ÉH POLÉNG 17 - Rengah Jian

Tong redo bavah éh kenejam kelunan béé

¹ Boh jah usah jin ketujuu' meliket éh pu'un tujuu' pigan nah, tuai tavin ku' ngan bara' ngan ké' ka' ha' néh, Tuai ke', boh akeu' bara' tong ukum éh tong redo petuyang, inah éh leboo' ja'au éh pu'un déhéé' baa' pinaa'.

² Irah raja' tong tana' petuyang ngan redo éh sa'at inah, ngan kelunan tong tana' barei' kelunan mavuk tovoo' redo éh petuyang inah maneu' penganeu' éh segit ngan réh.

³ La'ah Sahéé' Ni'ai pepenoo' kenin ké' ngan meliket inah mihin akeu' tai tana' linek. Sinah akeu' na'at jah redo menyun tong jah ka'an bala éh pu'un kuraa'-kuraa' surat éh ngesa'at ngaran Allah tong usah néh. Ka'an inah pu'un tujuu' ulun ngan jah poloo' uheng.

⁴ Redo inah pu'un pakai livah éh rep-rep ngan bala, ngan pinaa' arong mas ngan bateu' éh jian na'at, éh ma'an melih, ngan bateu' mutiara. Iah ngamit sawan mas éh penoo' neu' kuraa'-kuraa' arong éh sa'at ngan jelemih neu' barék néh éh sa'at.

⁵ Tong sela' néh pu'un ngaran, éh sin tong ngaran inah pelim, ka' éh, Babel ja'au éh tinen kekat kelunan éh petuyang ngan kekat irah éh maneu' ineu'-ineu' barék éh sa'at tong tana' iteu' kenat ngaran éh tong sela' néh.

⁶ La'ah ta'an ké' redo inah mavuk neu' dahaa' kelunan éh anah Allah, ngan dahaa' irah éh penatai réh uban réh tigéh kivu Yésus. Hun ké' na'at éh, béé kenin ké'.

⁷ Boh meliket nah neteng ku', Uban ineu' ke' béé kenin, akeu' juk bara' sin tong redo inah ngan sin tong ka'an éh mihin éh lakau nah, ngan sin tong ka'an éh pu'un tujuu' ulun ngan jah poloo' uheng nah.

⁸ Ka'an éh ta'an ko' nah, inah pu'un éh murip sahau bang hun iteu' bé' éh murip la'ah, bang danii' jaka' néh juk musit jin luvang éh dilem, ke' Tuhan kebéé éh pelinguh. La'ah kekat kelunan tong tana' éh bé' pu'un ngaran senurat lem surat urip bé' jak tana' iteu' senuai, adang irah inah béé kenin na'at ka'an inah. Ka'an inah sahau pu'un éh murip, hun iteu' bé' éh murip la'ah, bang pu'un éh juk poléng kepéh.

⁹ Iteu' tekep seneruh palaa' pengejam éh dilem. Tujuu' ulun inah, inah éh tujuu' tokong éh jalan redo inah menyun, tujuu' ulun inah kepéh inah éh tujuu' raja.

¹⁰ Lemah usah raja jin belah irah inah lepah matai, pu'un jah éh raja keto, ngan jah kepéh to bé' jak tuai. Hun iah pu'un tuai metok awah éh maneu' kereja' néh raja.

¹¹ La'ah ka'an éh murip sahau nah, bang éh bé' murip hun iteu', inah éh kayah raja nah éh pu'un ngan irah tujuu' nah, ngan iah danii juk kenebéé' Tuhan. Ha néh.

¹² Ha' meliket nah kepéh, la'ah jah poloo' uheng éh ta'an ko' nah, inah éh jah poloo' raja' éh to bé' jak maneu' kereja' néh raja, bang pu'un Tuhan kejeraa' réh pu'un penyukat ke' réh omok raja' pemung ngan ka'an inah kelebéé' jah jam.

¹³ Jah poloo' raja inah pu'un pekua' kenin, ngan pu'un réh mena' pengegahang réh ngan penyukat réh ngan ka'an inah.

¹⁴ Pu'un réh ngelawan Anak Domba nah, bang Anak Domba nah pemung ngan irah éh tenebai Néh ngan kevéléé' Néh, irah éh tigéh, pu'un réh nyopéé' réh teleu' raja inah, uban Anak Domba nah éh Pengeja'au bau kekat pengeja'au, ngan Raja bau kekat raja' péh, ha' néh.

¹⁵ La'ah ha' meliket nah ngan ké' kepéh, baa' éh ta'an ko' nah, éh jalan redo éh petuyang nah menyun, inah éh kuraa'-kuraa' leboo', kelunan, bengesa' ngan arong ha'.

¹⁶ La'ah jah poloo' uheng éh ta'an ko' ngan ka'an éh ta'an ko' nah, adang réh juk leko mu'un tong redo éh petuyang nah, ngan alaa' kekat pakai néh ngan bet usah néh ugai awah, adang réh pu'un kuman sin néh ngan motong éh lem luten.

¹⁷ Éh ke' néh kenat uban Allah lepah ngusii' kenin réh dokoo' pesukup ineu' éh pengeloo' Néh. Pu'un Allah maneu' réh kua' kenin ke' réh mena' penyukat réh ngan ka'an inah, ke' néh omok raja pah avéé' ineu' éh lepah benara' Allah pu'un kenat mu'un.

¹⁸ Ka' ha' néh kepéh, La'ah redo éh ta'an ko' nah, inah éh leboo' ja'au éh kenajung réh éh pu'un penyukat bau kekat raja tong tana', ha' néh.