2 KORINTUS 9 - Rengah Jian

Petenup pengena' ngan irah kelunan kristén

¹ La'ah bé' tiken ke' ku' nyurat bara' tong pengena' keh dokoo' keh nolong kelunan éh anah Allah tong tana' Yudea.

² Akeu' jam adang ka'ah juk nolong réh, ngan pu'un ku' mejing ka'ah ngan irah tong tana' Makedonia. Ka' ha' ké' ngan réh, Irah padéé' lu' tong tana' Akhaya pu'un réh lepah petenup jah ta'un tenéh ke' réh mena' éh, ha' ké' ngan réh. Hun irah jam ka'ah gahang kenin maneu' kenat, irah péh gusii' kenin juk nolong kepéh.

³ La'ah hun iteu' kepéh inah akeu' nyohoo' kekat padéé' lu' iteu' tai ngan ka'ah, dai ha' ké' mejing keh rai barei' ha' kenyo awah. Bang akeu' jam adang ka'ah petenup juk nolong pekua' ha' ké' bara' keh nah.

⁴ Uban hun pu'un kelunan jin Makedonia kivu akeu' tai ka'ah, boh réh jam bé' jak keh petenup mena' ineu'-ineu', menyaa' mu'un améé', makin péh ka'ah, uban améé' ngelan adang keh pu'un mena' éh tenéh.

⁵ Kenat péh akeu' seruh tekep akeu' nyohoo' kekat padéé' lu' iteu' tai tenah, dokoo' keh omok petenup pengena' keh éh juk nena' keh rai. Hun mah ku' avéé' kepéh, boh éh pu'un petenup keh tenéh, boh éh poléng ka'ah mena' éh uban keh keloo', bé' éh uban sohoo' kelunan awah.

⁶ Seruh keh, kelunan éh mulah tulin pulah éh kerat, adang néh majau éh kerat kepéh. Bang kelunan éh mulah pinaa', adang néh majau éh pinaa' kepéh.

⁷ Jian siget-siget usah mena' kivu pengeloo' kenin néh, mai éh nyihun éh, ngan mai éh mena' éh uban sohoo' kelunan awah, uban Allah murung kenin ngan kelunan éh mena' éh ngan jian kenin.

⁸ La'ah omok Allah mena' ngan keh pelapah ja'au jin pengekurang keh, dokoo' néh omok sukup tong usah keh tengéé', ngan pu'un éh mutaa' kepéh dokoo' keh nolong dalem kereja' Tuhan.

⁹ Barei' ha' lem surat Allah ka', Ja'au mu'un pengena' Néh ngan kelunan kari, penika Néh pu'un pelinguh.

¹⁰ La'ah Allah éh mena' parai ngan kelunan ke' néh omok mulah éh, kenat péh Éh mena' éh sukup kinan réh kepéh, omok Iah mena' parai éh sukup ngan keh ngan omok Éh maneu' parai inah nyekaa', dokoo' ja'au ajau néh kepéh jin éh pengena' keh.

¹¹ Omok Iah maneu' ka'ah sukup kaya' dokoo' keh ngelayau pu'un palaa' omok mena' ngan Néh kepéh, dokoo' kelunan pinaa' omok bara' jian kenin ngan Allah uban pengena' keh éh tenulat améé'.

¹² Uban hun keh mena' éh kenat, bé' éh jah pesukup pengekurang kelunan éh anah Tuhan awah, bang pu'un éh mihin kelunan pinaa' bara' jian kenin ngan Allah kepéh.

¹³ Uban neu' pengena' keh kenat, inah éh pepoléng pengereken keh dalem pengelan keh, inah mihin kelunan pinaa' peparen Allah uban ka'ah maneu' pekua' éh kenakun keh tong Rengah Jian Kristus, neu' penika keh mena' ngan irah ngan mena' ngan kelunan éh jah kepéh.

¹⁴ La'ah adang réh pu'un sebayang ka'ah ngan murung keh mu'un uban penika Allah ngan keh éh pelapah ja'au jin ineu'-ineu' éh omok kejam lu'.

¹⁵ Jian uleu' bara' jian kenin ngan Allah uban pengena' Néh ngan uleu' éh jian mu'un-mu'un.