2 KORINTUS 3 - Rengah Jian

Kelunan sohoo' Tuhan ke' Néh nebaraa' kelunan tong jajii' maréng

¹ Kineu' ha' mé' pané kenat seneruh keh, uban mé' juk ngajung usah mé'? Kineu', tekep mé' mena' surat ngan ka'ah éh bara' tong kereja' mé', ngan alaa' surat jin ka'ah, barei' kemalai jelua' kelunan?

² Ka'ah éh barei' surat améé', uban ka'ah barei' senurat lem kenin mé' dokoo' kekat kelunan omok jam éh ngan omok purung éh.

³ Kristus éh nyurat surat iteu' ngan nyohoo' améé' patet éh. Bé' éh senurat Néh lem surat ngan bé' éh tong bateu' péh, bang senurat Néh lem kenin kelunan neu' Sahéé' Allah éh murip.

⁴ Améé' pané kenat uban mé' ngelan tong Allah neu' Kristus.

⁵ Bé' mé' ngelan tong ineu'-ineu' penganeu' mé' ngan bé' mé' seruh neu' pengejam mé' tengéé' améé' omok maneu' éh, uban kekat pengejam mé' pu'un éh jin Allah,

⁶ Uban Iah éh maneu' améé' jam nebaraa' kelunan tong jajii' Néh éh maréng tong jalan Néh juk purip réh. Bé' éh neu' réh kivu kuraa'-kuraa' sohoo' éh lepah senurat Néh, bang neu' Sahéé'. Uban kekat sohoo' éh senurat Néh nah ngukum réh matai, bang Sahéé' Ni'ai éh purip kenin kelunan.

⁷ Kekat sohoo' Tuhan lem Surat Musa pu'un éh senurat Néh tong bateu', ngan pengaren Allah pu'un poléng tovoo' Néh bara' éh ngan Musa. Kekat pengaren Néh inah na' péh éh pu'un tovoo' inah awah, da'in Musa mening mu'un neu' pengaren Tuhan inah, pah avéé' kelunan Israel bé' omok kepuh Musa nah.

⁸ Kekat sohoo' Tuhan lem Surat Musa nah, na' péh éh mihin réh matai, pu'un éh ngan pengaren Allah, hun néh kenat kekat éh pu'un hun iteu' éh neu' Sahéé', adang néh pelapah ja'au pengaren Néh.

⁹ Hun néh kekat éh mihin réh matai nah pu'un ngan pengaren, adang éh tekep kekat éh juk purip réh nah, pu'un ngan pengaren éh pelapah ja'au kepéh.

¹⁰ Éh mu'un néh kenat pengaren éh jian mu'un lepah rai, pu'un éh béé hun iteu' naneu' pengaren éh pelapah jian éh pu'un hun iteu' kepéh.

¹¹ Uban hun néh tong sohoo' Néh éh pu'un metok awah, pu'un ngan pengaren Néh, makin péh tong éh pu'un pelinguh.

¹² La'ah uban uleu' ngelan éh kenat, inah éh maneu' uleu' makang kenin pané.

¹³ Bé' uleu' barei' Musa éh mekep da'in néh dokoo' kelunan Israel bé' omok na'at pengaren da'in néh tai kurang juk béé.

¹⁴ Bang maten lem kenin réh barei' peseu' awah, pah avéé' dau iteu' siget koléé' réh purung lem jajii' éh sahau, kenin réh barei' pekep. Uban kep inah pu'un éh peka hun kelunan pu'un pemung ngan Kristus.

¹⁵ Pah avéé' dau iteu' hun mah irah purung Surat Musa, kep inah mekep kenin réh.

¹⁶ Bang barei' ha' lem surat Allah pu'un bara' tong Musa, hun kelunan moléé' kepéh tavin Tuhan, boh kep inah omok pebet.

¹⁷ La'ah Tuhan, Iah néh Sahéé' ngan semah-semah Sahéé' Tuhan pu'un, kenin kelunan pu'un pelepu.

¹⁸ La'ah uleu' béé pepoléng pengaren Tuhan palaa' da'in lu' éh bé' pu'un mekep, uban pengaren inah tuai jin Tuhan, neu' Sahéé' Ni'ai éh ngepaléu uleu' omok pekua' Iah dalem pengaren Néh éh pelapah ja'au.