ÉH POLÉNG 14 - Rengah Jian

Anak Domba ngan Irah éh anah Nah

¹ La'ah pu'un ku' na'at kepéh ngan ta'an ké' Anak Domba nah nekedéng tong Tokong Sion, inah éh Yérusalem éh tong seruga. La'ah pu'un jah ato pat poloo' pat ibu kelunan, iteu' kelunan éh pu'un ngaran Anak Domba ngan ngaran Tamen Néh tong sela' réh éh pu'un pemung ngan Néh sinah.

² La'ah nenéng ké' ha' jin seruga éh barei' ha' o'ong éh ja'au barei' ha' lengedo éh ja'au. Ha' éh nenéng ké' nah barei' ha' sapé' éh netit réh.

³ Tong saa' lemah nyun inah, pat penyuai éh murip inah, ngan irah pengeja'au inah, nekedéng 144,000 kelunan inah. Irah nyanyi jah nyanyi maréng éh bé' omok kelunan éh jah nyanyi éh. Irah inah awah éh lepah alaa' urip jin Allah.

⁴ Irah bé' pemung pegen ngan redo, ke' réh mihau usah réh ni'ai. Irah kivu Anak Domba semah awah éh tai. Jin belah kekat kelunan, irah inah éh lepah alaa' urip jin Allah. Irah anah Allah ngan Anak Domba inah. Uban irah néh éh barei' ajau éh bu'un-bu'un éh nena' ngan Allah.

⁵ Bé' irah pané kenyo, bé' pu'un ineu'-ineu' kesa'at réh.

Tong teleu' meliket

⁶ La'ah akeu' na'at jah meliket kepéh marang bau tong sawang. Iah mihin Rengah Jian éh pelinguh ke' néh perengah éh ngan kelunan tong tana'; inah ngan kekat bengesa', pohoo', arong ha' ngan leboo'.

⁷ Meliket inah pané ngan ja'au ha' Jian keh seva' Allah ngan ngajung Iah uban Néh Ja'au! Hun iteu' avéé' jaka' Allah petuneng kelunan. Jian keh tukep seva' Iah éh suai langit, tana', baa' banget, ngan kekat usit baa'!

⁸ Jin la'o meliket éh bu'un nah piso, avéé' meliket éh keruwah éh bara' Leboo' Babel lepah Sopéé'. Leboo' ja'au inah lepah sopéé'! Penganeu' éh segit tong Leboo' Babel nah nasa' kekat bengesa', barei baa' buaa' agun éh maneu' réh mavuk.

⁹ Jin la'o rawah meliket inah piso avéé' kepéh meliket éh ke teleu' éh bara', séé'-séé' éh seva' ka'an inah ngan butun néh ngan éh alaa' tada' ka'an inah tong sela' ngan ojoo' réh,

¹⁰ irah mesep baa' buaa' agun kemerek Allah, baa' buaa' agun éh mulun éh nujek lem sawan kemerek Néh! Kekat irah inah juk teneng pengeketa dalem luten ngan éh letéé' éh pana mu'un tong jumen kekat meliket ni'ai ngan Anak Domba.

¹¹ Sap luten éh peketa réh nebului ngelayau avéé' pelinguh-linguh. Irah éh seva' ka'an inah, ngan butun néh, kenat péh irah éh pu'un tada' ngaran ka'an inah adang réh keta mu'un-mu'un putung dau ngan putung merem.

¹² Inah maneu' irah éh anah Allah éh tigéh kivu sohoo' Néh ngan tigéh tong Yésus tekep kebit kenin.

¹³ La'ah nenéng ké' jah ha' jin seruga éh bara', Jian ke' nyurat ha' ké' iteu', Jin la'o iteu' murung kenin kelunan éh matai lem réh maneu' kereja' Tuhan, ha' néh. Ka' ha' Sahéé' Ni'ai mipa éh, Mu'un, adang réh murung, uban réh ma'o jin kereja' réh bahat, kekat penganeu' réh pu'un oléé' ngan réh kepéh, ha' néh.

Ajau tong tana'

¹⁴ La'ah pu'un ku' na'at kepéh ngan ta'an ké' jah avun éh mebéng. Pu'un jah kelunan menyun tong avun inah, layan néh barei' kelunan mu'un, pu'un jah tapong mas tong ulun Néh, ngan po'é tebikong éh nyahit kenamit Néh.

¹⁵ La'ah pu'un jah meliket kepéh musit jin Umaa' Allah pané ngan ja'au ha' ngan Iah éh menyun tong avun nah, ka' ha' néh alaa' po'é Ko' ngan nebu'un kereja' majau, uban jaka' ajau lepah avéé', ajau tong tana' lepah mesak ngan lepah avéé' jaka' néh dokoo' majau!

¹⁶ Boh Iah éh menyun bau avun nah niwet po'é Néh tong tana' ngan ajau tong tana' tenipun Néh.

¹⁷ La'o inah ta'an ké' jah meliket kepéh musit jin Umaa' Allah éh tong seruga, ngan iah péh pu'un po'é éh tebikong éh nyahit.

¹⁸ La'ah tuai jah meliket kepéh éh mihau luten tong jalan réh motong kemenyan ngan Tuhan. Pu'un éh pané ngan ja'au ha' ngan meliket éh pu'un po'é tebikong éh nyahit nah, ka' ha' néh, pakai po'é ke' alaa' buaa' agun jin pulah tong tana' uban néh lepah mesak tenéh, ha' néh.

¹⁹ Boh meliket nah niwet po'é néh tong tana' ngan alaa' buaa' agun jin inan néh ngan ngaléng éh tong jalan meték buaa' agun, inah éh kemerek Allah.

²⁰ Kekat buaa' agun nah neték réh saa' usit leboo' inah ngan jin jalan meték agun inah nguhat dahaa' barei tovoo' baa' ja'au, kejuu' néh barei jin i'ot jah atong baa' ja'au pah avéé' long néh, kedilem néh ngioo'-ngioo' nem kaki.