2 KORINTUS 6 - Rengah Jian

¹ Améé' kelunan éh kereja' pemung ngan Tuhan, naten mé' nyohoo' keh uban keh lepah jam tong penika Tuhan mai keh si'ik kenin tong néh.

² Uban ka' ha' Néh, Uban ka' ha' Néh, Hun jaka' kenin ké' juk purip, pu'un ku' menéng ha' ko' ngan tong dau pengelepu, pu'un ku' nolong ka'au'. Nesen éh hun iteu' néh jaka' penika Néh, ngan hun iteu' néh dau ka'ah alaa' urip.

³ Bé' améé' mapat jalan ngan kelunan séé'-séé' péh, ngan bé' mé' keloo' maneu' ineu'-ineu' éh jalan kelunan omok pesala' kereja' mé' ngan Tuhan.

⁴ Bang pu'un mé' maneu' kekat kereja' mé' barei' éh tekep ngan kelunan éh sohoo' Tuhan, pu'un mé' ngeretep lem penusah ngan kekat pengeketa, kenat péh hun mé' besau, pu'un mé' ngeretep ngan kebit kenin.

⁵ Pu'un réh mipok ngan bet mé' tong lamin tutup, ngan pu'un kelunan pinaa' pebetéé' kenin réh merek juk maneu' améé', pu'un mé' kereja' mutau, ngan pinaa' koléé' mé' bé' omok pegen, ngan bé' pu'un penguman.

⁶ Bang dalem kekat inah pu'un mé' pekelenaa' mé' adang améé' kelunan éh sohoo' Tuhan. Améé' pekelenaa' éh kenat neu' kekat barék mé' pu'un jian, ngan dawai kenin jam seruh, ngan kebit kenin ngan neu' mé' nolong kelunan éh jah, neu' kekat pengena' Sahéé' Ni'ai ngan mé' ngan neu' mé' pika réh mu'un.

⁷ Inah kepéh neu' ha' tebaraa' éh benara' mé' éh teneng, ngan neu' penyukat Allah, inah éh pekelenaa' améé' éh kelunan sohoo' Tuhan. Kekat éh teneng, inah éh lajam mé' ke' mé' omok ngelawan kekat kesa'at ngan mihau usah mé' kepéh.

⁸ Jelua' koléé' pu'un mé' kenajung kelunan, jelua' koléé' pu'un réh pekenyaa' mé'. Pu'un réh maneu' mé' pu'un réh mejing mé'. Pu'un réh maneu' mé' barei' réh seruh améé' kelunan éh pané kenyo awah, bang bé' mé' kenyo, kekat ha' mé' teneng éh.

⁹ Améé' barei' bé' kejam irah éh bé' ngelan, éh mu'un néh adang réh jam mé'. Améé' barei' kelunan éh danii' juk matai bang murip keto mé'. Pu'un réh ngukum mé' bang bé' réh mematai mé'.

¹⁰ Pu'un mé' besau, bang pu'un murung kenin mé' kepéh. Pu'un mé' kari mu'un, bang pu'un mé' pekaya' kenin kelunan pinaa'. Améé' bé' pu'un livah ineu'-ineu' bang améé' pu'un kekat pengena' Tuhan ngan kaya' mu'un mé'.

¹¹ O kekat bakéh mé' tong leboo' Korintus, améé' pané lenaa' mu'un ngan keh, améé' murung keh ngan kekat kenin mé'.

¹² Bé' améé' bet ka'ah, bang ka'ah éh bet améé'.

¹³ Hun iteu' akeu' pané ngan keh seleket ké' pané ngan anak usah ké' mu'un, jian keh pika améé' barei' améé' pika ka'ah, mai keh bet améé', jian keh alaa' améé'.

Mai pebakéh ngan kelunan éh bé' ngelan tong Tuhan

¹⁴ Mai ka'ah pebakéh ngan kelunan éh bé' ngelan uban keh bé' omok pekua' kenin ngan réh. Kekat éh teneng ngan kekat éh sala', bé' éh omok pemung. Rema ngan merem bé' éh omok pemung.

¹⁵ Kristus ngan Sitan bé' roh omok pekua' kenin. Kekat penyeruh kelunan éh ngelan tong Tuhan, tengéé' mu'un éh jin kelunan éh bé' ngelan. Bé' pu'un ineu'-ineu' éh pekua'.

¹⁶ Lamin Allah tengéé' mu'un éh jin lamin butun, bé' éh omok pekua'. Uban uleu' éh lamin Allah éh murip, barei' Allah bara', Akeu' juk mokoo' ngan murip dalem irah, Akeu' omok Allah réh, ngan irah omok anah Ké' mu'un.

¹⁷ Ha' Tuhan kepéh, Uban néh kenat piso keh jin belah kelunan éh bé' ngelan, petengéé' usah keh jin irah, Mai keh keloo' tong ineu'-ineu' éh sa'at, La'ah Akeu' juk alaa' ka'ah.

¹⁸ Akeu' omok Tamen keh, ngan ka'ah omok anak Ké', kenat péh anak Ké' lakei' ngan anak Ké' redo péh. Kenat ha' Allah éh pelapah ja'au penyukat jin ineu'-ineu' péh.