2 KORINTUS 4 - Rengah Jian

Uleu' barei' kuren tana' awah

¹ La'ah uban Tuhan pu'un masi améé' ngan mena' kereja' iteu' ngan mé', bé' mé' putui kenin maneu' éh.

² Pu'un mé' bet kekat-kekat barék sa'at éh pu'un pelim éh mihin kelunan menyaa', bé' mé' maneu' ineu'-ineu' ngelavo' kelunan, ngan bé' mé' ngepaléu ha' tebaraa' Tuhan. Améé' bara' tong kekat éh teneng ngan lenaa' mu'un, pu'un mé' maneu' kekat kereja' mé' tong jumen Allah, adang kekat kelunan pu'un jam kenat éh neu' mé'.

³ Bang hun rengah Tuhan éh benara' mé' nah pu'un pelim, pu'un éh pelim kenat tong kelunan éh tawang.

⁴ Bé' irah ngelan uban Sitan éh pengeja'au tana' iteu' memeseu' maten kenin réh, inah maneu' réh bé' omok na'at nawa éh perema tong irah, nawa éh jin Rengah Jian éh bara' tong pengaren Kristus éh pekua' mu'un ngan Allah lem ineu'-ineu' péh.

⁵ Bé' améé' lakau ke' mé' bara' tong penganeu' usah mé' tengéé', bang pu'un mé' bara' Yésus Kristus Iah éh Tuhan, améé' éh kelunan sohoo' Néh awah, dokoo' mé' nolong keh uban penika Yésus ngan améé'.

⁶ Uban Allah éh lepah bara', Jian rema ngada jin merem, Iah ke' éh ngada dalem kenin uleu' kepéh, dokoo' Néh mihin lu' tong rema neu' pengejam lu' tong pengaren Allah éh pepoléng Néh ngan lu' neu' Kristus.

⁷ Bang améé' éh pu'un Rengah Jian iteu', améé' barei' kuren tana' awah éh jalan kelunan modoo' livah éh jian. Uleu' iteu' barei' kuren tana' awah dokoo' pepoléng penyukat éh ja'au nah bé' éh jin améé' bang jin Allah.

⁸ Pinaa' koléé' améé' jam tusah, bang bé' mé' putui kenin, jelua' koléé' bé' mé' jam seruh, bang bé' mé' béé kenin.

⁹ Pinaa' kelunan maneu' améé' avéé' réh peketa usah mé', bang bé' Tuhan bet améé'. Jelua' koléé' pu'un mé' kuba', bang tioo betéé' mé' maneu' kepéh.

¹⁰ Améé' ngelayau juk teneng ukum penatai réh barei' éh teneng tong Yésus, dokoo' urip Kristus omok poléng lem mé.

¹¹ Dalem kekat pengurip mé', bé' mé' jam hun mah irah juk mematai mé' uban pengelan mé' tong Yésus, bang pu'un éh kenat dokoo' urip Yésus omok poléng lem usah mé' éh juk matai iteu'.

¹² Uban kereja' mé' ngan Tuhan mihin améé' matai, bang mihin keh murip.

¹³ La'ah ka' ha' lem surat Allah, uban akeu' ngelan inah akeu' pané, ha' Néh, kenat péh améé', uban améé' ngelan inah ke' mé' pané.

¹⁴ Uban améé' jam Allah éh pebetéé' Tuhan Yésus ngan purip Éh, adang Néh juk pebetéé' améé' kepéh pemung ngan Yésus, ngan mihin améé' pemung ngan ka'ah tong jumen Néh.

¹⁵ Kekat pengeketa améé' pu'un éh dokoo' mé' nolong ka'ah, ngan hun néh penika Tuhan pepit kejam kelunan pinaa', inah mihin kelunan pinaa' pepit kepéh sebayang bara' jian kenin ngan Allah ke' réh peparen Iah.

Murip neu' pengelan lu' awah

¹⁶ Uban néh kenat bé' uleu' putui pengelan. Na' péh usah uleu' juk lemoo', bang dalem kenin lu' inah éh paléu gahang kepéh siget-siget dau.

¹⁷ Uban penusah ngan pengeketa lu' iteu', barei' si'ik awah éh ngan metok awah, pu'un éh mihin uleu' alaa' pengaren éh ja'au ngan éh pelinguh, éh pelapah ja'au kepéh jin kekat penusah lu'.

¹⁸ Uban bé' uleu' seruh tong kekat éh poléng ta'an lu' awah, bang pu'un lu' seruh tong kekat éh bé' poléng ta'an lu', uban kekat éh poléng ta'an lu' iteu', metok awah éh, bang kekat éh bé' poléng nah, inah éh pu'un pelinguh.