ÉH POLÉNG 13 - Rengah Jian

Duah usah ka'an éh musit jin baa' banget.

¹ La'ah ta'an ké' jah ka'an éh musit jin baa' banget ka'an inah pu'un jah poloo' uheng néh ngan tujuu' ulun néh, pu'un tapong tong siget uheng néh ngan tong siget ulun néh pu'un surat éh ngesa'at Allah.

² Ka'an inah ta'an ké' barei' layan bilung, bang gem néh barei' gem buang, ngan ujun néh barei' ujun singa'. La'ah berungan nah mena' ngan ka'an inah pengegahang néh, ngan néh, ngan penyukat néh éh ja'au.

³ La'ah jah jin belah ulun ka'an inah, pu'un ila uban suhat éh ja'au mu'un, bang suhat néh inah lepah malit. Kekat kelunan pah tipo tana' béé kenin na'at éh, ngan irah kivu ka'an inah.

⁴ Kekat kelunan seva' berungan nah uban iah mena' penyukat néh ngan ka'an inah. Pu'un réh seva' ka'an inah kepéh, pu'un réh bara', Bé' pu'un ka'an éh jah éh jian barei' ka'an iteu'. Bé' pu'un séé' péh omok ngelawan éh, ha' réh.

⁵ Tuhan kejeraa' ka'an inah ngesa'at Allah ngan kejeraa' éh pu'un penyukat avéé' pat poloo' duah laséh kelebéé'.

⁶ Ka'an inah ngesa'at Allah, ngaran Allah, retek okoo' Allah, ngan kekat éh pu'un tong seruga.

⁷ Pu'un Tuhan kejeraa' ka'an inah ngelawan irah éh anah Allah ngan nyopéé' réh. Ngan pu'un penyukat nena' ngan néh bau siget pohoo', leboo', arong ha' ngan bengesa'.

⁸ Kekat kelunan éh murip tong tana' seva' ka'an inah, bang irah éh ngaran réh senurat lem surat irah éh alaa' urip bé' seva' éh. Kekat ngaran inah pu'un senurat tenéh bé' jak tana' iteu' senuai, ngan surat inah pu'un ngan Anak Domba éh lepah penatai.

⁹ Hun keh pu'un kelingen omok menéng, jian keh menéng éh mu'un.

¹⁰ Séé'-séé' éh tekep narau réh, adang iah pu'un narau réh kenat. Séé'-séé' éh tekep penatai réh palaa' po'é adang néh penatai réh kenat. Uban néh kenat irah éh anah Allah tekep ngeretep, kebit kenin ngan tigéh tong Kristus.

¹¹ La'o inah ta'an ké' jah ka'an éh jah kepéh éh musit jin lem tana'. Ka'an inah pu'un duah uheng barei' uheng anak domba, bang ha' néh barei' ha' berungan.

¹² Ka'an iteu' alaa' penyukat ja'au ka'an éh bu'un nah tong ta'an néh. Kekat kelunan tong tana' nugun dokoo' seva' ka'an éh bu'un nah éh suhat néh ja'au nah lepah malit.

¹³ Ka'an éh keruwah iteu' maneu' kuraa'-kuraa' telana' éh tejeu'. Tong jumen kekat kelunan, luten petuhun néh jin langit tai tana'.

¹⁴ Allah kejeraa', ka'an éh keruwah iteu' dokoo' maneu' kuraa'-kuraa' telana' tong jumen ka'an éh bu'un. Palaa' kekat telana' inah, ka'an éh keruwah iteu' ngelavo' kekat kelunan éh murip tong tana' ngan nyohoo' réh maneu' butun dokoo' seva' ka'an éh bu'un éh lepah suhat neu' po'é, bang to ke' murip.

¹⁵ Ka'an éh keruwah iteu' omok mena' laset ngan butun inah, pah avéé' butun inah omok pané ngan mematai kekat irah éh bé' keloo' seva' éh.

¹⁶ Ka'an éh keruwah iteu' mugun kekat kelunan: kelunan kemalai ngan kelunan ja'au, kelunan kaya' ngan kelunan kari, ripen ngan kelunan pelepu, dokoo' alaa' tada' tong ojoo' saa' na'au' ngan tong sela' réh.

¹⁷ Bé' pu'un séé'-séé' omok melih ngan pebelih, hun néh bé' pu'un tada' inah, inah éh ngaran ka'an inah ke' tengéé' hun néh bé' kenat lubun éh ngeliwah ngaran ka'an inah.

¹⁸ Tong iteu' tekep pakai pengejam. Séé'-séé' éh jam omok éh jam sin tong lubun ka'an inah, uban lubun inah ngeliwah ngaran kelunan. Lubun inah 666.