ÉH POLÉNG 20 - Rengah Jian

Tong jah ibu ta'un

¹ La'ah ta'an ké' kepéh jah meliket tuai jin seruga, éh ngamit kusi' luvang tana' éh dilem nah ngan jah latai éh ja'au.

² Iah ngamit berungan inah, torok éh sahau inah éh Iblis iah ke' éh Sitan ngan ngejeret éh palaa' latai avéé' jah ibu taun kelebéé'.

³ Meliket nah bet éh lem luvang tana' éh dilem nah, ngan tutup éh ngan ngusii' éh ke' néh bé' omok ngelavo' kekat arong kelunan kepéh, avéé' jah ibu ta'un nah béé. La'o inah boh éh pelepu metok awah.

⁴ La'ah ta'an ké' kepéh kuraa'-kuraa' nyun raja ngan irah éh menyun tong néh. Irah inah pu'un penyukat omok petuneng kelunan. La'ah ta'an ké' kepéh sahéé' irah éh penatai réh uban réh bara' tong pengelan réh tong Yésus ngan nebaraa' tong ha' tebaraa' Allah. Bé' irah inah seva' ka'an ngan butun éh pekua' layan ka'an inah, ngan bé' réh pakai tada' ka'an inah tong sela' ngan tong ojoo' réh. Pu'un réh murip kepéh ngan pu'un réh pengeja'au pemung ngan Kristus avéé' jah ibu ta'un kelebéé'.

⁵ Murung kenin irah éh betéé' tong pengebetéé' éh bu'un, irah anah Allah. Pematai éh keruwah bé' pu'un penyukat bau réh. Irah omok imam Allah ngan imam Kristus. Irah omok pengeja'au pemung ngan Néh avéé' jah ibu taun kelebéé'.

⁶ Murung kenin, bahuu' mu'un irah éh betéé' tong pengebetéé' éh bu'un nah. Bé' patai éh keruwah koléé' pu'un penyukat bau réh, irah pu'un seva' Allah ngan Kristus, irah péh pengeja'au pemung ngan Néh avéé' jah ibu ta'un kelebéé'.

Tong Sitan Senopéé'

⁷ La'o jaka' jah ibu taun nah béé, Sitan nah pu'un kelepu jin jalan néh tenutup.

⁸ Ke' néh tai ngelavo' kuraa' arong kelunan pah tipo tana', inah éh Gog ngan Magog. Tovoo' inah pu'un Sitan mihin réh pemung ke' réh pekayau, pinaa' mu'un réh pekua' kekat napun tong baa' banget.

⁹ Irah purat tong tana' ngan pu'un tutuh retek pengokoo' kelunan éh anah Allah, ngan tutuh Yérusalem leboo' ja'au éh kemurung Tuhan. Bang pu'un luten tuhun jin langit kebéé kekat réh béé.

¹⁰ Boh Sitan éh ngelavo' réh nebet Tuhan lem bawang luten ngan éh letéé' éh pana mu'un. Éh jalan ka'an inah ngan nabi éh ngelavo' nah nebet Tuhan sahau. Irah béé teneng keta putung dau ngan putung merem avéé' pelinguh-linguh.

Tong pengega' Allah petuneng kelunan

¹¹ La'ah akeu' na'at jah nyun ja'au éh mebéng ngan Iah éh menyun tong néh. Langit ngan tana' piso jin jumen Néh, avéé' néh bé' poléng la'ah.

¹² La'ah ta'an ké' kekat kelunan éh lepah matai, irah éh ja'au ngan irah éh si'ik péh, kekat réh béé nekedéng saa' tenah nyun nah. La'ah pu'un réh mukap kekat surat, boh réh mukap jah surat kepéh, éh surat ngaran irah éh pu'un urip maréng. Kekat irah éh lepah matai petuneng néh kivu kekat penganeu' réh pekua' éh senurat lem kekat surat inah.

¹³ Boh baa' banget pepusit irah matai éh pu'un lem néh. Patai ngan jalan patai péh pepusit irah matai éh pu'un sinah. Kekat irah matai petuneng Néh kivu penganeu' réh.

¹⁴ Boh pematai ngan jalan patai nebet Néh lem bawang luten. Bawang luten nah inah éh patai éh keruwah koléé'.

¹⁵ Séé'-séé' éh bé' pu'un ngaran lem surat ngaran irah éh pu'un urip maréng pu'un Tuhan bet réh lem bawang luten nah.