ÉH POLÉNG 12 - Rengah Jian

Tong jah redo ngan berungan

¹ Boh pu'un jah telana' tong langit éh ja'au éh ngebéé kenin kelunan. Jah éh pakai néh maten dau ngan laséh ra' gem néh, Iah pakai jah tapong éh pu'un jah poloo' duah kenyuhai tong ulun néh.

² Danii' néh juk nganak, ngan neu' kesakit néh juk nganak, pu'un éh ngeradau.

³ Boh jah telana' kepéh pu'un tong Langit. Pu'un jah berungan bala éh ja'au mu'un, pu'un tujuu' ulun néh ngan jah poloo' uheng néh. Pu'un tapong tong siget ulun néh.

⁴ Palaa' iko néh iah mega' jah tulat jin teleu' tulat kenyuhai tong langit ke' néh ngelohoo' éh tong tana'. Boh éh nekedéng saa' tenah redo éh juk nganak nah ke' néh kuman anak néh hun néh pelohoo'.

⁵ Boh redo inah nganak jah anak lakei' éh juk pengeja'au éh pu'un sekot daven ngan éh pu'un penyukat bau kekat pohoo' kelunan. Bang anak inah senagem ngan nihin tai ngan Allah éh menyun tong nyun-raja'.

⁶ Redo inah kelap tai tana' linek, pu'un Allah petenup jalan néh sinah, sinah iah mokoo' lem nihau Néh avéé' jah ibu duah ato nem poloo' dau kelebéé'.

⁷ La'ah pu'un pekayau tong seruga. Mikhael ngan irah meliket néh pekayau ngelawan berungan inah. Berungan inah tenolong irah meliket néh ngelawan Mikhael.

⁸ Bang berungan inah pu'un senopéé'. Berungan inah ngan irah meliket néh bé' omok mokoo' tong seruga kepéh.

⁹ Berungan ja'au nah nebet jin seruga. Inah éh torok éh sahau éh ngaran néh Iblis ngan Sitan, éh ngelavo' kekat kelunan pah tipo tana'. Iah pu'un nebet tai tana' pemung ngan kekat meliket néh.

¹⁰ Boh akeu' menéng jah ha' éh ja'au tong seruga éh bara' ka', Hun iteu' jalan Allah purip kelunan lepah avéé'. Hun iteu' Allah pu'un pepoléng penyukat Néh, penyukat Néh Raja' bau kekat ineu'-ineu' péh. Hun iteu' Kristus éh kevéléé' Tuhan ke' Néh Raja', Iah péh pu'un pepoléng penyukat Néh. Uban Sitan éh pesala' padéé' lu' tong jumen Allah putung dau ngan putung merem, lepah nebet Tuhan jin seruga.

¹¹ Kekat padéé' lu' lepah nyopéé' éh neu' dahaa' Anak Domba ngan neu' ha' tebaraa' Tuhan éh benara' réh avéé' réh mena' urip réh matai ngan jian kenin.

¹² Uban néh kenat jian kekat ka'ah éh murip tong seruga, pu'un murung Bang tusah mu'un ngan kekat ka'ah éh pu'un tong tana' ngan tong baa' banget péh. Uban Sitan lepah tai ngan keh, merek mu'un-mu'un éh, uban kejam néh bé' iah omok lebéé' kepéh, ha' néh.

¹³ Hun berungan nah jam iah nebet Tuhan tong tana', pu'un éh pitah redo éh nganak anak lakei' nah.

¹⁴ Pu'un Tuhan mena' duah pawit juhit ja'au éh barei' juhit pelakei' ngan redo inah ke' néh omok marang tai tana' linek, sinah éh pu'un lem nihau Tuhan avéé' teleu' ta'un ngan memutui jah ta'un kepéh, ngan torok inah bé' éh omok maneu' éh.

¹⁵ La'ah berungan nah maneu' baa' musit jin ujun néh barei' baa' ja'au, ke' néh juk pepatong redo inah.

¹⁶ Bang tana' nolong redo inah, pu'un éh bila' ke' néh alaa' baa' éh musit jin ujun Berungan nah.

¹⁷ Berungan inah merek mu'un ngan redo inah pah avéé' iah ngayau kekat irah éh anak ayam redo inah. Inah éh kekat irah éh bé' putui pengelan bang éh ngelan tong Yésus, éh mihau kekat sohoo' Allah.

¹⁸ La'ah berungan nah nekedéng tong dirin baa' banget.