2 KORINTUS 12 - Rengah Jian

Tong kekat éh ta'an Paulus ngan éh pepoléng Tuhan ngan néh

¹ La'ah tekep akeu' ngajung usah ké', na' péh akeu' seruh bé' pu'un gunah ké' maneu' kenat, uban akeu' keloo' bara' tong éh ta'an ké' ngan tong éh pepoléng Tuhan ngan ké'.

² La'ah akeu' jam jah kelunan éh ngelan tong Kristus, jah poloo' pat ta'un lepah rai, Tuhan alaa' éh tai seruga. Akeu' éh kelunan inah. Bé' ku' jam hun usah ké' mu'un éh tai kenat ngan hun néh barei' lem nyupin ké' awah péh. Tuhan awah éh jam éh.

³ Bang akeu' tai barei' tong seruga mu'un, inah akeu' bara' kepéh, bé' ku' jam hun ké' tai kenat mu'un ngan hun néh barei' nyupin ké' awah péh. Allah awah éh jam éh.

⁴ Hun ké' sinah nenéng ké' kuraa'-kuraa' arong éh bé' omok benara' ké' palaa' ha' jin tana' iteu', bé' tekep ku' bara' éh.

⁵ Tong kekat éh ta'an ké' inah, hun ké' juk ngajung, jian ku' ngajung tong inah, bang bé' ku' keloo' ngajung usah ké', akeu' juk ngajung tong kekat pengelemoo' usah ké' awah.

⁶ Uban hun ké' keloo' ngajung, bé' akeu' palui, uban pu'un ku' bara' tong éh pu'un ta'an ké' mu'un, bang bé' akeu' juk ngajung usah ké' tengéé', dai pu'un séé'-séé' seruh akeu' pelapah jian jin éh ta'an réh ngan jin éh nenéng réh éh benara' ké'.

⁷ La'ah akeu' pu'un sakit dai akeu' ngeja'au usah ké' ngan bau kenin uban kekat éh poléng ta'an ké' inah. Kesakit ké' inah barei' jah penyohoo' Sitan ke' néh petusah ku' dai ku' ngeja'au usah ké'.

⁸ Teleu' koléé' ké' sebayang menyat Tuhan mega' kesakit ké' inah,

⁹ bang ka' ha' Néh ngan ké', Penika ké' pu'un éh sukup tong kekat pengelemoo' ko' inah, uban hun ko' lemoo' boh pengegahang ké' pu'un sukup mu'un ngan ko', ha' Néh. Uban néh kenat murung kenin ké' lem kekat pengelemoo' ké', dokoo' penyukat Kristus omok sukup tong akeu'.

¹⁰ La'ah uban pengelan ké' tong Kristus, omok ku' murung kenin dalem kekat pengelemoo' usah ké', kenat péh hun kelunan ngesa'at ku', kenat péh dalem kekat penusah ngan pengeketa ngan pengekurang ké', uban hun ké' lemoo', tovoo' inah péh ku' pu'un gahang kepéh.

Tong Paulus pika irah Korintus

¹¹ Pu'un ku' pané barei' kelunan éh palui awah, bang ka'ah éh maneu' akeu' pané kenat. Éh mu'un néh tekep ka'ah ngajung akeu', uban na' péh akeu' kelunan éh adek ke' awah, bé' akeu' kurang jin irah lawah éh jah éh kenajung keh nah.

¹² Uban kekat kereja' ké' belah keh rai, inah éh pekelenaa' adang akeu' jah lawah Tuhan, pu'un ku' maneu' kereja' ké' ngan kebit kenin, pinaa' telana' éh neu' ké' éh ngebéé kenin keh éh tejeu' ta'an keh rai.

¹³ Ineu' éh maneu' keh seruh akeu' tengéé' kenin ngan ka'ah jin sidang éh jah? Jah awah éh tengéé', bé' ku' nyohoo' keh tagong akeu'. Akeu' menyat jian uban sala' ké' inah.

¹⁴ Iteu' éh keteleu' koléé' ké' petenup juk angai ngan hun ké' angai bé' ku' keloo' nyohoo' keh maneu' ineu'-ineu' éh bé' pekua' lem pengeloo' keh. Uban bé' akeu' juk alaa' livah keh bang akeu' juk alaa' ka'ah. Uban bé' éh tekep irah anak tagong tinen tamen réh, bang tinen tamen éh tekep tagong anak néh.

¹⁵ Keloo' ku' mena' ineu'-ineu' éh anah ké', avéé' usah ké' péh, dokoo' ké' nolong ka'ah. Ja'au mu'un penika ké' tong ka'ah, kineu' ka'ah, kurang penika keh tong akeu' kei?

¹⁶ Oo' mu'un, bé' lakei' inah nyohoo' mé' tagong iah, ha' keh. Bang kineu' keh, pu'un keh seruh akeu' ngelavo' keh ngan petawang keh uban ké' pané kenyo?

¹⁷ Hun ké' pu'un maneu' éh kenat, kineu' éh neu' ké'? Kineu', neu' kelunan éh sohoo' ké' tai ngan keh rai éh kei?

¹⁸ Pu'un ku' nyohoo' Titus tai, ngan pu'un jah padéé' lu' kivu éh tai rai. Kineu', Titus éh ngelavo' keh kei? Kineu', bé' éh jah awah Sahéé' éh mihin amo kei? Kineu', bé' mo maneu' kereja' pekua'?

¹⁹ Barang ka'ah seruh améé' pané kenat uban mé' juk peteneng usah mé' tong ta'an ka'ah awah. Bé' éh kenat. Bang tong jumen Allah améé' pané barei' Kristus keloo' mé' pané. O kekat bakéh mé', penganeu' mé' pu'un éh dokoo' mé' nolong ka'ah.

²⁰ Tusah kenin ké' dai hun ké' angai da' barang bé' péh keh barei' éh keneloo' ké', kenat péh barang akeu' bé' pu'un barei' éh keneloo' ka'ah nah. Medai ku' dai hun ké' angai, pu'un irah pepaneu' pekeleko pekerek, seruh usah réh tengéé', ngesa'at ngaran kelunan ngan nebok, bau kenin ngan keloo' ngasau.

²¹ Medai ku', dai hun ké' kangai kepéh Allah pekenyaa' ku' tong jumen keh ngan akeu' pu'un besau kenin ngan mangaa' uban keh to ke' maneu' penyala', ngan bé' keloo' pekoléé' kenin jin petuyang ngan kekat kemagat éh sa'at lem kenin keh nah.