ÉH POLÉNG 15 - Rengah Jian

Meliket ngan penusah éh pengega'

¹ La'ah ta'an ké' tong langit jah telana' éh tejeu' ngan éh ngebéé' kenin. Pu'un tujuu', meliket éh kereja' pesavéé' tujuu' penusah éh pengega' bau tana' palaa' tujuu' penusah inah Allah ngega' ukum Néh.

² Ta'an ké' barei' baa' banget éh mening ngan barei' pekulup ngan luten. La'ah ta'an ké' kepéh irah éh lepah menang bau ka'an éh musit jin baa' ngan butun éh pekua' layan ka'an inah, ngan bau iah éh bara' ngaran néh palaa' lubun nah. Pu'un réh nekedéng déhéé' baa' éh mening nah, ngan pu'un irah ngamit sapé' éh nena' Allah ngan réh.

³ Pu'un réh nyanyi ha' nyanyi Musa, kelunan éh sohoo' Allah, ngan ha' nyanyi Anak Domba, ka' ha' réh, O Tuhan, Tuhan Allah éh pelapah ja'au penyukat jin ineu'-ineu' péh, matek jian ngan matek ja'au kekat penganeu' Ko'. Ka'au' éh Raja' bau kekat arong kelunan, kekat jalan Ko' pu'un teneng ngan pu'un pejek.

⁴ O Tuhan, tekep kekat kelunan leko maneu' sa'at tong Ke', jian réh peparen ngaran Ko', uban Ka'au' awah éh pu'un ni'ai. Kekat kelunan pah tipo tana' juk tuai seva' Ke', uban kekat penganeu' Ko' éh teneng kejam réh béé-béé, ha' réh.

⁵ La'o inah ta'an ké' umaa' Allah tong seruga pu'un pukap inah éh lamin jalan Allah mokoo' sahau rai.

⁶ La'ah tujuu' meliket éh ngamit tujuu' arong penusah nah musit jin umaa' Allah irah pakai livah kapan éh ni'ai ngan ngada. Tong kebah réh peseviget naneu' mas.

⁷ Jah usah jin pat penyuai éh murip inah mena' ngan tujuu' meliket inah, tujuu' pigan mas éh penoo' neu' kemerek Allah, inah éh Allah éh murip pelinguh-linguh.

⁸ Umaa' Allah inah penoo' neu' sap jin pengaren ngan penyukat Allah, ngan bé' pu'un séé'-séé' péh omok tai lem Umaa' Allah inah hun tujuu' penusah éh kamit tujuu' meliket nah bé' jak ma'o.