngan Iah omok Anak ké'.

⁸ Bang kekat kelunan éh medai, éh bé' ngelan, irah éh maneu' barék éh segit, irah éh mematai kelunan, irah éh petuyang, irah éh pakai limu', irah éh seva' butun ngan kekat irah éh kenyo, adang nebet lem bawang luten ngan éh letéé' éh pana mu'un éh mahang ngelayau, inah éh pematai éh keruwah koléé'.

Yérusalem Éh Maréng

⁹ La'ah jah meliket jin irah éh tujuu' nah éh pu'un tujuu' pigan penoo' neu' tujuu' arong penusah rai, tuai éh tavin akeu', ka' ha' néh ngan ké', Tuai ke', akeu' omok bara' redo Anak Domba ngan ko', ha' néh.

¹⁰ Sahéé' Ni'ai pepenoo' kenin ké' ngan meliket nah mihin ku' tai bau jah berusu' éh bau mu'un. Boh éh pepoléng Yérusalem ngan ké', leboo' ni'ai inah, éh tuai jin seruga jin Allah,

¹¹ ngan pu'un éh maren neu' pengaren Allah. Leboo' inah mening mu'un barei' bateu' éh jian éh ma'an belih, barei' bateu' jasper éh mening pesan barei' kristal.

¹² Leboo' inah pu'un pagin bau éh ja'au ngan jah poloo' duah usit néh, ngan pu'un jah poloo' duah meliket mavaa' siget usit inah. Tong siget usit inah senurat ngaran jah poloo' duah betah Israel.

¹³ Tutuh leboo' inah pu'un teleu' usit ja'au. Teleu éh saa' usit maten dau, teleu' éh saa' na'au' usit maten dau, teleu éh saa' kabéng usit maten dau ngan teleu' éh saa' oléé' maten dau.

¹⁴ Pagin leboo' inah nejek réh bau jah poloo' duah kekat bateu' pengereken néh. Tong siget bateu' inah senurat ngaran jah poloo' duah irah lawah Anak Domba.

¹⁵ La'ah meliket éh pané ngan ké' pu'un utang mas palaa' néh nguwa' ke' néh nguwa' leboo' inah ngan siget usit néh ngan pagin néh.

¹⁶ Leboo' inah layan néh besagi' pat, kebit ngan ke ja'au néh kua'. Meliket inah nguwa' leboo' inah palaa' utang mas inah: kebit néh 2,400 kilo meter, ke ja'au ngan kebau néh pekua awah ngan kebit néh.

¹⁷ Meliket inah péh nguwa' pagin leboo' inah; kebau néh 216 kaki: kivu kemalai kelunan nguwa'.

¹⁸ Pagin leboo' inah senuai jin bateu' jasper bang usah leboo' inah senuai jin mas éh mu'un, éh mening barei pengada.

¹⁹ Kekat bateu' pengereken pagin leboo' inah senuai jin kuraa'-kuraa' arong bateu' éh ma'an belih. Bateu' éh bu'un-bu'un inah éh bateu' jasper, éh keruwah bateu', nilam, éh keteleu' bateu' akik, éh ke pat néh bateu' jam rud

²⁰ éh kelemah bateu' oniks, éh ke nem bateu' Sardis, éh ketujuu' bateu' kuarja letéé' éh kayah néh bateu' beril, éh ke pien bateu' topas, éh ke poloo' néh bateu' kalsedoni, éh jah poloo' jah néh bateu' pirus ngan éh jah poloo' duah néh bateu' kesubung.

²¹ Jah poloo' duah kekat usit ja'au inah, jah poloo' duah mutiara tong néh. Jalan ja'au tong leboo' inah senuai jin mas éh mu'un éh mening barei' pengada.

²² La'ah bé' pu'un Umaa' Allah ta'an ké' tong leboo' inah, uban Allah éh pelapah ja'au penyukat jin ineu'-ineu' péh, ngan Anak Domba éh umaa' Allah.

²³ La'ah bé' pu'un maten dau ngan laséh tong leboo' inah, uban pengaren Allah éh perema tong leboo' inah ngan Anak Domba éh pelita' néh.

²⁴ Kekat arong kelunan omok lakau tong rema néh, ngan kekat raja tong tana' mihin pengekaya' tong leboo' inah.

²⁵ Usit leboo' inah pu'un pukap putung dau, bé' éh tenutup réh uban bé' pu'un merem sinah.

²⁶ Kekat pengaren ngan pengekaya' jin siget arong bengesa' juk nihin tai lem leboo' inah.

²⁷ Bang kekat ineu'-ineu' éh segit bé' omok masek lem leboo' inah, kenat péh kelunan éh maneu' kuraa'-kuraa' penganeu' éh sa'at éh pekenyaa' ngan kelunan éh kenyo. Bang kelunan éh pu'un ngaran senurat lem surat urip, éh anah Anak Domba éh omok masek lem leboo' inah.