2 TIMOTIUS 2 - Rengah Jian

Seradu Kristus éh tigéh

¹ Timotius anak ké'! Jian ke' gahang neu' penika Néh éh pu'un ngan lu', uban lu' pemung ngan Kristus Yésus.

² La'ah kekat tebaraa' éh nenéng ko' éh benara' ké' tong jumen kelunan pinaa' rai, jian ke' bara' éh kepéh ngan kelunan éh tigéh, ke' réh omok bara' éh ngan kelunan éh jah kepéh.

³ Jian ke' ngeretep ngan kebit kenin pemung ngan ké' dalem pengeketa, barei' seradu Kristus Yésus éh tigéh.

⁴ Kelunan seradu adang néh ngepayoo' kenin pengeja'au néh, bé' iah bubuu' seruh maneu' kereja' kelunan éh jah.

⁵ Kenat péh kelunan éh petesi tong inga' bé' réh omok alaa' tapong hun réh bé' kivu adet.

⁶ La'ah kelunan éh mutau nérék, tekep iah éh tenah alaa' buaa' jin térék néh.

⁷ Jian ke' seruh tong kekat ha' ké' inah, uban Tuhan omok nolong ke' nesen éh.

⁸ Ko' nesen éh iteu', barei' ha' éh benara' lem Rengah Jian éh benara' ké', Yésus Kristus lepah pebetéé Tamen Néh jin patai ngan Iah jin puku' Daud.

⁹ La'ah uban akeu' pu'un bara' tong Rengah Jian nah, inah akeu' jam keta ngan kejeret réh tong lamin tutup, pekua' barei' kelunan éh maneu' penyala' mu'un. Bang ha' tebaraa' Tuhan bé' éh omok kejeret ngan tenutup réh.

¹⁰ Kenat péh akeu' ngeretep dalem kekat pengeketa ké', dokoo' ké' omok nolong kelunan éh kevéléé' Allah, dokoo' irah péh omok alaa' urip dalem Kristus Yésus, pemung ngan pengaren Néh éh pu'un pelinguh.

¹¹ La'ah teneng mu'un ha' iteu' éh bara' ka', Hun uleu' matai pemung ngan Yésus, omok uleu' murip pemung ngan Néh kepéh.

¹² Hun uleu' omok ngeretep dalem pengeketa, omok lu' pengeja'au pemung ngan Néh kepéh. Hun lu' ngaken bara' lu' bé' jam Iah, Iah péh ngaken kepéh bara' Iah bé' jam uleu'.

¹³ Na' péh lu' bé' tigéh, Iah petem tigéh, uban bé' Iah omok bé' pu'un tigéh, uban bé' Iah omok maneu' ineu'-ineu' éh tengéé' jin pohoo' kenin Néh.

Kelunan kereja' éh omok Senepah

¹⁴ Jian ke' petesen kekat irah lem nihau ko' tong ha' ké' iteu', ngan pané mu'un-mu'un ngan réh barei' tong jumen Allah mu'un, mai réh pepaneu' tong sin ateng ha' inah bé' pu'un gunah néh, bang éh nasa' pengelan kelunan éh menéng éh awah.

¹⁵ Jian ke' mekat pitah jalan éh dokoo' Tuhan omok bara' ke' pu'un jian, barei' kelunan éh bé' menyaa' tong kekat penganeu' néh. Jian ke' bara' ha' tebaraa' éh teneng jin Allah ngan teneng mu'un.

¹⁶ Piso ke' jin ha' tosok kelunan éh bé' pu'un gunah ngan éh ngesa'at Allah. Ha' tosok éh kenat maneu' kelunan makin juu' jin Allah.

¹⁷ Ha' tebaraa' réh pu'un éh barei' okoo' baha' éh memeseu' ngan éh ngeborok ketem lo'ong usah réh. Pu'un duah guru kenat, Himenius rawah Piletus.

¹⁸ Pu'un réh netat jin ha' tebaraa' éh teneng, ngan hun iteu' irah mihin kuraa' kelunan petat jin pengelan réh tong Kristus. Uban réh bara', pengebetéé kelunan jin pematai lepah pu'un tenéh.

¹⁹ Bang lihei' éh neu' Allah, pu'un éh reken mu'un, bé' éh omok gusii', ngan Tuhan pu'un nyurat tong néh ka', Tuhan jam kekat kelunan éh anah Nah, ha' néh, ngan ha' néh kepéh, séé'-séé' kelunan éh bara' pengelan néh pu'un tong Tuhan, jian iah ngejuu' usah néh jin kekat kesa'at, ha' néh.

²⁰ La'ah tong umaa' ja'au pu'un pinaa' arong pigan penakai réh, pu'un pigan mat ngan pirek, pu'un éh lalit, pu'un éh kuren tana' péh, pu'un jelua' éh mejat penakai réh, pu'un jelua' kepéh éh ngelayau penakai réh.

²¹ Uban néh kenat séé'-séé' éh peti'ai usah néh jin kekat éh sa'at iah éh omok penakai Tuhan maneu' kereja' éh jian, uban néh pu'un gunah ngan pengeja'au néh ke' néh omok pakai éh maneu' ineu'-ineu' kereja' éh jian.

²² Bang jian ke' ngejuu' usah ko' jin kekat pengagat kelunan lemanai, mekat kenin kivu pengeloo' Allah, maneu' néh kekat inah pemung ngan irah éh menyat Tuhan nolong réh ngan kenin éh ni'ai.

²³ Bang mai keh pemung ngan kelunan éh suwok kenin, éh pesakat tong kekat éh bé' pu'un gunah, uban ka'au' jam irah éh maneu' kenat pepit réh paneu' kepéh.

²⁴ Kelunan éh sohoo' Tuhan bé' tekep éh paneu', bang jian iah pika ngan nolong kekat kelunan, nebaraa' ngan petena' réh jian-jian ngan kebit kenin.

²⁵ Hun néh peteneng irah éh ngelawan éh, jian éh peteneng réh ngan dawai kenin, mai éh maneu' éh ngan kejaha kenin. Barang Allah omok ngusii' kenin réh ke' réh omok pekoléé' kenin ngan nesen tong kekat ha' tebaraa' éh teneng.

²⁶ Boh réh omok nesen kesa'at réh ngan kelap jin viheu' Sitan éh mugun réh maneu' éh kivu pengeloo' néh.